Vemanyinako mazavu amwilu vaze vazachishile hakunongesa Yelusalema vaze nawa navakazachisa hakunongesa kaye kaSatana kakuhuka haAlamangetone. Ulumbunwiso kana unalumukako chindende. Mwomwo ika tunakushimutwila hachakumwenesa kana?

Shimbu kanda 607 B.C.E., Yehova alwezele Ezekele muchakumwenesa vyuma navikasoloka muYelusalema shimbu kanda vayinongese. Muchakumwenesa kana, Ezekele amwene vyuma vyavipi vyalingiwile muYelusalema. Amwene malunga 6 vaze vapwile mutu himutu “nachitwa chakupuzwisa mulivoko lyenyi.” Kwapwile nawa lunga mukwavo “uze avwalile lihina lyamwaza, uze apwile nachinoma chavyuma vyakusonekesa chamuka-kusoneka.” (Ezekele 8:6-12; 9:2, 3) Uze lunga vamulwezele ahite munganda yosena ‘nakufunjika mifunda hajiholo javatu vaze vapwile nakulishimwoka nakulikemenena mikemo havyuma vyaunyengwe vapwile nakulinga vatu munganda.’ Kaha vaze malunga 6 vambachile vitwa vavalwezele vajihe vatu vosena munganda vaze kavapwile namifunda hajiholoko. (Ezekele 9:4-7) Vyuma muka natulinangula kuli echi chakumwenesa, kaha uze lunga ambachile chinoma chavyuma vyakusonekesa emanyinako iya?

Ezekele vamumwenesele chakumwenesa kana mu 612 B.C.E. Upolofweto kana wateselemo chatete omu mwahichile myaka 5 omu Yehova etavishile maswalale javaka-Mbavilone vanongese Yelusalema. Yehova azachishile vaMbavilone vazangamise vatu jenyi vakulikanga. (Yelemiya 25:9, 15-18) Vyuma muka vyasolokele kuli vaYuleya vavilinga  vyamwaza vaze kavazanyine muvilinga vyavipi valingilenga vatu munganda? Yehova akingile vatu kana.

Muchakumwenesa kana, Ezekele keshi ikiye azanyine mumulimo wakufunjika vatu, chipwe kunongesa vatu muze mungandako. Oloze vangelo vakiko vazachile mulimo kanou muYelusalema. Shikaho, upolofweto kana watukafwa tumone vyuma vyeji kusolokanga mwilu. Yehova alwezele vangelo jenyi vanongese vatu vakuhuka nakuzeza vatu vamwenemwene. *

Upolofweto kana naukatesamo nakulutwe. Kunyima twahanjikilenga ngwetu uze lunga ambachile vyakusonekesa emanyinyineko vawavisa vaze vachili nakuyoyela hano hamavu. Twambile nawa ngwetu vatu vaze vevwilililenga nakwitavila mujimbu twambulwilenga vakiko vafunjikilenga mifunda. Oloze tunawane nge ulumbunwiso waupolofweto kana unalumukako chindende. Kweseka namukanda waMateu 25:31-33 tunawane nge Yesu yikiye eji kusopesanga vatu. Mulimo kana mwakauzata kulutwe haluyando lwalunene. Vaze navakapwa kusali yamikoko navakayoya, oloze vaze navakapwa kusali yavapembe navakanonga.

Vyuma muka natulinangula kuchakumwenesa amwene Ezekele? Tukekesenu havishina vino vitanu:

1. Shimbu kanda Yelusalema vayinongese, Ezekele, naYelemiya naIsaya valwezele vatu vyakunongesa nachiza munganda. Vapwile ngana mwamalunga vaka-kutala nganda. Makumbi ano Yehova ali nakuzachisa lizavu lyavawavisa mangana vanangule vatu nakuvalweza vyaluyando lwalunene lunakwiza kulutwe. Kaha nawa vangamba jaKalunga vosena makumbi ano vaze vapwa vaka-kuzata kuzuvo yaKulishitu vali nakwazana mumulimo wakuhuhumuna vatu.—Mateu 24:45-47.

2. Ezekele kafunjikile mifunda vatu vaze vatelele kuyovokako. Navatu jaKalunga makumbi ano kavalinga ngochoko. Oloze veji kwambululanga kaha mujimbu nakulweza vatu vyuma navikasoloka kulutwe. Mulimo kanou wakwambulula vanakuutesamo mwomwo yakuvakafwa kuvangelo.—Kusoloka 14:6.

3. Vatu vaze vayovokele mulwola lwaEzekele kavavafunjikile mifunda yivene hajiholo javoko. Namakumbi ano, vatu vaze navakayovoka kavatwama namifunda yiveneko. Vyuma muka vatela kulinga vatu numba vakayovoke luyando lwalunene? Omu navevwa mujimbu wakuvahuhumuna, vatela kwitavila nakulondezeza Yesu, nakulihana kuli Kalunga nakukundwiza vandumbu jaKulishitu hakwambulula mujimbu wamwaza. (Mateu 25:35-40) Nge navalinga ngocho, kaha navakavafunjika mifunda haluyando lwalunene, kulumbununa nge navakayovoka.

4. Uze lunga akwata vyuma vyakusonekesa, emanyinako Yesu. Halwola lwaluyando lwalunene Yesu mwakafunjika liyongomena lyalinene hajiholo javo omu mwakavasakula kupwa kusali yamikoko. Navakatokwa chikuma hakukayoyela hano hamavu haya myaka yosena.—Mateu 25:34, 46. *

5. Makumbi ano, malunga 6 vaze vambachile vitwa vyakunongesa vemanyinako mayongomena avangelo vamwilu vaze ali nakutwaminyina Yesu. Kalinwaha vanongese vatu vavilinga vyavipi vosena.—Ezekele 10:2, 6, 7; Kusoloka 19:11-21.

Upolofweto kana unatukafwe tufwelele ngwetu Yehova keshi kukanongesa vatu vakuhuka hamwe kaha navatu vakwolokako. (WaPetulu 2, 2:9; 3:9) Kaha nawa tunalinangula ngwetu mulimo wakwambulila vatu makumbi ano ukiko waulemu chikuma. Vatu vosena vatela kwivwa mujimbu wakuvahuhumuna shimbu kanda kunongesa chizenga.—Mateu 24:14.