NDUMBWETU Don wakuCanada eji kwambulilanga vatu vaze kavatwama hamembwavoko oloze veji kutambwojokanga kaha mumikwakwa. Ambile ngwenyi: “Likumbi limwe ngwawanyine lunga umwe uze apwile namajilo chikuma kaha nawa kasakilenga kumuhanjikisako. Lijina lyenyi apwile ikiye Peter. Ketavililenga vatu kumukafwa mukala jilako.” Oloze Don atwalileho kusolwela uze lunga zangi nachisambo hamyaka 14 numba tuhu akanyinenga.

Likumbi limwe Peter ahulishile Don ngwenyi: “Mwomwo ika weji kwijilanga kuli yami? Vakwenu vosena nge ngunavakane kaveshi kwiza chekako, oloze yove hanga weza. Vyuma muka weji kusakanga kuli yami?” Don azachishile visoneka vitatu mujila yakuzangama mangana ambulile Peter nakumuheta kumuchima. Chatete, amuhulishile nge atachikijile lijina lyaKalunga, nakumulweza alitangile ivene muMbimbiliya hali Samu 83:18. Chamuchivali, amulwezele atange Wavaka-Loma 10:13, 14, haze hatwama mazu akwamba ngwavo, “weshowo mwasanyika halijina lyaYehova navakamulwila.” Chamakumishilo, Don alwezele Peter atange Mateu 9:36, haze hatwama mazu akwamba ngwavo: “Omu [Yesu] amwene mayongomena avatu, avevwilile keke, mwomwo vayanjile nakulimwanga nge mikoko vakuzeneka kafunga.” Peter evwile jino namasoji hameso makamaka, kaha ahulishile Don ngwenyi: “Uno nayami vangulavila hali ava mikoko tahi?”

Peter aputukile kwalumunako chiyoyelo chenyi. Asanyine, nakuteula wevu wenyi, nakuvwala uvwalo wamwaza uze amuhanyine Don. Ngocho asolokelenga jino waunyoji mwomwo atwalileho lika kuliwahisa.

Peter apwile namukanda uze asonekelenga mijimbu yamukuyoya chenyi. Mijimbu yize asonekele hakavanga yapwile yayipi mwomwo lwola lwosena apwilenga wakupihilila kaha. Oloze yize asonekele omu aputukile kulinangula naDon yapwile yamwaza. Mazu amwe asonekele shina aze akwamba ngwenyi: “Likumbi lyalelo ngunalinangula lijina lyaKalunga. Ngocho  ngweji kulombanga jino kuli Yehova. Kaha ngwawahilila chikuma kutachikiza lijina lyenyi. Don angulwezele ngwenyi ngunahase kupwa nguSepa lyaYehova, mwomwo kala lwola ngunahase kuhanjika nenyi, kaha mwevwilila kukulomba chami.”

Mazu amakumishilo asonekele Peter mumukanda wenyi awasonekelele vandumbwenyi. Asonekele ngwenyi:

“Lelo kangweshi nakwivwa kanawako. Ushinakaji unanguzeyesa. Oloze chipwe tuhu nangufwa, ngunejiva ngwami nangukamona cheka sepa lyami [Don] muPalachise. Tachikizenu ngwenu kangweshi kupwa cheka hamwe nayenuko. Oloze nge namukamona mutu uze kamwatachikizako neza kuchipeji chami, mukamutambwokesa nachisambo. Kaha mwatela kutanganga ou mukanda. Ou mukanda wahanjika ngwawo sepa lyami nangukamumona cheka muPalachise. Chuma kana ngwachifwelela namuchima wami wosena. Yami ndumbwenu Peter.” Peter apwile nakuvuluka mukanda “[wa]Mucano Uli Nakutetekela Kumwono Wamyaka Yosena.” *

Omu chakumine chipeji, Ummi, yaya yaPeter ambile ngwenyi: “Myaka yivali kunyima Peter ejile nakungumona. Aha hakiko ngwamumwene nawahilila.” Ummi alwezele Don ngwenyi: “Ou mukanda nanguutanganga mwomwo wakafwile songo yami.” Ummi etavilile kulinangula Mbimbiliya naVinjiho jaYehova kuzachisa mukanda waUno Chikupu Mbimbiliya Yanangula Vyuma Muka?

Nayetu twatela kwambulilanga vatu vosena chamokomoko nomu vapwa, nakuvatalililanga chikoki, nakuvasolwela zangi. (Chimo. 1, 2:3, 4) Nge natulinga ngocho kaha tunahase kuwana vatu vamwaza michima ngana mwaPeter, numba tuhu kaveshi kusoloka kanawa kumujimbako. Kaha twatela kufwelela ngwetu Kalunga uze “eji kutalanga mumuchima” mwavakafwa vazovoloke kushipilitu.—Samwe. 1, 16:7; Yowa. 6:44.