1-2. Uno mazu atwama hali Isaya 65:16, 17 eji kutukolezezanga ngachilihi tupwenga nalukakachila?

KUKUNGULUKA changalila chamu 2017 chapwile namutwe wamwaza wakwamba ngwavo “Kanda Kuzeyako!” Kukunguluka kana chatukafwile tumone omwo tunahase kutwalaho lika kumika nge tuli nakumona ukalu. Munahichi jino myaka yiwana kufuma haze twapwile nakukunguluka kana, oloze tuchili lika nakukakachila muukalu tunakumona mukatwamino kamyaka yino.

² Ukalu muka munamono muli eyi myaka? Kutala munafwisa kausoko kenu chipwe sepa lyenu tahi? Kutala munakuviza misongo yayinene tahi? Kutala munakulipika naukalu mwomwo yaushinakaji tahi? Uno munamononga ukalu wakulijila chipwe uhwanga chipwe kumifumbukila tahi? Nyi munamononga ukalu mwomwo yamisongo yachihita yakufwana nge COVID-19 tahi? Tuli nakutalilila kulwola luze katweshi kukamona ukalu kanou chipwe kukawanukako.—Tangenu Isaya 65:16, 17.

3. Chuma muka twatela kulinga, kaha mwomwo ika?

³ Chiyoyelo mukaye kano chinakaluhwa, kaha kulutwe tunahase kukamona ukalu waunene chikuma. (Mateu 24:21) Shikaho, twatela kutwalaho lika kupwa nalukakachila. Mwomwo ika? Mwomwo Yesu ambile ngwenyi: “Hakukakachila chenu hakiko vene namukalwila myono yenu.” (Luka 21:19) Kushinganyeka havatu vaze vali nakukakachila muukalu wakulifwana ngana uze tuli nakumona nayetu, nachitukafwa tupwenga nalukakachila.

4. Mwomwo ika natwambila ngwetu Yehova atuhana chakutalilaho chamwaza chakupwa nalukakachila?

⁴ Yehova atuhana chakutalilaho chamwaza chakupwa nalukakachila. Uno munalikomokela hakwivwa ngwenu Yehova atwama nalukakachila tahi? Pamo vene, oloze nge namushinganyeka kanawa, kaha kamweshi kulikomokelako. Tachikizenu ngwenu Liyavolo ikiye ali nakuyula kano kaye, ngocho mukaye muli ukalu  wauvulu. Yehova ali nangolo jakunongesa kano kaye kala lwola nasake, oloze navandamina lwola luze atongola. (Loma 9:22) Chamokomoko naukalu uli nakusoloka mukaye, Yehova chatwalaho lika kukakachila palanga nomu mwakanongesa kano kaye. Tushimutwilenu jino havyuma 9 vize Yehova nasololanga lukakachila.

5. Uno lijina lyaKalunga vanalisaulanga ngachilihi, kaha mweji kwivwanga ngachilihi hachuma kana?

⁵ Kusaula lijina lyenyi. Yehova azanga lijina lyenyi kaha asaka vatu vosena valimonenga kupwa lyalilemu. (Isa. 42:8) Oloze vatu vanasaulanga lijina lyenyi hamyaka kafwe 6,000. (Samu 74:10, 18, 23) Chuma kana chaputukilile mulitepa lyaEtene omu Liyavolo (kulumbununa “Muka-lusongi,”) avangijikilile Kalunga ngwenyi apwile nakuswekela vaAlama naEve vyuma vyamwaza vize vyatelelele kuvalingisa kachi vawahilile. (Kupu. 3:1-5) Kufuma vene haze, vatu vanavangijikilanga Yehova ngwavo eji kuswekelanga vatu vyuma vyamwaza. Yesu evwilenga kupihya havyuma vyavipi vize vatu vahanjikilenga halijina lyaIse. Echi chikiko chamulingishile anangule tumbaji twenyi mwakulombela ngwenyi: “Ove Setu uli mwilu, lijina lyove lipwenga lyajila.”—Mateu 6:9.

6. Mwomwo ika Yehova netavishila vatu valiyule vavene hatando yayisuku?

⁶ Kufumbukila wata wenyi. Yehova ikiye atamo kuyula melu namavu, kaha chiyulo chenyi chapwa chakwoloka. (Kuso. 4:11) Oloze Liyavolo ahungumwishile vangelo navatu vashinganyeke ngwavo Kalunga katamo kuyulako. Shikaho, echi chihande chakufumbukila wata waYehova kaveshi kuhasa kuchivatula mulikumbi lyangongoko. Echi chikiko chalingisa Kalunga etavise vatu valiyule vavene hatando yayisuku mangana vamone ngwavo vatu kaveshi kuhasa kuliyula vavene chakuzeneka kuvakafwa kuli Tengiko. (Yele. 10:23) Hakuwana nge Kalunga atwama namuchima wakutalilila chikiko, ngocho vatu vosena navakatachikiza ngwavo ikiye kaha atamo kuyula mwilu nahano hamavu. Kaha nawa navakatachikiza ngwavo chiyulo chenyi chikiko chakwoloka, kaha nawa Wangana wenyi ukiko kaha naukaneha kuunda namukingo hano hamavu.

7. Veya vanafumbukilanga Yehova kaha mwakavalinga ngachilihi?

⁷ Kulikanga chavana venyi vamwe vamwilu navahamavu. Yehova atengele vana venyi vamwilu navahamavu mujila yakukupuka. Oloze mwanenyi umwe wamwilu alikangile nakupwa Satana (kulumbununa “Muka-kulikanga,”) ngocho ahungumwishile vaAlama naEve vaze vapwile vakukupuka valikange kuli Yehova. Kaha ahungumwishile cheka vangelo veka navatu mangana valikange kuli Kalunga. (Yuta 6) Mukuhita chamyaka, vatu vamwe vamumuyachi waIsalele vaze Kalunga asakwile valikangile kuli Kalunga nakuputuka kulemesa tulunga vamakuli. (Isa. 63:8, 10) Yehova evwile kupihya omu vatu jenyi valikangile. Oloze chatwalaho lika kukakachila palanga nomu mwakanongesa vaka-kulikanga vosena. Halwola kana Yehova navangamba jenyi vakushishika navakawahilila chikuma omu Yehova mwakanongesa kano kaye kakuhuka.

8-9. Makuli muka veji kuhanjikanga vatu hali Yehova, kaha vyuma muka twatela kulinga?

⁸ Makuli aLiyavolo. Satana avangijikile Yopa kuhakilako vene navangamba jaYehova vakushishika vosena ngwenyi, veji kuzachilanga Kalunga mangana vanganyalileho. (Yopa 1:8-11; 2:3-5) Satana chatwalaho lika kuvangijikila vangamba jaKalunga. (Kuso. 12:10) Tunahase kusolola ngwetu Satana apwa muka-makuli hakutwalaho lika kukakachila mukala ukalu natumona, nakupwa lika vakushishika kuli Yehova mwomwo yakumuzanga. Nge natupwa lika nalukakachila kaha Yehova mwatukisula ngana muze akiswile Yopa.—Yako. 5:11.

 ⁹ Satana eji kuzachisanga vatwamina vamukwitava chamakuli mangana vanangule vatu ngwavo Kalunga apwa waukenya kaha nawa ikiye eji kunehanga ukalu kuvatu. Chakutalilaho, vamwe veji kunangulanga ngwavo nge kanyike nafu, Kalunga ikiye namumbate mangana apwenga kangelo mwilu. Chikupu vene kunangula kana cheji kusaulanga Kalunga. Oloze etu twatachikiza ngwetu Yehova apwa setu wazangi. Kachi nge tunakuviza misongo yayinene chipwe nge kausoko ketu nafu, katweshi kuhana Kalunga mulongako. Oloze twatachikiza ngwetu kweseka nalwola atongola, mwakoka vaveji nakusangula vafu. Twatela kulweza kala mutu wosena uze mwasaka kwivwilila ngwetu Yehova apwa Kalunga wazangi. Echi nachilingisa Yehova alangulule uze eji kumutombanga.—Vishi. 27:11.

10. Uno mukanda waSamu 22:23, 24 wasolola vyuma muka hali Yehova?

¹⁰ Kumona vangamba jenyi vanakuyanda. Yehova apwa Kalunga wakutetela. Ngocho eji kwivwanga kupihya nge mwamona tuli nakuyanda mwomwo yakutuyanjisa chipwe misongo chipwe mwomwo yatutenga twetu. (Tangenu Samu 22:23, 24.) Yehova atachikiza ukalu tunakuhitamo, ngocho mwakaukumisa kulutwe. (Esekesenuko Kulovoka 3:7, 8; Isaya 63:9.) Tuli nakutalilila kulwola luze “mwakahunda masoji osena kumeso [etu], kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kuso. 21:4.

11. Uno Yehova afwila kukalinga chuma muka kuli vangamba jenyi vaze vafwa?

¹¹ Kufwa chavangamba jenyi. Yehova afwila kukamona vangamba jenyi vakushishika vaze vafwa. (Yopa 14:15) Achishinganyekenu omwo Yehova afwila kukamona sepa lyenyi Apalahama. (Yako. 2:23) Kaha nawa afwila kukamona Mose, mutu uze ahanjikilenga nenyi “meso nameso.” (Kulo. 33:11) Kaha nawa afwila kukamona Ndavichi navakwavo vaka-kwimba jisamu navamwimbila myaso  yamwaza yakumwalisa. (Samu 104:33) Numba tuhu ava masepa jenyi vasavala tulo twakufwa, oloze Yehova kavavulyamako. (Isa. 49:15) Eji kwanukanga vilinga vyavo vize vapwilenga navyo. Tunahase kwamba ngwetu, “kuli ikiye vosena vavatonyi.” (Luka 20:38) Likumbi limwe mwakavasangula nakukevwilila cheka kukulomba chavo nakwitavila vamulemese. Kachi nge mwafwisa kausoko kenu chipwe sepa lyenu, kaha mazu kana atela kumivendejeka.

12. Chuma muka cheji kwivwisanga Yehova kupihya chikuma?

¹² Kumona vatu vali nakuvayanjisa kuli vaka-kuhuka. Omu vatu vaputukile kulikanga muEtene, Yehova atachikijile ngwenyi vilinga vyavipi navikavulilako numba jino akavifumiseko. Yehova ahunga vilinga vyavipi, nakuhengesa chiyulo naukenya. Eji kuzakamanga vatu vaze kaveshi namutu wakuvakingako. Chakutalilaho, eji kuzakamanga vanginga navatuliwe. (Zeka. 7:9, 10) Yehova eji kwivwanga kupihya chikumanyi nge mwamona vangamba jenyi vakushishika vali nakuvayanjisa nakuvahaka mutumenga. Tachikizenu ngwenu amizanga muvosena enu muli nakukakachila muukalu hamwe naikiye.

13. Kalunga ali nakumona vyuma muka vyavipi vanakulinga vatu, kaha chuma muka mwakalinga?

¹³ Kumona vatu vali nakulinga ujila. Satana asaka vatu vaze vatenga muchifwanyisa chaKalunga valinge vyuma vyavipi. Omu Yehova amwene ngwenyi “kuhuka chavatu chinatoho chikuma” mumakumbi aNowa, “evwile kupihya havatu vaze atengele hamavu, kaha evwile kukola kumuchima wenyi.” (Kupu. 6:5, 6 kwinyikila chamwishi, 11) Uno vilinga mukaye vinawahilako tahi? Nduma. Liyavolo ali nakwivwa kuwaha hakumona omu ujila unalisale mukaye kuhakilako vene nakulisavala chavatu vausonyi woumwe. (Efwe. 4:18, 19) Satana eji kwivwanga kuwaha chikumanyi nge mwahungumwisa ngamba yaYehova alinge shili yayinene. Omu lwola atongola Yehova nalukaheta, mwakanongesa vatu vosena vaze veji kulinganga vyuma vyavipi.

14. Uno vatu vanakulinga vyuma muka kuvyuma atenga Kalunga?

¹⁴ Kumona vatu vali nakwenyeka vyuma vyakutenga. Vatu vali ‘nakushinyinyika vakwavo vatu mangana vavayanjise,’ kaha nawa vali nakwenyeka mavu natunyama vize Yehova atenga nakuvihana kuvatu mangana vavilamenga. (Kwambu. 8:9; Kupu. 1:28) Vaka-sayasi vamwe vamba ngwavo vyuma vanakulinga vatu kutunyama nakumitondo chinakusolola nge mukuhita chamyaka yayindende, tunyama namitondo kavyeshi kukapwako chekako. Echi chikiko chinalingisa vatu valizakamine havyuma vyakutenga. Oloze twawahilila hakutachikiza ngwetu Yehova atushika ngwenyi ‘mwakenyeka vaze veji kwenyekanga mavu’ nakwalumuna ano mavu kupwa palachise.—Kuso. 11:18; Isa. 35:1.

15-16. Chuma muka chatela kutulingisa tukakachile muukalu ngana mwaYehova? Hanenu chakutalilaho.

¹⁵ Achishinganyekenu omu Setu wamwilu Yehova nakakachilanga hakumona vyuma vyavipi vinasolokanga hamyaka yayivulu. (Talenu lipwata lyakwamba ngwavo “ Uno Yehova Ali Nakukakachila Muvyuma Muka?”) Yehova nahase kunongesa kano kaye kakuhuka kala lwola. Oloze muchima wenyi wakutalilila chikiko unanehe kutokwa kuli etu vavavulu. Achishinganyekenu hachakutalilaho chino. Kachi nge lunga napuwenyi navavalweza kuli ndotolo ngwavo mwanavo ali mujimo ali naukalu, kahomu mwasemuka keshi kupwa wakulikangula kanawako, mukuhita chalwola nawa mwafwa. Numba tuhu vanavalweza vyuma kana, oloze omu mwasemuka ou mwanavo ou lunga napwevo navawahilila. Kuzanga mwanavo nachivalingisa vamuzakame nakufwila kukakachila mukala ukalu navamona.

¹⁶ Chochimwe nawa, navana vaAlama naEve veji kusemukanga nashili. Chipwe ngocho Yehova avazanga kaha nawa eji kuvazakamanga. (Yowa. 1, 4:19) Yehova nalihandununa navisemi  tunavuluka muchakutalilaho mwomwo ikiye nahase kukumisa ukalu. Kaha nawa atongola lwola lwakukafumisako ukalu wosena uze vali nakumona vatu. (Mateu 24:36) Chikupu vene, zangi atwama nayo Kalunga yatela kutulingisa tukakachile muukalu ngana mwaikiye.

17. Uno mazu atwama hali WavaHepeleu 12:2, 3 anahase kutukafwa ngachilihi tupwenga nalukakachila?

¹⁷ Yehova atuhana chakutalilaho chamwaza chakupwa nalukakachila. Yesu alondezezelenga chakutalilaho chaIse chakupwa nalukakachila. Omu Yesu apwile hano hamavu, omikile chamokomoko nakumwamba mazu amapi, nakumwivwisa sonyi, nakumusukika hachitondo chakuyanjishila mwomwo yajishili jetu. (Tangenu WavaHepeleu 12:2, 3.) Chakutalilaho chaYehova chakupwa nalukakachila chakafwile Yesu omike muukalu. Chakutalilaho kana chinahase kutukafwa nayetu.

18. Uno kweseka namukanda WaPetulu 2, 3:9, vyuma muka vinakusoloka mwomwo yamuchima waYehova wakutalilila vatu chikoki?

¹⁸ Tangenu WaPetulu 2, 3:9. Yehova atachikiza lwola lwakutamo lwakunongesa kano kaye kakuhuka. Muchima wenyi wakutalilila chikoki unalingisa vatu vavavulu vamutachikize, nakuputuka kumulemesa. Vatu vavavulu vanawahilila hakutachikiza ngwavo muchima waYehova walukakachila unavalingisa vasemuke, nakumuzanga nakulihana kuli ikiye. Hakuwana nge etu vavavulu tuli nakukakachila chamokomoko nakala ukalu tuli nakumona, echi nachikasolola hatoma nge chapwile chakutamo kuli Yehova kutalilila vatu chikiko.

19. Chuma muka twatela kulinga, kaha fweto muka nayikafumamo?

¹⁹ Chakutalilaho chaYehova chinatunangula nge tunahase kukakachila muukalu oku tunawahilila. Chamokomoko naukalu uze ali nakuneha Satana, Yehova natwaleho lika kupwa “Kalunga wakuwahilila.” (Chimo. 1, 1:11) Nayetu twatela kutwalaho lika kupwa vakuwahilila nakuvandamina Yehova omu mwakajilika lijina lyenyi, nakuhakwila wata wenyi, nakukumisa vyuma vyavipi vyosena nakukumisa ukalu wetu tunakumona oholyapwa. Shikaho, tutwalenuho lika kukakachila hakutachikiza ngwetu naSetu wamwilu eji kukakachilanga. Nge natulinga ngocho, kaha natukamona kutesamo chamazu akwamba ngwavo: “Awahilila mutu uze mwakakachila lika hakuhita mucheseko, mwomwo omu navamwivwila kuwaha, kaha mwakatambula muchama wakuyoya uze ashikile Yehova kuuhana kuli vaze navamuzanganga lika.”—Yako. 1:12.