YEHOVA KALUNGA alweza vaka-Kulishitu vafwilenga kutwama mukuunda nakuchimona kupwa chachilemu mukuyoya chavo. Nge natupwanga vakuunda, kaha natutwamanga navakwetu mukuunda. Echi cheji kulingisanga vatu vaze vazanga kutwama mukuunda vezenga muchikungulwilo chavaka-Kulishitu.

Chakutalilaho, chimbanda umwe muMadagascar amwene omu Vinjiho jaYehova vatwaminenga mukuunda navakwavo. Alyambile mumuchima wenyi ngwenyi, ‘Nge nangukasaka kuya kuchachi, kaha nangukapwa nguchinjiho.’ Kutwala muze, echele vilinga vyenyi vyakupanda, nakuwahisa ulo wenyi mangana ulitombole najindongi jamuMbimbiliya, kaha aputukile kulemesa Yehova Kalunga wakuunda.

Ngana mwauze lunga, mwaka himwaka vatu vavavulu vali nakwiza muchikungulwilo chavaka-Kulishitu mangana vawane kuunda chize vali nakutondatonda. Oloze Mbimbiliya yahanjika hatoma ngwayo, “lwiso lwalupi nakulikindukila” vinahase kujiha usepa wavatu nakuneha ukalu muchikungulwilo. (Yako. 3:14-16) Chipwe ngocho, Mbimbiliya yatulweza mwakukumishila ukalu kana mangana tutwame mukuunda. Tushimutwilenu haukalu uze weji kutusolokelanga nomu tunahase kuuhonesa.

CHRIS ambile ngwenyi: “Ngwalikokojweselenga nandumbwami ngwazachilenga nenyi. Likumbi limwe omu twapwile nakulikokojwesa, vatu vavali vejile nakututala.”

JANET ambile ngwenyi: “Likumbi limwe, ndumbwami uze ngwazachilenga nenyi chikuma muwande angulwezele ngwenyi katweshi kuzatanga cheka hamweko. Kaha echele nakunguhanjikisanga. Oloze kangwatachikijile ovyo angujinjilileko.”

MICHAEL ahanjikile ngwenyi: “Likumbi limwe twapwile nakushimutwila hashinga tuvatatu. Umwe asalishile, kaha ngwashinganyekele ngwami navatula shinga kumana pimbi. Ngocho ngwaputukile kuhanjika vyuma vyavipi hali ikiye.”

GARY ambile ngwenyi: “Vapayiniya vavali muchikungulwilo chetu valikokojweselenga. Umwe aputukile kutenukila mukwavo. Vikokojola vyavo vyevwishilenga vandumbwetu kupihya.”

Munahase kushinganyeka ngwenu ou kawapwile ukalu wauneneko. Oloze ukalu kana wavevwishilenga kumuchima kupihya nakuvazeyesa kushipilitu. Munahase kwivwa kuwaha kutachikiza ngwenu ava vandumbwetu vakavangijile jindongi jamuMbimbiliya jize javakafwile vakumise vikokojola vyavo. Uno mwashinganyeka ngwenu vakavangijile jindongi muka?

“Kanda namulitenukila mujilako.” (Kupu. 45:24) Yosefwe ikiye ahanjikile mazu kana kuli vandumbwenyi omu vapwile nakukinduluka  kuli sevo. Mazu kana apwile amalemu chikuma. Nge mutu mwapihililanga washi, nahase kulingisa navakwavo vapwenga namatoto. Chris uze twavulukanga amwene ngwenyi apwile namuchima wakulivwimba nakuhona kwivwilila vakwavo. Shikaho ayile kuli uze ndumbwenyi nakulikonekela, kaha nawa azachilile hamuchima wenyi wamatoto. Echi chalingishile uze ndumbwenyi muvazachililenga nayikiye avwovuwise muchima. Oholyapwa jino veji kuzachilanga Yehova hamwe mukuwahilila.

“Kachi nge vatu kavatwamine pungako, vyuma vanajinyi kulinga vyeji kukuminamo.” (Vishi. 15:22) Janet amwene mazu kana kupwa amalemu. Ngocho ayile akahanjike nandumbwenyi. Janet amuhulishile mukuzangama mangana amulweze ovyo amujinjilile. Hakavanga chapwile chachikalu kushimutwila, oloze vashimutwilile nakukumisa ukalu wavo mukuunda. Uze ndumbwenyi amwene ngwenyi kevwishishile chihande kanako, kahechi chikiko chamulingishile ajinde Janet. Alikonekelele kuli Janet, kaha vali jino nakuzachila Yehova hamwe.

“Kachi nge uli nakuneha wana wove kulijiko lyakulumbila, kaha hakuheta kuze hinawanuka ngwove uli namulonga nandumbwove, seza wana wove kulutwe lwalijiko lyakulumbila, kaha yako. Chatete kalivwasane nandumbwove.” (Mateu 5:23, 24) Pamo muli nakwanuka awa mazu ahanjikile Yesu muChihande ChahaPili. Michael evwile kupihya hamazu amapi ahanjikile. Kaha azachile nangolo mangana vatwame cheka mukuunda nandumbwenyi. Shikaho ayile akalikonekele kuli ndumbwenyi. Vyuma muka vyafuminemo? Michael ambile ngwenyi, “Ndumbwami angukonekelele namuchima wakusuuluka.” Ngocho vapwile cheka vasepa namutu.

“Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo.” (Kolo. 3:12-14) Vaze vapayiniya vavali vavakafwile kuli mukulwane umwe muchikungulwilo, hakuvalweza vashinganyeke havihula vino: ‘Uno twatela kunyengetesa vandumbwetu mwomwo yavikokojola vyetu tahi? Uno kuli vyuma vyatela kutulingisa tuhone kulikonekela mangana tuzachile Yehova mukuunda tahi?’ Vetavilile nakukavangiza vyuma avakafwile uze mukulwane. Oholyapwa veji kuzachilanga hamwe hakwambulula mujimbu wamwaza.

Kukavangiza mazu atwama hali Wavaka-Kolose 3:12-14, nachitukafwa nge ndumbwetu natuhukanyisa. Vavavulu veji kukonekelanga vakwavo nakuvulyamako. Oloze nge nachimikaluhwila kuliula tutenga twavakwenu, kaha mwatela kuzachisa mazu ahali Mateu 18:15.  Numba tuhu mazu ahanjikile Yesu atalisa kuvyuma atela kulinga mutu nge navulumuna mulonga waunene kuli mukwavo, oloze jindongi kana jinahase kumikafwa nayenu. Shikaho mwatela kuya kuli ndumbwenu mukashimutwile mukulinyisa nalikoji mangana mukumise ukalu wenu.

MuMbimbiliya mwatwama jindongi jikwavo jakutukafwa mwakuhonesela vikokojola. Jindongi jimwe shina jakusolola “mihako yashipilitu” yakufwana nge “zangi, kuwahilila, kuunda, kutalilila chikoki, likoji, kuwaha, lufwelelo, kuvova, namuchima wakulikanyisa.” (Ngale. 5:22, 23) Vilinga kana vyeji kukafwanga vatu vatwame mukuunda nganomu maji eji kuvwovuwisanga chikova.

Vilinga vyakulisezaseza twatwama navyo vyeji kutulingisanga tulivwasane navakwetu. Chipwe ngocho, vilinga kana vinahase nawa kutulingisa tulikokojwesenga. Mukulwane umwe muchikungulwilo ambile ngwenyi: “Mutu wasonyi keshi kuhasa kupwa hamwe nauze asaka kuhanjejeka chikumako. Ukalu kana unahase kusoloka nge waundende, oloze unahase kuneha vikokojola vyavinene.” Kutala mwashinganyeka ngwenu chapwa chachashi vatu vavilinga vyakulihandununa kulimbalaka tahi? Tuchitalenu hachakutalilaho chavaposetolo vavali. Uno Petulu apwile navilinga muka? Pamo mwashinganyeka ngwenu apwile muka-kulusuka kuhanjika. Nyi ngachilihi Yowano? Pamo twamutachikiza kupwa mutu wazangi mwomwo yavilinga vyenyi nahanjikiso yenyi. Kunahase kupwa vyuma vize vyatulingisa tushinganyeke mujila kaneyi hali ava vaposetolo vavali. Chasoloka nge vapwile navilinga vyakulihandununa. Chipwe ngocho, valivwasanyinenga nakuzachila hamwe. (Vili. 8:14; Ngale. 2:9) Namakumbi ano, vaka-Kulishitu vavilinga vyakulisezaseza vanahase kuzachila hamwe.

 Pamo muchikungulwilo chenu mwatwama ndumbwenu wavilinga vize vyeji kumivwisanga kupihya. Chipwe ngocho, mwamuzanga hakutachikiza ngwenu nayikiye vamufwililile kuli Kulishitu. (Yowa. 13:34, 35; Loma 5:6-8) Shikaho muchishishisa chakulihenda kumutu kana, mwatela kulihulisa ngwenu: ‘Uno ou ndumbwami eji kulinganga vyuma vize vyalimbalaka naVisoneka tahi? Kutala asaka kaha angwivwise kupihya tahi? Nyi vilinga vyetu vikiko kaha vyalihandununa?’ Kaha chihula chachilemu mwatela kulihulisa shina echi: ‘Vilinga muka vyamwaza atwama navyo vize vinahase kungunganyalisa?’

Kutalanga havilinga vyamwaza vyavandumbwetu nachitunganyalisa chikuma. Nge ndumbwenu asaka kuhanjika chikuma oloze yenu kamwapwa ngochoko, kaha shinganyekenu hajila yamwaza eji kuputukilangamo kuhanjika navatu wamuwande. Munahase kulivwasana muzate hamwe muwande nakufwila kulinangula kuli ikiye. Nge ndumbwenu atwama namuchima wakuhana oloze yenu wauchi, kaha mwatela kumona kuwaha cheji kwizanga hakupwa namuchima wakuhana vandumbwetu vatushinakaji, navaze vanakuviza navaze vanakalikiza. Shikaho numba mukwechi vilinga vyakulihandununa navandumbwenu, oloze munahase kulikata navo hakushinganyeka havilinga vyamwaza vatwama navyo. Kulinga vyuma kana nachimikafwa mulikate navandumbwenu, nakulingisa chikungulwilo chosena chipwenga chakulinunga.

Yuwochiya naSunduke vapwile navilinga vyakulihandununa. Oloze kaposetolo Paulu avakolezezele “vapwenganga navishinganyeka vyovimwe muli Mwata.” (Fwili. 4:2) Kutala nayenu muli nakufwila kukavangiza mazu kana mangana mutwame mukuunda navakwenu tahi?

Nganomu mwila weji kukivisanga jimbuto, nakutwalaho kwivwila vandumbwetu kupihya cheji kunehanga chijindo. Nge vishinganyeka kana vinayangilila mumuchima, kaha  navandumbwetu veka muchikungulwilo vanahase kupwa navishinganyeka kanevi vyavipi. Shikaho, kuzanga Yehova navandumbwetu nachitukafwa tuhonese vikokojola mangana tutwame mukuunda navatu jenyi.

Nge natufwilanga kukumisa vikokojola, kaha nachitwivwisa kuwaha mwomwo natutwama mukuunda navandumbwetu. Ndumbwetu umwe ambile ngwenyi: “Ngwamwene ngwami ndumbwami umwe anguhanjikishilenga kwijiva nge anakuhanjika nakanyike. Echi changwivwishilenga kupihya. Kutwala muze ngwaputukile kumufutulula nge mwanguhanjikisa. Ngwashinganyekele ngwami kanguvumbikilengako, kaha nayami kangweshi kumuvumbikako.”

Ou ndumbwetu aputukile kushinganyeka havyuma apwile nakulinga. Ambile ngwenyi: “Ngwatalile hatutenga twami, kaha ngwamwene ngwami ami yami ngwapwile naukalu. Ngwamwene jino ngwami ngwatelelele kwalumunako vishinganyeka vyami. Ngwalombele kuli Yehova ngocho ngwasonekele mukanda wakulikonekela nakumutwalila, kaha ngwamuhichikile nawana ngwamulanjilile. Twalipakachile mukasamba kaha angukonekelele. Kufuma vene haze, katwalimbalaka chekako.”

Vatu makumbi ano vafwila kutwama mukuunda. Oloze nge kuli vyuma vimwe vinavevwisa kupihya, veji kulikokojwesanga navakwavo. Omu mukiko chapwa kuli vatu vavavulu vaze kavalemesa Yehovako. Oloze vatu vaze veji kumulemesanga vatela kutwama mukuunda nakulinunga. Kalunga ahwiminyinyine Paulu asoneke ngwenyi: “Ami . . . ngunamilembelela mutambukenga nganomu mwatela kusanyika kana chize vamisanyikile, nakulinyisa chosena, nakuvova, nakutalilila chikoki, nakuliula tutenga twavakwenu muzangi, nakufwilanga kulama kulinunga chenu hamwe mushipilitu chize cheji kuminunganga hamwe mukuunda.” (Efwe. 4:1-3) ‘Kulinunga hamwe mukuunda’ chapwa chachilemu. Shikaho twatela kufwila kukumisanga washi vikokojola mangana tutwame mukuunda.