1. Yehova asaka vyuma muka makumbi ano?

 MAKUMBI ANO Kalunga asaka mujimbu wamwaza waWangana tuwambulule kumavu kwosena. (Mako 13:10; Chimo. 1, 2:3, 4) Ou wapwa himulimo waYehova, kaha atongola Mwanenyi azanga mangana autwaminyine. Hakuwana nge vali nakututwaminyina kuli Yesu, ngocho mulimo kana natuuzata nakuukumisa kanawa, ngana muze Yehova asaka shimbu kanda kukuma chizenga.—Mateu 24:14.

2. Vyuma muka natushimutwila muchihande chino?

² Muchihande chino natushimutwila omwo Yesu ali nakuzachisa “ndungo [yenyi] wakushishika wakuzangama” hakutuhana kulya chakushipilitu nakutwaminyina vaka-kumukavangiza mumulimo wakwambulula uze wapwa waulemu chikuma. (Mateu 24:45) Natumona nawa vyuma twatela kulinga mutu himutu mangana tukundwize Yesu nandungo wakushishika.

3. Ngolo muka vamuhana Yesu?

³ Yesu ali nakutwaminyina mulimo wakwambulula. Uno twatachikiza ngachilihi? Shimbu kanda Yesu ayenga mwilu, aliwanyine navaka-kumukavangiza vakushishika kupili yimwe muNgalileya. Avalwezele ngwenyi: “Wata wosena wamwilu nahamavu vananguhanewo lyehi.” Ivwenu mazu akwavo avalwezele, ambile ngwenyi: “Shikaho yenunga mukanangule vatu vakumafuchi osena vakapwe tumbaji.” (Mateu 28:18, 19) Yesu vamuhana nawa ngolo jakutwaminyina mulimo wakwambulula.

4. Mwomwo ika twatela kufwelela ngwetu Yesu achili nakutwaminyina mulimo wakwambulula?

 ⁴ Yesu ambile ngwenyi mulimo wakwambulula nakunangula vatu vapwenga tumbaji, naukaheta “kumafuchi osena.” Kaha ambile nawa ngwenyi mwapwanga navaka-kumukavangiza “makumbi osena palanga nakuchikukulwishi chakatwamino kamyaka yino.” (Mateu 28:20) Mazu kana asolola nge Yesu mwatwalaho lika kutwaminyina mulimo wakwambulula kuheta nakumakumbi ano.

5. Uno tuli nakulingisa ngachilihi upolofweto wahali Samu 110:3 utesemo?

⁵ Yesu kalizakaminyine ngwenyi vaka-kuzata navakakeha kuchikukulwishi chakatwamino kamyaka yinoko. Atachikijile ngwenyi mazu vapolofwetele kuli muka-kwimba jisamu nawakatesamo akwamba ngwavo: “Vatu jove navakalihana halikumbi lize naukatwaminyina maswalale jove kujita.” (Samu 110:3) Kachi nge muli nakwazana mumulimo wakwambulula kaha muli nakukundwiza Yesu nandungo wakushishika nakulingisa nawa upolofweto kana utesemo. Vatu vali nakuzata mulimo kana numba tuhu vali nakumona ukalu.

6. Ukalu umwe muka vali nakumona vaka-kwambulula Wangana makumbi ano?

⁶ Ukalu umwe veji kumonanga vaka-kwambulula Wangana shina kuvafumbukila. Vaka-kulikanga kuli Kalunga navatwamina vamukwitava, navaka-mapolitiki vanalwezenga vatu mijimbu yamakuli kutalisa kumulimo wetu. Kachi nge vausoko wetu, navakwetu vaka-milimo navatu veka twatachikiza, navavahungumwisa namijimbu kaneyi yamakuli, kaha vanahase kutushinyinyika twechenga kuzachila Yehova nakulitwamina kwambulula mujimbu. Mumafuchi amwe vandumbwetu vali nakuvevwisa woma, nakuvayanjisa nakuvakwata, nakuvahaka mutumenga. Katwalikomokela hachuma kanako mwomwo Yesu ambile ngwenyi: “Navakamihunga kuli vaka-mafuchi osena mwomwo yalijina lyami.” (Mateu 24:9) Vyuma tuli nakuhitamo vyakutuhunga kuli vaka-kole jetu, vyasolola nge vali nakutwivwila kuwaha kuli Yehova. (Mateu 5:11, 12) Liyavolo ikiye ali nakulingisa vatu vatufumbukile. Oloze Yesu atwama nangolo kuhambakana Liyavolo. Mujimbu wamwaza uli nakuheta kuvatu vakumafuchi osena mwomwo yakutukafwa kuli Yesu.

7. Unjiho muka uze munamono unasolola nge mazu ahali Kusoloka 14:6, 7 ali nakutesamo?

⁷ Ukalu ukwavo veji kumonanga vaka-kwambulula Wangana shina, vatu vaze veji kwambulilanga veji kuhanjikanga malimi akulisezaseza. Oloze muchakumwenesa chize Yesu amwenesele kaposetolo Yowano, ambile ngwenyi mujimbu wamwaza naukahonesa ukalu kana mumakumbi etu. (Tangenu Kusoloka 14:6, 7.) Mujila muka? Tuli nakwambulila vatu vavavulu mujimbu waWangana. Makumbi ano, vatu mukaye kosena vali nakutanga mikanda yahanjika haMbimbiliya hakeyala yetu ya jw.org mumalimi akuzomboka 1,000. Lizavu lyaKutwaminyina lyetavishile kwalumuna mukanda waLivwise Kuwaha Kuyoya Haya Myaka mumalimi akuzomboka 700. Mukanda kana hichinoma chimwe tuli nakuzachisa hakunangula vatu vapwenga tumbaji. Kuli nawa kulya chakushipilitu chatuveveve chize chili mujivindiyo, namikanda yamuvasona vatupuputa. Tuli nakumona omwo upolofweto wamuMbimbiliya uli nakutesamo, vatu “vakumalimi akumafuchi osena” vali nakulinangula kuhanjika “lilimi litoma” lize lyapwa muchano. (Zeka. 8:23; Zefwa. 3:9) Vyuma vyosena evi vili nakutesamo mwomwo yakututwaminyina kuli Yesu Kulishitu.

8. Nganyo muka yinafumumo lyehi hakwambulula mujimbu wamwaza?

⁸ Makumbi ano, vatu vakuzomboka jimiliyoni 8 vamumafuchi 240 vali muliuka lyaYehova. Kaha vatu vavavulu vali nakuvambapachisa  mwaka himwaka. Ava tumbaji vavahya vali nakuvwala “mutu wamuhya,” kulumbununa kupwa navilinga vyavaka-Kulishitu. (Kolo. 3:8-10) Vavavulu vapwilenga vaka-ujila, vilyanyi, navaka-kumona vakwavo ulumbi, oloze valumuka. Upolofweto watwama hali Isaya 2:4 uli nakutesamo mwomwo vatu kana ‘kaveshi nakulinangula cheka jitako.’ Hakuwana nge tuli nakuzata nangolo mangana tuvwale mutu wamuhya, ngocho tuli nakusolola nawa ngwetu tuli nakukavangiza kalama ketu Kulishitu Yesu. (Yowa. 13:35; Petu. 1, 2:12) Mwomwo ika vyuma kana vili nakusolokela? Mwomwo Yesu ali nakutukafwa.

9. Kweseka naMateu 24:45-47, vyuma muka ahanjikile Yesu ngwenyi navikasoloka hamakumbi akukuminyina?

⁹ Tangenu Mateu 24:45-47. Yesu ahanjikilile chimweza ngwenyi hamakumbi akukuminyina mwakatongola “ndungo wakushishika wakuzangama” uze mwakawahisanga kulya chakushipilitu. Shikaho twafwelela ngwetu ou ndungo mwazata nangolo makumbi ano. Kaha omu mukiko ali nakulinga. Kalama ketu nazachisa eli lizavu lyalindende lyamalunga vakuwavisa mangana awahishile vatu jaKalunga navatu vakuwahilila kulya chakushipilitu “halwola lwakutamo.” Ava malunga kavalimona kupwa nge hivamyata halufwelelo lwavandumbwavoko. (Koli. 2, 1:24) Oloze vatachikiza ngwavo Yesu Kulishitu ikiye apwa ‘twamina, kaha nawa kapitau’ kavatu jenyi.—Isa. 55:4.

10. Kweseka namikanda yili hamivwimbimbi, umwe ulihi wamikafwile muputuke kuzachila Yehova?

¹⁰ Kufuma vene mu 1919, ndungo wakushishika nawahisanga mikanda yakulisezaseza mangana vatu vakuwahilila vaputuke kulinangula Mazu aKalunga. Mu 1921, ndungo alowele mukanda waThe Harp of God (Kalyalya kaKalunga) uze wakafwile vatu vakuwahilila valinangule muchano wamaputukilo wamuMbimbiliya. Omu mwahichile lwola, valoweleleleko cheka  mikanda yeka. Mukanda muka wamikafwile mutachikize Setu wamwilu nakumuzanga? Uno wapwile mukanda waLet God Be True, (Kalunga Apwenga waMuchano)” nyi Mucano Uli Nakutetekela Kumwono Wamyaka Yosena, nyi You Can Live Forever in Paradise on Earth, (Unahase Kutwama Haya Myaka Yosena muPalachise Hano haMavu) nyi Chinyingi Chize Cheji Kutwaminyinanga kuKuyoya chaHaya Myaka Yosena, nyi Uno Chikupu Mbimbiliya Yanangula Vyuma Muka?, nyi Mbimbiliya Nayitunangula Vyuma Muka? nyi ou mukanda wetu wauhya waLivwise Kuwaha Kuyoya Haya Myaka. Mikanda yoseneyi vayitungile mangana yitukafwe tunangule vatu vapwenga tumbaji, kaha yikiko twasakiwile halwola kana.

11. Mwomwo ika chapwila chachilemu etu tuvosena kutambula kulya chakushipilitu?

¹¹ Tuvosena kuhakilako vene navatu vakuwahilila twasakiwa kulya chakutafunya chakushipilitu. Kaposetolo Paulu asonekele ngwenyi: “Kulya chakutafunya chapwa chavatu vanakolo lyehi.” Kaha ahanjikile nawa ngwenyi kukavangiza vyuma natulinangula nachitukafwa ‘tuhandunune kwoloka nakuhenga.’ (Hepe. 5:14) Chinahase kupwa chachikalu kukavangiza jishimbi jaYehova omu tuli nakuyoyela mukaye muze vatu vavavulu vali navilinga vyavipi chikuma. Oloze Yesu achimona ngwenyi chapwa chakutamo kutuhana kulya chakushipilitu chakutwivwisa chipepa mangana tuzamise lufwelelo lwetu. Echi kulya kana cheji kufuminyinanga muMbimbiliya, Mazu aKalunga vahwima. Ndungo wakushishika eji kuwahisanga nakupangila kulya kana hakumutwaminyina kuli Yesu.

12. Uno tunasolola ngachilihi ngwetu twavumbika lijina lyaKalunga, ngana muze alingile Yesu?

¹² Ngana muze alingile Yesu, nayetu tweji kuvumbikanga lijina lyaKalunga. (Yowa. 17:6, 26) Chakutalilaho, mu 1931 twaputukile kulivuluka lijina lyamuVisoneka ngwetu Vinjiho jaYehova. Shikaho kulivuluka lijina  kana chasolwele nge twamona lijina lyaKalunga kupwa lyalilemu, nakusaka nawa vatu vatuvulukenga lijina kana. (Isa. 43:10-12) Kufuma vene muOctober mumwaka kana uze, lijina kana linasolokanga halipapilo lyahelu lyamangazini yino yaKaposhi Kakutalila. Kaha nawa muMbimbiliya yaVisoneka vyaKaye Kakahya vanahakemo lijina lyaKalunga havisoneka haze lyapwile muMazu enyi. Chaluvinda, jichachi jamuKulishitendomu jafumisa lijina kana mujiMbimbiliya javo jajivulu.

13. Vyuma muka vyamilingisa mukunyuke ngwenu Yesu ali nakuzachisa “ndungo wakushishika wakuzangama”? (Yowa. 6:68)

¹³ Yesu nahakeko liuka makumbi ano hano hamavu, kuhichila muli “ndungo wakushishika wakuzangama” mangana likundwize kulemesa chamuchano. Uno mweji kwivwanga ngachilihi haliuka kana? Pamo mweji kushinganyekanga mazu akaposetolo Petulu, uze ahanjikile kuli Yesu ngwenyi: “Natuya kuli iyaze? Ove uli namazu akuyoya chahaya myaka yosena.” (Yowa. 6:68) Uno etu vamwe kachi tuli kulihi nge katwejile muliuka lyaYehovako? Kulishitu eji kuzachisanga liuka kana nakumona ngwenyi, vali nakutulisa kanawa kushipilitu. Eji kutunangulanga nawa tuzate kanawa mulimo wetu wakwambulula. Kaha nawa eji kutukafwanga tuvwale “mutu wamuhya,” mangana vatwivwile uselewa kuli Yehova.—Efwe. 4:24.

14. Uno kupwa muliuka lyaYehova chinaminganyalisa ngachilihi mulwola lwamusongo wachihita waCOVID-19?

¹⁴ Yesu eji kutuhananga jindongi jamwenemwene mulwola lwalukalu. Nganyo yakukavangiza jindongi kana yasolokele hatoma omu musongo wachihita waCOVID-19 waputukile. Halwola kana vatu mukaye chavakaluhwilile kutachikiza vyuma vyakulinga. Oloze yetu twatachikijile vyakulinga mwomwo Yesu atuhanyine  jindongi jakutukafwa tupwenga vakukingiwa. Vatulwezele tuvwalenga tumahina kukanwa kachi nge tuli kuvatu vavavulu nakulisosoloka. Vakulwane vavalwezele vatuminenga vandumbwavo vosena muchikungulwilo, nakumona ngwavo vali kanawa kumujimba nakushipilitu. (Isa. 32:1, 2) Twatambwilenga nawa jindongi jeka jakutukafwa nakutukolezeza kuhichila mumalipoti akufuma kuLizavu lyaKutwaminyina.

15. Jindongi muka twatambwile jamwakukungulukila namwakuzachila mulimo wetu wakwambulula mulwola lwamusongo wachihita, kaha vyuma muka vyafuminemo?

¹⁵ Mulwola lwamusongo wachihita twatambwile nawa jindongi jamwakukungulukila, namwakuzachila mulimo wakwambulula. Nakushimbula chiku, twaputukile kukunguluka chachikungulwilo, nachachihanda, nachangalila hakuzachisa makina oku tunakumona vakwetu. Twaputukile nawa kwambulula hakusonekela vatu mikanda nakuvatumina jishinga. Yehova natukisula hakukilikita chetu. Mujingalila jamitango yayivulu vaka-kwambulula vanavulilako chikuma. Kaha nawa mulwola kanelu lwamusongo wachihita, vatu vavavulu vanapunga navyakuliwana navyo vyamwaza vyakutukolezeza.—Talenu lipwata lyakwamba ngwavo “ Yehova Eji Kukisulanga Mulimo Wetu Wakwambulula.”

16. Vyuma muka tunafwelela?

¹⁶ Pamo vatu vamwe vashinganyekele ngwavo liuka linakaluhwisa chikuma jishimbi kutalisa kumusongo wachihita. Oloze mukuhita chalwola chasolokele hatoma nge jindongi jize twatambwilenga japwile jamwenemwene. (Mateu 11:19) Shikaho kushinganyeka hajila yazangi yize Yesu ali nakutwaminyinamo vatu jenyi nachitukafwa tufwelele ngwetu chamokomoko nomwo navikapwa vyuma kulutwe, Yehova naMwanenyi azanga navapwanga lika nayetu.—Tangenu WavaHepeleu 13:5, 6.

17. Uno mweji kwivwanga ngachilihi hakumitwaminyina kuli Yesu?

¹⁷ Twawahilila chikuma hakuwana nge Yesu ikiye twamina yetu. Kaha nawa twatwama muliuka muze vatu kavalihandula mwomwo yavisemwa vyakulisezaseza, namafuchi namalimiko. Tweji kutambulanga kulya chakushipilitu chakuwahisa kanawa nakutunangula nawa tuzate kanawa mulimo wetu wakwambulula. Kaha nawa mutu himutu vali nakumunangula mwakuvwalila mutu wamuhya namwakulisolwela zangi navakwavo. Chikupu vene, kuli vyuma vyatela kutulingisa tulisase mwomwo Yesu ikiye kalama ketu.