Ngwasemukile mu 1954 mungalila ya St. Paul munganda lyaMinnesota, mu U.S.A. Visemi jami kavapwile naluheto chikumako kaha nawa kavapwile vaka-kuhutwako. Tuvosena twapwile tuvaka-Katolika. Twasemukile tuvatanu, kaha ami yami wamuchivali. Omu ngwapwile ngukanyike ngwatangilililenga hashikola yavaka-Katolika, kaha nawa vangutongwele ngukafwenga kapilishitu havilika vyamuchachi. Chipwe ngocho kangwatachikijile vyuma vyavivulu yanangula Mbimbiliyako. Numba tuhu ngwafwelelele ngwami kwatwama Kalunga uze atengele vyuma vyosena, oloze ngwamwene ngwami chachi yaKatolika kayeshi kuhasa kungukafwa ngumulemeseko.

Omu ngwapwile mumwaka wakulivanga hashikola yakulinangwila jishimbi yaWilliam Mitchell, Vinjiho jaYehova vejile kuzuvo yami. Oloze vanguwanyine nguli nakukosa uvwalo wami, ngocho ngwavalwezele vakezeko cheka likumbi lyeka, kaha vetavilile. Kahomu vejile, ngwavahulishile vihula vivali. Chatete ngwavahulishile ngwami: “Mwomwo ika vatu vavilinga vyavipi veji kufukilanga mukuyoya kuhambakana vatu vamwenemwene?” Kaha chamuchivali ngwami: “Chuma muka chinahase kulingisa vatu vapwenga vakuwahilila?” Vanguhanyine mukanda waMucano Uli Nakutetekela  Kumwono Wamyaka Yosena naMbimbiliya yaVisoneka vyaKaye Kakahya yaulombo wamafwo amatamba, kaha ngwatambwile. Ngwetavilile nawa vangunangulenga Mbimbiliya. Kulinangula Mbimbiliya changukafwile ngutachikize vyuma vyavivulu. Ngwawahililile chikuma hakutachikiza ngwami Wangana waKalunga ukiko kaha naukayula kanawa vatu. Aha hakiko ngwamwene ngwami viyulo vyavatu vinahono, kaha vinalingisa vatu vapwenga muukalu nakuyanda.

Kumaputukilo amwaka wa 1982, ngwalihanyine kuli Yehova, kaha vangumbapachishile mumwaka vene uze hakukunguluka changalila chakwamba ngwavo “Kingdom Truth,” chize chapwililile kuzuvo yayinene yamungalila ya St. Paul. Chalumingo chakavangijileho, ngwayile cheka kuzuvo kana nakusoneka vyeseko vyamakumishilo mangana ngupwenga ngulihako. Kuheta kumaputukilo akakweji waOctober, ngwatachikijile ngwami ngwapashile vyeseko, ngocho ngwatelemo jino kupwa ngulihako.

Hakukunguluka kanechi chakwamba ngwavo “Kingdom Truth” ngwaliwanyine nandumbwetu Mike Richardson, uze azachililenga haMbetele yakuBrooklyn. Ou ndumbwetu atulwezele ngwenyi haMbetele vasokolweleho lipatimende lyatala hajishimbi. Ngocho ngwanukile mazu ahanjikile chilolo wakaEchopa aze vasoneka hali Vilinga 8:36, kaha ngwalihulishile ngwami, ‘Chuma muka nachinguhonesa kuya nakuzachila haMbetele kulipatimende lyatala hajishimbi?’ Ngocho ngwasonekele mukanda wakwihula kuzachila haMbetele.

Visemi jami kavawahililileko hakungumona ngunapu nguChinjiho chaYehova. Tata anguhulishile numba nge kuzachila haMbetele chinahase kungunganyalisa kweseka nashikola ngwayile yakulinangula jishimbi. Ngwamulwezele ngwami nangukazata mulimo wakulisakila, kaha navakanguhananga tujimbongo twatundende hakakweji ngana mwavakwetu vaka-Mbetele vosena.

Hakuwana nge ngwetavilile kuzata kuzango yakusopela, ngocho kangwahashile kuya kuMbetele hahaze veneko. Jino kuheta mumwaka wa 1984, hakiko ngwayile kuMbetele yakuBrooklyn, muNew York. Omu ngwahetele, vangulwezele kuzachila kuLipatimende Lyatala haJishimbi. Kuzachila kuzango yakusopela milonga changukafwile ngupwenga nguwakulizanga kuzata mulimo uze wapwile nakwiza kulutwe.

MuNovember 1983, Liuka lyalanjile zuvo yakuhemena yaStanley yamunganda yaJersey, muNew Jersey. Ngocho vandumbwetu vasonekele mapapilo akuvetavisa kuwahisa jisambo jakakahya kakezi namiyengo yameya muzuvo kana. Omu vandumbwetu valiwanyine navilolo jafulumende, vavalwezele ngwavo vapwile nakusaka zuvo yakuhemena yaStanley yipwenga yakuzachisa hakukungulukila changalila chaVinjiho jaYehova. Jishimbi  jamunganda kana jambile ngwajo vihela vyakulemesela Kalunga vyatela kupwa kaha mundandanda muze vali nakutwama vatu. Shikaho hakuwana nge zuvo yakuhemena yaStanley yapwile mumbaka, ngocho vilolo jafulumende vakanyine. Vandumbwetu vasakile kutambula mukanda wakuvetavisa vatwale chihande kuli vilolo veka, oloze kavavetavilile kuvahana mukandako.

Muchalumingo vene chize ngwayile haMbetele, liuka lyatwalile chihande kuzango mangana vatwitavise kuzachisa yize zuvo yakuhemena. Hakuwana nge ngwazachile mulimo waulaliki hamyaka yivali mu St. Paul, muMinnesota, ngwatachikijile mwakulingila havihande vyakufwana ngana. Lihako lyetu umwe ambile ngwenyi zuvo yakuhemena yaStanley vayizachishilenga kuvilika vyakulisezaseza, vyakufwana nge kutalilamo jifwilimu navaka-kwimba. Kaha mwomwo ika navakanyishila kukungulukilamo? Vaka-zango vatalile hachihande, kaha vayulile ngwavo vilolo vamunganda yaJersey vahokwele lisesa lyetu lyakusaka kulemesa Kalunga. Vavalwezele vatwitavise, ngocho ngwamwene ngwami Yehova ali nakukisula liuka lyenyi litandakanyise mulimo wenyi hakukavangiza jishimbi jafulumende. Kaha nawa ngwawahililile chikuma hakunguzachisa mumulimo kana.

Vandumbwetu vakatwile mulimo waunene chikuma wakuwahisa yize zuvo yakuhemena. Kaha nachilika chavaze vakumishile shikola yaNgileyate yakusokesa 79, chapwililile vene muZuvo yaKukunguluka Chachinene chamunganda yaJersey ha 8 September, 1985 omu mwahichile kaha tukweji kufuma haze vaputukile kuyiwahisa. Ngwachimwene kupwa hikutokwa chachinene kunguzachisa mumulimo kana, kaha nawa kuwaha ngwevwile chahambakanyine chize ngwevwilenga omu ngwazachilenga mwalihako shimbu kanda nguyenga kuMbetele. Kaha kufuma vene haze Yehova nanguzachisanga muvihande vyavivulu.

Kuheta muji 1980, vaka-vipatela navandotolo kavakavangijilenga vyuma vasakwilenga vandumbwetu vyakuvoka chakuhona kuvahaka manyingako. Kaha tufumbakaji vapwilenga muukalu waunene chikuma mwomwo vachambamilonga vashinganyekelenga ngwavo mapwevo vatufumbakaji kavapwile nalisesa lyakukana kuvahaka manyingako. Vashinganyekelenga ngwavo nge pwevo walijimo mwakana kumuhaka manyinga, kaha nahase kufwa, ngocho uze kemba mwasala chakuzeneka naye.

Ha 29 December, 1988, ndumbwetu Denise Nicoleau asapulukile mwanenyi walunga, oloze unyinga watwalileho lika kuhita. Ngocho asalile namanyinga amandende chikuma, kaha ndotolo amulwezele etavile kumuhaka manyinga. Ou ndumbwetu akanyine. Kuheta nachimene, vaka-chipatela vayile kuzango mangana vavetavisa kuhaka ou ndumbwetu manyinga. Chakuzeneka kuhulisa ou ndumbwetu chipwe lunga lyenyi, chambamilonga etavishile ava vaka-chipatela vamuhake manyinga.

Ngocho lyaChitanu ha 30 December, vaka-chipatela vahakile ndumbwetu Nicoleau manyinga,  numba tuhu vausoko wenyi nalunga lyenyi vakanyine. Halikumbi vene lize nachingoloshi, vausoko wenyi vavavulu hamwe kaha nakalama umwe chipwe vavali vavakwachile kutupokola hakuvavangijikila ngwavo vajingilikile kukahela kandumbu Nicoleau kuchina navamuhaka manyinga. Kaha kuheta lyaSateli nachimene ha 31 December, vaka-kwazana mijimbu vamunganda yaNew York namujinganda jeka vambulwile mujimbu kana.

Kuheta lyaMande nachimene, ngwahanjikile naMilton Mollen uze apwile chambamilonga kuzango yayinene. Ngwamulumbunwinyine ngwami mukwavo chambamilonga etavishile vaka-chipatela kuhaka ndumbwetu manyinga chakuzeneka kumuhulisa ivene. Mollen angulwezele nguyenga kuOfesi yenyi nachingoloshi mangana tukashimutwile kanawa hajishimbi. Kuheta nachingoloshi, ngwayile hamwe naPhilip Brumley, mukulwane wetu walipatimende. Mollen asanyikile nawa lihako lyavaka-chipatela. Hakushimutwila kakwapwile kulivwasanako. Kutwala muze, ndumbu Brumley angusonekelele hamukanda wenyi ngwenyi: “Unda muchima.” Alingile kanawa kunguhuhumuna mwomwo ngwapihililile chikuma hakulipula jipami nauze lihako.

Omu mwahichile kafwe ola yimwe, Mollen ambile ngwenyi chihande natukachisopa hamene chimene. Hakulovoka muOfesi yenyi alwezele uze lihako lyavaka-chipatela ngwenyi, “hamene kuvanga ukalikwachise.” Echi chasolwele nge nachikamukaluhwila kulovola unjiho wakusolola nge chapwile chakutamo uze chambamilonga wavo kuvetavisa vahake ndumbu Nicoleau manyinga. Ngwamwene ngwami Yehova apwile nakutufwelelesa ngwenyi natusamba. Ngwalikomokelele hakumona Yehova ali nakutuzachisa mangana atesemo mwaya muchima wenyi.

Twazachile swi namukachi kaufuku, mangana tupwenga vakulizanga kukalihakwila kuzango. Zango yapwile hakamwihi naMbetele yamuBrooklyn, ngocho vandumbwetu vavavulu vamuLipatimende Lyatala haJishimbi vatambukile nakuya kuzango. Omu twajimbwile chihande chetu kumeso avyambamilonga vawana, vaze vyambamilonga vavatwile chihande. Zango yayinene yahakwililile ndumbu Nicoleau nakwamba ngwavo chapwile chakuhenga kuhaka mutu manyinga chakuzeneka kumuhulisa.

Nakushimbula chiku, zango yayinene yamunganda yaNew York yahanyine ndumbu Nicoleau lisesa lyakukana kumuka kuzachisa manyinga. Echi chikiko chapwile chihande chatete havihande viwana vyakutalisa kumanyinga vize ngwazanyinemo. (Talenu lipwata lyakwamba ngwavo “ Milonga  Twasambilenga kuZango.”) Kaha nawa ami navakwetu mahako vahaMbetele tunazananga mukusopa vihande vyavivulu vyakupandama kukulama vana nge vatu vanalilukulula, nakufwa chamalo, nakuyanjisa vanyike, najishimbi jahanjika hamisuka yamavu najizuvo.

Puwami Dawn ngwamuwanyine ali navana vatatu. Azachilenga tumilimo awaneko mwakuyoyela, oku nawa ali nakuzata upayiniya. Numba tuhu chiyoyelo chamukaluhwilile, oloze angwivwishile kuwaha hamuchima wenyi wakusaka kuzachila Yehova. Mu 1992 twapwile hamwe kukukunguluka chaNgalila munganda yaNew York chize chapwile namutwe wakwamba ngwavo “Light Bearers.” Ngwamulwezele ngwami nguli nakusaka tukalimbate, ngocho twalimbachile mwaka wakavangijileho. Kupwa napwevo uze azanga vyuma vyakushipilitu kaha nawa walyepe ngwachimona kupwa hiwana wakufuma kuli Kalunga. Dawn nalinginga mwamwaza kuli ami lunga lyenyi mukuyoya chetu chosena.—Vishi. 31:12.

Omu twalimbachile, vana vetu vapwile namyaka yakusemuka 11, na 13, na 16. Ngwasakilenga kupwa nguchisemi wamwenemwene, ngocho ngwatangilenga vihande vyamumikanda yetu vize vyahanjika hamwakutwamina navana vakulela. Numba tuhu kachapwile chachashiko, oloze ngwapwa wakuwahilila hakupwa navana vaze vangumona kupwa ngusepa lyavo kaha nawa nguchisemi wazangi. Katwakanyishilenga masepa javana vetu kwiza hembo lyetuko, kaha nawa twevwilenga kuwaha nge vaneza.

Kuheta mu 2013, ami naDawn twalukilile kuWisconsin mangana tukalame visemi jetu vatushinakaji. Ngwashinganyekele ngwami mulimo wami wakuzachila haMbetele naukuma, oloze kawakumineko. Vangusanyikile ngukafwe liuka kusopa milonga.

MuSeptember 2018 ngwaputukile kusekulasekula chikuma hamuliu. Ndotolo yetu angupimine oloze namusongo awanyine wauchi. Kutwala muze ndotolo weka angulwezele nguyenga kuli ndotolo atala vyamishisa. Ngocho muJanuary 2019, ndotolo atala vyamishisa angupimine kaha ambile ngwenyi chasolokele nge ngwapwile namusongo umwe (vavuluka ngwavo PSP) uze unahase kutanda mujimba wosena.

Omu mwahichile makumbi atatu, ngwapwile nakuhema, kuhema chimwe chize ngwazanga, kaha ngwaholokele nakulichingumuna mukonekelo. Ngwamwene ngwami mujimba wami unaputuka kuzeya, mwomwo kuhema kana ngunachiheme hamyaka yayivulu. Nakushimbula chiku musongo ngwapwile nawo watohwele chikuma nakungulingisa nguhone nakuhanjika nakutambuka chipwe vene kumina vyakulya.

Ngwapwa nguwakuwahilila chikuma hakuzatako mulimo wakukundwiza liuka lyaYehova hakupwa ngulihako. Kaha nawa ngwawahilila chikuma hakusoneka mijimbu yayivulu yize vali nakuzachisa vandotolo, namahako navyambamilonga. Ngunahakwilanga Vinjiho jaYehova mukaye kosena mangana vapwenga nalisesa lyakusakula kuvoka chakuhona kuvahaka manyinga. Chipwe ngocho, ngweji kushinganyekanga hamazu ahali Luka 17:10 nakwamba ngwami: ‘Ami ngundungo wamokomoko kaha. Vyuma ngunalingi vikiko vene ngwatelanga kulinga.’