1. Vyuma muka tunafwelela, kaha mwomwo ika?

 KUTALA cheji kumikaluhwilanga kushinganyeka ngwenu vyuma navikapwa kanawa kulutwe omu muli nakumona vyuma vili nakupihilako mukaye tahi? Vatu mujitanga kavalizanga chekako. Kaha nawa vatu muchivulu vanapu vilyanyi, vali nawa namuchima wakulizanga vavene. Vatu vavavulu cheji kuvakaluhwilanga kufwelela vaze vali nangolo jakuyula. Oloze ijivenu ngwenu, vyuma kanevi vinahase kumilingisa mufwelele ngwenu kulutwe vyuma navikapwa kanawa. Mwomwo ika? Mwomwo vatu vali nakulinga vyuma vize Mbimbiliya yahanjikilile chimweza kutalisa ‘kumakumbi akukuminyina.’ (Chimo. 2, 3:1-5) Kakweshi mutu wamangana nahase kukana ngwenyi upolofweto kana kaweshi nakutesamoko. Kaha kutesamo chaupolofweto kana chinasolola nge Kulishitu Yesu naputuka kuyula mwaMwangana waWangana waKalunga. Kuli upolofweto wauvulu uze wahanjika haWangana, oloze tunavulukako kaha umwe. Shikaho, hakusaka tuzamise lufwelelo lwetu, twatela kukekesa haupolofweto weka uze unatesamo mumyaka yakalinwomu.

2. Vyuma muka natushimutwila muchihande chino, kaha mwomwo ika? (Hanjikenu hamuvwimbimbi wahalipapilo lyahelu.)

² Muchihande chino natushimutwila (1) upolofweto uze nautukafwa tutachikize mwaka waputukile kuyula Wangana, (2) upolofweto uze nautukafwa tutachikize ngwetu Yesu naputuka kuyula mwaMwangana waWangana waKalunga, (3) upolofweto uze wasolola omwo vaka-kole jaWangana waKalunga navakavanongesa. Ngana muze tuvihanda twamuvwimbimbi navatuwanyisa hamwe mangana muvwimbimbi wosena usoloke, nakulinangula upolofweto wakulisezaseza cheji kutukafwanga tutachikize kanawa oho tunahete kweseka nakunoneka chaYehova.

3. Uno upolofweto wahali Ndanyele 7:13, 14 watufwelelesa vyuma muka kutalisa kuMwangana waWangana waKalunga?

³ Upolofweto wahali Ndanyele 7:13, 14 watufwelelesa ngwawo Kulishitu Yesu mwakapwa Muka-kuyula muWangana waKalunga. Muka-kuyula kana mwakapwa wamwenemwene. Vatu vakumafuchi osena navakawahilila ‘kumuzachila,’ kaha kaveshi kukamushisa kuli Muka-kuyula wekako. Upolofweto ukwavo wamumukanda waNdanyele wahanjikilile chimweza ngwawo, Yesu mwakatambula Wangana kukukuma chajitando 7 jaupolofweto. Kutala chachashi kutachikiza mwaka aputukile kuyula Yesu tahi?

4. Lumbununenu omwo mukanda waNdanyele 4:10-17 watukafwa tutachikize mwaka uze Kulishitu vamuswanyishile kupwa Mwangana. (Talenu nawa kwinyikila chamwishi.)

⁴ Tangenu Ndanyele 4:10-17. “Jitando 7” jemanyinako myaka 2,520. Myaka kana yaputukile mu 607 B.C.E., omu vaMbavilone vafumishile mwangana wamakumishilo halitanda lyaYehova muYelusalema. Myaka kana yakumine mu 1914 C.E., omu Yehova ahakile Yesu “ou vahana lisesa” halitanda kupwa Mwangana waWangana waKalunga. *—Ezeke. 21:25-27.

5. Jila yimwe muka tunahase kunganyala kuupolofweto ‘wajitando 7’?

⁵ Uno upolofweto kana unahase kutunganyalisa ngachilihi? Kutachikiza upolofweto ‘wajitando 7’ nachitukafwa tufwelele ngwetu Yehova eji kutesangamo jishiko jenyi mulwola lwakutamo. Yehova anonekele lwola naukaputuka kuyula Wangana, kaha lwola kana lwateselemo. Ngocho naupolofweto weka nawa naukatesamo halwola atongola. Chikupu vene, likumbi lyaYehova kalyeshi “kukakotokelako.”—Hamba. 2:3.

6. (a) Vyuma muka vili nakusoloka hano hamavu vize vinasolola nge Kulishitu ali nakuyula mwilu? (b) Uno upolofweto wahali Kusoloka 6:2-8 wasolola ngachilihi nge vyuma kana navikasoloka chikupu?

⁶ Omu Yesu apwile kwakamwihi nakukumisa mulimo wenyi hano hamavu, ahanjikilile chimweza vyuma navikasoloka mukaye vize navikakafwa vaka-kumukavangiza vakatachikize ngwavo naputuka kuyula mwilu. Vyuma vimwe avulukile shina jijita, nazala yakalombolombo namindenda. Ahanjikile nawa ngwenyi “kuvihela kweka nakweka” nakukapwa misongo yachihita. Kaha musongo umwe shina musongo wachihita waCOVID-19. Vyuma kana vinapu vyuma vimwe vize vyatwama hamukana wavyuma vize Mbimbiliya yavuluka ngwayo “chinjikizo” chakutachikijilaho kupwako chaKulishitu. (Mateu 24:3, 7; Luka 21:7, 10, 11) Yesu alwezele kaposetolo Yowano unjiho wakusolola nge vyuma kana navikasoloka chikupu. Yowano vamulwezele vyuma kana omu mwahichile myaka yakuzomboka 60 hanyima yakufwa chaYesu nakuya mwilu. (Tangenu Kusoloka 6:2-8.) Vyuma vyosenevi vinasolokanga kufuma vene halwola luze Yesu aputukile kuyula mu 1914.

7. Mwomwo ika ukalu unatohwela hano hamavu kufuma vene haze Yesu aputukile kuyula mwaMwangana?

⁷ Mwomwo ika vyuma mukaye vinapihilangako lika kufuma vene haze Yesu aputukile kuyula mwaMwangana? Chisoneka chaKusoloka 6:2 chahana unjiho ukwavo waulemu uze wasolola nge chuma chatete alingile Yesu omu apwile Mwangana shina kulwa jita. Uno jita kana ayizungile naveya? Azungile naLiyavolo navandemone jenyi. Kweseka namukanda waKusoloka  kapetulu 12, Satana vamufungulwile, kaha vamumbilile hano hamavu hamwe navandemone jenyi. Ngocho Satana akwachile matoto, kaha aputukile kuyanjisa vatu nakuneha “lamba hamavu.”—Kuso. 12:7-12.

8. Tunahase kunganyala ngachilihi hakumona omwo upolofweto wakutalisa kuWangana uli nakutesamo?

⁸ Uno upolofweto kana unahase kutunganyalisa ngachilihi? Vyuma vili nakusoloka mukaye navilinga vyavatu vinahase kutukafwa tutachikize ngwetu Yesu naputuka kuyula. Shikaho, nge natumona vatu vali namuchima wakulizanga vavene nakupwa vilyanyi, katwatela kupihililako. Oloze twatela kwanuka ngwetu, vali nakulingisa upolofweto wamuMbimbiliya utesemo. Chikupu vene, Wangana uli nakuyula. (Samu 37:1) Kaha nawa tachikizenu ngwenu ukalu nautohwelako lika omu Alamangetone yili nakupandama kwakamwihi. (Mako 13:8; Chimo. 2, 3:13) Twasakwilila Setu wazangi wamwilu hakutukafwa tutachikize ovyo ukalu mukaye uli nakutohwelako ngana.

9. Uno upolofweto vasoneka hali Ndanyele 2:28, 31-35 walumbununa ngachilihi chiyulo changolo chakaye chamakumishilo, kaha chiyulo kana chejile nakupwako lwola muka?

⁹ Tangenu Ndanyele 2:28, 31-35. Tuli nakumona omwo upolofweto kana uli nakutesamo makumbi ano. Chilota chaNevukataneza chasolwele vyuma navikasoloka “kumakumbi akukuminyina” nge Kulishitu naputuka kuyula. Hamukana wavaka-kole jaYesu vahamavu hatwama nachiyulo changolo chakaye chamakumishilo chize Mbimbiliya yahanjikilile chimweza. Chiyulo kana vachimanyinako ‘kuvilyachilo vyakufutula fwelu naunengu.’ Echi chiyulo changolo chakaye chaputukile lyehi kuyula. Chaputukile kuyula haJita yaKaye yatete omu  Britain naUnited States valifutwile nakutunga chiyulo changolo chakaye chaAnglo-America. Chifwanyisa chize alotele Nevukataneza chasolwele vyuma vivali kutalisa kuli echi chiyulo changolo chakaye, vize kavyapwile mumawangana aze apwileko kunyimako.

10. (a) Vyuma muka tuli nakumona muchiyulo chaAnglo-America vize vahanjikilile chimweza muupolofweto waNdanyele? (b) Vyuma muka vize katwatela kulingako? (Talenu lipwata lyakwamba ngwavo “ Vangulukenu naUnonga.”)

¹⁰ Chatete, chiyulo chaAnglo-America chalihandununa naviyulo vikwavo vyangolo vyakaye vavulukile muchakumwenesa, mwomwo chiyulo kana vachimanyinako kufwelu naunonga vize vanafutula hamwe, keshi kuulu napalatako. Unonga wemanyinako “vana vavatu,” chipwe ngwetu vatu vamuchivulu. (Ndanye. 2:43, kwinyikila chamwishi) Makumbi ano, tuli nakumona omwo vatu vali nangolo hakuvwota, nakusaka kupwa vakulihehwa mulifuchi nakumilimo, kahechi chinalingisa vatwamina vamuchiyulo changolo chakaye vahone kutesamo vyuma vasaka.

11. Uno kupwako chachiyulo changolo chakaye chaAnglo-America chinatukafwe ngachilihi tufwelele ngwetu tuli nakuyoyela mumakumbi akukuminyina?

¹¹ Chamuchivali, ngana muze Mbimbiliya yapolofwetele chimweza, chiyulo chaAnglo-America chize vemanyinako kuvilyachilo vyachifwanyisa chachinene chamutu, chikiko chapwa chiyulo changolo chakaye chamakumishilo. Kaveshi kukachishisa kuchiyulo cheka changolo chakayeko. Oloze navakachinongesa hamwe kaha najifulumende javatu josena kuWangana waKalunga haAlamangetone. *—Kuso. 16:13, 14, 16; 19:19, 20.

12. Uno upolofweto waNdanyele wasolola unjiho muka ukwavo uze watuvendejeka nakutuhana lutalililo?

¹² Uno upolofweto kana unahase kutunganyalisa ngachilihi? Upolofweto waNdanyele wasolola nawa unjiho ukwavo wakusolola nge tuli nakuyoyela mumakumbi akukuminyina. Myaka yakuzomboka 2,500 kunyima, Ndanyele apolofwetele chimweza ngwenyi, hanyima yaMbavilone nakukeza viyulo vyakaye vyangolo viwana vize navikapwa nangolo havatu jaKalunga. Kaha nawa asolwele ngwenyi Chiyulo chaNgolo chaKaye chaAnglo-America nachikapwa chamakumishilo. Chuma kana cheji kutuvendejekanga nakutulingisa tufwelele ngwetu kalinwomu Wangana waKalunga ufumiseko jifulumende javatu josena nakuyula vatu vosena hano hamavu.—Ndanye. 2:44.

13. Uno “mwangana wakusokesa 8” ‘navamyangana 10’ vavuluka hali Kusoloka 17:9-12 vyemanyinako vyuma muka, kaha upolofweto kana unatesamo ngachilihi?

¹³ Tangenu Kusoloka 17:9-12. Hakuwana nge Jita yaKaye yatete yenyekele vyuma vyavivulu chikuma, ngocho kwasolokele upolofweto ukwavo wamuMbimbiliya uze wasolwele nge tuli nakuyoyela mumakumbi akukuminyina. Vatwamina vamukaye vasakile kuneha kuunda mukaye. Kaha kuheta muJanuary 1920, vahakileko liuka lyaLeague of Nations, lize vashishile kuliuka lyaUnited Nations muOctober 1945. Eli liuka valivuluka ngwavo “mwangana wakusokesa 8.” Oloze kalyapwa chiyulo changolo chakayeko. Ngolo jalyo jeji kufumanga kujifulumende jize jeji kulikundwizanga. Mbimbiliya yafwanyisa jifulumende kana ‘kuvamyangana 10.’

14-15. (a) Uno chisoneka chaKusoloka 17:3-5 chasolola vyuma muka hali “Mbavilone Yayinene”? (b) Vyuma muka vili nakusoloka kuli vaze veji kukundwizanga kwitava chamakuli?

¹⁴ Tangenu Kusoloka 17:3-5. Kaposetolo Yowano vamumwenesele chakumwenesa kuli Kalunga chapwevo muka-ujila uze  apwa “Mbavilone Yayinene” yize yemanyinako kwitava chamakuli chamukaye kosena. Uno chakumwenesa kana chateselemo ngachilihi? Hamyaka yayivulu, mauka akwitava chamakuli anazachilanga hamwe najifulumende jamukaye nakujikundwiza. Chipwe ngocho, kalinwomu Yehova achihake mumichima yavaka-jifulumende “mangana valinge mwaya kujina chenyi.” Vyuma muka navifumamo? Jize jifulumende jakaye jize vemanyinako ‘kuvamyangana 10,’ najikafumbukila mauka akwitava chamakuli nakuwanongesa.—Kuso. 17:1, 2, 16, 17.

¹⁵ Tunatachikiza ngachilihi ngwetu kalinwomu Mbavilone Yayinene vayinongese? Hakusaka kukumbulula chihula kana, anukenu ngwenu nganda yaMbavilone yakushikulu vayikingileko chindende kumeya akalwiji wamunene Yufwalate. Mukanda waKusoloka wafwanyisa vatu vavavulu vaze vali nakukundwiza Mbavilone Yayinene ‘kumeya’ aze ali nakuyikinga. (Kuso. 17:15) Oloze wasolola nawa ngwawo aze meya ‘nawakoma,’ kulumbununa nge vatu vavavulu navakecha kukundwiza echi kwitava chamakuli chamukaye kosena. (Kuso. 16:12) Makumbi ano ou upolofweto uli nakutesamo,  mwomwo vatu vavavulu vali nakuseza kwitava chamakuli nakutondatonda kweka kuze vanahase kuvakafwa muukalu wavo.

16. Natunganyala ngachilihi hakutachikiza upolofweto wakupwako chaUnited Nations nawakunongesa Mbavilone Yayinene?

¹⁶ Uno upolofweto kana unahase kutunganyalisa ngachilihi? Kupwako chaliuka lyaUnited Nations nomwo vatu vali nakulitwamina kukundwiza kwitava chamakuli, chinasolola nge tuli nakuyoyela mumakumbi akukuminyina. Numba tuhu meya achifwanyisa aze eji kukundwizanga Mbavilone ali nakuma, oloze kwitava chamakuli navakachinongesa kuchuma cheka. Ngana muze twashimutwilanga hakavanga, Yehova mwakachihaka mumichima ‘yavamyangana 10’ vaze vemanyinako jifulumende jakaye jize jili nakukundwiza United Nations “mangana va[ka]linge mwaya kujina chenyi.” Eji jifulumende najikanongesa kwitava chamakuli mukukasumuna. Kaha vatu mukaye navakalikomokela hachuma kana. * (Kuso. 18:8-10) Kunongesa Mbavilone Yayinene nachikanyikisa kaye kosena nakuneha ukalu wauvulu. Oloze vatu jaKalunga navakawahilila mwomwo yavyuma vivali. Kwitava chamakuli chize chinapunga muka-kole waYehova Kalunga hamyaka yayivulu kacheshi kukapwako chekako, kaha nawa navakatuyovola kukaye kano kakapi.—Luka 21:28.

17-18. (a) Natuhasa ngachilihi kutwalaho lika kuzamisa lufwelelo lwetu? (b) Vyuma muka natushimutwila muchihande chinakavangizaho?

¹⁷ Ndanyele ahanjikilile chimweza ngwenyi “chinyingi chamwenemwene nachikavula.” Kaha chikupu vene chinavulu. Tunevwishisa jino upolofweto wauvulu wahanjika halwola tuli nakuyoyelamo. (Ndanye. 12:4, 9, 10) Upolofweto kana unatesamo, kaha unatulingisa tuvumbike Yehova naMazu enyi. (Isa. 46:10; 55:11) Shikaho twalenuho lika kuzamisa lufwelelo lwenu hakulinangula Mbimbiliya nahakukafwa vakwenu vatunge usoko wakukola naYehova. Mwomwo eji kukinganga vaze vamufwelela nakuvalingisa “vatwamenga lika mukuunda.”—Isa. 26:3.

¹⁸ Muchihande chinakavangizaho natushimutwila haupolofweto uze wahanjika hachikungulwilo chavaka-Kulishitu mumakumbi akukuminyina. Omu natulinangula, natumona ngwetu ou upolofweto wasolola chikupu ngwawo, tuli nakuyoyela mumakumbi akukuminyina. Natumona nawa unjiho ukwavo wakusolola nge Yesu uze apwa Mwangana wetu ali nakutwaminyina vaka-kumukavangiza vakushishika.