Yehova asaka vatu vaze navalimbata vapwenga vakuwahilila nakutwama hamwe haya myaka yosena. (Mateu 19:4-6) Nge munakusaka kwingila muulo, kaha munahase kuwana ngachilihi mutu wamwenemwene wakulisoka nenyi? Hakuwana nge Yehova ikiye Tengi yetu, ngocho atachikiza vyuma vize twatela kulinga mangana tupwenga vakuwahilila muulo. Shikaho nge namukavangiza jindongi jize atuhana, kaha namupwa vakuwahilila muulo wenu. Tushimutwilenuko hajindongi jimwe.

Chatete, twatela kutachikiza chishina chino chachilemu chakwamba ngwavo: “Muchima wapwa uka-kutangisa kuhambakana vyuma vyosena, kaha wafwila kulinga cheshocho unasake.” (Yele. 17:9) Kachi nge vatu vaze vali nakusaka kulimbata vanaputuka kulisesembwa vanahase kulivwila chikuma peha, ngocho chinahase kuvakaluhwila kusakula kanawa vyakulinga. Kakavulu nge vatu navasaka kulimbata mwomwo yakulivwila peha, kaha kaveshi kukapwa vakuwahilila muulo wavoko. (Vishi. 28:26) Shikaho nachipwa chakuhenga kuzanga chikuma mutu uze namusaka kukalimbata nenyi, chipwe kumushika vyuma vize namukamulingila shimbu kanda mulitachikize kanawa.

Mukanda waVishimo 22:3 wamba ngwawo: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.” Jino mwomwo ika chapwila chaponde kuzachisa jikeyala jahaInternet mangana tuwane mutu wakulimbata nenyi? Chaluvinda, vatu vamwe vaputukile kulisesembwa navatu kuzachisa eji jikeyala, oloze kutwala muze vejile nakutachikiza ngwavo vatu kana vavongele. Kaha nawa vatu vanazachisanga majina amakuli hajikeyala kana mangana vambembejeka vatu nakuveva jimbongo. Shimbu jimwe ava vatu vanalyongonga ngwavo vapwa Vinjiho.

Tutalenu nawa ponde yikwavo yatwama hakuzachisa eji jikeyala. Jikeyala jimwe jeji kuzachisanga jipolongalamu jahakopyuta mangana vawane malunga namapwevo vaze vatela kulisesembwa. Oloze kakwatwama unjiho wakusolola nge jijila kaneji veji kuzachisanga jeji kukafwanga mutu atachikize mutu wamwenemwene wakulimbata nenyiko. Nachipwa chakuhenga kufwelela mujipolongalamu jahakopyuta vanatungu kuvatu mangana jimisakwile mutu wamwenemwene wakulimbata nenyi. Kukavangiza jindongi jamuMbimbiliya chikiko nachikafwa mutu awane mutu wamwenemwene wakulimbata nenyi.—Vishi. 1:7; 3:5-7.

Hamukanda waVishimo 14:15 hatwama lundongi lwakwamba ngwavo: “Mutu wakuzeneka chinyingi  eji kwitavilanga vyuma vyosena navamulweza, oloze mutu wakuzangama eji kuhehwojolanga jijila jenyi josena.” Chakavanga mwatela kutachikiza kanawa mutu uze namukasaka kukalimbata nenyi. Oloze chinahase kupwa chachikalu kumutachikiza kanawa kuzachisa makina. Numba tuhu namutanga mijimbu yenyi nakushimutwila nenyi haInternet, oloze echi kachalumbununa nge mwamutachikiza kanawako. Vatu vamwe vawahililile omu vashinganyekele ngwavo vanawane mutu wamwenemwene wakulimbata nenyi hakuzachisa eji jikeyala, oloze jino omu valiwanyine namutu kana meso nameso kavamuzangile chekako.

Muka-kwimba jisamu ambile ngwenyi: “Kangweshi kulikata navaka-kutangisako. Ngweji kulihendanga kuli vaze veji kulyonganga kupwa vatu vavilinga vyamwaza.” (Samu 26:4) Vatu vavavulu vashinganyeka ngwavo, kachapwa chakuhenga kusoneka vyuma vyamakuli hajiakauti javo vatunga hali eji jikeyala kanako. Vatu kana veji kulyonganga kupwa vatu vavilinga vyamwaza mangana vakunyule vatu vavazange. Chapwa chachilemu kulihulisa vihula vino: Numba tuhu vatu vali hajikeyala kana navalyamba ngwavo vapwa Vinjiho jaYehova, kutala chikupu vene vavambapachisa tahi? Kutala vapwa vakuhya kushipilitu tahi? Kutala vavavumbika kuli vandumbwavo muchikungulwilo tahi? Uno vatwama napuho yayipi chipwe vapwa “vatu vavapi” vaze katwatela kulikata navoko tahi? (Koli. 1, 15:33; Chimo. 2, 2:20, 21) Kutala vanatemo kwingila muulo kweseka naVisoneka tahi? Mwatela kukumbulula vihula kana. Oloze chinahase kupwa chachikalu kuvikumbulula kachi nge kamwahulishile ndumbwenu uze atachikiza mutu kanako. (Vishi. 15:22) Ngamba yaYehova wakushishika keshi kuhasa kushinganyeka ‘kulikasa toka’ namutu uze ketavako.—Koli. 2, 6:14; Koli. 1, 7:39.

Hakuwana nge chapwa chaponde kuzachisa jikeyala jahaInternet mangana tuwane mutu wakulimbata nenyi, ngocho kuli jijila jeka jamwaza jize jinahase kumikafwa muwane mutu wamwenemwene wakukalimbata nenyi. Kulihi munahase kuwana mutu wamwenemwene wakukalimbata nenyi? Munahase kuwana mutu kana nge tuli kukukunguluka chachikungulwilo, nechi chachihanda, nechi changalila nakukunguluka cheka.

Nge katweshi nakulikungulwila hamwe navandumbwetuko pamo mwomwo yamusongo wachihita wakufwana nge COVID-19, kaha tweji kuzachisanga makina mangana tulikungulwile hamwe navandumbwetu, kuze tunahase kuwana vandumbwetu vaze vapwa vajike, nakufwila kuvatachikiza kanawa. Kukukunguluka kana munahase kwivwilila kuvihande navahanjika nomu navakumbululaho. (Chimo. 1, 6:11, 12) Kaha hanyima yakukunguluka munahase kushimutwila navo. Nge muli nakulihizumuna navandumbwenu kuzachisa polongalamu yahalikina yakuhanjika navatu oku muli nakuvamona, kaha munahase kukekesa omwo mutu uze muli nakufwila kukalimbata nenyi eji kuyoyelangamo navakwavo. Echi nachimikafwa mutachikize kanawa vilinga atwama navyo mutu kana. (Petu. 1, 3:4) Kaha mukuhita chalwola, munahase kulitachikiza kanawa, nakumona numba nge mwafwila vyuma vyovimwe, nakumona nawa numba nge munawane mutu wamwenemwene wakukalimbata nenyi.

Kachi nge vatu navakavangiza jindongi jamuMbimbiliya mangana jivakafwe kuwana mutu wamwenemwene wakulimbata nenyi, kaha vanahase kukapwa vakuwahilila muulo wavo. Kaha navatesamo mazu atwama mumukanda waVishimo akwamba ngwavo: “Ou mwawana pwevo [chipwe lunga] wamwenemwene nawane chuma chamwaza, kaha Yehova mwamwivwila uselewa.”—Vishi. 18:22.