1-2. (a) Kweseka nalushimbi lwaYesu lwahali Mateu 28:18-20, mulimo muka waulemu vatela kuzata vaka-Kulishitu? (b) Vihula muka natushimutwila muchihande chino?

MICHIMA yatumbaji yapwile nakulyangalyanga omu valikungulwilile hapili. Omu Yesu alingile hanasanguka lyehi, ashikile tumbaji twenyi valiwanyine kupili kana. (Mateu 28:16) Lwola kana pamo lukiko luze “asolokele kuli vandumbwetu vakuhambakana 500 halwola lwolumwe.” (Koli. 1, 15:6) Mwomwo ika Yesu asanyikilile tumbaji twenyi valiwanyine kuze kupili? Avasanyikile mangana avahane mulimo waulemu. Avalwezele ngwenyi: “Yenunga mukanangule vatu vakumafuchi osena vakapwe tumbaji.”—Tangenu Mateu 28:18-20.

² Tumbaji vaze vevwile mazu ahanjikile Yesu, vakiko vapwile vaka-Kulishitu muchikungulwilo chamulikulukaji lyamyaka lyakulivanga. Mulimo waulemu chikuma vapwile nawo, shina wakwambulila vatu vapwenga tumbaji twaKulishitu. * Makumbi ano, kuli vikungulwilo vyavivulu vyavaka-Kulishitu vamuchano, kaha mulimo waulemu vatwama nawo shina wakwambulila vatu vapwenga tumbaji. Muchihande chino, natushimutwila vihula viwana. (1) Mwomwo ika mulimo wakunangula vatu vapwenga tumbaji wapwila waulemu chikuma? (2) Vyuma muka vyasakiwa hakuzata mulimo kana? (3) Uno vaka-Kulishitu vosena vatela kwazana mumulimo kana tahi? (4) Mwomwo ika kuzata mulimo kana chasakiwa kupwa namuchima wakutalilila chikoki?

3. Kweseka naYowano 14:6; 17:3, mwomwo ika mulimo wakunangula vatu vapwenga tumbaji wapwila waulemu chikuma?

³ Mwomwo ika mulimo kana wapwila waulemu? Mwomwo tumbaji twaKulishitu kaha vakiko veji kupwanga masepa jaKalunga. Kaha nawa vatu vaze veji kukavangizanga Kulishitu veji kusuulukanga mukuyoya chavo, nakupwa nalutalililo lwakukayoya haya myaka yosena. (Tangenu Yowano 14:6; 17:3.) Yesu atuhana mulimo waulemu chikuma wakunangula vatu vapwenga tumbaji, kaha nawa katweshi kuuzata uka wetuko. Kaposetolo Paulu asonekele kutalisa kuli ivene nakuli vandumbwenyi ngwenyi: “Etu tuvaka-kuzachila hamwe naKalunga.” (Koli. 1, 3:9) Chikupu vene, Yehova naKulishitu vahana mulimo waunene chikuma kuvatu vakuhona kukupuka.

4. Chuma muka natulinangula kuli ndumbu Ivan naMatilde?

⁴ Mulimo wakunangula vatu vapwenga tumbaji weji kunehanga kuwahilila. Chakutalilaho, achishinganyekenu hali ndumbwetu Ivan napuwenyi Matilde mulifuchi lyaColombia. Vambulilile mukweze walunga Davier, kaha avalwezele ngwenyi: “Ngunakufwila kwalumunako chiyoyelo chami, oloze ngunakuhona.” Davier apwile muka-kuhema chakuzunga najikonyi, anwinenga maundu akupendesa nawala kaha nawa atwaminenga nakajila kenyi Erika. Ndumbu Ivan ambile ngwenyi: “Davier atwaminenga kuchihela chize chatwama kwaukawacho, ngocho twavuwilenga jikinga hajola jajivulu mumukwakwa waulova hakuya nakumwambulila. Omu Erika amwene kajila kenyi Davier nalumunako vilinga vyenyi, naikiye aputukile kulinangula Mbimbiliya.” Kutwala muze Davier alitwaminyinyine kuhema chakuzunga najikonyi, nakunwa maundu akupendesa nakunwa wala. Kaha nawa ambachile Erika kupwa puwenyi kweseka navisoneka. Matilde ambile ngwenyi: “Omu Davier naErika vavambapachishile mu 2016, twanukile mazu ahanjikile Davier ngwenyi, ‘Ngunakufwila kwalumunako chiyoyelo chami, oloze ngunakuhona.’ Ngocho twawahililile chikuma hakumona nalumuka.” Chikupu vene, tweji kwivwanga kuwaha chikuma kachi nge tunakafwe vatu vapwenga tumbaji twaKulishitu.

5. Hakusaka tunangule vatu vapwenga tumbaji, twatela kulinga vyuma muka?

⁵ Hakusaka tunangule vatu vapwenga tumbaji, twatela ‘kutondatonda’ vatu vakwechi michima yamwaza. (Mateu 10:11) Tweji kusololanga ngwetu twapwa tuVinjiho jaYehova hakwambulila vatu vosena tweji kuwananga. Chikupu vene, twapwa tuvaka-Kulishitu vamuchano hakwambulila vatu.

6. Vyuma muka vinahase kutukafwa twambulile kanawa vatu?

⁶ Vatu vamwe vasaka kulinangula muchano, oloze vavavulu kaveshi kwitavila kulinangula halwola lwateteko. Twatela kuvakolezeza numba vetavile kulinangula muchano. Hakusaka tufukile mumulimo wetu wamuwande, twatela kuliwahisa kanawa. Sakulenu vihande vize navivwisa vatu kuwaha. Shinganyekenu omu munahase kujimbwilamo chihande hichihande munawahisa.

7. Munahase kuputuka ngachilihi kushimutwila navatu, kaha mwomwo ika chapwila chachilemu kuvevwilila kanawa nakuvavumbika?

⁷ Chakutalilaho, munahase kuhulisa mutu ngwenu: “Ngunakusaka ngumihuliseko mwane, ‘Vatu muno mukaye vali nakumona ukalu wauvulu. Kutala mwashinganyeka ngwenu nakukapwa fulumende yavatu yize nayikakumisa ukalu wavo tahi?’” Kaha shimutwilenu hali Ndanyele 2:44. Chipwe kuhulisa vatu mwalihata navo ngwenu: “Vyuma muka  navikafwa visemi valele vana vapwenga navilinga vyamwaza? Ngunakusaka kwivwa vishinganyeka vyenu hachihande kana.” Kaha shimutwilenu chisoneka chaLushimbi lwamuchivali 6:6, 7. Kala chihande namusakula kushimutwila navatu, shinganyekenu omu vatu vanahase kwakulako. Tachikizenu ngwenu, vatu navanganyala hakutachikiza vyuma yahanjika Mbimbiliya hachihande kana. Omu namushimutwila navatu, mwatela kuvavumbika nakwivwilila kanawa vyuma vali nakuhanjika. Kulinga ngocho, nachimikafwa mutachikize vishinganyeka vyavo, kaha navakiko vanahase kumivwilila.

8. Mwomwo ika twatela kukindulukilanga kuvatu?

⁸ Shimbu kanda mutu etavile kulinangula Mbimbiliya, mwatela pamo kukindulukila kuli mutu kana mapapa kakavulu. Mwomwo ika? Mwomwo shimbu jimwe vatu vaze twashimutwilile navo katwavawana hamembo avoko. Kaha nawa mwatela kukindulukilako kuswakumwe numba jino mwenyazuvo akasunuke nakwitavila chilongesa chaMbimbiliya. Anukenu ngwenu, mutondo weji kukolanga kanawa kachi nge navautukumwina kuswakumwe. Chochimwe nawa, nge natutwalaho kushimutwilanga mazu aKalunga namutu anakulinangula, kaha zangi yenyi yakuzanga Yehova naKulishitu nayitohwa.

9-10. Mwomwo ika natwambila ngwetu vaka-kwambulula vosena vatwama namulimo wakutondatonda vatu vamichima yamwaza?

⁹ Muka-kwambulula wosena atwama namulimo wakutondatonda vatu vamichima yamwaza. Mulimo kana tunahase kuufwanyisa kumulimo wakutondatonda mwana uze najimbala. Mujila muka? Talenu hachakutalilaho chamwana walunga wamyaka yitatu uze ajimbalile. Vatu kafwe ku 500 vayile nakumutonda. Jino omu mwahichile kafwe jola 20 kufuma haze ajimbalile uze mwana, mutu umwe awanyine uze mwana muwande wavivwale.  Vatu vasakile kwalisa uze amuwanyine, oloze ikiye akanyine. Ambile ngwenyi: “Tuvosena tunazate mulimo waunene wakutonda ou mwana.”

¹⁰ Vatu vavavulu mukaye vanafwane nge uze mwana ajimbalile. Kavatwama nalutalililoko, oloze vasakiwa kuvakafwa. (Efwe. 2:12) Etu Vinjiho vakuzomboka hajimiliyoni 8 twatwama namulimo wakutondatonda vaze vatela. Pamo kamweshi kuwana mutu mwetavila kulinangula Mbimbiliya nayenuko. Oloze vandumbwenu vanahase kuwana mutu uze anakufwila kulinangula muchano waKalunga. Kachi nge ndumbwetu nawane mutu uze mwazovoloka nakupwa kambaji kaKulishitu, kaha vosena vaze vazanyine mumulimo wakutonda mutu kana veji kuwahililanga chikuma.

11. Nge kamweshi nachilongesa chaMbimbiliyako, kaha munahase kukafwa ngachilihi vatu vapwenga tumbaji?

¹¹ Numba tuhu kamweshi nachilongesa chaMbimbiliya oholyapwako, oloze munahase kukafwa vatu vapwenga tumbaji mujijila jeka. Chakutalilaho, munahase kutambwokesa vatu vavahya nge vaneza haZuvo yaWangana. Kulinga ngocho nachivakafwa vamone ngwavo vaka-Kulishitu vamuchano valizanga mwavomwavo. (Yowa. 13:34, 35) Kaha nawa kukumbulula mukavatu hakukunguluka nachikafwa vavahya vazamise lufwelelo lwavo. Munahase nawa kuzata hamwe navaka-kwambulula vavahya muwande nakuvakafwa vejive mwakuzachishila Visoneka hakushimutwila navatu. Kulinga ngocho, nachivakafwa valondezeze Kulishitu.—Luka 10:25-28.

12. Uno twatela kupwa nauhashi wakulipwila numba tukafwe vatu vapwenga tumbaji tahi? Lumbununenu.

¹² Katwatela kushinganyeka ngwetu kuvanga tupwenga nauhashi wakulipwila numba tukafwe vatu vapwenga tumbaji twaKulishituko. Mwomwo ika? Tutalenu chakutalilaho chaFaustina, wamulifuchi lyaBolivia. Omu aputukile kulikata naVinjiho jaYehova, katachikijile kutangako. Kutwala muze alilongesele kutanga. Oholyapwa vamumbapachisa lyehi, kaha asaka kunangulako vakwavo muchano. Chalumingo hichalumingo eji kutwaminyinanga vilongesa vyaMbimbiliya vitanu. Numba tuhu Faustina katachikiza kutanga kanawako, oloze nakafwe vilongesa vyenyi 6 vavambapachise.—Luka 10:21.

13. Numba nge twatwama namilimo yayivulu chikuma, vyuma muka vyamwaza tunahase kulivwisa kuwaha hakukafwa vatu vapwenga tumbaji?

¹³ Vaka-Kulishitu vavavulu vatwama namilimo yayivulu chikuma. Oloze veji kuwananga lwola lwakutwaminyina vilongesa vyaMbimbiliya, echi cheji kuvalingisanga vapwenga vakuwahilila. Tutalenu hachakutalilaho chaMelanie chisemi wapwevo wamulifuchi lyaAlaska. Apwile nakulela mwanenyi wapwevo wamyaka yakusemuka 8. Kaha nawa apwile hamilimo, oku nawa azakaminenga naye uze apwile namusongo wakasa. Melanie ikiye kaha apwile Chinjiho chaYehova mumbaka  atwaminenga. Alombelenga kuli Yehova amuhane ngolo mangana atwaleho kwambulula numba tuhu kuchihela kana kwapwa kututa chikuma, mwomwo asakile chikuma kupwa nachilongesa chaMbimbiliya. Mukuhita chalwola aliwanyine naSara, uze awahililile chikuma hakutachikiza lijina lyaKalunga. Omu mwahichile makumbi, Sara etavilile kumunangulanga Mbimbiliya. Melanie ambile ngwenyi “Chitanu hiChitanu kuchingoloshi ngwazeyelenga chikuma, oloze ngwayilenga namwanami nakunangula Sara, kaha twanganyalile tuvosena. Twahehwojwelenga tuwane mwakukumbulwila vihula ahulishilenga Sara, kaha twevwile kuwaha chikuma hakumona mwapwa sepa lyaYehova.” Sara ahombele chikuma omu vamufumbukilile kuli vausoko wenyi navatu vakuchachi halwola apwile nakulinangula muchano, oloze atwalileho lika kulinangula, kaha vamumbapachishile.

14. (a) Mwomwo ika mulimo wakunangula vatu vaufwanyisa kukuta vaishi? (b) Vyuma muka namulinangula kuli Paulu hamazu asonekele hali WaChimoteu 2, 4:1, 2?

¹⁴ Nge kamwawanyine mutu mwetavila kulinangula Mbimbiliyako, kaha kamwatela kuzeyako. Anukenu ngwenu, Yesu afwanyishile mulimo wakunangula vatu vapwenga tumbaji kukuta vaishi. Vaka-kuta vaishi veji kuzatanga nangolo numba vakwate vaishi. Kakavulu veji kukwatanga vaishi naufuku, chipwe kulungulungu lyakucha, kaha shimbu jimwe veji kuvuwanga mato nakuya kuvihela vyakwakusuku. (Luka 5:5) Chochimwe nawa, ‘vaka-kuta vaishi vachifwanyisa’ nawa veji kuzatanga halwola lwakulisezaseza nakuya kuvihela vyakulihandununa. Mwomwo ika? Mwomwo veji kufwilanga kutondatonda vatu vaze  navetavila muchano. Vandumbwetu vaze veji kuzatanga nangolo veji kuwahililanga chikuma hakuwana vatu vaze veji kwitavilanga muchano. Kutala munahase kwambulula namusana mwomwo pamo vatu vali hamembwavo, chipwe kuya kuvihela kuze munahase kuwana vatu tahi?—Tangenu WaChimoteu 2, 4:1, 2.

15. Mwomwo ika muchima wakutalilila chikoki wasakiwila kachi nge tuli nakutwaminyina vilongesa vyaMbimbiliya?

¹⁵ Mwomwo ika twatela kupwila namuchima wakutalilila chikoki omu natutwaminyinanga vilongesa vyaMbimbiliya? Mwomwo mutu uze anakulinangula asakiwa kumukafwa atachikize muchano wamuMbimbiliya nakuuzanga. Atela nawa kutachikiza Yehova uze mwenyaMbimbiliya nakumuzanga. Twatela kumunangula atachikize vyuma vyasakiwa kuli kambaji kaKulishitu, nakumukafwa nawa atachikize vilinga atela kupwa navyo muka-Kulishitu wamuchano. Twatela kumutalilila chikoki omu anakufwila kukavangiza jindongi jamuMbimbiliya mukuyoya chenyi. Vatu vamwe veji kwalumunanga chiyoyelo chavo mulwola lwalundende oloze veka veji kumbatanga lwola lwalusuku.

16. Chuma muka natulinangula kuli Raúl kweseka navyuma ahichilemo?

¹⁶ Kamishonali umwe mulifuchi lyaPeru, amwene kutokwa chatwama hakupwa namuchima wakutalilila vatu chikoki. Ou kamishonali ambile ngwenyi: “Ngwalinangwile nachilongesa chami Raúl mumikanda yivali. Oloze achipwile lika naukalu mukuyoya chenyi. Apwile naukalu muulo wenyi, nakuzachisa mazu akasautu, kaha nawa vana venyi kavamuvumbikilengako. Numba tuhu apwile naukalu kana, oloze ejilenga kukukunguluka shimbu yosena, ngocho ngwatwalileho lika kumutambukila nakumukafwa natanga yenyi. Omu mwahichile myaka yitatu kufuma halwola luze twaputukile kulinangula, atelemo kumumbapachisa.”

17. Vyuma muka natushimutwila muchihande nachikavangizaho?

¹⁷ Yesu atulweza ngwenyi “yenunga mukanangule vatu vakumafuchi osena vakapwe tumbaji.” Hakusaka tutesemo mulimo kana, twatela kwambulila vatu vakulihandununa handununa, kuhakilako navaze kavapandama kukala liuka lyakwitavako, chipwe vaze vashinganyeka ngwavo kakwatwama Kalungako. Muchihande nachikavangizaho natushimutwila omu tunahase kwambulila vatu vakulisezaseza vaze kavapwa vaka-kwitavako.