Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu munahase kukumbulula vihula vino vinakavangizaho:

Uno vandumbwetu vamalunga vakufwana nge tulama vakutambwojoka navakulwane muchikungulwilo vatela kumona ngachilihi jindongi jeji kufumanga kuliuka lyaKalunga?

Vatela kukavangiza jindongi kana washiwashi. Vatela kulihulisa ngwavo: ‘Uno ngweji kukolezezanga vakwetu kushipilitu tahi? Kutala ngweji kwitavilanga washi jindongi nakujikavangiza tahi?’—w16.11, li. 11.

Lwola muka vaka-Kulishitu vamuchano vengilile muundungo waMbavilone?

Echi chasolokele omu vafwile vaposetolo vosena. Halwola kana hakiko vatwamina vamukwitava chamakuli vaputukile kupwako. Chachi naFulumende vyaputukile kukundwiza kwitava chamakuli nakusaka kuhonesa vaka-Kulishitu vamuchano. Oloze mumyaka yakukokela ku 1914, vaka-Kulishitu vawavisa vaputukile kusokoka chindende chindende.—w16.11, mafwo 23-25.

Mwomwo ika mulimo azachile Lefèvre d’Étaples wapwilile waulemu?

Muji 1520, Lefèvre alumwine Mbimbiliya mulilimi lyaFrench, kaha navatu vamuchivulu vahashile kupwa naMbimbiliya kana. Jila alumbunwinyinemo mijimbu yamuMbimbiliya yakunywile Martin Luther, naWilliam Tyndale naJohn Calvin.—wp16.6, mafwo 10-12.

Chihandwa muka chatwama “[ha]kujika vishinganyeka havyuma vyamujimba” “[na]kujika vishinganyeka havyuma vyashipilitu”? (Loma 8:6)

Vatu vaze vajika “vishinganyeka havyuma vyamujimba” vahaka kulutwe vyuma vafwila mumichima yavo, navize vasaka, nakuvihanjikanga, nakulivwisa kuwaha kuvilinga. Echi cheji kunehanga kufwa. Oloze vaze vajika “vishinganyeka havyuma vyashipilitu” vahaka muchima kuvyuma vyaKalunga, nakushinganyeka mwaya shipilitu yajila. Kahechi cheji kunehanga kuyoya nakuunda.—w16.12, mafwo 15-17.

Jijila jimwe muka jakukeheselamo kulizakamina?

Nonekenunga vyakulinga, shinganyekenu vyuma namutesamo, wanenungako lwola lwakunoka hakumbi hakumbi, livwisenu kuwaha vyuma atenga Kalunga, wahililenunga, linyukenunga mujimba, kaha savalenunga washi.—w16.12, mafwo 22-23.

Mujila muka “Enoke vamunungulwile mangana azeneke kumona kufwa”? (Hepe. 11:5)

Kalunga anungulwile kuyoya chaEnoke nakuchineha kukufwa chakuhona ikiye kuchitachikiza.—wp17.1, mafwo 12-13.

Mwomwo ika kulikehesa chapwila lika chachilemu makumbi ano?

Kulikehesa chapwa kutachikiza hakumina ngolo jetu. Kaha twatela kushinganyekanga omu vanahase kwivwa vakwetu havyuma tuli nakusaka kulinga.—w17.01, li. 18.

Unjiho muka wasolola nge Kalunga ikiye apwile nakutetekela lizavu lyakutwaminyina mulikulukaji lyamyaka lyakulivanga, nganomu ali nakutetekela Lizavu Lyakutwaminyina makumbi ano?

Shipilitu yajila yavakafwile vevwishise muchano wamuVisoneka. Vangelo nawa vavakafwilenga vatwaminyine mulimo wakwambulula, kaha vapendaminyine haMazu aKalunga. Omu mukiko chili namakumbi ano.—w17.02, mafwo 26-28.

Vyuma muka vyatulingisa tumone wana wandando yakusokola kupwa waulemu?

Chuma chatulingisa tumone wana kana kupwa waulemu shina kushinganyeka hali uze auhanyine, novyo auhanyinyinyine, navyuma alisuwile kulinga numba atuhanewo, novyo wana kana wasakiwilile. Ngocho twatela kushinganyeka omu vyateselemo vyuma vyosenevi.—wp17.2, mafwo 4-5.

Kutala muka-Kulishitu nahase kwalumuna vyuma vize asakwile kulinga tahi?

Numba tuhu twatela kutesangamo vyuma natuhanjika, oloze shimbu jimwe tunahase kwalumuna vyuma twasakwile. Omu vaka-Nyineve vapihililile nakwalumuka, Kalunga alumwine vishinganyeka vyenyi, kaha kavanongeseleko. Nayetu nawa tunahase kwalumunako vyuma twasakwile nge kunasoloka vyuma vimwe chipwe nge tunatambula mijimbu yeka.—w17.03, mafwo 16-17.

Mwomwo ika kutwaha chapwila chachipi?

Kutwaha vakwetu chinahase kwepula vikokojola vyavivulu. Numba tuhu vyuma natuhanjika hali vandumbwetu vyamuchano chipwe vyamakuli, oloze kuvihanjika kacheshi kuhasa kukumisa ukaluko.—w17.04, li. 21.