1, 2. (a) Luheto muka lwakushipilitu atuhana Yehova? (b) Vyuma muka natushimutwila muchihande chino?

YEHOVA atwama naluheto chikuma mwilu nahamavu. (Miji. 1, 29:11, 12) Hakupwa Setu uze apwa muka-kuhana, eji kuhananga luheto lwenyi lwakushipilitu kuli vaze valumona kupwa lwalulemu. Luheto atuhana Yehova shina (1) Wangana waKalunga, (2) mulimo wakwambulula uze weji kuyovolanga vatu, (3) muchano waulemu uze watwama muMazu enyi. Oloze nge katwazangamineko tunahase kuhona kumona kulema chaluheto kana. Hakusaka tutwaleho lika kumona luheto kana kupwa lwalulemu, twatela kuluzachisanga mujila yamwaza nakutwalaho kuluzanga. Yesu ambile ngwenyi: “Kuze kuli luheto lwenu, kukiko vene nakupwanga namichima yenu.”—Luka 12:34.

² Tushimutwilenu omu tunahase kusolola zangi yetu namuchima wakusakwilila haWangana, namulimo wakwambulula namuchano wamuMazu aKalunga. Shinganyekenu omu munahase kuzamishilamo zangi yenu haluheto kanelu lwakushipilitu.

3. Vyuma muka alingile muka-kusekasana wamuchishimo chaYesu mangana alande yize pela? (Talenu muvwimbimbi wakulivanga.)

³ Tangenu Mateu 13:45, 46. Yesu atele chishimo chamuka-kusekasana uze ayile nakutonda jipela. Ou muka-kusekasana alanjilenga nakulanjisa jipela hamyaka yayivulu. Oloze awanyine pela yamwaza yize yamulingishile awahilile chikuma. Hakusaka kulanda pela kana, ayile nakulanjisa vyuma vyenyi vyosena apwile navyo. Chapundu vene, amwene pela kana kupwa yayilemu.

4. Kachi nge twazanga Wangana waKalunga ngana muze chapwile kuli muka-kusekasana uze azangile pela, kaha natulinga ika?

⁴ Vyuma muka natulinangula kuchishimo kana? Muchano waWangana waKalunga wapwa nge pela yandando yayinene. Nge natuuzanga ngana muze uze lunga azangile yize pela, kaha natulisuula kumbila kala vyuma vyakukaye mangana tupwenga vatu vayula kuWangana waKalunga. (Tangenu Mako 10:28-30.) Tuchishimutwilenu havatu vavali vaze valisuwile kulinga ngocho.

5. Zakeu asolwele ngachilihi ngwenyi azangile Wangana waKalunga?

⁵ Zakeu apwile mukulwane wavaka-kutambula mitelo, kaha apwile naluheto lwaluvulu luze atambwilenga kuvatu mulizangamina. (Luka 19:1-9) Oloze omu evwile Yesu ali nakwambulula vyaWangana, amwene kulema chavyuma evwile nakwalumuna chiyoyelo chenyi. Ambile ngwenyi: “Tala! Ove Mwata, chimbwa chavikumba vyami nanguchihana vaka-kuhutwa, kaha weshowo ngwalyapwile nakumutambula chuma, nangumushishishilamo viwana.” Alisuwile kuhana vatu luheto lwenyi, nakumbila muchima walizangamina.

6. Vyuma muka alingile pwevo umwe numba atengamo kupwa mutu uze vayula kuWangana waKalunga, kaha mwomwo ika?

⁶ Pwevo umwe uze alisavalilenga navakwavo mapwevo, vamwambulilile mujimbu waWangana. Apwile twamina waliuka lize lyahakwilililenga vaka-kulisavala navatu vausonyi woumwe. Oloze omu aputukile kulinangula Mbimbiliya, amwene jino kulema chamuchano waWangana. Ngocho amwene ngwenyi atela kwalumuna chiyoyelo chenyi. (Koli. 1, 6:9, 10) Shikaho asezele mulimo azachilenga nakulilukulula namukwavo pwevo ambachile. Kuheta mu 2009 vamumbapachishile, kaha mwaka wakavangijileho aputukile kuzata upayiniya washimbu yosena. Ou ndumbwetu azangile chikuma Yehova naWangana wenyi kuhambakana milimo yenyi.—Mako 12:29, 30.

7. Natutwalaho ngachilihi kuzanga Wangana waKalunga?

⁷ Etu vavavulu nawa twalumwine chiyoyelo chetu mangana tutengamo kupwa vatu vayula kuWangana waKalunga. (Loma 12:2) Chipwe ngocho twatela kutwalaho lika kwalumunako vyuma vimwe mukuyoya chetu. Twatela kuzangama navyuma vyakufwana nge muchima wakufwila luheto nawakufwila kulinga ujila. (Vishi. 4:23; Mateu 5:27-29) Yehova atuhana luheto lweka lwandando yayinene mangana lutukafwe kutwalaho lika kuzanga Wangana waKalunga.

8. (a) Mwomwo ika kaposetolo Paulu ambile ngwenyi mulimo wetu wapwa nge ‘luheto mumilondo yauma’? (b) Paulu asolwele ngachilihi ngwenyi azangile mulimo wakwambulula?

⁸ Yesu atuhana mulimo wakwambulula nakunangula vatu mujimbu waWangana waKalunga. (Mateu 28:19, 20) Kaposetolo Paulu amwene kulema chamulimo kanou wakwambulula. Ambile ngwenyi amwene mulimo wakwambulula kupwa nge ‘luheto mumilondo yauma.’ (Koli. 2, 4:7; Chimo. 1, 1:12) Numba tuhu twapwa milondo yakuhona kukupuka, oloze mujimbu tweji kwambululanga  weji kunehanga kuyoya kuvatu vosena. Shikaho Paulu ahanjikile ngwenyi: “Ngweji kulinganga vyuma vyosena mwomwo yamujimbu wamwaza mangana nguwambulule kuvatu veka.” (Koli. 1, 9:23) Paulu azangile chikuma mulimo wakwambulula, ngocho azachile nangolo mumulimo wakunangula vatu vapwenga tumbaji. (Tangenu Wavaka-Loma 1:14, 15; WaChimoteu 2, 4:2.) Echi chamukafwile omike muvyeseko vyavinene ahichilemo. (Teso. 1, 2:2) Natuhasa kulondezeza ngachilihi kaposetolo Paulu?

9. Jijila muka tunahase kusolwelamo ngwetu twazanga mulimo wakwambulula?

⁹ Jila yimwe Paulu asolwelelemo ngwenyi azangile mulimo wakwambulula, shina yakuhanjikanga navatu kwosenokwo avawanyinenga. Nayetu nawa tweji kwambululanga mukutulukila, kuvihela vyasanga nakuzuvo hizuvo ngana muze valingilenga vaposetolo navaka-Kulishitu vakulivanga. (Vili. 5:42; 20:20) Kachi nge chinahase, tweji kufwila kutohwesa mulimo wetu hakuzatako upayiniya wakukafwa, chipwe washimbu yosena. Tunahase nawa kulinangula lilimi lyeka chipwe kuya kuchihela cheka chipwe kulifuchi lyeka nakwambulula mujimbu.—Vili. 16:9, 10.

10. Uno Irene anganyala ngachilihi hatwima yenyi yakwambulula mujimbu?

¹⁰ Tushimutwilenu hachakutalilaho chaIrene, ndumbwetu wapwevo wamujike wakuUnited States. Afwililile kwambulila matunduke vaze vahanjikilenga lilimi lyakuRussia. Halwola aputukile kulinangula lilimi kana mu 1993, kwapwile lizavu lyavaka-kwambulula 20 kaha vaze vazachishilenga lilimi kana munganda yaNew York. Irene nazate nangolo hamyaka 20 kwambulila vatu mulilimi kana. Ou ndumbwetu ambile ngwenyi: “Noholyapwa vene lilimi kana kangwalitachikiza kanawako.” Oloze Yehova namukafwe hamwe kaha navakwavo hakukilikita chavo. Oholyapwa munganda yaNew York muli vikungulwilo 6 vyazachisa lilimi lyakuRussia. Vatu 15 vaze Irene anangwilenga Mbimbiliya vavambapachisa. Vamwe jino veji kuzachilanga haMbetele, veka vapwa vapayiniya kaha vakwavo tulama. Ou ndumbwetu Irene eji kwambanga ngwenyi, “Ou ukiko mulimo weji kungunehelanga kuwahilila mukuyoya chami.” Chapundu vene, amona mulimo wakwambulula kupwa waulemu chikuma.

11. Nge natwambululanga mujimbu chamokomoko nakutufumbukila, kaha vyuma muka navifumamo?

¹¹ Nge twamona mulimo wakwambulula kupwa waulemu kaha natutwalaho kwambulula chamokomoko navyeseko natumona, ngana muze alingile kaposetolo Paulu. (Vili. 14:19-22) Kuputuka muji 1930 nakuheta kumaputukilo aji 1940, vandumbwetu muUnited States vavayanjishile chikuma. Oloze vomikile nakutwalaho kwambulula. Vatwalilenga vihande kana kujizango jakusopela. Mu 1943,  Ndumbwetu Nathan H. Knorr ahanjikile hamulonga umwe vasambile muZango Yayinene yakusopela mu U.S, ngwenyi: “Tunasambe mulonga kana mwomwo yangolo jenu. Nge vaka-kwambulula kavatwalileho kwambululako, kachi kakwapwile mulonga wakutwala kuZangoko. Oloze tunakufungulula mwomwo yayenu vaka-kwambulula vosena mukaye munakutwalaho lika kwambulula chakuhona kulitwamina. Tunasambe mwomwo yakumika chenu.” Namakumbi ano vandumbwetu mumafuchi eka vanakutwalaho lika kumika nakwambulula mujimbu chamokomoko nakuvafumbukila. Ngocho vali nakusambanga milonga kana mujizango. Chikupu vene, kuzanga mulimo wakwambulula chinatulingisa tutwaleho kuuzata chamokomoko nakutufumbukila.

12. Vyuma muka muli nakufwila kulinga mangana mutohwese mulimo wakwambulula?

¹² Nge natumonanga mulimo wakwambulula kupwa luheto lwakuli Yehova, kaha katweshi kufwila kuzata mangana tuhetese “jola” jasakiwa kahako. Oloze natulinganga vyuma vyosena mangana tuhanenga “kanawa unjiho wamujimbu wamwaza.” (Vili. 20:24; Chimo. 2, 4:5) Uno vyuma muka natunangula vatu? Tushimutwilenu haluheto lukwavo atuhana Kalunga.

13, 14. Uno ‘zuvo yakulamina luheto’ avulukile Yesu hali Mateu 13:52 yapwa ika, kaha natuyizalisa ngachilihi?

¹³ Luheto lwamuchitatu shina muchano uze twalinangula. Yehova ikiye Kalunga wamuchano. (Samwe. 2, 7:28; Samu 31:5) Hakupwa Setu, eji kunangulanga muchano vatu vaze vamwivwa woma. Kufuma halwola twaputukile kulinangula, tunatachikiza muchano wauvulu kuhichila muMazu enyi Mbimbiliya, namumikanda yetu, nakukukunguluka changalila, nachachihanda nachachikungulwilo. Mukuhita chalwola twapwile jino ‘nazuvo yakulamina luheto’ lwamuchano wamwaka nou wauhya. (Tangenu Mateu 13:52.) Yehova mwatukafwa tupwenga namuchano wauhya ‘muzuvo yetu yakulamina luheto,’ nge natutondatondanga muchano kana ngana mwaluheto lwakuvumbama. (Tangenu Vishimo 2:4-7.) Uno tunahase kulinga ngachilihi ngocho?

¹⁴ Twatela kupwanga nachilongesa chahauka, nakuhehwojolanga muMazu aKalunga namumikanda yetu. Echi nachitukafwa tutachikize muchano wauhya uze katwejivile hakavangako. (Yoshu. 1:8, 9; Samu 1:2, 3) Kaposhi Kakutalila watete uze alovokele muJuly 1879 ambile ngwenyi: “Muchano wapwa nge lutemo lwamwaza luze lunasoko mukachi kamwila. Nge uli nalwo lukinge. . . . Nge unaluwane lumbate. Kanda kusuuluka nalutemo lumwe kahako, chipwe ngwetu muchano watete unalinangula. . . . Twalaho kutondatonda jikwavo.” Shikaho twatela kufwila kuzalisa zuvo yetu yakulamina luheto namuchano wauvulu.

15. Mwomwo ika natuvulukila vyuma vimwe twalinangula ngwetu “muchano wamwaka,” kaha vyuma muka vize mwazanga chikuma?

¹⁵ Omu twaputukile kulikata navatu jaKalunga hakiko twaputukile kutachikiza muchano watete waulemu. Ou ukiko natwamba ngwetu “muchano wamwaka” mwomwo ukiko twavangilile kulinangula. Uno vyuma muka twalinangwile? Twalinangwile nge Yehova ikiye Tengi uze atuhana kuyoya, kaha nawa ajina kulingila vatu vyuma vyamwaza. Twalinangwile nawa nge Kalunga atumine Mwanenyi kupwa ndando yakutusokola kushili nakukufwa. Kaha nawa twalinangwile nge Wangana wenyi naukakumisa kuyanda, kaha vatu vatalilila kukayoya haya myaka yosena mukuunda nakuwahilila.—Yowa. 3:16; Kuso. 4:11; 21:3, 4.

16. Vyuma muka twatela kulinga nge muchano umwe vanawalumuna?

 ¹⁶ Mukuhita chalwola upolofweto umwe wamuMbimbiliya naulumbunwiso umwe wamuVisoneka veji kuwalumunanga. Kachi nge vyuma vimwe vanavyalumuna, kaha twatela kunoneka lwola nakutanga mijimbu kana nakuhunananaho kanawa. (Vili. 17:11; Chimo. 1, 4:15) Twatela kufwila kwivwishisa vyuma vyosena vanalumuna, numba vipwa vyavindende chipwe vyavinene, nakumona chihandwa chili hali vize vyavihya navyamwaka. Nge natulinga ngocho kaha nachipwanga chachashi kulama muchano wauhya. Mwomwo ika twatela kulingila vyuma kana?

17, 18. Shipilitu yajila yinahase kutukafwa ngachilihi?

¹⁷ Yesu anangwile ngwenyi shipilitu yaKalunga nayitukafwa twanukenga vyuma twalinangwile kunyima. (Yowa. 14:25, 26) Uno kutachikiza chuma kana nachitukafwa ngachilihi hakupwa tuvaka-kwambulula mujimbu wamwaza? Talenu hachakutalilaho chandumbwetu Peter. Mu 1970 apwile namyaka yakusemuka 19, kaha aputukile kuzachila haMbetele muBritain. Likumbi limwe omu apwile nakwambulila kuzuvo hizuvo, awanyine mukulwane walunga uze apwile naviwevu. Ndumbwetu Peter ahulishile ou lunga nge mwetavila kulinangula Mbimbiliya. Uze lunga amulwezele ngwenyi ikiye apwa kaYuleya kaha nawa kalapi. Ngocho esekele Peter hakumuhulisa ngwenyi, “Ove kanyike, mukanda waNdanyele vausonekele mulilimi muka?” Peter akumbulwile ngwenyi, “Chihanda chimwe vachisonekele muchiAlamayiki.” Peter ambile ngwenyi: “Uze kalapi alikomokele mwomwo ngwamukumbulwile mwakwoloka, oloze nayami nawa ngwalikomokelele. Uno chuma muka changukafwile ngukumbulule mwakwoloka? Omu ngwakindulukile kwimbo ngwakekesele mujimangazini jakunyima jaKaposhi Kakutalila naTonenu! kaha ngwawanyine chihande chize chalumbunwine nge mukanda waNdanyele vausonekele muchiAlamayiki.” (Ndanye. 2:4, kwinyikila chamwishi) Eyo, shipilitu yajila yeji kutwanukisanga vyuma vize twatangile lyehi nakuvihaka muzuvo yetu yakulamina luheto.—Luka 12:11, 12; 21:13-15.

¹⁸ Nge twamona mangana akufuma kuli Yehova kupwa amalemu, kaha nachitulingisa tuzalise muzuvo yetu namuchano wamwaka nou wauhya. Omu zangi yetu yakuzanga Yehova nayitohwelako, natutamo jino kupwa vaka-kunangula vatwima.

19. Mwomwo ika twatela kukinga luheto lwetu lwakushipilitu?

¹⁹ Satana nakaye kenyi veji kufwilanga kukivisa zangi yetu yakuzanga vyuma vyakushipilitu vize tunashimutwila muchihande chino. Tuvosena vanahase kutweseka kuli Satana. Nahase kutweseka tufwile milimo yayinene yakukaye, nachiyoyelo chauhando, chipwe kupwa namuchima wakutembesa vyuma twatwama navyo. Kaposetolo Yowano atulweza ngwenyi, kano kaye kali nakuhita hamwe nakufwila chako. (Yowa. 1, 2:15-17) Ngocho, twatela kuzata nangolo mangana tutwaleho kuzanga luheto lwetu lwakushipilitu.

20. Vyuma muka muli nakufwila kulinga mangana mulame luheto lwenu lwakushipilitu?

²⁰ Fwilenu kuseza kala vyuma vize navimilingisa muhone kuzanga Wangana waKalunga. Twalenuho kwambulula mujimbu natwima nakuhona kuzelendenda mulimo kanou wakuyovola vatu. Kaha twalenuho kutondatonda muchano waKalunga. Nge namulinga ngocho, kaha namukungulwila luheto lwenu mwilu “muze mwiji mwahona kupandama, chipwe katutu kulwenyekako. Mwomwo kuze kuli luheto lwenu, kukiko vene nakupwanga namichima yenu.”—Luka 12:33, 34.