Haykanush, uze apwa muka-kwambulula wakuzeneka kumbapachisa wamulifuchi lyaArmenia awanyine chikwama mujila kwakamwihi nalimbo lyenyi. Mwapwile jimbongo jajivulu, nachitupa chapasipoti, nakati yakutambwisa jimbongo kunyambaulu. Kaha alwezele lunga lyenyi uze nawa apwile muka-kwambulula wakuzeneka kumbapachisa.

Halwola kana, ava valunga napwevo kavapwile najimbongoko, kaha nawa vapwile namikuli. Oloze vatwalile jize jimbongo kuli mwenyajo hakuzachisa keyala yize yapwile haze hachitupa. Mwenya chikwama natanga yenyi valikomokelele chikuma. Haykanush nalunga lyenyi valwezele eyi tanga ngwavo vasolwele muchima wakashishi mwomwo yavyuma valinangwile muMbimbiliya. Vamulumbunwinyine jino omu vapwa Vinjiho jaYehova nakumuhana mikanda hamwe kaha natanga yenyi.

Yize tanga yasakile kufweta jimbongo Haykanush nalunga lyenyi, oloze vakanyine. Lichako, pwevo lyauze lunga aholwele chikwama ayile kuli Haykanush nakumusakwilila, kaha amushinjilile atambule kazeya vatunga nalilolwa lyandayamonde lyandando yayinene.

Vatu vavavulu vanahase kulikomokela hakwivwa mujimbu wakashishi waHaykanush nalunga lyenyi. Kutala Yehova alikomokelele hachuma kana tahi? Uno amwene ngachilihi kushishika chavo? Vyuma muka vanganyalile hakupwa vakushishika?

Vihula kana kavyeshi vyavikaluko. Mwomwo ika? Mwomwo vangamba jaKalunga vatachikiza ngwavo kupwa navilinga vize asaka Yehova chapwa chachilemu chikuma kuhambakana malolwa andando yayinene chipwe luheto lweka. Vyuma amona Yehova kupwa vyavilemu vyalihandununa navize vamona vatu. (Isaya 55:8, 9) Vangamba jaYehova vatachikiza ngwavo kupwa navilinga vyamwenemwene chikiko chapwa chachilemu chikuma.

Mazu kana apwa amuchano mwomwo Mbimbiliya yatulweza kupwa namangana nakunangakana. Hali Vishimo 3:13-15 vamba ngwavo: “Awahilila mutu uze mwawana mangana, nauze mwaheta uhashi wakukekesa vyuma, kuwana mangana chinawahe kuhambakana kuwana palata, kupwa nawo chinawahe kuhambakana kupwa naulu. Apwa amalemu kuhambakana malolwa akolale, kaha vyuma vyosena nauzanga kavyeshi kuteseka nawo hamweko.” Yehova amona vilinga kana kupwa vyavilemu kuhambakana luheto.

Nyi ngachilihi kupwa nakashishi?

Yehova apwa wakashishi, mwomwo “ahona kwonga.” (WaChituse 1:2) Kaha ahwiminyinyine kaposetolo Paulu asonekele vaka-Kulishitu vavaHepeleu mulikulukaji lyamyaka lyakulivanga ngwenyi: “Tulombelenungako lika, mwomwo tunafwelela ngwetu tuli nachivezu chamwaza omu tuli nakusaka ngwetu tupwenga vakashishi muvyuma vyosena.”—WavaHepeleu 13:18.

Yesu Kulishitu ahana chakutalilaho chamwaza chakupwa nakashishi. Lwola lumwe omu Kapilishitu Wakulitulaho Kayafwase ambile ngwenyi, “Ngunakushingisa Kalunga ou ayoya ngwami, tulweze numba nge ove yove Kulishitu MwanaKalunga,” Yesu ahanjikile muchano hakulivuluka ivene ngwenyi ikiye Meshiya. Avalwezele muchano numba tuhu atachikijile ngwenyi vaka-Sunendeline navamuwanyina mulonga nakumusukika.—Mateu 26:63-67.

Nyi etu twatela kulinga ngachilihi? Uno tunahase kuhanjika muchano kachi nge tunatachikiza ngwetu natunganyalilaho vyuma vimwe nge natuhanjika makuli tahi?

Chinahase kupwa chachikalu kupwa vakashishi mumakumbi ano akukuminyina mwomwo vatu vanapu “vaka-kulizanga vavene, vaka-kuzanga jimbongo.” (WaChimoteu 2, 3:2) Vatu vamwe nge vali muuhutu chipwe milimo yauchi veji kulyonganga, nakwiva, chipwe kulinga vyuma vyeka mulizangamina. Muchima kana unalisale kuvatu mwomwo veji kushinganyekanga ngwavo navanganyala hakuhona kushishika. Navaka-Kulishitu vamwe vanafu mumuheto kanou hakufwila ‘kunganyala vyuma mulizangamina,’ kaha vali jino napuho yayipi muchikungulwilo.—WaChimoteu 1, 3:8; WaChituse 1:7.

Vaka-Kulishitu vavavulu veji kulondezezanga Yesu. Vamona ngwavo kupwa navilinga vize asaka Kalunga chapwa chachilemu chikuma kuhambakana kala luheto lwosena. Evi vikiko vyeji kulingisanga vaka-Kulishitu vavanyike vahone kulyonga hakusoneka vyeseko kushikola. (Vishimo 20:23) Lwola lumwe kupwa vakashishi kachalingisa mutu anganyalilehoko, ngana muze chapwile kuli Haykanush. Chipwe ngocho, Kalunga asaka tupwenga lika vakashishi mangana tupwenga nachivezu chitoma, chize chapwa chachilemu chikuma.

 Gagik ambile ngwenyi: “Shimbu kanda ngupwenga ngumuka-Kulishitu ngwapwile nakuzachila hakapani yayinene yize yahanjikilenga makuli mangana yihane mitelo yayindende. Hakupwa yami ngwapwile mukulwane haze hakapani, twalikashilenga ‘chivwasano’ navaka-kutelesa mitelo nakuvahana majika kanwa mangana vahone kututelesa jimbongo jajivulu. Ngocho vangutachikijile kupwa ngumutu wakuhona kashishi. Omu ngwalinangwile muchano, ngwalitwaminyine kuhanjika makuli kana numba tuhu kapani yangufwetelenga jimbongo jajivulu. Kaha ngwechele milimo kana nakusokolola kapani yami yakusekasana yize ngwasonekesele kanawa kufulumende nakutela mitelo yosena.”—Wavaka-Kolinde 2, 8:21.

Ndumbwetu Gagik ambile nawa ngwenyi: “Jimbongo ngwatambwilenga kukapani yami jakulikafwa najo japwilenga jajindende hakujesekesa kuli jize ngwatambwilenga kukapani ngwazachililenga. Oloze ngwasuulukilenga mwomwo ngwapwile nachivezu chamwaza kuli Yehova. Ngwahana chakutalilaho chamwaza kuli vana vami vavali, kaha vangutongola kuzata milimo muchikungulwilo. Vatu vaze ngweji kufwetanga mitelo yakapani yami vangumona jino kupwa mutu wakashishi namuchano.”

Yehova azanga vatu vaze veji kumwalisanga hakupwa navilinga vyamwenemwene vyakufwana nge kashishi. (WaChituse 2:10) Atufwelelesa kutukafwa nge natupwa vakashishi. Ahwiminyinyine Mwangana Ndavichi asoneke ngwenyi: “Ngwapwile ngukanyike, oholyapwa ngunakolo jino, oloze kanda ngumonengaho lyehi muka-kwoloka vanamusuvilila, chipwe kumona vana venyi navalombalomba mboloko.”—Samu 37:25.

Vyuma ahichilemo Lute vyasolola nge apwile wakushishika. Atwalileho lika kutwama nanayewenu Nowemi numba tuhu apwile kashinakaji. Lute ayile kuIsalele kuze akalemeselenga Kalunga wamuchano. (Lute 1:16, 17) Apwile wakashishi, kaha nawa azachilenga nangolo hakuhuhulula mumande, kweseka naJishimbi javatu vakuhutwa. Nge muze chapwile kuli Ndavichi, Yehova kasezele Lute naNowemiko. (Lute 2:2-18) Yehova akiswile Lute hakumuhana vyakulya, nakumukisula nawa muvyuma vyeka. Amusakwile kupwa muchisaka chaMwangana Ndavichi naMeshiya uze vashikile.—Lute 4:13-17; Mateu 1:5, 16.

Vangamba jaYehova vamwe chinahase kuvakaluhwila kuwana jimbongo jakulikafwa najo. Oloze veji kuzatanga nangolo mangana vawane vyakulikafwa navyo muchishishisa chakuwana jimbongo mujila yakuhona kashishi. Hakulinga ngocho, veji kusololanga nge vamona kashishi navilinga vyeka kupwa vyavilemu chikuma kuhambakana luheto.—Vishimo 12:24; Wavaka-Efwesu 4:28.

Vaka-Kulishitu mukaye kosena vafwelela Yehova avakafwe ngana muze alingile Lute. Yehova ashika ngwenyi: “Kangweshi kukakusezako, kangweshi kukakumbilako.” (WavaHepeleu 13:5) Yehova asolola hatoma ngwenyi mwakafwanga vosena vaze navapwa vakashishi lwola lwosena. Putu vene kunyima, natesangamo jishiko jenyi jakuzakama vangamba jenyi.—Mateu 6:33.

Vatu vamona malolwa andando yayinene naluheto lweka kupwa vyavilemu chikuma. Oloze twatela kufwelela ngwetu Setu wamwilu Yehova amona muchima wetu wakushishika navilinga vyeka vyamwaza kupwa vyavilemu chikuma kuhambakana malolwa andando yayinene.