Omu ngwaputukile upayiniya, chiyoyelo chami chalumukile mujila yize kangwashinganyekeleko. (Efwe. 3:20) Munahase kulihulisa ngwenu, uno chapwile ngachilihi ngocho? Manenu ngumilweze omu chapwile.

Ngwasemukilile muBerlin nganda yayinene mulifuchi lyaGermany, kafwe omu mwahichile kaha tukweji vavandende kufuma haze yaputukile Jita yaKaye yamuchivali mumwaka wa 1939. Kuheta mu 1945 omu jita yakumine, maswalale vatwalileho kujinguluka nganda yaBerlin najindeke javo, kaha vaholwelenga tupata. Kapata aholokelele mungalila yetu, ngocho ami natanga yami twachinyinyinyine kuchihela vayilenga vatu nakuswama. Kufumaho, twachinyinyinyine kunganda yaErfurt kuze asemukilile mama.

Mama atondelenga kutachikiza muchano. Ngocho atangilenga chikuma mikanda yavatu vaze valinangula mangana autu, nakuyanga kumauka akwitava akulisezaseza, oloze kasuulukile navyuma kanako. Kuheta muji 1948, Vinjiho jaYehova vavali vejile hembo. Kaha mama avahulishile vihula. Omu mwahichile ola yimwe, mama alwezele ami nasongo yami wapwevo ngwenyi, “Ngunawane jino muchano ngwatondelenga.” Kufumaho tuvosena twaputukile kuyanga nakukunguluka kuchikungulwilo chamuze vene munganda yaErfurt.

Mu 1950 twakindulukile kuBerlin, kaha twaputukile kukungulukila muchikungulwilo chaBerlin-Kreuzberg. Kahomu twalukilile kuchihela cheka, twaputukile kukungulukila muchikungulwilo chaBerlin-Tempelhof. Kutwala muze mama vamumbapachishile, oloze ami ngwamwene ngwami kanda ngutengamo kungumbapachisa. Mwomwo ika?

Kangwazovolokele washiko mwomwo ngwapwilenga nasonyi chikuma. Numba tuhu ngwayilenga muwande, oloze hamyaka yivali kangwashimutwilile namutu numba umweko. Vyuma vyalumukile omu ngwaputukile kulikata navandumbwami vaze  vomikile nakuzachila Yehova namichima yavo yosena. Vamwe vavatwalile muchilombo chaNazi chakulamina vafunge, veka vavatwalile mutumenga vakumututuko waGermany. Kaha vakwavo vahakile myono yavo muponde hakutwalanga mikanda yetu mukusweka kumututuko waGermany. Chakutalilaho chavo changukwachile chikuma kumuchima. Ngwashinganyekele ngwami, nge vakiko vahakile myono yavo muponde mangana vazachile Yehova navandumbwavo, kahanyi nayami ngwatela kuzata nangolo mangana ngukeheseko sonyi.

Ngwaputukile kukehesako sonyi omu ngwazanyine mukwambulula chakulipwila mu1955. Mumukanda waInformant, * mwapwile mazu ahanjikile ndumbu Nathan Knorr, mazu kana avulukile ngwawo, natwazana mumulimo wakulipwila chikuma uze kanda tuzatengaho lyehi muliuka lyetu. Ambile ngwenyi, nge vaka-kwambulula vosena navazanamo, “kaha nachiwaha chikuma.” Omu mukiko chapwile. Kufumaho ngwalihanyine kuli Yehova, kaha mu 1956 vangumbapachishile hamwe kaha natata nasongo yami. Kwapwile cheka vyuma vyeka vize ngwatelelele kulitomena kulinga.

Ngwatachikijile ngwami kuzata upayiniya chapwa chamwaza, oloze kangwalisonekesele hahaze veneko. Ngwavangililile kulinangulako mulimo wakulanda vyuma nakuvilandulwila kumafuchi eka. Kufumaho ngwasakile kuzatako chindende mangana ngutachikize kanawa mulimo kana. Kaha mu 1961, ngwengilile milimo mumbaka yayinene yaHamburg yize yatwamina kwakamwihi nakalungalwiji, mulifuchi lyaGermany. Omu ngwaputukile kutachikiza kanawa mulimo kana changulingishile ngutwaleho kulangisa kulisonekesa upayiniya. Ngwambile ngwami nangulinga ngachilihi?

Ngwawahilila chikuma hakungukafwa kuli Yehova kuhichila muli vandumbwami vaze vangukolezezele nguhake vyuma vyakushipilitu kulutwe. Masepa jami vavavulu vaputukile kuzata upayiniya, ngocho vanguhanyine chakutalilaho chamwaza. Kaha nawa ndumbu Erich Mundt uze apwile muchilombo chakulamina vafunge angukolezezele ngutwaleho kufwelela Yehova. Ambile ngwenyi omu vapwile muchilombo chakulamina vafunge, vandumbwetu vaze kavapendaminyine hali Yehovako, vazeyele kushipilitu mukuhita chalwola. Oloze vaze vapendaminyine hali Yehova vatwalileho lika kupwa vakushishika, kaha vahanyine chakutalilaho chamwaza kuli vandumbwavo muchikungulwilo.

Kaha nawa ndumbwetu Martin Poetzinger uze ejile nakupwa jino muLizavu Lyakutwaminyina atukolezezelenga ngwenyi, “Kumika chapwa chachilemu kuli vaka-Kulishitu vosena.” Omu ngwahunananyine hamazu kana, ngwechele milimo ngwazachilenga, kaha kuheta muJune 1963 ngwaputukile kuzata upayiniya. Kusakula kuzata mulimo kana chapwile chachilemu chikuma mukuyoya chami. Omu mwahichile tukweji vavali shimbu kanda nguputuke kutonda milimo yeka, vangutongwele kupwa payiniya wakulipwila. Kahomu mwahichile myaka yayindende, Yehova angukiswile kuhambakana nomu ngwashinganyekele. Vangusanyikile kushikola yaNgileyate yakusokesa 44.

Chishina chachilemu chikuma ngwalinangwile shina chakwamba ngwavo, “Kanda kwecha mulimo wenuko” chize vahanjikile kuli ndumbu Nathan Knorr naLyman Swingle. Vatukolezezele tupwenga vakumika hakuzata mulimo wetu. Ndumbu Knorr ambile ngwenyi: “Vyuma muka namukahaka mangana? Uno namukahaka mangana kumajilo tahi, kuvasanya tahi, nyi hauhutu? Nyi namukahaka mangana kumitondo, kujitemo nyi kuvatu vakuwahilila? Mwatela kukazanga vatu vosena.” Likumbi limwe omu ndumbwetu Swingle apwile nakulumbununa ovyo vyeji kulingisanga vatu vamwe vechenga kuzata mulimo washimbu yosena, aputukile kulila. Aholele kulu palanga nomu aunjile. Chihande kana changukwachile kumuchima, kaha ngwafwililile kutwalaho lika kwivwisa Yesu navandumbwenyi kuwaha.—Mateu 25:40.

Omu twakumishile shikola, vaka-Mbetele vejilenga nakutuhulisa tuvalweze okwo vatutumine. Vahanjikilenga mazu akukolezeza omu vandumbwetu vavalwezele okwo vavatumine, ngocho nayami ngwavalwezele ngwami: “Vanangutumu kuCongo (Kinshasa).” Vavangililile kuhola, kaha hinavahanjika ngwavo: “KuCongo! Yehova apwenga nayove.” Halwola kana, muCongo (Kinshasa) mwapwilenga  jita, vatu valijihilenga chikuma. Oloze ngwashinganyekelenga lika vishina vize ngwalinangwile kushikola. MuSeptember 1967, ami naHeinrich Dehnbostel, Claude Lindsay, twayile kuKinshasa mbaka yamuCongo.

Omu twahetele muKinshasa, twalinangwile lilimi lyaFrench hatukweji vatatu. Kufumaho twayile kumbaka yaLubumbashi yize vavulukilenga ngwavo Elisabethville yatwamina kwakamwihi naZambia. Twatwaminenga muzuvo yavamishonali yize yapwililile mukachi kambaka.

Hakuwana nge mbaka kana kanda vambulwilengamo mujimbu wamwaza, ngocho twevwile kuwaha hakupwa yetu vatete kwambulwila mungalila kana. Nakushimbula chiku twapwile navilongesa vyaMbimbiliya vyavivulu. Twambulililenga navilolo jafulumende. Vatu vamwe vevwilenga kuwaha vyuma valinangwilenga nakuvumbika Mazu aKalunga. Vatu vavavulu vahanjikilenga lilimi lyaSwahili, ngocho yami naClaude Lindsay twaputukile kulinangula lilimi kana. Kutwala muze vatutumine kuchikungulwilo chazachishilenga Swahili.

Numba tuhu twalivwishilenga kuwaha vyuma vyavivulu, oloze twamwenenga nawa ukalu. Twalitalasanyinenga natupokola namaswalale vaze vejilenga nakutulukuka namata oku vanapende, navaze vatuvangijikililenga vihande vyamakuli. Likumbi limwe lizavu lyatupokola lyejile nakutulukuka omu twapwile nakukunguluka, kaha vakwachile etu malunga vosena nakututwala kuofesi yatupokola kuze vakatutwamishile hamavu, kaha kuheta nalwola lwa 22:00 vatulwezele tukinduluke kujizuvo jetu.

Mu 1969, vangutumine mumulimo wakutambwojoka. Hakuzata mulimo kana, ngwatambukilenga jitunda jajisuku kuhita mumusenge namujijila  jakujika najize japwilenga naulova. Chikungulwilo chimwe ngwatambukilile, muzuvo ngwasavalilenga mwapwile kasumbi navana venyi mwishi yakahela, muze pulundundu anehelenga vyema, ngocho anguhindwilenga, kangweshi kukavulyama vyema anehelenga uze kasumbi mukuyoya chamiko. Ngweji kwivwanga kuwaha kushinganyeka omu twatwaminenga hamwe navandumbwami nakwota kakahya naufuku nakushimutwila hamuchano wamuMbimbiliya.

Ukalu umwe twamwenenga shina wakupwa hamwe navatu vaze valyongelenga kupwa Vinjiho jaYehova vaze vakundwijilenga Kitawala movement. * Vamwe vapwile tulama muvikungulwilo. Vandumbwetu vakushishika vasolwele ava vatu vapwile nge ‘malolwa akuswama.’ (Yuta 12) Mukuhita chalwola, Yehova atomesele vikungulwilo hakufumisamo vatu kana, kaha vikungulwilo vyazovolokele.

Mu 1971 vangulwezele ngukazachile haofesi yamutango muKinshasa, kaha ngwazachilenga milimo yakulisezaseza yakufwana nge, kusoneka mikanda kuvikungulwilo, nakusonekesa mikanda, nakuzachila kulipatimende lyamulimo. Ngwazachilenga nawa mulimo wakulongesa vyuma vyakukafwa kumafuchi kuze kakwapwile mikwakwa yamwazako. Shimbu jimwe mikanda yize twasonekelenga yambachilenga tukweji numba jino yikahete kuvikungulwilo. Twayituminenga nandeke, kufumaho vayinungulwilenga mumato aze ambachilenga vyalumingo hakalwiji numba jino mikanda yikahete kuvikungulwilo. Chamokomoko naukalu kanou, twazachile kanawa mulimo wetu.

Ngwalikomokelelenga omu vandumbwetu valongeselenga kukunguluka changalila numba tuhu twapwilenga najimbongo jajindende. Vatotelenga tuumbu mangana vapwenga utenda, kaha vatungilenga lilapa kuzachisa mwila wakatengo nakukasa mikuta yamwila mangana vatwameho vatu. Hakutunga vazachishilenga jikosa, kaha helu vahakilengaho visalo mangana vinehe muvule, visalo vikwavo vavitungile jimesa. Vazachishilenga tumitondo vasongele kanawa muchishishisa chajimbambo. Ngwalikomokelele chikuma hakumona uhashi wavo. Ngwavazangilenga chikuma, shikaho ngwevwile ushona chikuma omu ngwavasezele nakuya nakuzachila kweka.

Mu 1974 vangutumine kuya nakuzachila kuofesi yamutango muNairobi, mulifuchi lyaKenya. Ngwapwile namilimo yayivulu chikuma, mwomwo mutango wamuKenya watwaminyinyinenga mulimo wakwambulula mumafuchi 10, kaha hamafuchi kana, hapwile nawaze akanyishile mulimo wetu. Ngwatambukililenga mafuchi kana kuswakumwe, chikumanyi muEthiopia. Vandumbwetu mumafuchi kana vavayanjishilenga chikuma, kaha vavavulu vavahakile mutumenga kaha vamwe vavajihile. Vomikile muukalu kana mwomwo vapwile nausoko wakukola naYehova navandumbwavo.

Mu 1980, chiyoyelo chami chalumukile omu ngwambachile Gail Matheson wakuCanada, uze twapwile nenyi kushikola yaNgileyate. Ikiye apwile nakuzata umishonali mulifuchi lyaBolivia, kaha twalituminyinyinenga mikanda kuswa kumwe. Omu mwahichile myaka 12 twaliwanyine cheka muNew York. Kufumaho twalimbachile, halwola kana ngwapwile nakuzachila muKenya. Ngwazanga chikuma puwami, mwomwo apwa wakuhya kushipilitu kaha nawa apwa muka-kusuuluka navyuma ali navyo. Apwa sepa lyami wamwenemwene uze eji kungukundwizanga chikuma.

Kaha mu 1986 ami napuwami vatutumine mumulimo wakutambwojoka, oku nawa ngwapwile muKomiti yaMutango. Ngwatambukililenga mafuchi amavulu aze vatwaminyinyinenga kumutango wamuKenya.

Ngweji kwanukanga omu ngwalongesele kukunguluka changalila mu 1992 muAsmara (muEritrea), shimbu kanda mulimo wetu vaukanyise mulifuchi kana. Omu twatondele zuvo yakukungulukila twawanyine kaha zuvo yize kayasolokele kanawako chikumanyi mukachi. Oloze halikumbi lyakukunguluka, ngwalikomokelele hakumona omu vandumbwetu vawahishile zuvo kana mangana tulemeselemo kanawa Yehova. Vandumbwetu vanehele  mahina nakufwika hajimbango hosena. Twalivwishile kuwaha chikuma kukunguluka kana, vatu vapwileko vahetele ku 1,279.

Kuzata mulimo wakutambwojoka kachapwile chachashiko, mwomwo twasavalilenga mujizuvo jakulisezaseza chalumingo hichalumingo. Shimbu jimwe twasavalilenga mujizuvo jauhando jize japwililile kukalungalwiji, kaha shimbu yikwavo twasavalilenga mujizuvo jaupukuvele jize japwile navimbushu haweluka, kutambuka jimita 100 numba uhete kuchimbushu. Chamokomoko nachihela twazachilililenga, chuma chachilemu tweji kwanukanga chikuma shina omu twalivwishilenga kuwaha kwambulula navapayiniya navaka-kwambulula vatwima. Oloze jino twasezele masepa vaze twazangile chikuma omu vatulwezele tuyenga nakuzachila kuchihela cheka.

Mumwaka wa 1987 nakuheta mu 1992 mumafuchi aze vakanyishile mulimo wetu vatwaminyinyinenga kumutango wamuKenya, vetavishile jino mulimo wetu. Ngocho mumafuchi amwe vatungilemo mitango chipwe jiofesi. Kuheta mumwaka wa 1993 vatutumine kuya nakuzachila haofesi munganda yayinene yaAddis Ababa muEthiopia. Hamyaka yayivulu mulimo wetu vauzachilenga mukusweka mulifuchi kana, oloze jino vawitavishile.

Yehova nakisula mulimo wetu mulifuchi kana. Vandumbwetu vavavulu vaputukile kuzata upayiniya. Vaka-kwambulula vavavulu vanalisonekesanga upayiniya washimbu yosena kufuma vene mumwaka wa 2012. Kaha nawa jishikola jamuliuka jinanangulanga vandumbwetu vapwenga nauhashi wakwambulula, echi chinalingisa vatu vavule chikuma, ngocho vanatungu jiZuvo jaWangana jakuzomboka 120. Mu 2004 tanga yaMbetele yanungulukilile hamutango wauhya, haze nawa vatunga Zuvo yaKukungulukila Chachinene, vyuma vyosena evi vinapu kukisula chaYehova.

Hamyaka yoseneyi ami napuwami tunalivwisanga kuwaha chikuma kulikata navandumbwetu muEthiopia. Twavazanga chikuma mwomwo vatwama nalikoji nazangi. Jino mwomwo yakuviza, vatutumine kumutango wakuCentral Europe. Vali nakutuzakama, oloze tweji kwanukanga chikuma masepa jetu mulifuchi lyaEthiopia.

Tunamono omu Yehova nalingisa mulimo wenyi ukole. (Koli. 1, 3:6, 9) Chakutalilaho, omu ngwambulilile vatu vaze vazachilenga kumingochi muRwanda, halwola kana kamwapwile vaka-kwambululako. Oholyapwa jino muli vaka-kwambulula vakuzomboka 30,000. Mumwaka wa 1967 muCongo (Kinshasa) mwapwile vaka-kwambulula kafwe 6,000. Makumbi ano muli jino vaka-kwambulula kafwe 230,000, kaha mu 2018 vatu vakuzomboka hamiliyoni vejile kukwanuka kufwa chaMwata. Mumafuchi osena vatwaminyinenga kumutango waKenya, vaka-kwambulula vanavulilako chikuma.

Yehova azachishile vandumbwami vakulisezaseza vangukafwe nguputuke kuzata mulimo washimbu yosena, kufuma halwola ngwaputukile kuzata mulimo kana munahichi myaka yakuzomboka 50. Numba tuhu namakumbi ano ngweji kwivwanga sonyi, oloze ngunalinangula kupendamina hali Yehova. Kuzachila mulifuchi lyaAfrica chinangukafwe ngupwenga namuchima wakutalilila chikoki nakusuuluka navyuma nguli navyo. Ami napuwami Gail tweji kwivwanga kuwaha hakumona vandumbwetu vaze veji kusololanga zumbu, nakumika muukalu nakufwelela Yehova. Ngweji kusakwililanga Yehova halikoji lyenyi lyalinene. Chikupu vene, Yehova nangukisula mwamunene kuhambakana omu ngwashinganyekele.—Samu 37:4.