1. Uno lizu lyakwamba ngwavo “muchano” lyalumbununa ika?

“MWALINANGWILE ngachilihi muchano?” “Uno vamilelelelele mumuchano tahi?” “Myaka yingahi munatwame mumuchano?” Pamo vamihulisaho lyehi vihula kana, chipwe mwavihulisaho lyehi vakwenu. Uno lizu lyakwamba ngwavo “muchano” lyalumbununa ika? Kakavulu tweji kuzachisanga lizu kana hakulumbununa vyuma twafwelela, najila tweji kulemeselangamo Kalunga, namujila tweji kuyoyelangamo. Vatu vaze vatwama “mumuchano” vatachikiza vyuma yanangula Mbimbiliya, kaha veji kukavangizanga jindongi jatwamamo. Kahechi cheji kuvakafwanga vahone kuhungumuka nakunangula chamakuli nakulivwisa nawa kuwaha kuyoya numba tuhu kavakupukako.—Yowa. 8:32.

2. Kweseka namukanda waYowano 13:34, 35, chuma muka chinahase kulingisa mutu afwile kulinangula muchano?

² Chuma muka chamilingishile mufwile kulinangula muchano? Pamo mwafwililile kulinangula muchano mwomwo yakumona vilinga vyamwaza vyavatu jaYehova. (Petu. 1, 2:12) Nyi pamo mwamwene omwo vasolwelele vakwavo zangi. Vatu vavavulu vavasolwelele zangi kana omu vayile kukukunguluka halwola lwatete, kaha veji kwanukanga chikuma chuma kana kuhambakana navyuma vakevwile. Katweshi kulikomokela hachuma kanako mwomwo Yesu ambile ngwenyi tumbaji twenyi navakavatachikijila hazangi yavo. (Tangenu Yowano 13:34, 35.) Oloze hakusaka tupwenga nalufwelelo lwakukola, twatela kulingako vyuma vimwe.

3. Chuma muka chinahase kusoloka kachi nge lufwelelo lwetu naluzama kaha hazangi veji kusololanga vatu jaKalunga?

³ Lufwelelo lwetu kalwatela kuzama kaha hakuzanga vatu jaKalungako. Mwomwo ika? Mwomwo kachi nge lufwelelo lwetu naluzama kaha hazangi kana, kaha chinahase kutulingisa twechenga  kuzachila Yehova. Chakutalilaho, tunahase kwecha kuzachila Yehova kachi nge ndumbwetu umwe pamo uze vene apwa kalama chipwe payiniya nalingi shili, chipwe nge natulingi mwamupi, chipwe nge nalikange kuli Kalunga nakuputuka kufwefulula vyuma twafwelela. Shikaho, chishina twatela kwijiva shina echi: Kachi nge lufwelelo lwenu nalupendamina kaha hali vakwenu, kaha kalweshi kupwa lwakukolako. Numba tuhu lufwelelo lwenu lunahase kuzama hakushinganyeka hali Yehova nahali vatu jenyi, oloze naluzama chikuma kachi nge namulinangula chikuma Mbimbiliya, nakwivwishisa vyuma namulinangula nakuhehwojola, mangana mukunyuke ngwenu vyuma muli nakulinangula hali Yehova vyamuchano.—Loma 12:2.

4. Kweseka namukanda waMateu 13:3-6, 20, 21, chuma muka cheji kusolokanga kuli vatu vamwe kachi nge vali nakumona ukalu?

⁴ Yesu ambile ngwenyi vatu vamwe navaketavila muchano “nakuwahilila,” oloze lufwelelo lwavo nalukazeya hakuhita muvyeseko. (Tangenu Mateu 13:3-6, 20, 21.) Pamo kavejivile ngwavo vatu vaze navakavangiza Yesu navamonanga ukaluko. (Mateu 16:24) Nyi pamo vashinganyekele ngwavo kupwa muka-Kulishitu kachaneha ukaluko, kaha nawa ngwavo Kalunga mwavakinganga kuchina kumona kala ukalu. Oloze natumonanga ukalu mukaye kano kakuhuka, mwomwo vyuma vinahase kwalumuka kala lwola nakutulingisa tuhombe.—Samu 6:6; Kwambu. 9:11.

5. Uno vandumbwetu vavavulu vali nakusolola ngachilihi nge vakunyuka ngwavo vanawane muchano?

⁵ Vandumbwetu vavavulu vakunyuka ngwavo vanawane muchano. Twatachikiza ngachilihi? Veji kutwalangaho lika kupwa vakuzama mulufwelelo numba nge ndumbwavo navevwisa kupihya chipwe nge nalingi shili. (Samu 119:165) Lufwelelo lwavo lweji kuzamanga lika chamokomoko nakala ukalu navahitamo. (Yako. 1:2-4) Vyuma muka mwatela kulinga mangana mupwenga nalufwelelo kana?

6. Uno lufwelelo lwatumbaji vamulikulukaji lyamyaka lyakulivanga lwazamine haka?

⁶ Lufwelelo lwatumbaji vamulikulukaji lyamyaka lyakulivanga, lwazamine hachinyingi chamuVisoneka nahavyuma anangwilenga Yesu Kulishitu vize vyapwa “muchano wamujimbu wamwaza.” (Ngale. 2:5) Mumuchano kana mwatwama vyuma vyosena vize twafwelela etu vaka-Kulishitu, kuhakilako vene namuchano wakuvuluka ndando yakusokola yaYesu nakusanguka chenyi. Kaposetolo Paulu akunyukile ngwenyi muchano kanou wapwa wakwoloka. Mwomwo ika tunambila ngocho? Mwomwo azachishile Visoneka nakulweza vatu “unjiho kweseka nomu vasoneka ngwenyi, chatelemo Kulishitu kumona luyando nakusanguka cheka kuvafu.” (Vili. 17:2, 3) Tumbaji vamulikulukaji lyamyaka lyakulivanga vetavilile kunangula kana, kaha vapendaminyine hashipilitu yajila yivakafwe kwivwishisa vyuma valinangwilenga muMazu aKalunga. Vahehwojwelenga nakukunyuka chikupu ngwavo vyuma kana vyazamine haVisoneka. (Vili. 17:11, 12; Hepe. 5:14) Lufwelelo lwavo kalwazamine kaha hakushinganyeka hali Kalunga nahali vandumbwavoko, kaha nawa kavazachililile Kalunga mwomwo yakwivwa kuwaha kupwa hamwe navandumbwavoko. Oloze lufwelelo lwavo lwazamine “[ha]chinyingi chakwoloka chakumutachikiza Kalunga.”—Kolo. 1:9, 10.

7. Vyuma muka navisoloka kachi nge lufwelelo lwetu naluzama haMbimbiliya?

⁷ Muchano wamuMazu aKalunga kawalumukako. (Samu 119:160) Chakutalilaho, muchano kana kawalumukako kachi nge ndumbwetu natwivwisa kupihya chipwe nge nalingi shili. Kaha nawa kawalumukako kachi nge tuli nakuhita muukalu. Shikaho twatela kutachikiza kanawa vyuma yanangula Mbimbiliya nakukunyuka ngwetu vyapwa vyamuchano. Kachi nge lufwelelo lwetu naluzama haMbimbiliya kaha nachitukafwa tumike hakuhita muukalu, ngana  muze chikungo chakwimikisa wato cheji kukinganga wato kachi nge kuli nyamanganda. Uno vyuma muka navimikafwa mukunyuke chikupu ngwenu vyuma mwafwelela vyapwa vyamuchano?

8. Kweseka namukanda WaChimoteu 2, 3:14, 15, chuma muka chakafwile Chimoteu akunyuke ngwenyi awanyine muchano?

⁸ Chimoteu akunyukile ngwenyi awanyine muchano. Uno atachikijile ngachilihi ngocho? (Tangenu WaChimoteu 2, 3:14, 15.) Naye nakaka yenyi vamunangwilenga “mikanda yajila.” Oloze chakuzeneka kukakasana, naikiye awanyinenga lwola lwakulinangula mikanda kana. Kahechi chamulingishile ‘akunyuke nakwitavila’ ngwenyi mikanda kana yapwile yamuchano. Kaha mukuhita chalwola, Chimoteu, nanaye nakaka yenyi vejile nakupwa vaka-Kulishitu. Chakuzeneka kukakasana, Chimoteu evwile kuwaha hakumona zangi vasolwelenga vaka-kukavangiza Yesu, kaha afwililile kuzakama vandumbwenyi nakulikungulwila hamwe navo. (Fwili. 2:19, 20) Chipwe ngocho, lufwelelo lwenyi kalwazamine hakuzanga vatuko, oloze lwazamine hamuchano wamuMbimbiliya uze wamulingishile apandame chikuma kuli Yehova. Nayenu nawa mwatela kushinganyekanga kanawa havyuma munalinangula muMbimbiliya hali Yehova.

9. Mwatela kukunyuka havyuma muka vitatu vyavilemu?

⁹ Mwatela kukunyuka havyuma vitatu vyavilemu. Chatete, mwatela kukunyuka ngwenu Yehova Kalunga ikiye atengele vyuma vyosena. (Kulo. 3:14, 15; Hepe. 3:4; Kuso. 4:11) Chamuchivali, mwatela kutachikiza chuma chamilingisa mwitavile ngwenu Mbimbiliya yapwa mazu vahwima kuli Kalunga aze asonekela vatu. (Chimo. 2, 3:16, 17) Kaha chamuchitatu, mwatela kwitavila chikupu ngwenu Yehova atwama naliuka hano hamavu lize lyatwama navatu vaze veji kumulemesanga, vaze vali nakutwaminyina kuli Kulishitu, kaha nawa ngwenu Vinjiho jaYehova vakiko vatwama muliuka kana. (Isa. 43:10-12; Yowa. 14:6; Vili. 15:14) Kukunyuka havyuma kanevi tunavuluka kachasakiwa kutachikiza vyuma vyosena vyakupandama kuMbimbiliyako. Oloze mwatela kufwila kuzachisa “uhashi wenu wakushinganyeka” mangana mukunyuke ngwenu munawane muchano.—Loma 12:1.

10. Vyuma muka twatela kulinga kachi nge tunalinangula muchano?

¹⁰ Kachi nge munatachikiza lyehi muchano wakuvuluka Kalunga, naMbimbiliya navatu jaKalunga, mwatela jino kulizanga kulumbunwina vakwenu muchano kanou kuzachisa Visoneka. Mwomwo ika? Mwomwo etu vaka-Kulishitu twatwama namulimo wakunangula vakwetu muchano uze twalinangula. * (Chimo. 1, 4:16) Kaha kwambulila vakwetu nakuvakunyula vafwelele muchano wamuMbimbiliya, cheji kutukafwanga nayetu tukunyuke chikuma hamuchano kana.

11. Chakutalilaho muka atusela kaposetolo Paulu omu anangwilenga vatu?

¹¹ Omu kaposetolo Paulu anangwilenga vatu, avakunywilenga “havyuma vyakuvuluka Yesu vyakufuma muJishimbi jaMose namuMazu aVapolofweto.” (Vili. 28:23) Tunahase kulondezeza ngachilihi Paulu omu natunangulanga vatu muchano? Katwatela kukumina kaha hakuvalweza vyuma yanangula Mbimbiliyako. Oloze twatela kukafwa vatu vaze tweji kunangula Mbimbiliya vashinganyekenga haVisoneka mangana vapandame kuli Yehova. Katwatela kufwila kuvakafwa vetavile muchano mwomwo yakulondezeza yetuko, oloze vatela kuwitavila mwomwo yakuutachikiza kanawa nakukunyuka nawa ngwavo vyuma vali nakulinangula vyapwa vyamuchano.

12-13. Uno visemi navahasa kukafwa ngachilihi vana vavo mangana vatwaleho kupwa mumuchano?

¹² Enu visemi, twafwelela ngwetu mwasaka vana venu vatwaleho lika kupwa mumuchano. Pamo munahase kushinganyeka ngwenu navazovoloka kushipilitu kachi nge navapwa namasepa vamwenemwene muchikungulwilo. Oloze nge muli nakusaka vana venu vakunyuke ngwavo vanawane muchano, kavatela kukumina kaha hakupwa namasepa vamwenemweneko. Vatela kupwa nausoko wamwaza naKalunga nakukunyuka ngwavo vyuma yanangula Mbimbiliya vyapwa vyamuchano.

¹³ Hakusaka visemi vanangule vana vavo muchano wakuvuluka Kalunga, vatela kupwa vaka-kulinangula Mbimbiliya vakuhya numba vavahane chakutalilaho chamwaza. Visemi vatela kuhunanananga havyuma navalinangula, numbanyi vahase kunangula vana vavo valingenga mwomumwe. Vatela nawa kuvanangula mwakuzachishila vinoma vyakutukafwa kulinangula Mbimbiliya, ngana muze veji kukafwanga vilongesa vyavo. Kulinga ngocho nachikafwa vana vavo vafwelele Yehova “[na]ndungo wakushishika wakuzangama” uze eji kutuhananga kulya chakushipilitu. (Mateu 24:45-47) Enu visemi, kanda kukumina kaha hakunangula vana venu muchano wamaputukilo wamuMbimbiliyako. Oloze vakafwenu nawa vapwenga nalufwelelo lwakukola hakuvanangulanga “vyuma vyakujiminyina vyaKalunga,” kweseka namyaka yavo yakusemuka nauhashi wavo wakukwata vyuma.—Koli. 1, 2:10.

14. Mwomwo ika twatela kulinangwilanga upolofweto wamuMbimbiliya? (Talenu nawa lipwata lyakwamba ngwavo, “ Kutala Munahase Kulumbununa Ou Upolofweto Tahi?”)

¹⁴ Upolofweto wamuMbimbiliya wapwa waulemu mwomwo weji kutukafwanga tufwelele chikuma Yehova. Upolofweto muka wamuMbimbiliya uze wazamishile chikuma lufwelelo lwenu? Pamo muli nakushinganyeka haupolofweto wakuvuluka “makumbi akukuminyina.” (Chimo. 2, 3:1-5; Mateu 24:3, 7) Uno upolofweto muka weka uze wamilingishile mukunyuke ngwenu munawane muchano? Chakutalilaho, kutala munahase kulumbununa omwo upolofweto wamumukanda waNdanyele kapetulu 2 chipwe kapetulu 11 unatesangamo tahi? * Kachi nge lufwelelo lwenu nalupendamina havyuma yanangula Mbimbiliya, kaha nalupwa lwakukola. Chakutalilaho, achishinganyekenu hali vandumbwetu vaze vayanjishile chikuma mulifuchi lyaGermany halwola kwapwile Jita yaKaye yamuchivali. Numba tuhu kavevwishishile kanawa upolofweto wamuMbimbiliya wakutalisa kumakumbi akukuminyinako, oloze vafwelelele chikuma Mazu aKalunga.

15-17. Uno kulinangula Mbimbiliya chakafwile ngachilihi vandumbwetu vaze vapwile nakuyanjisa kuli vaka-Nazi?

¹⁵ Muchiyulo chavaka-Nazi vaze vayulilenga lifuchi lyaGermany, vandumbwetu vavavulu vavatwalilenga kuvilombo vyakulamina vafunge. Hitler naHeinrich Himmler mukulwane waliuka lya SS, vahungile chikuma Vinjiho jaYehova. Ndumbwetu umwe wapwevo ambile ngwenyi, Himmler ahanjikile kumeso avafunge vamapwevo vaVinjiho vaze vapwile muchilombo ngwenyi: “Owo Yehova yenu eji kuyulilanga kaha mwilu, oloze hano hamavunyi, etu yetu tuli nakuyula. Natutala owo mwashimbula hali yenu nayetu.” Jino chuma muka chakafwile vatu jaYehova vapwenga lika vakushishika?

¹⁶ Vaka-Kulinangula Mbimbiliya vatachikijile ngwavo Wangana waKalunga waputukile kuyula  mumwaka wa 1914. Ngocho kavalikomokelele omu vapwile nakuvayanjisako. Oloze vatachikijile ngwavo kakweshi fulumende yavatu yize yinahase kuhonesa Kalunga kulinga vyuma najinyiko. Hitler ahonene kufumisako kulemesa chamuchano, chipwe kuhakako fulumende yangolo chikuma kuhambakana Wangana waKalunga. Vandumbwetu vatachikijile ngwavo likumbi limwe chiyulo chaHitler nachikakuma.

¹⁷ Vyuma vafwelelele vandumbwetu vyapwile vyamuchano. Omu mwahichile myaka yayindende, chiyulo chaNazi chakumine, kaha Heinrich Himmler uze ahanjikile ngwenyi, “hano hamavunyi, etu yetu tuli nakuyula” aputukile kuchina. Omu apwile nakuchina, aliwanyine nandumbu Lübke uze atachikijile halwola apwilenga mukamenga. Himmler ahulishile ndumbu Lübke ngwenyi: “Mama! Enu Vaka-Kulinangula Mbimbiliya, vyuma muka navisoloka jino?” Ndumbu Lübke amulumbunwinyine ngwenyi, Vinjiho jaYehova vejivile lyehi ngwavo chiyulo chaNazi nachikakuma, kaha navakavasokola. Himmler, lunga uze apwile nakusaula chikuma Vinjiho jaYehova ahonene jino vyakuhanjika. Ngocho nakushimbula chiku, alijihile. Chishina muka natulinangulako? Nge natulinangulanga Mbimbiliya, kuhakilako vene naupolofweto watwamamo, kaha nachitukafwa tufwelele chikuma Kalunga nakupwa vakumika nge tuli nakuhita muvyeseko.—Petu. 2, 1:19-21.

18. Kweseka namukanda waYowano 6:67, 68, mwomwo ika twatela kupwila “nachinyingi chakwoloka, nakunangakana chosena” vize asonekele Paulu hali Wavaka-Fwilipi 1:9?

¹⁸ Numba tuhu tuvosena twatela kusololanga zangi yize yapwa katachikijilo kavaka-Kulishitu vamuchano, oloze twatela nawa kupwa “nachinyingi chakwoloka, nakunangakana chosena.” (Fwili. 1:9) Nge chiku, kaha vanahase kutuhungumwisa “napeho yakunangula yosena, natufuta twavatu,” kuhakilako vene navaka-kulikanga kuli Kalunga. (Efwe. 4:14) Omu tumbaji vavavulu mulikulukaji lyamyaka lyakulivanga valitwaminyinyine kukavangiza Yesu, kaposetolo Petulu akunyukile ngwenyi Yesu ikiye apwile “namazu akuyoya chahaya myaka yosena.” (Tangenu Yowano 6:67, 68.) Numba tuhu halwola kana Petulu katachikijile vyuma vyosena hamazu akuyoyako, oloze apwile lika wakushishika mwomwo atachikijile muchano hali Kulishitu. Nayenu nawa munahase kukunyuka havyuma yanangula Mbimbiliya. Nge namulinga ngocho, kaha lufwelelo lwenu naluzama nakuzamisa nawa lufwelelo lwavakwenu.—Yowa. 2, 1, 2.