1, 2. (a) Chihande muka chachinene vatela kushinganyekanga vatu vosena? (b) Mwomwo ika chapwila chachilemu kulinga ngocho?

VATU vavavulu makumbi ano vamona jimbongo kupwa jajilemu chikuma. Vasaka kulivulishila luheto chipwe kukinga vyuma vatwama navyo. Veka vamona kukinga tanga yavo, nakulikangula kumujimba navyuma vafwila kutesamo kupwa vyavilemu.

² Oloze tuvosena twatela kumona chihande chakuhakwila wata waYehova kupwa chachilemu chikuma. Shimbu yosena twatela kushinganyekanga hachihande kana. Vyuma muka vinahase kututangula? Tunahase kuhungukila kuvikilikita vyahakumbi hakumbi nakuvulyama chihande chakuhakwila wata waKalunga. Pamo tunahase nawa kumona vyeseko tuli nakuhitamo ngwetu vinatutohwela. Oloze nge natumonanga kuhakwila wata waYehova kupwa chachilemu kaha natumikanga muukalu wetu wahakumbi hakumbi. Kaha nawa natupandama chikuma kuli Yehova.

3. Vyuma muka Satana avangijikilile Kalunga?

³ Satana Liyavolo akatwile chihande chize chalingisa vatu vahuhwasane nge Yehova atamo kuyula nyi chiku. Eji kwambanga ngwenyi Kalunga kapwa muka-kuyula wamwenemweneko kaha nawa aswekela vatu vyuma vyamwaza. Chasoloka nge Satana apwile nakuhanjika ngwenyi vatu vanahase kupwa vakuwahilila nge navaliyula vavene. (Kupu. 3:1-5) Satana ambile nawa ngwenyi, vatu kavazachila Kalunga namuchima wosenako, ngwenyi nge vali muukalu kaha vanahase kulitwamina kumuzachila. (Yopa 2:4, 5) Oloze Yehova ahana vatu lwola mangana vatachikize ngwavo vyuma ahanjikile Liyavolo vyapwile vyamakuli.

4. Mwomwo ika Yehova atela kuvatula chihande chawata?

⁴ Yehova atachikiza ngwenyi vyuma ahanjikile Liyavolo vyapwile vyamakuli. Oloze mwomwo ika nahanyina Satana lwola lwalusuku ngana mangana asolole nge vyuma ahanjikile vyamakuli? Chihande kana chakwata hali vatu vosena navangelo. (Tangenu Samu 83:18.) Vapwevo nalunga vakulivanga valikangile kuchiyulo chaYehova, kahomu mukiko vali nakulinga vatu makumbi ano. Echi chili nakulingisa vatu vakakasane nge vyuma ahanjikile Liyavolo vyapwile vyamuchano nyi chiku. Hakuwana nge chihande kana kavachivatwileko, kakweshi kupwa kuunda nakulinungako. Oloze omu Yehova mwakahakwila wata wenyi, vatu vosena navakaliluula kuchiyulo chenyi chakwoloka. Nakukapwanga jino kuunda mwilu nahamavu.—Efwe. 1:9, 10.

5. Vyuma muka twatela kulinga mangana tuhakwile wata waYehova?

⁵ Omu Yehova mwakahakwila wata wenyi, chiyulo chaSatana navatu mwakachifumisako. Chiyulo chaWangana waKalunga uze navakayula kuli Meshiya nachikafukila, kaha vatu vakulonga navakahakwila chiyulo chaKalunga. (Isa. 45:23, 24) Kutala munakusaka kupwa hamukana wavatu vakulonga vaze veji kukundwizanga wata waYehova tahi? Twafwelela ngwetu munasake vene. Oloze hakusaka kupwa vakulonga, twatela kushinganyekanga hachihande chize chapwa chachilemu chikuma nakumona omu chakwata hakuyoya chenu.

6. Uno kuhakwila wata waYehova chalema ngachilihi?

⁶ Nganomu tunashimutwila, kuhakwila wata waYehova chikiko chuma chachilemu kuvatu vosena. Chapwa chachilemu kuhambakana vyuma vyosena vize vyeji kusuulwisanga vatu. Uno echi chinakulumbununa nge kutulwila kachapwa chachilemuko, kaha nawa Yehova katuzakamako tahi? Nduma. Mwomwo ika?

7, 8. Mwomwo ika kuhakwila wata waKalunga chatambukila hamwe nakutesamo jishiko jenyi?

⁷ Yehova azanga vatu nakuvamona kupwa vavalemu. Alisuwile kuhana Mwanenyi mangana vatu vakayoye haya myaka yosena. (Yowa. 3:16; Yowa. 1, 4:9) Kachi nge Yehova keshi kutesamo jishiko jenyiko, kaha Liyavolo mwamwamba ngwenyi apwa muka-kwonga uze eji kuswekelanga vatu vyuma vyamwaza. Chinahase kulingisa nawa vaka-kulikanga vahanjike ngwavo: “Kupwako chenyi ocho vashika chili kulihize? Mwomwo kufuma vene haze vakakuluka jetu vasavalile tulo twakufwa, vyuma vyosena hanga vyapwila vene nge muze vinapunga kufuma kukuputuka chakutanga  vyuma.” (Petu. 2, 3:3, 4) Ngocho jila yimwe Yehova mwakahakwilamo wata wenyi shina kulwila vatu vakwononoka. (Tangenu Isaya 55:10, 11.) Kaha nawa chiyulo chenyi chazama hazangi. Ngocho twafwelela ngwetu mwatwalangaho lika kuzanga vangamba jenyi vakushishika nakuvamona kupwa vavalemu.—Kulo. 34:6.

⁸ Kuhanjika ngwetu kuhakwila wata waYehova chapwa chachilemu mukuyoya kacheshi nakulumbununa nge twamona ulwilo wetu kupwa wamokomokoko. Twamona vyosena vivali kupwa vyavilemu. Oloze chuma chachilemu chikuma twatela kushinganyekangaho shina kuhakwila wata waYehova nakupwa vakushishika kuli ikiye.

9. Satana avangijikilile Yopa vyuma muka? (Talenu muvwimbimbi wakulivanga.)

⁹ Mukanda waYopa uze vasonekele kushikulu watukafwa tumonenga vyuma mujila yamwaza. Mumukanda kana vasonekamo ngwavo, Satana ahanjikile ngwenyi nge Yopa mwamona ukalu, kaha mwalitwamina kuzachila Kalunga. Satana alwezele Kalunga ayanjise Yopa, oloze Kalunga akanyine, ngocho amulwezele amweseke vene ikiye. Ambile ngwenyi: “Vyuma vyosena ali navyo vili mulivoko lyove.” (Tangenu Yopa 1:7-12.) Mukapyapya kakandende kaha Yopa afwishile vangamba jenyi, navimuna jenyi, navana venyi 10. Satana alingishile vyuma kana visoloke kwijiva nge Kalunga ikiye anehele ukalu kuli Yopa. (Yopa 1:13-19) Satana nawa avetele Yopa namusongo waupi. (Yopa 2:7) Ushona wenyi nawa watohweleleko mwomwo yamazu amapi ahanjikile puwenyi namasepa jenyi vatatu vaze vasolokele nge vanakusaka kumukafwa.—Yopa 2:9; 3:11; 16:2.

10. (a) Yopa asolwele ngachilihi kulonga chenyi kuli Kalunga? (b) Uno alimbenjele ngachilihi?

¹⁰ Vyuma ahanjikile Satana vyapwile vyamakuli mwomwo Yopa kalitwaminyine kuzachila Yehovako numba tuhu ahichile muukalu. (Yopa 27:5) Chipwe ngocho, halwola lumwe Yopa amwene ukalu wenyi mujila yakuhenga. Alimwene kupwa wakwoloka chikuma, nakusaka kutachikiza ovyo vyamulingishile ayande. (Yopa 7:20; 13:24) Tunahase kushinganyeka ngwetu chapwile chakwoloka kuli ikiye kusaka kutachikiza ovyo apwile nakuyanjila. Oloze Kalunga olwele vishinganyeka vyaYopa. Uno amulwezele ika?

11, 12. Yehova anukishile Yopa vyuma muka vyavilemu, kaha Yopa akwileko ngachilihi?

¹¹ Mazu ahanjikile Kalunga kuli Yopa vawasoneka mutupetulu vawana vamumukanda waYopa, kufuma mukapetulu 38 swi naku 41. Oloze nahamwe hauchi vasoneka  ngwavo Kalunga alwezele Yopa ovyo vyamulingishile ayande. Yehova kapwile nakufwila kulumbunwina Yopa ovyo vyamulingishile ayande, kwijiva nge apwile nakusaka kulihakwilako. Oloze asakile Yopa atachikize ngwenyi katelelele kulyesekesa naKalungako. Amukafwile nawa amone vyuma vyavilemu chikuma vize atelelele kushinganyeka. (Tangenu Yopa 38:18-21.) Echi chakafwile Yopa amone vyuma mujila yamwaza.

¹² Uno echi chasolola nge Yehova akaluhwishile muchima hakutenukila Yopa okunyi ahichile muukalu tahi? Nduma, naYopa vene kashinganyekele ngochoko. Chamokomoko naukalu amwene, Yopa amwene jino vyuma mujila yamwaza. Ambile ngwenyi: “Ngunaliveye hamazu ngwahanjikanga, ngunapihilila nakulimbila mulukungu namuuto.” Mazu ahanjikile Yehova akiko akafwile Yopa. (Yopa 42:1-6) Hakavanga Yopa vamwolwele kuli mukweze Elihu. (Yopa 32:5-10) Omu Yopa etavilile vamwolole, Yehova ahanjikile ngwenyi Yopa amwivwishile kuwaha mwomwo omikile muvyeseko.—Yopa 42:7, 8.

13. Uno mazu ahanjikile Yehova akafwile ngachilihi Yopa nahalwola vyakumine vyeseko?

¹³ Mazu ahanjikile Yehova kuli Yopa amukafwile nahalwola vyakumine vyeseko. Mujila muka? “Yehova akiswile Yopa hakukuminyina kuhambakana hakavanga.” Kaha mukuhita chalwola “apwile nawa navana vamalunga 7, navana vamapwevo vatatu.” (Yopa 42:12-14) Yopa ashinganyekelenga havana venyi vaze vafwile. Kaha nawa hahichile lwola numba jino avulyame vyuma ahichilemo. Numba tuhu atachikijile ovyo ayanjililile, oloze pamo lwola lumwe ashinganyekelenga ovyo ayanjililile chikuma ngana. Chamokomoko navyuma ashinganyekelenga, oloze atwalileho kwanukanga mazu amuhuhumwine Kalunga. Echi chamuvendejekele nakumukafwa amone vyuma mujila yamwaza.—Samu 94:19, kwinyikila chamwishi.

14. Vyuma muka natulinangula kuli Yopa?

¹⁴ Nayetu nawa mujimbu waYopa unahase kutuvendejeka nge tuli muukalu, nakumona vyuma mujila yamwaza. Yehova asonekele mazu kana muMbimbiliya atunangule etu, “mangana kuhichila mukukakachila chetu namukuvendejeka chamuVisoneka tuhase kupwa nalutalililo.” (Loma 15:4) Vyuma muka natulinangula kumujimbu kana? Twatela kumona ngwetu kuhakwila wata waYehova chikiko chachilemu mukuyoya chetu. Shikaho tumonenunga kuhakwila Yehova kupwa chachilemu nakutwalaho kupwa vakushishika namulwola lwaukalu, nganomu alingile Yopa.

15. Uno kushishika chetu muvyeseko cheji kutesangamo vyuma muka?

 ¹⁵ Mwomwo ika chapwila chachilemu kupwa vakushishika nge tuli muvyeseko? Mwomwo vyeseko tweji kuhitangamo kavyalumbununa nge Yehova natumbiliko, oloze vyeji kutukafwanga tusolole ngwetu twasaka kukundwiza chiyulo chenyi. (Vishi. 27:11) Lukakachila lweji kunehanga “uselewa waKalunga,” nakuzamisa lutalililo lwetu. (Tangenu Wavaka-Loma 5:3-5.) Mujimbu waYopa wasolola hatoma nge “Yehova atwama nazangi chikuma, apwa muka-kutetela.” (Yako. 5:11) Ngocho twafwelela ngwetu Yehova mwakatufweta hohamwe navatu vosena vaze veji kukundwizanga wata wenyi. Kutachikiza chuma kanechi nachitukafwa tukakachile “chikuma namuchima wakutalilila chikoki nakuwahilila.”—Kolo. 1:11.

16. Mwomwo ika twatela kushinganyekanga hakulema chakuhakwila wata waYehova?

¹⁶ Chipwe ngocho, kuhakwila wata waYehova kachapwa chachashiko. Lwola lumwe tunahase kupwa muukalu waunene. Naukalu waundende unahase kutuzeyesa nge natuushinganyekanga chikuma. Shikaho twatela kushinganyekanga hakulema chakukundwiza wata waYehova nge tuli muukalu.

17. Uno kwazana chikuma mumulimo wamuwande nachitukafwa ngachilihi tuhakwile wata waYehova.

¹⁷ Kuzatanga lwola lwosena muwande nachitukafwa tushinganyekenga hachihande chachinene. Chakutalilaho, Renee avijile musongo wakalepa nakasa ngocho evwilenga kukola chikuma. Halwola apwilenga mukahela, ambulililenga vandotolo, navakwavo vaveji navaze vejilenga nakumumenekela. Hachipatela chimwe, ambulwile maola 80 muvyalumingo vivali nachimbwa. Renee atwalileho kuvumbika wata waYehova swi nakukufwa chenyi. Kaha nawa chamukafwile ahone kushinganyeka chikuma hakukola evwilenga.

18. Ndumbwetu wapwevo ahakwilile ngachilihi wata waYehova omu apwile muukalu?

¹⁸ Twatela kufwila kuhakwilanga wata waYehova namuukalu wahakumbi hakumbi. Chakutalilaho, Jennifer atwamine makumbi atatu kuchivaza nakuvandamina ndeke. Vavalwezele ngwavo jindeke jatelelele kuya kwimbo lyavo kajeshi kuyako. Chipwe ngocho kahombele chikumako. Oloze alombele kuli Yehova amukafwe mangana azachise lwola kana hakukafwako vakwavo vaze vapwile muukalu woumwe. Vyuma muka vyafuminemo? Ambulilile vatu vavavulu kaha nawa ahanyine jimangazini jajivulu. Jennifer ambile ngwenyi, “Yehova angukiswile chamokomoko naukalu wami, anguhanyine ngolo mangana ngutohwese lijina lyenyi.” Chapundu vene asakile kulinga mwaya muchima waYehova.

19. Uno vatu jaYehova vamona ngachilihi wata wenyi?

¹⁹ Kuhakwila wata waYehova chikiko chatuhandununa kukwitava chamakuli. Vatu jaKalunga vanahakwilanga wata wenyi kufuma kushikulu. Hakupwa tuvaka-kukundwiza kulemesa chamuchano, tuvosena twatela kutwalaho kuhakwila wata waKalunga.

20. Yehova eji kwivwanga ngachilihi nge namuhakwila wata wenyi?

²⁰ Tachikizenu ngwenu Yehova eji kwivwanga kuwaha nge namuhakwila wata wenyi nakupwa vakushishika chamokomoko navyeseko namumona. (Samu 18:25) Muchihande nachikavangizaho natushimutwila vyuma vikwavo vyatela kutulingisa tukundwize wata waYehova namuchima wosena nomu tunahase kulingilamo ngocho.