1. Vyuma muka namilingila Yehova?

MWEJILE nakupwa ngachilihi muVinjiho jaYehova? Chatete, mwevwile “mujimbu wamwaza,” pamo kuli visemi jenu, chipwe kuli vakwenu mwazata navo, chipwe kuli vakwenu vaka-shikola, nyi pamo Vinjiho jaYehova vejile hazuvo yenu. (Mako 13:10) Kufumaho, Chinjiho umwe azachishile ngolo jenyi nalwola lwenyi kuminangula Mbimbiliya. Omu mwaputukile kulinangula, mwazangile jino Yehova nakutachikiza nawa ngwenu amizanga. Ngocho amikokele mwizenga mumuchano. Hakuwana nge mwapwa jino kambaji kaYesu Kulishitu, shikaho mwatwama nalutalililo lwakukayoya haya myaka yosena. (Yowa. 6:44) Chikupu vene, mwasakwilila Yehova hakuminehela mutu aminangule muchano nahakumitavila mumuzachilenga.

2. Vyuma muka natushimutwila muchihande chino?

² Hakuwana nge tunatachikiza jino muchano, ngocho tuli namulimo wakukafwako vakwetu tutambuke hamwe navo mujila yakuya kukuyoya. Chinahase kutwashiwila kwambulwila kuzuvo hizuvo, oloze pamo chinahase kutukaluhwila kuputuka kutwaminyina vilongesa. Kutala nayenu mwatwama naukalu kana tahi? Nge mukiko, kaha vishina vili muno muchihande navimikafwa. Natushimutwila hachuma cheji kutulingisanga tukafwe vatu vapwenga tumbaji. Natushimutwila nawa omwo tunahase kuhonesa ukalu uze unahase kutulingisa chitukaluhwile kuputuka kutwaminyina vilongesa. Chatete, tushimutwilenu ovyo vyatela kutulingisa twambulilenga vatu mujimbu wamwaza nakuvanangula.

3. Mwomwo ika tweji kwambulwilanga?

³ Omu Yesu apwile hano hamavu, ahanyine vaka-kumukavangiza milimo yivali. Watete, avalwezele vambululenga mujimbu  wamwaza waWangana, kaha avalwezele mwakulingila ngocho. (Mateu 10:7; Luka 8:1) Yesu alwezele tumbaji twenyi vyuma vatelele kulinga kachi nge vatu navevwilila kumujimbu wamwaza numba navakana. (Luka 9:2-5) Avalwezele nawa ngwenyi navakambulilanga vatu vavavulu “nakuhana unjiho kuli vaka-mafuchi osena.” (Mateu 24:14; Vili. 1:8) Yesu alwezele tumbaji twenyi vatwaleho lika kwambulula vyaWangana waKalunga, navyuma naukalinga numba vatu navetavila chipwe navakana.

4. Kweseka naMateu 28:18-20, mulimo muka ukwavo twatela kuzata?

⁴ Mulimo muka wamuchivali uze Yesu ahanyine vaka-kumukavangiza? Alwezele vaka-kumukavangiza vanangulenga vatu valamenga vyuma vyosena vize avalwezele. Uno ou mulimo wakwambulula nakunangula vauhanyine kaha kuli vaka-Kulishitu vamulikulukaji lyamyaka lyakulivanga ngana muze vahanjika vatu vamwe tahi? Nduma, mwomwo Yesu ambile ngwenyi, mulimo kanou waulemu navauzatanga, “palanga nakuchikukulwishi chakatwamino kamyaka yino.” (Tangenu Mateu 28:18-20.) Chasoloka nge Yesu ahanyine mulimo kanou kuli vaka-kumukavangiza halwola asolokele kuli tumbaji twenyi vakuhambakana 500. (Koli. 1, 15:6) Kaha nawa muchakumwenesa chize Yesu amwenesele Yowano, asolwele nge asaka tumbaji twenyi vosena vakafwe vatu vatachikize Yehova.—Kuso. 22:17.

5. Kweseka namukanda Wavaka-Kolinde 1, 3:6-9, Paulu alumbunwine ngachilihi mulimo wakwambulula nawakunangula?

⁵ Kaposetolo Paulu afwanyishile mulimo wakunangula vatu vapwenga tumbaji kuunjimi, kusolola nge katwatela kukumina kaha hakutumba mbutoko. Alwezele vaka-Kulishitu vamuKolinde ngwenyi: “Ami ngwatumbile, Apolo atukumwinyine meya . . . Enu munapu wande uze ali nakulima Kalunga.” (Tangenu Wavaka-Kolinde 1, 3:6-9.) Hakuwana nge twapwa tuvaka-kuzata ‘muwande waKalunga,’ ngocho tweji kutumbanga jimbuto omu tweji kwambululanga kaha nawa tweji kutukumwinanga meya omu tweji kunangulanga vatu. (Yowa. 4:35) Twatachikiza nawa ngwetu Kalunga ikiye eji kusokesanga jimbuto.

6. Vyuma muka vyaliweza mumulimo wakunangula?

⁶ Omu tweji kwambululanga, tweji kutondanga vatu vaze vali “namichima yamwaza yakusaka kuyoya chahaya myaka yosena.” (Vili. 13:48) Hakusaka tukafwe vatu kana vapwenga tumbaji, twatela kuvakafwa (1) vevwishise vyuma vanakulinangula, (2) vavitavile, kaha (3) vazachise vyuma vali nakulinangula muMbimbiliya. (Yowa. 17:3; Kolo. 2:6, 7; Teso. 1, 2:13) Vatu vosena muchikungulwilo vanahase kukafwa vilongesa hakuvasolwela zangi nachisambo nge vaneza kukukunguluka. (Yowa. 13:35) Muka-kwambulula uze ali nakutwaminyina chilongesa, atela kuzachisa lwola lwenyi nangolo jenyi hakukafwa chilongesa mangana aseze vyuma vyavipi vize afwelela, navize eji kulinganga vize “vyazama chikuma” mumuchima wenyi. (Koli. 2, 10:4, 5) Chinahase kumbata tukweji vavavulu numba mutu uze tuli nakunangula alumuneko chiyoyelo chenyi nakutamo kumumbapachisa. Numba tuhu chinahase kumbata lwola, oloze kukilikita chetu kacheshi kuya mwanganaveneko.

7. Chuma muka cheji kutulingisanga tuyenga nakwambulula nakunangula vatu vapwenga tumbaji?

⁷ Mwomwo ika tweji kwambulilanga vatu nakuvanangula vapwenga tumbaji? Chatete, mwomwo twazanga Yehova. Kachi nge namukavangiza lushimbi lwakwambulula nakunangula vatu vapwenga tumbaji, kaha namusolola ngwenu mwazanga Kalunga. (Yowa. 1, 5:3) Tachikizenu ngwenu mweji kwambulwilanga kuzuvo hizuvo mwomwo mwazanga Yehova. Uno chapwile chachashi kukavangiza lushimbi kana hakavanga tahi? Pamo kachapwile chachashiko. Kutala mwevwile woma halwola lwatete mwayile nakwambulwila kuzuvo hizuvo tahi? Twafwelela  ngwetu mwevwile woma. Oloze mwatachikijile ngwenu ou ukiko mulimo amilweza Yesu muzatenga, kaha mwononokele. Mukuhita chalwola, mwamwene jino ngwenu mulimo kana wawashi. Nyi ngachilihi kuputuka kutwaminyina vilongesa vyaMbimbiliya? Kutala mweji kwivwanga woma tahi? Pamo vene. Oloze nge namulomba Yehova amikafwe muhone kwivwa woma mangana muputuke chilongesa chaMbimbiliya, kaha mwamikafwa.

8. Kweseka namukanda waMako 6:34, chuma muka chikwavo nachitulingisa tunangule vatu?

⁸ Chamuchivali, kuzanga vatu cheji kutulingisanga tuvanangule muchano. Chakutalilaho, likumbi limwe omu Yesu natumbaji twenyi vafumine mumulimo wakwambulula, vazeyele chikuma. Ngocho vasakile kuya kuchihela chimwe vakahwime, oloze lizavu lyavatu lyavakavile. Yesu avevwililile keke, kaha aputukile kuvanangula “vyuma vyavivulu.” (Tangenu Mako 6:34.) Numba tuhu azeyele chikuma halikumbi kana, oloze avanangwile. Mwomwo ika? Mwomwo atachikijile ukalu vapwile nakuhitamo vatu kana. Ngocho asakile kuvakafwa mwomwo atachikijile ngwenyi vapwile nakuyanda kaha nawa vasakiwile kupwa nalutalililo. Omu mukiko vali navatu makumbi ano. Numba tuhu vali nakusoloka nge vapwa vakuwahilila oloze vali naukalu, ngocho vanakusakiwa kuvakafwa. Vanapu nge mikoko vakujimbala, vaze kaveshi nakafunga wakuvatwaminyinako. Kaposetolo Paulu avulukile vatu kana ava kavatwama nakafungako ngwenyi kavatachikiza Kalungako, kaha nawa kavatwama nalutalililoko. (Efwe. 2:12) Vatu kana ‘vali nakuya mujila yakutwala kukunonga.’ (Mateu 7:13) Kachi nge natushinganyeka ngwetu vatu vali mungalila yetu vatela kutachikiza Kalunga, kaha zangi nakeke navitulingisa tuvakafwe. Jila yamwaza tunahase kuvakafwilamo shina kuvanangula Mbimbiliya.

9. Kweseka namukanda Wavaka-Fwilipi 2:13, uno Yehova nahase kumikafwa ngachilihi?

⁹ Pamo mweji kulangisanga kuputuka chilongesa chaMbimbiliya hakutachikiza ngwenu chasakiwa kukilikita nakuliwahisa kanawa. Nge mukiko mweji kushinganyekanga kaha lwezenu Yehova ukalu wenu. Mulombenu amihane muchima wakufwila kuwana mutu uze namunangula Mbimbiliya. (Tangenu Wavaka-Fwilipi 2:13.) Kaposetolo Yowano atufwelelesa ngwenyi kachi nge natulomba Kalunga kweseka namwaya muchima wenyi, kaha mwatwivwa. (Yowa. 1, 5:14, 15) Shikaho, tachikizenu ngwenu Yehova mwamikafwa mupwenga namuchima wakufwila kunangula vatu vapwenga tumbaji.

10-11. Chuma muka chinahase kutuhonesa kutwaminyina chilongesa?

¹⁰ Twatachikiza ngwetu mulimo wakunangula vatu wapwa waulemu, oloze kunahase kupwa vyuma vimwe vinahase kutuhonesa kuzata chikuma mulimo kana. Tutalenu vyuma vize vinahase kutuhonesa, nomu tunahase kuvifungulula.

¹¹ Tunahase kuhona kuzata kweseka nomu tunakusaka mwomwo yaukalu. Chakutalilaho, vandumbwetu vamwe vanakuhona kuzata chikuma mwomwo yaushinakaji chipwe mwomwo yamisongo. Kutala ukiko ukalu muli nakuhitamo nayenu tahi? Nge mukiko, kaha talenu chishina tunalinangula mulwola lwamusongo waCOVID-19. Tunalinangula nge tunahase kutwaminyina vilongesa vyaMbimbiliya kuzachisa makina. Shikaho munahase kutwaminyina chilongesa oku muli hazuvo yenu. Kaha nawa vatu veka vasaka kulinangula Mbimbiliya oloze halwola luze vandumbwetu veji kuvatambukilanga kavavawana hamembo avako. Oloze vamwe vanahase kuwanyiwa hamembo avo nachimene chipwe naufuku. Kutala munahase kulisuula kulinangula navo halwola kanelu tahi? Tachikizenu ngwenu Yesu anangwile Nyikotemu naufuku mwomwo lukiko lwola asakile Nyikotemu kumunangula.—Yowa. 3:1, 2.

12. Vishina muka vinahase kutukafwa tupwenga vaka-kunangula vamwenemwene?

 ¹² Tunahase kumona ngwetu katweshi nauhashi wakutwaminyina chilongesa chaMbimbiliyako. Pamo tunahase kushinganyeka ngwetu katweshi nachinyingi chipwe uhashi wakunangula mutu Mbimbiliyako. Nge omu mukiko mweji kushinganyekanga, kaha talenu vishina vino vitatu vinahase kumikafwa. Chatete, Yehova amimona ngwenyi mwatamo kunangula vatu. (Koli. 2, 3:5) Chamuchivali, Yesu uze atwama ‘nawata wosena mwilu nahamavu,’ amitavisa munangulenga vatu. (Mateu 28:18) Kaha chamuchitatu, munahase kupendamina hali vandumbwenu vamikafwe. Yehova akafwile Yesu atachikize vyuma atelele kuhanjika, shikaho nahase kumikafwa nayenu nawa. (Yowa. 8:28; 12:49) Kaha nawa munahase kuhulisa kalama kenu walizavu, chipwe payiniya wakulindunuka, chipwe kala ndumbwetu wakuhya kushipilitu amikafwe mwakuputukila chilongesa chaMbimbiliya. Jila yimwe vanahase kumikafwilamo mupwenga vaka-kunangula vamwenemwene shina kuyanga navo kuvilongesa vyavo.

13. Mwomwo ika twatela kuzachisa jijila jajihya hakunangula vatu?

¹³ Chinahase kutukaluhwila kuzachisa jijila jajihya navinoma vyavihya. Jila yakutwaminyinamo vilongesa vyaMbimbiliya yinalumuka. Mukanda tunakuzachisa hakutwaminyina vilongesa waLivwise Kuwaha Kuyoya Haya Myaka, wasakiwa kuliwahisa kanawa, nakutwaminyina vilongesa mujila yakulihandununako nayize twazachishilenga hakutwaminyina vilongesa kunyima. Tunakutanganga jipalangalafu jajindende oloze tunakushimutwilanga chikuma nachilongesa. Hakunangula, tuli nakuzachisa chikuma jivindiyo navihande vili hakeyala yetu na JW Library^®. Kachi nge chinakumikaluhwila kuzachisa vinoma kanevi, kaha lwezenuko kala ndumbwetu mangana amikafwe mwijive mwakuvizachishila. Etu vatu twazanga kulinga vyuma mujila yize tweji kuvilinganga makumbi osena, ngocho cheji kutukaluhwilanga kulinga vyuma kana mujila yayihya. Oloze Yehova navandumbwetu navatukafwa twalumuneko jijila jakuzachilamo mangana tulivwise kuwaha kulinangula navatu. Payiniya umwe ambile ngwenyi jila kaneyi yayihya yakunangwilamo vatu yinapu yamwaza mwomwo “yinakwivwisa kuwaha chilongesa namuka-kumunangula.”

14. Chuma muka twatela kwanuka nge tweji kwambulwilanga mungalila yize vatu kavasaka kulinangula Mbimbiliyako, kaha mukanda Wavaka-Kolinde 1, 3:6, 7 watukolezeza vyuma muka?

¹⁴ Pamo twatwama mungalila muze chapwa chachikalu kuputuka kutwaminyina vilongesa. Pamo vatu veji kukananga kuvambulila mujimbu wamwaza. Vyuma muka navitukafwa tutwaleho lika kwambulula kachi nge twatwama mujingalila kana? Anukenu ngwenu chiyoyelo chavatu mukaye kano kakapi cheji kwalumukanga, shikaho vatu vaze vakanyinenga kuvambulila vanahase kuputuka kusaka vyuma vyakushipilitu. (Mateu 5:3) Vatu vamwe vaze vakanyinenga mikanda yetu vali nakwitavila jino kuvanangula Mbimbiliya. Twatachikiza nawa ngwetu Yehova ikiye Mwenyamulimo wakwaha. (Mateu 9:38) Asaka tutwaleho lika kutumba nakutukumwina meya, kaha ikiye mwakolesa. (Koli. 1, 3:6, 7) Numba tuhu oholyapwa katweshi nakutwaminyina chilongesa chaMbimbiliyako, oloze twatela kutachikiza ngwetu Yehova eji kutukisulanga mwomwo yakukilikita chetu keshi mwomwo yakutwaminyina chilongesa chipwe mwomwo yakuhana jimangazini jajivuluko. *

15. Uno Yehova eji kwivwanga ngachilihi nge mutu mwetavila kulinangula Mbimbiliya nakukavangiza vyuma vize ali nakulinangula?

¹⁵ Yehova eji kwivwanga kuwaha nge mutu mwetavila muchano wamuMbimbiliya nakulwezako  vakwavo vyuma vize nalinangula. (Vishi. 23:15, 16) Twafwelela ngwetu Yehova eji kwivwanga kuwaha hakumona vangamba jenyi vali nakuzata natwima mulimo wakwambulula nakunangula vatu. Chakutalilaho, mumwaka wamumulimo wa 2020, vaka-kwambulula vatwaminyinanga vilongesa vyaMbimbiliya vyakuheta ku 7,705,765, nakukafwa vatu vakuheta ku 241,994 valihane kuli Yehova nakuvambapachisa chamokomoko namusongo waCOVID-19. Ava tumbaji vavahya navakiko navakatwaminyina vilongesa vyaMbimbiliya nakuvakafwa vapwenga tumbaji. (Luka 6:40) Chikupu vene tweji kwivwisanga Yehova kuwaha omu tweji kwazananga mumulimo wakunangula vatu vapwenga tumbaji.

16. Chuma muka twatela kulitomena kulinga?

¹⁶ Kunangula vatu vapwenga tumbaji wapwa mulimo waunene, oloze twatachikiza ngwetu Yehova mwatukafwa tunangule vatu vamuzange nakupwa tumbaji. Kutala tunahase kulitomena kunangulako mutu umwe Mbimbiliya tahi? Tachikizenu ngwenu munahase kupwa navilongesa vyaMbimbiliya vyavivulu kachi nge namuhulisanga kala mutu wosena uze namuliwananga nenyi numba nge mwasaka kulinangula Mbimbiliya. Twafwelela ngwetu Yehova mwatukafwa tuwane vatu vaze navasaka kulinangula.

17. Uno natwivwa ngachilihi nge natutwaminyina chilongesa chaMbimbiliya?

¹⁷ Twatokwa chikuma hakuzata mulimo wakwambulula nakunangula vatu muchano. Kuzata mulimo kana cheji kutulingisanga tuwahilile chikuma. Kaposetolo Paulu akafwile vatu vavavulu muTesolonyika vapwenga tumbaji. Echi chikiko chamulingishile ahanjikile ngwenyi: “Uno lutalililo lwetu luka, chipwe kuwahilila chetu chika, mokomoko muchama wetu wakulisashilaho kumeso aMwata wetu Yesu hakupwako chenyi uka? Uno kumana keshi yenuko nyi? Chikupu vene, enu yenu upahu wetu, yenu kuwahilila chetu.” (Teso. 1, 2:19, 20; Vili. 17:1-4) Omu mukiko veji kwivwanga navandumbwetu vavavulu makumbi ano. Ndumbwetu Stéphanie nalunga lyenyi vaze vanakafwenga vatu vavavulu vazovoloke nakutamo kuvambapachisa vambile ngwavo: “Kukafwa vatu valihane kuli Yehova chikiko cheji kunehanga kuwahilila chamwenemwene.”