1. Mwomwo ika Yehova apwila Muka-kutenga wamunene?

MULONDO umwe vatungile vaka-China vaulanjishile muNovember 2010 najimbongo jajivulu kafwe jimiliyoni jajindola 70 muEngland. Hichuma chakukomwesa chikuma hakuwana nge mutu nahase kutunga chuma chakufuma kuunonga wamokomoko nakuchilanjisa handando yayinene chikuma. Yehova apwa nge ou muka-kutenga vyuma vyaunonga, oloze ikiye akwechi uhashi kuhambakana vatu. Mbimbiliya yamba ngwayo, Yehova atengele Alama mutu wakukupuka “nalukungu lwahamavu,” kulumbununa nge azachishile mavu hakutenga mutu. (Kuputuka 2:7) Mutu kana apwile “mwanaKalunga,” kaha vamutengele nauhashi wakulondezeza vilinga vyaKalunga.—Luka 3:38.

2, 3. Natulondezeza ngachilihi vaIsalele vaze vapihililile nakwalumuka?

² Omu Alama alikangile kuli Tengi yenyi, kapwile cheka mwanaKalungako. Oloze vana vaAlama vasakula Yehova kupwa Muka-kuvayula. (WavaHepeleu 12:1) Vononoka Yehova nakusolola hatoma ngwavo ikiye Sevo kaha nawa Tengi yavo,  keshi Satanako. (Yowano 8:44) Muchima wavo wakushishika weji kutwanukisa mazu vahanjikile vaIsalele vaze vapihililile nakwalumuka ngwavo: “Ove Yehova, ove unapu uSetu. Etu tunapu tuunonga, kaha ove unapu uTengi yetu. Tuvosena tunapu tumilimo yamavoko ove.”—Isaya 64:8.

³ Vangamba jaYehova vamuchano makumbi ano vali nakulinyisa nakwononoka Yehova. Veji kwivwanga kuwaha kuvuluka Yehova kupwa Sevo nakumumona kupwa Muka-kuvatunga. Uno tuli nakwitavila Kalunga atutunge ngana mwamulondo wamwaza tahi? Kutala tweji kumonanga vandumbwetu kupwa nge vachili nakuvatunga lika kuli Kalunga tahi? Natushimutwila omu Yehova eji kusakulanga vatu vaze atela kutunga, novyo eji kuvatungilanga, namujila eji kuvatungilangamo. Echi nachitukafwa tumonenga vandumbwetu mujila yamwaza.

4. Uno Yehova eji kusakulanga ngachilihi vatu vaze eji kukokanga nakwiza kuli ikiye? Hanenu vyakutalilaho.

⁴ Yehova kamona vatu nge omu tweji kuvamonanga etuko, mwomwo eji kumonanga vili mumuchima wamutu himutu. (Tangenu Samwele 1, 16:7b.) Yehova asolwele chuma kanechi omu atungile chikungulwilo chavaka-Kulishitu. Akokele vatu vaze vamona kuvatu kupwa vamokomoko nakuvaneha kuli ivene nakuli Mwanenyi. (Yowano 6:44) Chakutalilaho chimwe shina chakaFwaliseu Saulu. Ou lunga apwile ‘muka-kusaula, muka-kuyanjisa, kaha nawa muka-kasautu.’ (WaChimoteu 1, 1:13) Oloze Yehova akekesele muchima waSaulu nakumona ngwenyi kapwile mutu wamokomokoko. (Vishimo 17:3) Yehova amwene ngwenyi nahase kutunga Saulu nakupwa “chuma chakusakula” uze mwambululanga mujimbu kuli “vaka-mafuchi, nakuli vamyangana, nakuli vana vaIsalele.” (Vilinga 9:15) Yehova nawa asakwile veka nakuvatenga kupwa chuma “chamulimo waulemu,” vatu vakufwana nge vitakwa, navaka-ujila naveji. (Wavaka-Loma 9:21; Wavaka-Kolinde 1, 6:9-11) Omu valinangwile Visoneka, vazamishile lufwelelo lwavo muli Yehova nakwitavila avatunge.

5, 6. Kufwelela Yehova Tengi yetu nachitukafwa tumone ngachilihi (a) vatu vamungalila yetu? (b) vandumbwetu?

⁵ Twafwelela ngwetu Yehova eji kusakulanga vatu vamichima yamwaza nakuvakoka vezenga kuli ikiye. Ngocho katwatela kushinganyeka ngwetu vatu vamwe mungalila yetu chipwe muchikungulwilo kavatamo kupwa vangamba jaKalungako. Chakutalilaho, Michael apihililenga nge Vinjiho jaYehova naveza nakumwambulila. Ambile ngwenyi: “Nge ngunavamono, ngwavaliwilenga nakuvachina. Ngwavahungile chikuma. Oloze omu ngwayile kungalila yeka, ngwamwene tanga yimwe yize yapwile navilinga vyamwaza vize vyangusuulwishilenga. Ngwalikomokelele chikuma hakuwana  nge vapwile Vinjiho jaYehova. Vilinga vyavo vyamwaza vyangulingishile ngumone jino Vinjiho mujila yamwaza. Ngwamwene jino ngwami ngwavahungile mwomwo yakwivwa kaha mijimbu yamakuli vahanjikilenga vatu hali vakivo.” Kufumaho, Michael etavilile kulinangula Mbimbiliya, kutwala muze vamumbapachishile nakuzata mulimo washimbu yosena.

⁶ Nge natumona Yehova kupwa Muka-kututunga, kaha katweshi kumonanga vandumbwetu mujila yayipiko. Oloze natuvamona ngwetu vachili nakuvatunga lika kuli Kalunga. Omu mukiko Yehova eji kuvamonanga. Eji kumonanga omu vapwa mumichima yavo, kaha atachikiza ngwenyi kuhona chavo kukupuka chapwa chakashimbu kakandende. Atachikiza nawa omu nahase kupwa mutu himutu. (Samu 130:3) Tunahase kulondezeza Yehova hakumonanga vandumbwetu mujila yamwaza. Tunahase kuzachila hamwe naYehova mangana tukafwe vandumbwetu vazovoloke kushipilitu. (Wavaka-Tesolonyika 1, 5:14, 15) Vakulwane muchikungulwilo vatela kusolola chakutalilaho chamwaza muvyuma kana.—Wavaka-Efwesu 4:8, 11-13.

7. Mwomwo ika mwatela kumona kuhuhumuna chaYehova kupwa chachilemu?

⁷ Vatu vamwe veji kuhanjikanga ngwavo: ‘Vyuma vanguhuhumwine visemi jami kangwavimwene kupwa vyavilemuko, oloze mazu kana ngwawamwene kupwa amalemu omu ngwapwile navana.’ Shikaho omu mutu mwakola hakiko jino eji kumonanga kulema chamazu vamuhuhumwine. (Tangenu WavaHepeleu 12:5, 6, 11.) Yehova atuzanga chikuma, echi chikiko cheji kumulingisanga atuhuhumune nakututunga. Asaka tupwenga vakuwahilila nakumuzanga hakupwa Setu. (Vishimo 23:15) Eji kwivwa kupihya nge tuli nakuyanda, kaha nawa kasaka tufwenga mwomwo yakuhona kupihilila nakwalumukako.—Wavaka-Efwesu 2:2, 3.

8, 9. Yehova ali nakutunangula ngachilihi makumbi ano, kaha kulutwe mwakatunangula ngachilihi?

⁸ Etu vamwe shimbu kanda tulinangule muchano, twapwile navilinga vyavipi. Oloze Yehova atutungile nakutukafwa twalumune vilinga vyetu, ngachize tuli jino navilinga vyamwaza. (Isaya 11:6-8; Wavaka-Kolose 3:9, 10) Twatwama jino mupalachise yakushipilitu. Eyi yikiko jila Yehova ali nakutukafwilamo mangana tuseze vilinga vyavipi. Twapwa vakuwahilila kaha nawa vakukingiwa numba tuhu vatujingilika kukaye kakuhuka. Vatu vaze vasemukila mujitanga muze kavalizangako, vapwa jino vakuwahilila hakumona omu vandumbwavo veji kuvasolwelanga zangi mupalachise yakushipilitu. (Yowano 13:35) Ngocho nayetu nawa twalinangula kuzanga vakwetu. Oloze chuma chachinene shina, tunatachikiza kanawa Yehova nazangi eji kutusolwelanga.—WaYakova 4:8.

 ⁹ Mukaye kakahya natukanganyala chikuma kutwama hamwe navandumbwetu vaze vazanga vyuma vyakushipilitu. Natukalivwisa kuwaha kuyoyela mupalachise yize navakayula kuWangana waKalunga. Yehova mwakatwalaho lika kututunga mangana tukapwe navilinga vyamwenemwene chikuma. (Isaya 11:9) Yehova mwakakupwisa mijimba navishinganyeka vyetu. Echi nachikatukafwa tukevwishise kanawa jishimbi jenyi nakujononoka. Shikaho tutwalenuho lika kwitavila Yehova atutunge, nakusolola hatoma ngwetu tweji kumusakwilila chikuma hazangi yenyi.—Vishimo 3:11, 12.

10. Yesu asolwele ngachilihi muchima walikoji atwama nawo Muka-kutenga Wamunene?

¹⁰ Yehova atutachikiza kanawa, ngana muze kuluwa muka-kutenga vyuma vyaunonga atachikiza kanawa mulimo wenyi. Atachikiza kanawa tutenga twetu, nahakumina ngolo jetu, nomu tuli nakuzovoloka hakufwila kumuzachila, kaha eji kututunganga mutu himutu kweseka nomu apwa. (Tangenu Samu 103:10-14.) Tunahase kutachikiza omu Yehova atumona hakutala omu Yesu azachililengamo navaposetolo jenyi vaze kavapwile vakukupukako. Shimbu jimwe vaposetolo valipulilenga jipami hakusaka vatachikize iya apwile wamulemu hakachi kavo. Nge kumwapwile, kachi vilinga vyavo mwavimwene ngachilihi? Pamo kachi mwakukulwile ngwenu vapwile vavakalu michima, ngana mwaunonga wakuma. Oloze Yesu atachikijile ngwenyi nahase kuvatunga nge navevwilila kumazu avanangwilenga, nakuvahuhumuna mulikoji, nakukavangiza chakutalilaho chenyi. (Mako 9:33-37; 10:37, 41-45; Luka 22:24-27) Omu Yesu asangukile, vaposetolo vatambwile shipilitu yaKalunga, kaha kavapwile cheka namuchima wakufwila ulemuko. Oloze vashishikilenga kaha hamulimo uze avahanyine Yesu.—Vilinga 5:42.

11. Ndavichi apwile ngachilihi ngana mwaunonga wauvwovu, kaha natumulondezeza ngachilihi?

¹¹ Makumbi ano, Yehova ali nakuzachisa Mbimbiliya, nashipilitu yajila nachikungulwilo mangana atutunge. Uno Mbimbiliya yinahase kututunga ngachilihi? Twatela kuyitanga, nakushinganyeka vyuma natutanga, nakulomba Yehova atukafwe mwakuzachishila vyuma kana. Mwangana Ndavichi asonekele ngwenyi: “Ngweji kukwanukanga hakahela kami. Ngweji kukushinganyekanga naufuku.” (Samu 63:6) Asonekele nawa ngwenyi: “Nangwalisa Yehova uze nangulweze mangana. Vishinganyeka vyami vyeji kungwololanga numba vene naufuku.” (Samu 16:7) Chapundu vene, Ndavichi ashinganyekelenga hamazu aYehova nakuwetavila amutunge numba tuhu kulinga ngocho kachapwile chachashiko. (Samwele 2, 12:1-13) Ndavichi atusela chakutalilaho chamwaza chakulinyisa nakwitavila Kalunga atutunge. Lihulisenu ngwenu: ‘Nge nguli nakutanga Mbimbiliya, kutala ngweji kushinganyekanga havyuma nguli nakutanga nakwitavila Yehova angutunge tahi? Kutala ngweji kufwila kulinangula vyavivulu tahi?’—Samu 1:2, 3.

12, 13. Yehova eji kuzachisanga ngachilihi shipilitu yajila nachikungulwilo mangana vatutunge?

¹² Shipilitu yajila yinahase kututunga mujijila jakulisezaseza. Chakutalilaho, yinahase kutunangula mwakulondezezela vilinga vyamwaza vyaYesu, nakusolola mihako yashipilitu.  (Wavaka-Ngalesha 5:22, 23) Zangi nayikiko yapwa muhako washipilitu. Twazanga Kalunga nakufwila kumwononoka mangana atutunge mwomwo twejiva ngwetu jishimbi jenyi jeji kutunganyalisanga. Kaha nawa shipilitu yajila yinahase kutukafwa tulihende kuvilinga vyakukaye. (Wavaka-Efwesu 2:2) Omu kaposetolo Paulu apwile kanyike, vamuhungumwishile kuli vatwamina vamukwitava vavaYuleya. Oloze shipilitu yajila yamukafwile alumuke. Asonekele ngwenyi: “Ngunajikiza muvyuma vyosena kuhichila muli ou eji kunguhananga ngolo.” (Wavaka-Fwilipi 4:13) Nayetu nawa twatela kulomba shipilitu yajila mangana yitukafwe mwomwo twatachikiza ngwetu Yehova eji kwivwililanga kukulomba chavatu vamichima yamwaza.—Samu 10:17.

¹³ Yehova nawa eji kuzachisanga chikungulwilo navakulwane mangana vatutunge. Chakutalilaho, nge vakulwane muchikungulwilo vanamono ngwavo tuli naukalu umwe, veji kutukafwanga kuzachisa Mazu aKalunga. (Wavaka-Ngalesha 6:1) Veji kulombanga kuli Yehova avahane chinyingi, nakunangakana namangana. Veji kuzachisanga Mbimbiliya namikanda yetu mangana vawane mijimbu yakutukafwa. Nge vakulwane navamitambukila mangana vamikafwe, anukenu ngwenu vali nakusolola muchima wazangi uze atwama nawo Kalunga. Nge namukavangiza mazu navamikafwa, kaha namupwa ngana mwaunonga wauvwovu uze naupwa wawashi kuumba kuli Yehova. Ngocho namunganyala chikuma.

14. Numba tuhu Yehova akwechi ngolo jakwalumuna vatu, mwomwo ika eji kusakanga vatu valisakwile vyakulinga?

¹⁴ Nge namwivwishisa omu Yehova ali nakututunga, kaha nachitukafwa tutwamenga kanawa navandumbwetu. Natumonanga  vatu vamungalila yetu navaze tweji kunangulanga Mbimbiliya mujila yamwaza. Kushikulu muka-kutenga avangililenga kufumisa majilo haunonga numba jino atenge mulondo. Muka-kutenga wamunene Yehova eji kukafwanga vatu vaze vamichima yayivwovu vaze vasaka vavakafwe. Keshi kuvashinjila valumukeko, oloze eji kuvanangulanga mwaya jindongi jenyi jize vatela kukavangiza. Kaha vavene jino navasakula kukavangiza mazu navalweze.

15, 16. Chakutalilaho muka chinasolola omu vilongesa vyaMbimbiliya vanahase kwitavila Yehova avatunge?

¹⁵ Tuchishimutwilenu hachakutalilaho chandumbwetu Tessie wakuAustralia. Numba tuhu chapwile chachashi kulinangula Mbimbiliya, oloze kazovolokeleko. Kaha nawa kayilenga nakukungulukako. Ndumbwetu uze amunangwilenga Mbimbiliya alombele kuli Yehova amukafwe mwakulingila shimbu kanda alitwamine. Likumbi limwe omu vapwile nakulinangula, alikomokelele hamazu amulwezele. Ahanjikile ngwenyi ahonenenga kukunguluka mwomwo apwile natato yakwazana mukuhema chakulipecha. Kutwala muze ambilile jino.

¹⁶ Kufuma vene haze, Tessie aputukile kuyanga kukukunguluka nakuzachisa vyuma alinangwile numba tuhu masepa jenyi vamusekelekelenga. Kutwala muze, vamumbapachishile kaha alisonekesele upayiniya washimbu yosena numba tuhu apwile namulimo wakutala vana venyi. Chikupu vene, nge vilongesa vyaMbimbiliya navaputuka kuzachisa vyuma vanakulinangula, kaha Kalunga mwapandama kuli vakiko nakuvatenga kupwa ngana mwamulondo wamwaza.

17. (a) Vyuma muka vinamivwisa kuwaha hakwijiva ngwenu Yehova eji kumitunga? (b) Vihula muka natushimutwila muchihande chinakavangizaho?

¹⁷ Namakumbi ano, vaka-kutenga vachili lika nakutenga milondo navyuma vyeka vyamwaza chikuma. NaYehova nawa ali nakutwalaho lika kututunga nakumona omu tuli nakwakula kumazu ali nakutuhuhumuna. (Tangenu Samu 32:8.) Kutala munamono ngwenu Yehova amizanga tahi? Uno muli nakumona omu Yehova ali nakumitunga tahi? Nge mukiko, kaha vilinga muka mwatela kupwa navyo vize navilingisa Yehova amitunge? Jitato muka mwatela kumbila mangana muhone kupwa nge unonga wakuma? Uno visemi vanahase kuzachila ngachilihi hamwe naYehova hakutunga vana vavo? Vihula kana navavikumbulula muchihande chinakavangizaho.