1. Vyuma muka vinahase kusoloka nge vatu navafwila kupwa namuchima wakulikomwesa navakwavo?

MAKUMBI ano, vatu vavavulu mukaye vali namuchima wakufwila kulikomwesa navakwavo. Chakutalilaho, muka-kusekasana uze ali nakusaka kufukila mukusekasana chenyi kuhambakana vakwavo, nahase kulinga kala vyuma mangana alemeke vakwavo. Muka-kulaha mbushi nahase kulemeka mukwavo muvali nakulahila hakusaka mangana amutape. Muka-shikola nawa nahase kulyonga hakusoneka vyeseko hakusaka kaha ayenga kuyunivesiti. Etu vaka-Kulishitu twatachikiza ngwetu vyuma kana vavilavila ‘havilinga vyakumujimba.’ (Ngale. 5:19-21) Kutala vandumbwetu vamwe muchikungulwilo vanahase kupwa namuchima wakusaka kulikomwesa navakwavo chakuzeneka vavene kutachikiza tahi? Echi hichihula chachilemu chize twatela kulihulisa mwomwo kupwa namuchima wakulikomwesa unahase kulingisa chikungulwilo chihone kulinunga.

2. Vyuma muka natushimutwila muchihande chino?

² Muchihande chino, natushimutwila havilinga vyavipi vize vinahase kutulingisa tuputuke kulikomwesa navandumbwetu. Natushimutwila nawa havyakutalilaho vyamalunga namapwevo vakushishika vaze vavuluka muMbimbiliya vaze valihendele kumuchima wakulikomwesa navakwavo. Oloze tuvangilenu kushimutwila omwo tunahase kukekesa michima yetu tumone numba nge tunaputuka kupwa namuchima kanou nyi chiku.

3. Vihula muka twatela kulihulisa?

³ Chapwa chamwaza kukekesanga michima yetu kuswakumwe. Tunahase kulihulisa ngwetu: ‘Kutala ngweji kulyesekesanga kuli  vakwetu nakumona ngwami ngwapwa nguwamulemu kuhambakana vakiko tahi? Uno ngweji kuzatanga nangolo muchikungulwilo mangana ngusoloke ngwami yami ngwatachikiza milimo kuhambakana vandumbwami tahi? Nyi ngweji kuzatanga nangolo mangana ngwivwise Yehova kuwaha tahi?’ Mwomwo ika twatela kulihulishila evi vihula? Tutalenu omwo yahanjika Mbimbiliya.

4. Kweseka naWavaka-Ngalesha 6:3, 4, mwomwo ika katwatela kulyesekesa kuli vakwetuko?

⁴ Mbimbiliya yatulweza tulihende kukulyesekesanga kuli vakwetu. (Tangenu Wavaka-Ngalesha 6:3, 4.) Mwomwo ika? Mwomwo nge natushinganyeka ngwetu twahambakana vandumbwetu, kaha tunahase kulivwimba. Kaha nawa nge natushinganyeka ngwetu vandumbwetu veji kulinganga kanawa vyuma kuhambakana etu, kaha tunahase kuhomba. Ngocho chapwa chakuhenga kupwa navishinganyeka kana. (Loma 12:3) Ndumbwetu wapwevo Katerina, * uze atwama muGreece, ambile ngwenyi: “Ngwalyesekeselenga kuli vandumbwami vaze vapwa vamwaza vihanga, navaze veji kuzatanga kanawa muwande navaze vatachikiza kutunga masepa. Echi changulingishile ngulimone kupwa nguwamokomoko.” Twatela kwanukanga ngwetu Yehova atukoka twizenga kuli ikiye keshi mwomwo yakuwaha chetu, chipwe uhashi wetu wakunangula, chipwe kuya fumako oloze mwomwo yakumuzanga nakwivwilila kuli Mwanenyi.—Yowa. 6:44; Koli. 1, 1:26-31.

5. Vyuma muka munalinangula kuli ndumbwetu Hyun?

⁵ Twatela nawa kulihulisa ngwetu, ‘Uno ngwapwa ngumuka-kuneha kuunda tahi, nyi ngwasaka kulikokojwesanga navakwetu kuswakumwe tahi?’ Tutalenu hachakutalilaho chandumbwetu walunga Hyun, uze atwama muSouth Korea. Lwola lumwe kazangilenga vandumbwenyi vamwe vaze vahanyine milimo muchikungulwiloko. Ou ndumbwetu ambile ngwenyi, “Ngwawanyinyinenga tutenga ava vandumbwami nakukana kala vyuma vahanjikilenga.” Chuma muka chafuminemo? Ambile ngwenyi: “Muchima wami waupi walingishile chikungulwilo chihone kupwa chakulinunga.” Oloze masepa jenyi vamwe vamukafwile azachile haukalu wenyi. Ngocho ndumbwetu Hyun azachilile haukalu wenyi, kaha oholyapwa apwa kalama wakulindunuka. Kachi nge tunamono ngwetu tunaputuka kupwa namuchima wakulikomwesa navandumbwetu muchishishisa chakuneha kuunda, kaha twatela kuzachilaho washi.

6. Kweseka naWavaka-Ngalesha 5:26, vilinga muka vyavipi vinahase kutulingisa tuputuke kulikomwesa navakwetu?

⁶ Tangenu Wavaka-Ngalesha 5:26. Vilinga muka vyavipi vinahase kutulingisa tuputuke kulikomwesa navakwetu? Chatete shina kulitohwesa chamokomoko. Mutu uze eji kufwilanga kulitohwesa chamokomoko apwa wakulivwimba kaha nawa alizanga ivene. Chamuchivali shina lushiushiu. Mutu walushiushiu kafwila kaha vyuma vize ali navyo mukwavoko oloze asaka nawa vipwenga vyenyi. Chikupu vene mutu uze atwama nalushiushiu kazanga vakwavoko. Shikaho, twatela kukilikita mangana tulihende kuvilinga kanevi vyavipi.

7. Ukalu muka unahase kufumamo nge natupwa namuchima wakufwila kulitohwesa chamokomoko nalushiushiu? Hanenu chakutalilaho.

⁷ Vilinga vyavipi vyakufwana nge kulitohwesa chamokomoko nalushiushiu tunahase kuvifwanyisa kumajilo aze eji kupihisanga maji amundeke. Kachi nge mumaji muli majilo, ndeke yinahase kutuka, oloze aze majilo anahase kujika mumiteta mweji kuhichilanga maji nakulingisa yize ndeke yiholoke. Chochimwe nawa, namutu nahase kuzachila Yehova oloze nge mwaputuka kupwa namuchima wakulitohwesa  chamokomoko nalushiushiu, kaha mwalimbuka. (Vishi. 16:18) Mutu kana nahase kwecha kuzachila Yehova nakulinehela ukalu ivene navakwavo. Vyuma muka twatela kulinga mangana tulihende kumuchima wakufwila kulitohwesa chamokomoko nalushiushiu?

8. Tunahase kulihenda ngachilihi kumuchima wakulitohwesa chamokomoko?

⁸ Tunahase kulihenda kumuchima wakufwila kulitohwesa chamokomoko hakukavangiza mazu aze kaposetolo Paulu alwezele vaka-Fwilipi ngwenyi: “Kanda kulinga chuma numba chimwe namuchima wakulikindukilako, chipwe namuchima wakulitohwesa chamokomokoko, oloze linyisenunga nakumona vakwenu ngwenu vamihambakana enu.” (Fwili. 2:3) Kachi nge natumona vakwetu ngwetu vavalemu kuhambakana etu, kaha katweshi kufwila kulipecha navatu vaze vatwama nauhashi uze katwatwama nawoko. Oloze natuvevwilanga kuwaha muchishishisa chakulipecha navo. Natwivwa kuwaha chikumanyi nge vali nakuzachisa uhashi wavo hakuzachila Yehova. Kachi nge vandumbwetu vaze vatwama nauhashi navakavangiza mazu akuhuhumuna ahanjikile Paulu, kaha navakiko vanahase kumona vilinga vyamwaza twatwama navyo. Echi nachilingisa muchikungulwilo mupwenga kuunda nakulinunga.

9. Tunahase kulihenda ngachilihi kumuchima walushiushiu?

⁹ Tunahase kulihenda kumuchima walushiushiu nge natupwa vakulinyisa. Nge natupwa vakulinyisa, kaha katweshi kulisolola ngwetu twatwama nauhashi kuhambakana vakwetuko. Oloze twatela kufwila kulinangula vyuma vimwe kuli vakwetu vaze vatachikiza vyuma vize katwatachikizako. Chakutalilaho, kachi nge ndumbwetu walunga muchikungulwilo eji kuhanjikanga vihande vyalikungumbuwa vyamwaza, kaha tunahase kumuhulisa atulweze omwo eji kuwahisanga vihande vyenyi. Kaha nge ndumbwetu wapwevo ejiva kuteleka kanawa vyakulya, kaha tunahase kumuhulisa atulweze omwo eji kutelekanga. Kaha nawa nge ndumbwetu wamukweze cheji kumukaluhwilanga kutunga masepa, kaha nahase kuhulisako kala ndumbwetu uze atachikiza mwakutungila masepa. Nge natulinga ngocho, kaha natulihenda kulushiushiu nakuhotola uhashi wetu.

10. Ukalu muka amwene Ngiteyone?

¹⁰ Tutalenu havyuma vyasolokele kuli Ngiteyone wakumuyachi waManase nakuli malunga vakumuyachi waEfwalime. Yehova akafwile Ngiteyone navatu jenyi 300 vafungulule vaka-kole javo, chize pamo kachi chavalingishile valivwimbe. Oloze malunga vavaEfwalime vayile kuli Ngiteyone nakumukokojwesa muchishishisa chakumusangejeka. Chasoloka nge vevwile kupihya, mwomwo Ngiteyone kavasanyikile ayenga navo nakulwa jita navaka-kole jaKalungako. Ava malunga vafwililile kaha vatu vavumbike muyachi wavo oloze vahonene kutachikiza ngwavo Ngiteyone ahanyine kavumbi Yehova nakukinga vatu jaYehova.—Kuyu. 8:1.

11. Uno Ngiteyone akumbulwile ngachilihi malunga vavaEfwalime?

¹¹ Ngiteyone alinyishile nakulweza malunga vavaEfwalime ngwenyi: “Vyuma muka vyavilemu ngunalingi vyakumihambakanenu?” Kaha avulukile vyuma vize Yehova avakafwile vatesemo. Echi chalingishile ava malunga “vaunde michima.” (Kuyu. 8:2, 3) Ngiteyone alinyishile mangana anehe kuunda mukachi kavatu jaKalunga.

12. Vyuma muka natulinangula kuli malunga vavaEfwalime nakuli Ngiteyone?

¹² Vyuma muka natulinangula kumujimbu kana? Kuli malunga vavaEfwalime tunalinangulako nge twatela kutohwesanga Yehova muchishishisa chakulitohwesa etu vavavene. Mitwe yajitanga natulama vanahase kulinangulako vishina vimwe kuli Ngiteyone. Kachi nge mutu napihilila mwomwo yavyuma vimwe mwalingile, kaha mwatela kufwila kutachikiza kanawa chuma chinamulingisa apihilile. Mwatela nawa kusangejeka mutu kana havyuma vyamwaza eji kulinganga. Hakusaka mulinge ngocho mwatela kupwa namuchima wakulinyisa chikumanyi nge munatachikiza ngwenu mutu kana nalimbenje. Nachipwa chamwaza kutwama mukuunda nandumbwenu kuhambakana kulihakwila.

13. Ukalu muka amwenenga Hana, kaha aufungulwile ngachilihi?

¹³ Tutalenu nawa hachakutalilaho chaHana. Asombokele kuli Elekana kaLevi, uze amuzangile chikuma. Oloze Elekana apwile napwevo mukwavo Penyina. Elekana azangile chikuma Hana kuhambakana Penyina. Kaha “Penyina apwile navana, oloze Hana kapwile navanako.” Echi chalingishile Penyina atolekelenga chikuma Hana “mangana amwivwise kumuchima kupihya.” Uno Hana evwilenga ngachilihi? Evwilenga kupihya chikuma, ngocho “alililenga nakulitwamina kulya.” (Samwe. 1, 1:2, 6, 7) Oloze muMbimbiliya kamwatwama mujimbu uze wasolola nge Hana alingilenga sambanjinga kuli muhalika wenyiko. Chipwe ngocho Hana alwezelenga Yehova ukalu wenyi nakufwelela ngwenyi mwamukafwa. Kutala Penyina echele kutoleka Hana tahi? Mbimbiliya kayahanjikahoko. Oloze twatachikiza ngwetu Hana aunjile muchima, kaha “kahombele chekako.”—Samwe. 1, 1:10, 18.

14. Vyuma muka tunalinangula kuli Hana?

 ¹⁴ Vyuma muka natulinangula kuli Hana? Kachi nge mutu ali nakusaka kulikomwesa nayenu, kaha kamwatela kufwila kumulondezezako. Kamwatela kufwila kuputuka kulikomwesa nenyiko. Muchishishisa chakuhilwisa upi kumutu namilingi mwamupi, fwilenu kutwama namutu kana mukuunda. (Loma 12:17-21) Numba tuhu ikiye keshi kwalumuna muchima wenyiko, oloze enu namupwa vakuunda nakupwa vakuwahilila.

15. Apolo naPaulu valingilenga vyuma muka vyakulifwana?

¹⁵ Chamakumishilo, tutalenu vyuma natulinangula kuli kambaji Apolo nakuli kaposetolo Paulu. Ava malunga vavali vatachikijile kanawa Visoneka. Vosena vayile fuma, kaha nawa vapwile vaka-kunangula vamwenemwene. Vosena vavali vakafwilenga vatu vavavulu vapwenga tumbaji. Oloze kavalivwililenga lwisoko.

16. Uno Apolo apwile mutu wakufwana ngachilihi?

¹⁶ Apolo ‘asemukilile kuAlekesandelya,’ chihela chayile fuma chikuma, kuze vayilenga nakutangila vatu mulikulukaji lyamyaka lyakulivanga. Apwile nauhashi wakunangula, kaha nawa “atachikijile chikuma Visoneka.” (Vili. 18:24) Omu Apolo ayile nakuzachila muchikungulwilo chamuKolinde, vandumbwetu vamwe muchikungulwilo vamuzangile chikuma kuhambakana nomu vazangile vandumbwetu vamwe vaze vayileko hakavanga kuhakilako vene naPaulu. (Koli. 1, 1:12, 13) Uno Apolo akundwijile muchima kanou wakuneha chihandwa tahi? Nduma, kalingile ngochoko. Omu Apolo alingile nafumu lyehi kuKolinde, Paulu amulwezele akindulukileko cheka. (Koli. 1, 16:12) Nge Apolo apwile namuchima wakuneha chihandwa muchikungulwilo kachi Paulu kamulwezele akindulukileko. Chikupu vene Apolo azachishilenga uhashi wenyi mujila yamwaza hakuvilika mujimbu wamwaza nakukolezeza vandumbwenyi. Twafwelela nawa ngwetu Apolo apwile mutu wakulinyisa. Chakutalilaho, muMbimbiliya kamwatwama mujimbu  wasolola nge apihililile omu Akwila naPilishila ‘vamulumbunwinyine jila yaKalunga mwakwolokako.’—Vili. 18:24-28.

17. Uno Paulu anehele ngachilihi kuunda muchikungulwilo?

¹⁷ Kaposetolo Paulu atachikijile milimo yamwaza azachilenga Apolo. Oloze Paulu kalizakaminyine ngwenyi vatu navavumbika Apolo kuhambakana ikiyeko. Omu tweji kutanganga mukanda uze Paulu asonekelele vaka-Kolinde, tweji kumonanga ngwetu apwile wakulinyisa kaha nawa muka-kwashiwisa muchima. Muchishishisa chakuwahilila omu evwile vatu navamba ngwavo “Ami nguwakuli Paulu,” oloze ikiye ahanyine kavumbi Yehova Kalunga naYesu Kulishitu.—Koli. 1, 3:3-6.

18. Kweseka naWavaka-Kolinde 1, 4:6, 7, vyuma muka tunalinangula kuli Apolo naPaulu?

¹⁸ Vyuma muka natulinangula kuli Apolo naPaulu? Tunahase kuzachila Yehova nangolo jetu josena nakukafwa vatu vavavulu vazovoloke nakuvambapachisa, oloze twatela kutachikiza ngwetu vyuma kana tunakuvitesamo mwomwo yakutukafwa kuli Yehova. Chuma chikwavo natulinangula kuli Apolo naPaulu shina echi: Nge twatwama namilimo yayivulu muchikungulwilo, kaha kuli vyuma vyavivulu vize twatela kulinga mangana tunehe kuunda muchikungulwilo. Tweji kuwahililanga chikuma nge malunga vatongola navaneha kuunda nakulinunga muchikungulwilo hakukafwa vandumbwavo kuzachisa Mbimbiliya, nakukavangiza chakutalilaho chaYesu muchishishisa chakulitohwesa vavene.—Tangenu Wavaka-Kolinde 1, 4:6, 7.

19. Vyuma muka twatela kufwila kulinga? (Talenu nawa lipwata lyakwamba ngwavo “ Lihendenu kuMuchima Wakulikomwesa naVakwenu.”)

¹⁹ Tuvosena twatwama nauhashi chipwe wana wakulisezaseza uze atuhana Kalunga. Tunahase kuzachisa uhashi chipwe wana kana ‘hakuzachilanga vakwetu.’ (Petu. 1, 4:10) Tunahase kushinganyeka ngwetu vyuma tweji kulinganga kavyapwa vyavilemuko. Twatela kutachikiza ngwetu numba tulinga vyuma vyavindende chipwe vyavinene oloze vinahase kulingisa chikungulwilo chilinunge. Tuvosena tufwilenu kulihenda kumuchima wakulikomwesa navakwetu. Shikaho, tutwalenuho lika kuneha kuunda nakulinunga muchikungulwilo.—Efwe. 4:3.