1, 2. Vyuma muka twatela kutachikiza? (Talenu muvwimbimbi wakulivanga.)

NGANOMU twashimutwilanga muchihande chinafumuho, Liyavolo eji kuvangijikilanga Yehova ngwenyi katamo kuyulako, kaha nawa ngwenyi vatu navapwa vakuwahilila nge navaliyula vavene. Uno Satana ahanjikile mwakwoloka tahi? Twambenu ngwetu vatu vaze vasaka kuliyula vavene navakayoya haya myaka yosena. Kutala vatu kana vanahase kuyoya kanawa chakuhona kuvatwaminyina kuli Kalunga tahi? Uno munahase kupwa vakuwahilila kuyoya haya myaka yosena oku muli nakuliyula enu vavene tahi?

² Mutu himutu atela kushinganyeka havihula kana nakuwana mwakukumbulwila. Echi nachitukafwa tutachikize ngwetu chiyulo chaKalunga chapwa chakwoloka. Eyo chikiko kaha chapwa chamwaza. Ngocho twatela kuchikundwizanga namuchima wetu wosena. Mbimbiliya yatulweza jindongi jakusolola ovyo twatela kumukundwijila. Tushimutwilenu omu Visoneka vyasolola kwoloka chawata waYehova.

3. Mwomwo ika Yehova atamo kuyula?

³ Yehova ikiye Muka-kuyula wakutamo mwomwo apwa Kalunga wangolo josena, kaha nawa ikiye atutengele. (Miji. 1, 29:11; Vili. 4:24) Hali Kusoloka 4:11 hatwama mazu vahanjikile vaze 144,000 navakayula naKulishitu mwilu muchakumwenesa ngwavo: “Ove Yehova Kalunga ketu, ove watamo kutambula upahu nakavumbi nangolo, mwomwo ove yove watangile vyuma vyosena, kaha mwomwo mukiko mwaya muchima wove, shikaho vyapwileko kaha nawa wavitangile.” Eyo, Yehova atamo kuyula vatu navangelo mwomwo ikiye atengele vyuma vyosena.

4. Mwomwo ika kulikanga kuwata waKalunga chapwila jila yayipi yakuzachishilamo lisesa lyetu lyakulisakwila vyakulinga?

⁴ Satana katengele chuma numba chimweko. Shikaho, katamo kuyula mwilu nahano hamavuko. Satana, naAlama naEve valikangile kuchiyulo chaYehova. (Yele. 10:23) Hakuwana nge vapwile nalisesa lyakulisakwila vyakulinga, ngocho vasakwile kulikanga kuli Kalunga. Uno omu mukiko vatelelele kuzachisa lisesa lyavo tahi? Nduma. Lisesa lyakulisakwila vyakulinga lyeji kukafwanga vatu vasakulenga kanawa vyuma mukuyoya chavo. Oloze kavatela kulikanga kuli Tengi yavo uze apwa Muka-kuhana kuyoyako. Chikupu vene kulikanga kuli Yehova chapwa kuzachisa lisesa kana mujila yayipi. Hakupwa tuvatu, vatela kutuyula kuli Yehova.

5. Mwomwo ika natwambila ngwetu Kalunga atwama nachiyulo chamwaza?

⁵ Kuli nawa chuma chikwavo chalingisa Yehova kupwa Muka-kuyula wakutamo. Eji kuyulanga mukwoloka. Ambile ngwenyi: “Ami yami Yehova, Ou eji kusololanga zangi yakwilila, nachiyulo, nakwoloka hamavu. Mwomwo ngwazanga vyuma kana.” (Yele. 9:24) Chiyulo chenyi kachapendamina hamukanda wajishimbi vasoneka kuvatu vakuhona kukupukako. Oloze chapendamina hajishimbi jenyi ivene jize ahana vatu vajikavangizenga. “Litanda [lyenyi] valitungila hakwoloka nachiyulo,” ngocho tunahase kufwelela ngwetu jishimbi jenyi, najindongi jenyi navyuma eji kulinganga vyapwa vyakwoloka. (Samu 89:14; 119:128) Oloze Satana kahashile kuneha chiyulo chamwaza mukayeko numba tuhu eji kuvangijikilanga Yehova ngwenyi katamo kuyulako.

6. Mwomwo ika Yehova atelamo kuyula kano kaye?

⁶ Yehova nawa apwa Muka-kuyula wakutamo mwomwo atwama nachinyingi namangana akulama kanawa vyuma vyosena mwilu nahamavu. Chakutalilaho, Kalunga akafwile Mwanenyi okenga misongo yize vandotolo vali nakuhona kuka. (Mateu 4:23, 24; Mako 5:25-29) Yehova kamwene vyuma alingile mwanenyi kupwa vyakukomwesako. Ejiva vyuma atela kulinga, kaha akwechi ngolo jakufumisako vyuma vyosena vyavipi. Akwechi nawa ngolo jakusangula vafu, nakukinga ukalu wakulijila.

7. Chinyingi chaYehova chapwa ngachilihi chakulipwila kuhambakana chavatu vaze vatwama mukaye vayula kuli Satana?

⁷ Vatu mukaye kano vayula kuli Satana vali nakufwila kuwana jijila jakukumishilamo ukalu mukaye nakuneha kuunda, oloze Yehova kaha ikiye atwama nachinyingi chakulinga ngocho. (Isa. 2:3, 4; 54:13) Omu natulinangula chinyingi namangana akuli Yehova, natwivwa ngana muze evwile kaposetolo Paulu uze asonekele ngwenyi: “Omwo lwajiminyina luheto lwaKalunga namangana enyi nachinyingi chenyi! Omwo kusopesa chenyi vahona kuchihehula nomu jijila jenyi vahona kujilengeza.”—Loma 11:33.

8. Vyuma muka vinamivwisa kuwaha hachiyulo chaYehova?

⁸ Mbimbiliya kayatulweza kaha ngwayo Yehova atamo kuyulako oloze yatulweza novyo chiyulo chenyi chapwila chamwaza kuhambakana viyulo vyavatu. Chatete, Yehova eji kuyulanga muzangi. Chapundu vene tweji kwivwanga kuwaha hakutachikiza omu eji kuzachishilangamo ngolo jenyi. Apwa “Kalunga wakeke nakutetela, wakushipwokela kukwata utenu, wazangi yakwilila, wamuchano.” (Kulo. 34:6) Kalunga eji kuvumbikanga vangamba jenyi. Eji kutuzakamanga kanawa kuhambakana omu tunahase kulizakama etu vavene. Yehova kaswekela vaka-kumulemesa vyuma vyamwazako numba tuhu omu mukiko eji kuhanjikanga Liyavolo. Hazangi yenyi atuhanyine Mwanenyi azanga mangana tukayoye myaka yosena.—Tangenu Samu 84:11; Wavaka-Loma 8:32.

9. Twatachikiza ngachilihi ngwetu Kalunga azakama mutu himutu?

⁹ Yehova keshi kuzakama vatu jenyi mwalizavu kahako, oloze eji kuzakamanga nawa mutu himutu. Chakutalilaho, tuchitalenu omu Yehova azachishilenga vaka-kuyula hakusokola vaIsalele kuli vaka-kole javo. Halwola kana Yehova amwene Lute uze kapwile kaIsaleleko. Lute alisuwile kuseza kwitava chenyi mangana alemese Kalunga wamuchano. Yehova akiswile Lute hakumuhana lunga namwana. Oloze amukiswile nawa mujila yikwavo. Omu Lute mwakasanguka mwakatachikiza ngwenyi mwanenyi apwile kakuluka yaMeshiya. Mwakevwa kuwaha nawa hakutachikiza ngwenyi mujimbu wenyi vausonekele muMbimbiliya hamukanda uze vavuluka lijina lyenyi.—Lute 4:13; Mateu 1:5, 16.

10. Mwomwo ika Yehova kayula namuchima wakukakamako?

¹⁰ Yehova kayula vatu namuchima wakukakamako. Chiyulo chenyi cheji kulingisanga vatu kupwa vakulihehwa nakuwahilila. (Koli. 2, 3:17) Ndavichi ambile ngwenyi: “Ukelenga naluvaji vili kumeso [aKalunga]. Ngolo nakuwahilila vili muchihela chenyi atwama.” (Miji. 1, 16:7, 27) Muka-kwimba jisamu Etane nawa asonekele ngwenyi: “Vawahilila vaze vatachikiza kulikuwa. Ove Yehova, vatu kana veji kutambukanga mumumunyi wakumeso ove. Veji kuwahililanga lwola lwosena mwomwo yalijina lyove, veji kuvazezulanga mwomwo yakwoloka chove.”—Samu 89:15, 16.

11. Vyuma muka navitukafwa tufwelele ngwetu chiyulo chaYehova chapwa chamwaza?

¹¹ Kushinganyekanga hakuwaha chaYehova lwola lwosena nachitukafwa tufwelele ngwetu chiyulo chenyi chikiko kaha chamwaza. Ngocho tweji kwivwanga nganomu evwile muka-kwimba jisamu uze ambile ngwenyi: “Kutwama muvipango vyove likumbi limwe chinawahe kuhambakana kutwama makumbi 1,000 kweka.” (Samu 84:10) Yehova ikiye atutengele, ngocho atachikiza vyuma twasakiwa mukuyoya mangana tuwahilile, kaha eji kutuhanangavyo. Kala vyuma eji kutulwezanga tulinge vyeji kutunganyalisanga, numba tuhu chasakiwa kulisuula hakuvikavangiza.—Tangenu Isaya 48:17.

12. Vyuma muka navikatulingisa tukakundwize wata waYehova?

¹² Mbimbiliya yavuluka ngwayo, hanyima yaChiyulo chaKulishitu chaMyaka Likombakaji, vatu vamwe navakalikanga kuwata waYehova. (Kuso. 20:7, 8) Mwomwo ika navakalikangila? Omu Liyavolo navakamukasununa mwakafwila kuhungumwisa vatu, nganomu ali nakulinga makumbi  ano. Mwakahungumwisa vatu vakafwelele ngwavo vanahase kutwalaho kuyoya numba tuhu navalikanga kuli Yehova. Numba tuhu mazu mwakahanjika amakuli, oloze twatela kulihulisa ngwetu: Uno yami nanguketavila mazu amakuli mwakahanjika Satana tahi? Kachi nge twazanga Yehova nakumuzachila mwomwo yavilinga vyenyi vyamwaza, kaha nawa mwomwo apwa Muka-kuyula wakwoloka, kaha Satana keshi kukahasa kutuhungumwisako. Kakweshi chuma nachikatulingisa tukahone kupendamina hachiyulo chaYehova chakwolokako.

13. Vyuma muka twatela kulinga mangana tusolole ngwetu twakundwiza Kalunga?

¹³ Twatela kukundwizanga wata waYehova. Nganomu tunashimutwila, ikiye kaha atamo kuyula kaha nawa chiyulo chenyi chikiko kaha chamwaza. Tunahase kukundwiza wata waYehova hakulama kulonga chetu, nakumuzachila nakashishi. Jijila jeka muka tunahase kukundwijilamo wata waYehova? Tunahase kulinga ngocho hakulinga vyuma mujila yize asaka. Kulinga ngocho nachisolola nge twazanga chiyulo chenyi nakufwila kuchikundwiza.—Tangenu Wavaka-Efwesu 5:1, 2.

14. Uno mitwe yajitanga natulama muchikungulwilo navahasa kulondezeza ngachilihi Yehova?

¹⁴ Hakutanga Mbimbiliya tweji kulinangulanga nge Yehova ayula muzangi. Shikaho mitwe yajitanga navakulwane muchikungulwilo vaze vazanga chiyulo chaKalunga kaveshi kuzachisa ngolo javo mujila yakuhengako, oloze veji kulondezezanga Yehova. Paulu naikiye apwile muka-kulondezeza Kalunga naMwanenyi. (Koli. 1, 11:1) Paulu kahulamishilenga vandumbwenyi chipwe kuvashinyinyika valinge vyuma vize asakilenga ikiyeko. Oloze avalembelelelenga. (Loma 12:1; Efwe. 4:1; Fwile. 8-10) Omu mukiko azanga Yehova tulingenga. Shikaho omu mukiko vatela kulinga vaze vazanga chiyulo chaYehova nakuchikundwiza.

15. Uno kwononoka vaze vali nakututwaminyina nachisolola ngachilihi nge twazanga chiyulo chaYehova?

 ¹⁵ Uno tweji kuvumbikanga vaze atongola Kalunga mangana vatutwaminyine tahi? Nge natuvononoka nakuzachila navo hamwe kaha natusolola ngwetu twakundwiza wata waYehova. Numba tuhu shimbu jimwe katweshi kwivwishisa vyuma vimwe navatulwezako, oloze twatela kuvononoka. Kulyononona kana chapwa chakulipwila chize chasakiwa kuli vaze vayula kuli Yehova keshi kukaye kanoko. (Efwe. 5:22, 23; 6:1-3; Hepe. 13:17) Kalunga atuzanga kaha atuhana tulama, shikaho natunganyala nge natuvononokanga.

16. Vatu vaze vakundwiza wata waKalunga veji kusakulanga ngachilihi vyakulinga?

¹⁶ Tunahase nawa kukundwiza chiyulo chaKalunga hakusakula vyuma vyakulinga mukuyoya. Yehova katuhana jishimbi jamwakulingila vyuma vyosenako oloze atulweza kaha mwaya vishinganyeka vyenyi. Chakutalilaho, katulweza jindongi munona munona kupandama kuvyakuvwala twatela kuvwalako. Oloze atulweza ngwenyi tuvwalenga nakulilenga mujila yamwaza yize yatela vaka-Kulishitu. (Chimo. 1, 2:9, 10) Kasaka nawa tuhukanyisenga vandumbwetuko. (Koli. 1, 10:31-33) Nge natusakulanga vyuma kweseka navishinganyeka vyaYehova, kaha natusolola ngwetu twakundwiza chiyulo chenyi.

17, 18. Vaze valimbata vanahase kusolola ngachilihi nge vakundwiza chiyulo chaYehova?

¹⁷ Tushimutwilenu omu vaka-Kulishitu vaze vatwama muulo vanahase kukavangiza jijila jaYehova nakukundwiza wata wenyi. Namulinga ngachilihi nge muulo wenu muli ukalu? Nyi ngachilihi nge ukalu kana waunene chikuma? Mwatela kushinganyeka omu Yehova alingile kuli vaIsalele. Ambile ngwenyi apwile nge lunga lyavo. (Isa. 54:5; 62:4) Ulo kana wapwile naukalu. Oloze Yehova kavambilileko. Atwalileho kuvasolwela keke mwomwo yalushiko luze avashikile. (Tangenu Samu 106:43-45.) Chikupu vene, zangi yaYehova yeji kutulingisanga tupandame kuli ikiye.

¹⁸ Shikaho, vaka-Kulishitu valimbata vaze vazanga Yehova vatela kumulondezeza. Kavatela kulilukulula chakuzeneka mulonga vetavisa muMbimbiliyako. Vatachikiza ngwavo Yehova ikiye navanungu hamwe, ngocho asaka ‘valipanjike’ navaka-mahyavo. Visoneka vyetavisa kulilukulula kuvanga kaha nge umwe nalingi ujila. (Mateu 19:5, 6, 9) Shikaho nge valunga napwevo navakilikita nakukumisa ukalu wavo mangana vatwame mukuwahilila, kaha navasolola nge vakundwiza chiyulo chaYehova chakwoloka.

19. Vyuma muka twatela kulinga nge tunalimbenje?

¹⁹ Shimbu jimwe tunahase kulinga vyuma vize navivwisa Yehova kupihya mwomwo katwakupukako. Ngocho atuhana Kulishitu kupwa ndando yakutusokola. Shikaho nge tunalimbenje, twatela kulomba Yehova atukonekele. (Yowa. 1, 2:1, 2) Muchishishisa chakuhomba nakulihana milonga, twatela kuzachilaho nakulinga vyuma vyamwaza. Nge natupandama kuli Yehova, kaha mwatukonekela nakutukafwa tuhone kuhomba nakukahonesa ukalu kana kulutwe.—Samu 103:3.

20. Mwomwo ika twatela kukundwijila chiyulo chaYehova oholyapwa?

²⁰ Mukaye kakahya vatu vosena navakapwa muchiyulo chaYehova nakukalinangula jijila jenyi jakwoloka. (Isa. 11:9) Oloze etu oholyapwa tunalinangula lyehi vyavivulu. Kaha kalinwomu Yehova avatule chihande chawata chize akatwile Satana. Luno lukiko lwola twatela kukundwiza chiyulo chaYehova hakulama kulonga chetu, nakuzata mulimo wakwambulula nakumulondezeza muvyuma vyosena natulinganga.