1. Uno kulomba kuli Yehova twatela kuchimona kupwa chuma muka?

 TENGI uze atengele melu namavu, atuhana wana waulemu wakulombanga kuli ikiye. Achishinganyekenu hachumechi: Tunahase kulweza Yehova vyuma vyosena vili kumuchima wetu, hakala lwola namukala lilimi, chakuzeneka kuvangila kumushika ngwetu tuli nakusaka kulomba kuli ikiye. Tunahase kulomba kuli Yehova numba nge tuli muchipatela chipwe mukamenga, mwomwo tunatachikiza ngwetu Setu wazangi mwatwivwa. Twasakwilila Yehova hakutuhana wana kana.

2. Uno Mwangana Ndavichi asolwele ngachilihi ngwenyi amwene kulomba kupwa chachilemu?

² Mwangana Ndavichi amwene kulomba kupwa chachilemu. Embile mwaso uno kuli Yehova ngwenyi: “Kulomba chami chipwenga nge vyuma vyalivumba lyamwaza vanawahisa kumeso ove.” (Samu 141:1, 2) Mulwola lwaNdavichi, vyuma vyalivumba lyamwaza vyajila vize vazachishilenga mukulemesa chamuchano kuli vapilishitu, vaviwahishilenga kanawa. (Kulo. 30:34, 35) Ndavichi hakuvuluka vyuma vyalivumba lyamwaza, chasolola nge asakile kuvangila kushinganyeka kanawa vyuma mwahanjika kuli Ise wamwilu. Omu mukiko twafwila kulinga nayetu. Twasaka Yehova evwile kuwaha kulomba chetu.

3. Uno twatela kulomba ngachilihi kuli Yehova, kaha mwomwo ika?

³ Twatela kulomba kuli Yehova mukavumbi. Achishinganyekenu havyakumwenesa vyakukomwesa vamwenesele Isaya, naEzekele, naNdanyele naYowano. Numba tuhu mutu himutu amwene chakumwenesa chakulihandununa, oloze vyatwama noho vyalifwanyina. Vyakumwenesa vyosena vyasolwele nge Yehova apwa Mwangana wangolo. Isaya amwene “Yehova natwame halitanda lize lyapwile helu hakuzandama.” (Isa. 6:1-3)  Ezekele amwene Yehova natwame halitemba lyamwilu ‘lize vajingilikile nakumunyika nge muze eji kumunyikanga kongolo.’ (Ezeke. 1:26-28) Ndanyele amwene uze “Napungako Kufuma Kushikulu,” uze avwalile uvwalo utoma, kaha kulitanda lyenyi kwapwile nakwepuka milangi yakakahya. (Ndanye. 7:9, 10) Yowano nawa amwene Yehova natwamwe halitanda, lize vajingilikile kukongolo uze asolokele nge limelate wamafwo amatamba. (Kuso. 4:2-4) Kushinganyeka haupahu waYehova wakulipwila cheji kutwanukisanga wana waulemu wakulomba kuli ikiye, novyo chapwila chachilemu kulombanga kuli ikiye mukavumbi. Uno vyuma muka twatela kulomba?

4. Vyuma muka tunalinangula kuvyuma avangilile kuvuluka Yesu hali Mateu 6:9, 10?

⁴ Tangenu Mateu 6:9, 10. MuChihande ChahaPili, Yesu anangwile tumbaji twenyi valombenga mujila yize nayivwisa Kalunga kuwaha. Hanyima yakuhanjika ngwenyi “enu mwatela kulomba ngwenu,” Yesu avangilile kuvuluka vyuma vyavilemu vize vyapandama kuvyuma ajina Yehova. Vyuma kana shina kulomba lijina lyaYehova lipwenga lyajila, nakulomba Wangana wenyi wizenga uze naukanongesa vaka-kwimanyina Kalunga nakole vosena, nakulomba vyuma Kalunga mwakalinga hamavu nakuli vatu. Nge natuvulukanga vyuma kanevi mukulomba chetu, kaha natusolola ngwetu twamona vyuma ajina Kalunga kupwa vyavilemu.

5. Kutala chapwa chakutamo kulomba vyuma vyakupandama kuli etu vavene tahi? Tunatachikiza ngachilihi ngocho?

⁵ Vyuma vikwavo avulukile Yesu mukulomba, vyasolola nge chapwa chakutamo mutu kulomba vyuma vyakupandama kuli mutu ivene. Tunahase kulomba Yehova atuhane kulya chalikumbi lyalelo, nakutukonekela jishili jetu, nakutukinga kuvyeseko, nakutuyovola kuli uze wakuhuka. (Mateu 6:11-13) Nge natulombanga Yehova vyuma kana, kaha natusolola ngwetu twapendamina hali ikiye nakusaka kumwivwisa kuwaha.

6. Kutala twatela kuvulukanga kaha vyuma vize vyatwama mukulomba chaYesu chakutalilaho tahi? Lumbununenu.

⁶ Yesu kasaka vaka-kumukavangiza valondezeze kulomba chenyi chakutalilaho, halizu halizuko. Mukulomba chenyi chize alombelenga,  Yesu avulukilenga vyuma vyeka vyakulihandununahandununa vize vyapwilenga vyavilemu kuli ikiye halwola kana. (Mateu 26:39, 42; Yowa. 17:1-26) Chochimwe nawa, nayetu twatela kulomba kala vyuma tunalizakamina. Nge tuli nakusakula vyuma vyakulinga, kaha twatela kulomba Yehova atuhane mangana nakunangakana. (Samu 119:33, 34) Nge tuli nakusaka kuputuka mulimo waukalu, kaha twatela kulomba Yehova mangana atukafwe tutachikize mwakuzachila kanawa mulimo kana. (Vishi. 2:6) Visemi vanahase kulombelako vana vavo, kaha vana nawa vanahase kulombelako visemi javo. Etu tuvosena nawa twatela kulombelangako vilongesa vyetu vyaMbimbiliya, navaze tweji kwambulilanga. Chipwe ngocho, katwatela kukumina kaha hakulomba Yehova atukafweko.

7. Mwomwo ika twatela kwalisa Yehova mukulomba?

⁷ Twatela nawa kwalisanga Yehova mukulomba chetu. Kalunga kaha ikiye atamo kumwalisa. ‘Apwa wamwaza, kaha eji kukonekelanga.’ Apwa nawa “wakeke nakutetela, wakushipwokela kukwata utenu, wazangi yakwilila, wakushishika.” (Samu 86:5, 15) Shikaho twatela kwalisa Yehova mwomwo yomwo apwa navyuma eji kulinganga.

8. Vyuma muka vimwe tunahase kusakwilila Yehova? (Samu 104:12-15, 24)

⁸ Tweji kwalisanga Yehova mukulomba chetu nakumusakwilila havyuma vyamwaza eji kutulingilanga. Chakutalilaho, tunahase kumusakwilila hajitemo jaulombo wamwaza tweji kumonanga, nahavyakulya viyema vyakulisezaseza, nahamasepa vamwenemwene atuhana. Setu wazangi atuhana vyuma kanevi navyeka mangana tupwenga vakuwahilila. (Tangenu Samu 104:12-15, 24.) Chuma chachilemunyi tweji kumusakwililanga Yehova shina, hakutuhana kulya chachivulu chakushipilitu, nahavyuma vyamwaza atushika kutulingila kulutwe.

9. Chuma muka nachitukafwa twanukenga kusakwilila Yehova? (Wavaka-Tesolonyika 1, 5:17, 18)

⁹ Chinahase kupwa chachashi kuvulyama kusakwilila Yehova havyuma vyosena eji kutulingilanga. Vyuma muka vinahase kumikafwa muhone kuvulyamanga? Munahase kusoneka vyuma munalombo kuli Yehova nakukekesa mumone mujila nakumbulwilamo  kulomba kana. Kufumaho musakwililenu mukulomba hakumikafwa. (Tangenu Wavaka-Tesolonyika 1, 5:17, 18.) Achishinganyekenu hachumechi: Tweji kwivwinga kuwaha nakumona ngwetu vakwetu vatuzanga nge navatusakwilila havyuma tunavalingila. Chochimwe nawa, nge natwanukanga kusakwilila Yehova hakukumbulula kulomba chetu, kaha mwawahilila. (Kolo. 3:15) Chuma muka chikwavo chatela kutulingisa tusakwilile Kalunga ketu?

10. Kweseka naWaPetulu 1, 2:21, mwomwo ika twatela kusakwilila Yehova hakutuma Yesu hano hamavu?

¹⁰ Tangenu WaPetulu 1, 2:21. Twatela kusakwilila Yehova hakututumina Mwanenyi azanga mangana atunangule. Tweji kutachikizanga vyavivulu hali Yehova namwakumwivwishila kuwaha hakulinangula chiyoyelo chaYesu. Nge natufwelela wana waKulishitu, kaha natupandama chikuma kuli Yehova nakutwama mukuunda naikiye.—Loma 5:1.

11. Mwomwo ika tweji kulombelanga kuhichila mulijina lyaYesu?

¹¹ Tweji kusakwililanga Yehova mwomwo atwitavisa tulombenga kuhichila muli Mwanenyi. Yesu apwa jila yize Yehova eji kuzachisanga hakukumbulula kulomba chetu. Yehova eji kwivwililanga nakukumbulula kukulomba chize navalomba kuhichila mulijina lyaYesu. Yesu ambile ngwenyi: “Cheshocho chuma namulomba mulijina lyami, nanguchilinga, mangana Tata vamutohwese kuhichila muli Mwana.”—Yowa. 14:13, 14.

12. Chuma muka chikwavo chatulingisa tusakwilile Yehova hakutuhana Mwanenyi?

¹² Yehova eji kutukonekelanga jishili jetu kuhichila mundando yakusokola yaYesu. Visoneka vyavuluka Yesu kupwa ‘kapilishitu wakulitulaho wangocho uze atwama kuchilyo chalitanda lyaUze waUkelenga mumelu.’ (Hepe. 8:1) Yesu apwa ‘muka-kutukafwa uze ali naSetu.’ (Yowa. 1, 2:1) Twasakwilila Yehova hakutuhana Kapilishitu Wakulitulaho uze atachikiza kanawa tutenga twetu kaha nawa “eji kutulembelelangako.” (Loma 8:34; Hepe. 4:15) Hakuwana nge katwakupukako, ngocho katweshi kuhasa kulomba kuli Yehova chakuzeneka wana waYesuko. Tweji kusakwililanga chikuma Yehova hakutuhana Mwanenyi azanga chikuma kupwa wana waulemu.

13. Chuma muka alingile Yesu haufuku wamakumishilo shimbu kanda afwenga, chize chasolola nge azangile tumbaji twenyi?

¹³ Haufuku wamakumishilo shimbu kanda afwenga, Yesu alombeleleleko tumbaji twenyi halwola lwalusuku mangana Ise “[avalame] mwomwo yayauze wakuhuka.” (Yowa. 17:15) Echi chasolwele nge Yesu avazangile chikuma. Numba tuhu atachikijile ngwenyi kalinwomu ahite muukalu waunene, oloze alombeleleleko vaposetolo jenyi.

14. Natusolola ngachilihi ngwetu twazanga vandumbwetu vosena?

¹⁴ Nayetu nawa katwashinganyeka kaha haukalu wetuko, oloze tweji kulombelangako vandumbwetu vosena. Nge natulinga ngocho, kaha natusolola ngwetu tuli nakwononoka lushimbu atuhana Yesu lwakulizanganga navakwetu nakusolola nawa kuli Yehova ngwetu twazanga chikuma vandumbwetu. (Yowa. 13:34) Kulombelako vandumbwetu kachapwa kwenyeka lwolako. Mazu aKalunga atulweza ngwawo “kulembelela chamuka-kwoloka chatwama nangolo.”—Yako. 5:16.

15. Mwomwo ika vandumbwetu vasakiwa kuvalombelangako?

¹⁵ Hakuwana nge vandumbwetu vali nakumona ukalu wauvulu, ngocho vali nakusakiwa  kuvalombelangako. Tunahase kulomba Yehova avakafwe mangana vapwenga vakumika nge vanaviji, chipwe nge vali muukalu wakulijila, chipwe nge mulifuchi lyavo muli jita, chipwe nge vali nakuvayanjisa, chipwe nge vali muukalu weka. Twatela nawa kulombelangako vandumbwetu vaze vali nakulisuula kukafwa vaze vali muukalu. Pamo munahase kutachikizako vandumbwetu vamwe vaze vali nakumona ukalu. Munahase kulombelako ava vandumbwetu hakuvavuluka hamajina. Tweji kusololanga zangi yamwenemwene yakuzanga vandumbwetu hakulomba kuli Yehova avakafwe vapwenga vakumika.

16. Mwomwo ika twatela kulombelako vaze vali nakututwaminyina?

¹⁶ Vaze veji kutwaminyinanga muvikungulwilo veji kusakwililanga chikuma hakuwana nge tweji kuvavulukanga mukulomba chetu. Kaha kulomba kana cheji kuvakafwanga. Omu mukiko chapwile nakuli kaposetolo Paulu. Asonekele ngwenyi: “Ngulombelenungako nayami nawa, mangana vanguhane mazu omu nangulokolola mukanwa kami, mangana nawa nguhase kuhanjika nakumika hakujimbula vyuma vyajila vyakusweka vyamujimbu wamwaza.” (Efwe. 6:19) Namakumbi ano nawa, tuli navandumbwetu vaze vali nakututwaminyina vaze vapwa vasamalikita. Tweji kusololanga ngwetu twavazanga hakulomba Yehova avakafwe vazate kanawa milimo yavo.

17-18. Lwola muka vanahase kutulweza twimanyineko vakwetu mukulomba, kaha vyuma muka twatela kwanuka?

¹⁷ Shimbu jimwe vanahase kutulweza twimanyineko vakwetu mukulomba. Chakutalilaho, ndumbwetu wapwevo uze ali nakutetekela chilongesa chaMbimbiliya nahase kulweza mukwavo uze neza nenyi mangana alombe. Ou ndumbwetu vanalweze kulomba pamo katachikijile kanawa uze mutu ali nakulinangula Mbimbiliyako, ngocho pamo nahase kwitavila kulomba hanyima yakulinangula. Echi nachimukafwa atachikize kanawa vyuma atela kuvuluka mukulomba.

¹⁸ Ndumbwetu walunga vanahase kumulweza kulomba hakuliwana chakuya mumulimo wamuwande chipwe hakukunguluka chachikungulwilo. Vandumbwetu vaze vatwama namulimo wakulomba vatela kwanuka ovyo kwapwila  kukunguluka. Mutu nge ali nakulomba, katela kuvuluka mazu aze nawasolola nge ali nakuhuhumuna chikungulwilo chipwe kuchinangulako. Kaha nawa katela kuvuluka vyakuvilika mukulombako. Kukunguluka chachivulu vahakako minyutu 5 yamwaso nakulomba. Shikaho ndumbwetu uze ali nakulomba katela kuhanjika “mazu amavuluko,” chikumanyi kulomba chamaputukilo.—Mateu 6:7.

19. Chuma muka nachitukafwa tupwenga vakulizanga vyalikumbi lyaYehova lyakusopesa?

¹⁹ Twatela kumona kulomba kupwa chachilemu mukuyoya chetu, mwomwo likumbi lyaYehova lyakusopesa linapandama. Echi chikiko chalingishile Yesu ambenga ngwenyi: “Vangulukenunga lwola lwosena nakulembelelanga mangana mukahase kuchina vyuma vyosena evi navisoloka.” (Luka 21:36) Chikupu vene, kulombanga shimbu yosena nachitukafwa tupwenga vakutona kushipilitu kuchina likumbi lyaKalunga nalikatukasumuna.

20. Uno kulomba chetu nachihasa ngachilihi kupwa nge vyuma vyalivumba lyamwaza viyema?

²⁰ Vyuma muka tunashimutwila? Tunashimutwila ngwetu twamona kulomba kupwa chachilemu chikuma. Vyuma vyavilemu chikuma twatela kuvuluka mukulomba shina vize vyapandama kukujina chaYehova. Tweji kusakwililanga Kalunga hakutuhana Mwanenyi, nahaWangana wenyi uze uli nakuyula nakulombelangako nawa vandumbwetu. Chipwe ngocho, tunahase kulomba Yehova atukafwe tuwane vyakulikafwa navyo nakutukafwa nawa kushipilitu. Nge natushinganyekanga kanawa havyuma natuvuluka mukulomba chetu, kaha natusolola ngwetu twamona wana kana kupwa waulemu. Mazu natuvuluka nawapwa nge vyuma vyalivumba lyamwaza viyema kuli Yehova vize ‘eji kwivwilanga kuwaha.’—Vishi. 15:8.