1, 2. Vyuma muka Mbimbiliya yahanjikile chimweza hakuvula chavatu jaYehova?

MUNO mukaye muli liuka limwe lize lili navatu vazanga Yehova nakufwila kumuzachila. Vatu kana vakiko Vinjiho jaYehova. Numba tuhu veji kulimbenjanga, oloze Yehova eji kuvatwaminyinanga nashipilitu yenyi yajila. Tushimutwilenu hajijila jimwe jize navakiswilamo.

² Kumyaka yakunyima mu 1914, kwapwile kaha vaka-kulemesa Yehova vavandende. Oloze oholyapwa Yehova anakukisula mulimo wakwambulula. Echi chinalingisa vatu vavavulu valinangule muchano nakupwa Vinjiho jenyi. Yehova ahanjikile lyehi vyakuvula kanechi ngwenyi: “Vavandende navakapwa likombakaji, kaha vavapululu navakapwa lifuchi lyangolo. Ami Yehova yami nangukachanguhwisa halwola lwacho.” (Isaya 60:22) Makumbi ano tunakumona omu unakutesamo upolofweto kana, mwomwo vatu jaYehova vali nakuvula chikuma. Chakutalilaho, kuvula chaVinjiho jaYehova vosena chinahambakana kuvula chavatu vamumafuchi amwe.

3. Vangamba jaKalunga vanasololanga ngachilihi zangi?

 ³ Mumakumbi ano akukuminyina, Yehova nakafwe vatu jenyi mangana valizange navandumbwavo. Hakuwana nge “Kalunga ikiye zangi,” ngocho veji kumulondezezanga. (WaYowano 1, 4:8) Yesu alwezele tumbaji twenyi ‘valizangenga navakwavo.’ Avalwezele nawa ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:34, 35) Mumyaka yakalinwomu vangamba jaYehova vanasolola muchima kanou wakuzanga vandumbwavo numba tuhu mafuchi analunga jita. Chakutalilaho, mujita yakaye yamuchivali, vatu jimiliyoni 55 vavajihile. Oloze vatu jaYehova kavajihile numba mutu umweko. (Tangenu Mika 4:1, 3.) Echi chinavakafwe vapwenga vatoma “kumanyinga avatu vosena.”—Vilinga 20:26.

4. Mwomwo ika katwatela kulikomokelako hakumona omu vatu jaYehova vali nakuvula?

⁴ Vatu jaKalunga chivavulilako lika numba tuhu vatwama namuka-kole wavo Satana. Apwa “kalunga wakatwamino kamyaka yino.” (Wavaka-Kolinde 2, 4:4) Satana anakuzachisanga mauka amilingu amuno mukaye navaka-kwazana mijimbu, mangana vakanyise Vinjiho jaYehova kwambulula mujimbu wamwaza. Oloze keshi kuhasa kuhonesa mulimo kanouko. Natachikiza ngwenyi ali nakashimbu kakandende, shikaho ali nakufwila kutuhonesa kulemesa Yehova.—Kusoloka 12:12.

5. Mwomwo ika vatu vanahase kutwivwisa kupihya shimbu jimwe? (Talenu muvwimbimbi wakulivanga.)

⁵ Vangamba jaKalunga valinangula ngwavo chapwa chachilemu kuzanga Kalunga navatu. Yesu ambile ngwenyi: “‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete. Kaha lwamuchivali, lunalifwaneko, lukiko vene elu ngwavo: ‘Zangenunga vakwenu nganomu mwalizanga enu vavene.’” (Mateu 22:35-39) Chipwe ngocho, Mbimbiliya yasolola hatoma nge vatu vosena kavakupukako mwomwo vaswana shili kuli Alama. (Tangenu Wavaka-Loma 5:12, 19.) Shimbu jimwe vatu muchikungulwilo vanahase kulinga chipwe kuhanjika vyuma vize vinahase kumivwisa kupihya. Vyuma muka mwatela kulinga kachi nge ukalu kana unasoloka? Uno natutwalaho lika kuzanga Yehova tahi? Kutala natutwalaho lika kushishika kuli ikiye nakuvatu jenyi tahi? Mbimbiliya yatulweza vyavangamba jaKalunga vamwe vaze valingile vyuma vize vyevwishile vakwavo kupihya. Tushimutwilenu vyuma tunahase kulinangula kuli vakiko.

6. Eli ahonene ngachilihi kuhuhumuna vana venyi?

⁶ Chakutalilaho, Eli apwile kapilishitu wakulitulaho muIsalele, oloze vana venyi vavali kavononokelenga jishimbi jaYehovako. Mbimbiliya yamba ngwayo: “Vana vaEli vapwile malunga vatuvihu, kavamutachikijile Yehovako.” (Samwele 1, 2:12) Eli atachikijile ngwenyi vana venyi vapwile nakulinga vyavipi, oloze kavahuhumwine vambile vilinga kanako. Yehova azangamishile Eli hamwe kaha navana venyi vavali. Kutwala muze, Yehova ketavilile vana vakutanga yaEli kupwa vapilishitu vakulitulahoko. (Samwele 1, 3:10-14) Kachi nge kumwapwile halwola kana, kutala kachi mwazeyele kushipilitu hakumona omu Eli echelele vana venyi vatwaleho navilinga vyavipi tahi? Uno lufwelelo lwenu kachi lwazeyele nakulitwamina kuzachila Yehova tahi?

7. Shili muka yayinene avulumwine Ndavichi, kaha Kalunga alingile ngachilihi?

 ⁷ Ndavichi apwile navilinga vyamwaza, kahechi chikiko chalingishile Yehova amuzange. (Samwele 1, 13:13, 14; Vilinga 13:22) Chipwe ngocho, lwola lumwe alingile vyuma vyavipi. Chakutalilaho, omu Uliya ayile kujita, Ndavichi alingile ujila naMbate-sheva pwevo lyaUliya nakumwimichisa lijimo. Ndavichi kasakile vatu vatachikize vyuma alingileko. Ngocho alwezele Uliya akinduluke kwimbo kufuma kujita nakumulweza ayenga kuzuvo yenyi. Ndavichi ashinganyekele ngwenu Uliya mwalisavala napuwenyi Mbate-sheva, mangana vatu vashinganyeke ngwavo yivene namwimichisa. Oloze Uliya kayile nakusavala kuzuvo yenyiko. Shikaho Ndavichi alwezele vatu jenyi vahake Uliya kulutwe hakulwa jita, ngocho afwile. Ngana muze vamba ngwavo, kaveta-makumba ahichikishilemo vambuli, ngocho naNdavichi hakuvulumuna shili kana alingishile tanga yenyi yosena yiyande. (Samwele 2, 12:9-12) Oloze hakuwana nge Yehova apwa wakeke ngocho vamukonekelele. Amwene ngwenyi Ndavichi asakile kulinga vyuma vyakwoloka. (Vamyangana 1, 9:4) Nge kumwapwile halwola luze, kachi mwevwile ngachilihi hamulonga avulumwine Ndavichi? Kutala kachi mwalitwaminyine kuzachila Yehova tahi?

8. (a) Kaposetolo Petulu ahonene kutesamo ngachilihi mazu enyi? (b) Mwomwo ika Yehova atwalileho lika kuzachisa Petulu okunyi avulumwine?

⁸ Chakutalilaho chikwavo shina chakaposetolo Paulu. Yesu amusakwile apwenga kaposetolo, numba tuhu shimbu jimwe Petulu kalingilenga vyuma vyakwolokako. Chakutalilaho, Petulu alwezele Yesu ngwenyi keshi kukamusezako numba nge vakwavo navamuseza. (Mako 14:27-31, 50)  Oloze omu Yesu vamukashile, vaposetolo vosena hamwe kaha naPetulu vachinyine. Kaha nawa mapapa katatu, Petulu akanyine Yesu ngwenyi kamutachikizako. (Mako 14:53, 54, 66-72) Chipwe ngocho, Petulu evwile kupihya havyuma alingile, ngachize Yehova amukonekelele. Kaha atwalileho kuzachila Yehova. Nge nayenu mwapwile kambaji halwola kana, kutala kachi mwevwile kupihya havyuma alingile Petulu nakumizeyesa kushipilitu tahi?

9. Mwomwo ika mwatela kufwelela ngwenu Yehova eji kulinganga vyuma vyakwoloka lwola lwosena?

⁹ Vyakutalilaho kanevi vinatukafwe tumone nge vangamba jaYehova vamwe valingilenga vyuma vyavipi nakwivwisa vakwavo kupihya. Vyuma muka twatela kulinga nge vakwetu vanalingi vyuma vize vinatwivwisa kupihya? Kutala namulitwamina kukunguluka chipwe kuseza Yehova navatu jenyi tahi? Nyi namwanuka ngwenu Yehova apwa muka-kutetela, nakutalilila mutu kana apihilile nakwalumuka tahi? Oloze shimbu jimwe mutu uze navulumuna mulonga keshi kwivwa kupihya havyuma nalingi nakulikonekelako. Kutala namufwelela ngwenu Yehova ali nakumona vyuma kana, kaha mwalingaho vyuma vimwe mukuhita chamakumbi tahi? Nahase kumufumisa muchikungulwilo nge chinatemo kulinga ngocho. Uno mwafwelela ngwenu Yehova mwalinganga mwakwoloka, mwachiyulo shimbu yosena tahi?

10. Mwomwo ika Yesu ahonene kupihilila havyuma alingile Yuta Isakalyote naPetulu?

¹⁰ MuMbimbiliya tweji kutangangamo vatu vamwe vaze vapwile vakushishika kuli Yehova numba tuhu vakwavo valingilenga vyuma vyavipi. Yesu atusela chakutalilaho chamwaza. Alombele ufuku wosena kuli Ise mangana amukafwe, kaha asakwile vaposetolo 12. Oloze kutwala muze kaposetolo kenyi Yuta Isakalyote amusolwele. Kaha nawa kaposetolo Petulu akanyine ngwenyi katachikiza Yesuko. (Luka 6:12-16; 22:2-6, 31, 32) Numba tuhu vaposetolo vamwivwishile kupihya, oloze kapihililile naYehova chipwe natumbaji twenyiko. Yesu apandamine lika kuli Ise nakumuzachila nakashishi. Ngocho Yehova amusangwile nakumulingisa kupwa Mwangana waWangana wamwilu.—Mateu 28:7, 18-20.

11. Vyuma muka Mbimbiliya yahanjikile chimweza havangamba jaYehova vamakumbi ano?

¹¹ Chakutalilaho chaYesu chatunangula nge twatela kushishika kuli Yehova nakuli vatu jenyi, mwomwo kwatwama vyuma vyavivulu vyatela kutulingisa tulinge ngocho. Chakutalilaho, tunakumona omu Yehova ali nakutwaminyina vatu jenyi hamakumbi ano amakumishilo. Ali nakuvakafwa vambulule mujimbu mukaye kosena, mulimo uze vali nakuzata vakiko kaha. Vapwa vakuwahilila nakulinunga hamwe mwomwo yavyuma ali nakuvanangula Yehova. Amba ngwenyi: “Talenu! Vangamba jami navakatwanga jingunda hakwivwa kuwaha mumichima yavo.”—Isaya 65:14.

12. Twatela kumona ngachilihi tutenga twavakwetu?

¹² Twapwa vakuwahilila mwomwo Yehova ali nakututwaminyina nakutukafwa tulinge  vyuma vyamwaza vyavivulu. Oloze vatu vamukaye kaSatana kavapwa vakuwahililako, kaha nawa kavatwama nalutalililo lwavyuma vyakulutweko. Shikaho nachipwa chakuhenga kuseza Yehova navatu jenyi mwomwo ngwetu ndumbwetu umwe muchikungulwilo natulingi vyuma vyavipi. Oloze twatela kutwalaho lika kupwa vakushishika kuli Yehova nakukavangiza jindongi jenyi. Twatela nawa kulinangula kuliula tutenga twavakwetu.

13, 14. (a) Mwomwo ika twatela kutalilila vakwetu chikoki? (b) Vyuma muka vatushika vize twatela kwanukanga?

¹³ Namulinga ngachilihi nge ndumbwenu namilingi chipwe nahanjika vyuma vyavipi vize vinamivwisa kupihya? Mbimbiliya ngwayo: “Kanda naupihilila washiko, mwomwo kupihilila washi chatwama mujitulo javiheu.” (Muka-kwambulula 7:9) Tuvosena katwakupukako, kaha nawa tweji kulimbenjanga. Twatela kutachikiza ngwetu vandumbwetu navalimbenjanga nakulinga vyuma vyavipi. Nachipwa chakuhenga kushinganyeka lika hatutenga twavo, mwomwo kulinga ngocho nachituzeyesa nakuhona kuzachila kanawa Yehova. Lufwelelo lwetu nawa lunahase kuzeya nakutulingisa tufume muliuka lyaYehova nakukahona jino kukaswana kaye kakahya.

¹⁴ Vyuma muka mwatela kulinga mangana mutwaleho lika kupwa vakuwahilila hakuzachila Yehova, numba tuhu vakwenu navamivwisa kupihya? Mazu enyi akutuvendejeka amba ngwawo: “Talenu! Nangutenga melu amahya namavu amahya. Kaha vyuma vyakunyima kaveshi kukavyanuka chekako, chipwe kuvivezuka mumichima yavoko.” (Isaya 65:17; WaPetulu 2, 3:13) Yehova mwakamikisula mujila kaneyi nge namupwa lika vakushishika kuli ikiye.

15. Yesu atulweza tulinge vyuma muka nge vakwetu vanalimbenje?

¹⁵ Hakuwana nge kanda twingile mukaye kakahya, twatela kushinganyekanga havyuma atuwahishila Yehova, numba tuhu vakwetu navatwivwisa kupihya. Chakutalilaho, Yesu ambile ngwenyi: “Kachi nge namukonekela vatu havilinga vyavo vyakuhenga, kaha Senu wamwilu mwamikonekela nayenu nawa. Oloze kachi nge kamweshi kukonekela vatu havilinga vyavo vyakuhengako, kaha naSenu keshi kumikonekela havilinga vyenu vyakuhengako.” Omu Petulu ahulishile Yesu numba nge twatela kukonekelanga vakwetu “mapapa 7,” Yesu amukumbulwile ngwenyi: “Nangwamba kuli ove ngwami, keshi mapapa 7 koko, oloze mapapa 77.” Yesu atunangula ngwenyi, twatela kulisuula kukonekelanga vakwetu.—Mateu 6:14, 15; 18:21, 22.

16. Chakutalilaho muka chamwaza atusela Yosefwe?

¹⁶ Chakutalilaho chaYosefwe chatunangula nge katwatela kwivwa kupihya nge vakwetu vanatulingi vyavipiko. Yosefwe nasongo yenyi walunga vakiko kaha vapwile vana vaYakova naLakele. Yakova apwile  navana 10, oloze azangile chikuma Yosefwe kuhambakana vosena. Echi chalingishile vakwavo vamwivwile lwiso nakumujinda chikuma, kaha vamulanjishile muundungo kuli vaka-Ejipitu. Omu mwahichile myaka, mwangana waEjipitu atongwele Yosefwe kupwa muhato wenyi muze mulifuchi mwomwo azachilenga milimo yamwenemwene. Kutwala muze, vandumbu jaYosefwe vayile kuEjipitu nakulanda vyakulya omu kwapwile zala mulifuchi lyavo. Omu vahetele kuze kavatachikijile Yosefweko, oloze ikiye avatachikijile. Numba tuhu vamulingile mwamupi kunyima, ikiye kavazangamishileko, oloze avesekele kaha amone numba nge vanambili muchima wavo waupi. Omu Yosefwe amwene ngwenyi michima yavandumbwenyi yinalumuka, alisolwele kuli vakiko nakuvavendejeka. Ambile ngwenyi: “Kanda namwivwa womako. Enu navana venu nangumihananga vyakulya.”—Kuputuka 50:21.

17. Vyuma muka munakufwila kulinga nge vakwenu vanamilingi vyavipi?

¹⁷ Hakuwana nge vatu vosena veji kulimbenjanga, nayenu munahase kulinga vyuma vize navivwisa vakwenu kupihya. Nge munamono ngwenu munevwisa mukwenu kupihya, kaha kavangizenu jindongi jamuMbimbiliya. Yenunga mukalikonekele mangana mutwame mukuunda. (Tangenu Mateu 5:23, 24.) Tweji kwivwanga kuwaha nge vakwetu navatukonekela. Shikaho nayetu twatela kuvakonekela. Mukanda Wavaka-Kolose 3:13 watulweza ngwawo: “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo. Nge muze Yehova amikonekelele namuchima wakusuuluka, nayenu mwatela kulinga mwomumwe.” Kachi nge twazanga vandumbwetu, kaha katweshi kutwalaho lika kupihilila havyuma vize valingile kunyimako. (Wavaka-Kolinde 1, 13:5) Nge natukonekelanga vakwetu, kaha naYehova mwatukonekela nayetu nawa. Shikaho, nge vakwetu vanalimbenje, twatela kusolola muchima wakeke ngana mwaSetu Yehova uze apwa wakeke.—Tangenu Samu 103:12-14.