MUMBIMBILIYA mwazala namijimbu yavatu vaze ‘vevwilenga nganomu tweji kwivwanga nayetu.’ (Yako. 5:17) Chakutalilaho, tunahase kwivwishisa vyalingishile Paulu ahanjike mazu aze asonekele hali Wavaka-Loma 7:21-24 akwamba ngwawo: “Omu nangusaka kulinga vyuma vyakwoloka, vyuma vyavipi vikiko naviza muli ami. . . . Omu ngwavindama ami!” Mazu kana eji kutukolezezanga kachi nge tuli nakulipika natutenga twetu.

Paulu ahanjikile cheka omu evwile. Hali Wavaka-Ngalesha 2:20, ahanjikile ngwenyi Yesu ‘amuzangile nakulyecha ivene hali ikiye.’ Uno omu mukiko mweji ‘kwivwanga nayenu’ tahi? Pamo keshi shimbu yosenako.

Nge chivezu chetu chili nakutuyanjisa mwomwo yashili twalingile kunyima, kaha tunahase kushinganyeka ngwetu Yehova katuzangako, kaha nawa katukonekelako, echi nachitulingisa tuhone kumona wana wandando yakusokola ahanyine Yesu kuli mutu himutu kupwa waulemu. Uno Yesu asaka tumonenga ndando yakusokola kupwa wana ahanyine kuli mutu himutu tahi? Nge mukiko, kaha vyuma muka navitukafwa tuumone mujila kana? Tushimutwilenu hali evi vihula vivali.

Yesu asaka tumone ndando yakusokola kupwa wana uze ahanyine kuli mutu himutu. Uno twatachikiza ngachilihi ngocho? Mujimbu vasoneka hali Luka 23:39-43 nautukafwa. Achishinganyekenu mutu vanamusukika hachitondo kwakamwihi naYesu. Kaha himwalitavila milonga alingilenga kunyima. Chasoloka nge mulonga avulumwine watohwele chikuma, mwomwo vihwanga kaha vakiko vazangamishilenga mujila kana. Ou lunga alizakaminyine chikuma, kaha alembelelele Yesu ngwenyi: “Kangwanuke omu naukengila muWangana wove.”

Uno Yesu alingile ngachilihi? Achishinganyekenu kukola evwile Yesu hakwalumuna mutwe wenyi nakutala uze lunga. Numba tuhu apwile nakulyonyinga, oloze amwesele kukanwa nakulweza uze lunga ngwenyi: “Chamuchano vene nangukulweza lelo lino ngwami, naukapwa nayami muPalachise.” Yesu alwezele uze lunga ngwenyi: “Mwanamutu [ejile] . . . nakuhana mwono wenyi kupwa ndando yakusokola vavavulu.” (Mateu 20:28) Yesu asolwele hatoma omu ndando yakusokola yanganyalishile uze lunga, hakuhanjika ngwenyi “naukapwa nayami.” Kaha amulwezele nawa ngwenyi naukapwa mupalachise hano hamavu, kuzachisa hanjikiso kana chasolola nge ndando yakusokola yanganyalisa mutu himutu.

Chakuzeneka kukakasana, Yesu asakile ou lunga afwelele muwana wandando yakusokola. Nge Yesu evwililile keke lunga uze apwile chihwanga uze kazachililenga Kalungako, kahanyi echi chatela kutulingisa tufwelele ngwetu nge muka-Kulishitu wakumbapachisa mwapihilila nakwalumuka, kaha Yesu mwamukonekela. Chuma muka nachitukafwa tumone ndando yakusokola mujila kana chamokomoko najishili twalingile kunyima?

Mulimo wakwambulula azachile Paulu wamulingishile amone chikupu ngwenyi Yesu amufwilililile.  Mujila muka? Ambile ngwenyi: “Ngunamusakwilila Kulishitu Yesu Mwata wetu ou anguhanyine ngolo, mwomwo angumwene kupwa nguwakushishika hakunguhana mulimo, numba tuhu kunyima ngwapwilenga ngumuka-kusaula, ngumuka-kuyanjisa, ngumuka-kasautu.” (Chimo. 1, 1:12-14) Mulimo azachilenga Paulu wamulingishile amone ngwenyi Kulishitu amwivwililile keke, nazangi kaha nawa amufwelelelele chikuma. Namakumbi ano, Yesu ahana mulimo wakwambulula kuli mutu himutu. (Mateu 28:19, 20) Uno mulimo atuhana Yesu weji kutulingisanga tufwelele ngwetu nayetu atufwililile tahi?

Albert vamufumishile muchikungulwilo, hanyima yakutwama myaka 34 akindulukile kuli Yehova, kaha ambile ngwenyi: “Ngweji kwanukanga lika shili ngwalingile. Oloze nge nguli nakwambulula mujimbu ngweji kwivwanga ngana muze evwile Paulu hakushinganyeka ngwami Yesu anguhana mulimo. Cheji kungukolezezanga nakungulingisa ngupwenga wakuwahilila nakupwa nalutalililo.”—Samu 51:3.

Allan uze apwilenga chihwanga kaha nawa chilyanyi shimbu kanda alinangule muchano ambile ngwenyi: “Ngweji kwanukanga vyuma vyavipi ngwalingilenga kuvatu. Lwola lumwe ngweji kuhombanga chikuma nge ngunanuka vyuma kana. Shikaho ngweji kusakwililanga Yehova hakungwitavila ngwambulule mujimbu wamwaza kuvatu. Omu ngweji kumonanga vatu navetavila mujimbu wamwaza, cheji kungwanukisanga keke nazangi atwama nayo Yehova. Ngweji kumonanga ngwami Yehova ali nakunguzachisa mangana ngukafwe vatu veka vaze vali naukalu ngana uze ngwapwile nawo ami.”

Chikupu vene mulimo wakwambulula weji kutukafwanga tulinge vyuma vyamwaza nakushinganyeka nawa havyuma vyamwaza. Weji kutulingisanga tumone ngwetu Kulishitu atuzanga, atufwelela kaha nawa atwivwila keke.

Hakuwana nge tunakuyoyela mukaye kaSatana, michima yetu yinahase kutwalaho lika kutuhana milonga hashili twalingile kunyima. Vyuma muka navitukafwa tuhonese vishinganyeka kana?

Jean uze eji kushinganyekanga lika hashili alingilenga kunyima omu apwile kanyike ahanjikile ngwenyi eji kwivwanga kuwaha hakutachikiza nge, “Kalunga ahambakana michima yetu.” (Yowa. 1, 3:19, 20) Nayetu nawa nachituvendejeka nge natwijiva ngwetu Yehova naYesu vatachikiza ngwavo katwakupukako. Tachikizenu ngwenu, vamihanyine ndando yakusokola mangana yikafwe vaka-shili keshi vatu vakukupukako.—Chimo. 1, 1:15.

Nge natulombanga nakushinganyeka omu Yesu amwene vatu vakuhona kukupuka nakushinganyeka hamulimo wakwambulula atuhana, kaha natumona chikupu ngwetu ndando yakusokola yatunganyalisa tuvosena mutu himutu. Nge natulinga ngocho, kaha nayetu natwamba ngana muze ambile Paulu kutalisa kuli Yesu ngwenyi: “Anguzangile ami nakulyecha ivene hali ami.”