Yesu anangwilenga vatu vatwamenga mukuunda navakwavo. Oloze likumbi limwe alwezele vaposetolo jenyi ngwenyi: “Kanda namushinganyeka ngwenu ngwejile nakuneha kuunda hano hamavuko. Kangwejile nakuneha kuundako, oloze poko yamukwale. Ngwejile mangana ngunehe chihandwa muli mwana walunga naise, namuli mwana wapwevo nanaye, namuli nayewenu yamutu nanayewenu.” (Mateu 10:34, 35) Uno Yesu atalishile muli hakuhanjika mazu kana?

Yesu kasakile mujitanga mupwenga vihandwako. Oloze atachikijile ngwenyi vyuma eji kunangulanga vinahase kuneha vihandwa mujitanga jimwe. Shikaho vaze vali nakufwila kupwa tumbaji twaKulishitu nakuvambapachisa vatela kutachikiza ngwavo shimbu jimwe vausoko wavo kaveshi kwivwa kuwaha havyuma vanasakula kulingako. Kachi nge muka-zuvo yavo uze ketavako chipwe nge jitanga javo jinavafumbukila, chinahase kuvakaluhwila kukavangiza kala vyuma eji kuvanangulanga Kulishitu.

Mbimbiliya yakolezeza vaka-Kulishitu ‘vatwamenga mukuunda navatu vosena.’ (Loma 12:18) Oloze vyuma anangula Yesu vinahase kupwa nge “poko yamukwale” mujitanga jimwe. Chuma kana cheji kusolokanga kachi nge mutu umwe mutanga mwetavila vyuma eji kunangulanga Yesu oku vakwavo vosena mutanga navakana kunangula kana. Nge chuma kana chinasoloka, kaha vausoko vauze nalinangula muchano, veji kupwanga “vaka-kole” jenyi.—Mateu 10:36.

Tumbaji twaKulishitu vaze vatwama mutanga yize muli vatu vaze vatwama mukwitava cheka, shimbu jimwe vanahase kusakula kulinga vyuma vize navivwisa Yehova kuwaha naYesu chipwe kulinga vyuma vize navivwisa vausoko wavo kuwaha. Chakutalilaho, vausoko wavo vamukwitava cheka vanahase kuvashinyinyika vazane muchilika chamakumbi akunoka chamukwitava chavo. Uno nge vali mucheseko kana, navasakula kwivwisa kuwaha iya? Yesu ambile ngwenyi: “Weshowo mwazanga chikuma ise chipwe naye kunguhambakana ami kangutela amiko.” (Mateu 10:37) Chipwe ngocho, Yesu kapwile nakulumbununa ngwenyi hakusaka mutu apwenga kambaji kenyi katela kuzanga chikuma visemi jenyiko. Oloze apwile nakuvanangula mwakusakwila kanawa vyuma vyavilemu chikuma, mukuyoya chavo. Nge vausoko wetu vaze vatwama mukwitava cheka navatuhonesa kulemesa Yehova, yetu natutwalaho lika kuvazanga. Oloze twatachikiza ngwetu kuzanga Yehova chikiko chuma chachilemu chikuma.

Kutuyanjisa kuli vausoko wetu chinahase kutwivwisa kupihya chikuma. Chipwe ngocho, tumbaji twaYesu vatela kwanuka mazu aze ahanjikile Yesu ngwenyi: “Weshowo keshi kumbata chitondo chenyi chakuyanjishila nakungukavangiza, kangutela amiko.” (Mateu 10:38) Echi chili nakulumbununa nge vaka-Kulishitu vatela kumona kuvafumbukila kuli vausoko wavo kupwa hiluyanjisa luze tumbaji twaKulishitu vatela kumika. Chipwe ngocho, vatachikiza ngwavo vilinga vyavo vyamwaza vinahase kukunyula vausoko wavo vaze kavetavako mangana vevwilile kumujimbu wamuMbimbiliya.—Petu. 1, 3:1, 2.