MUKANDA waMujimbu Wamwaza asonekele Mateu wahanjika ngwawo, “Yesu engilile mutembele nakuhangamo vosena vaze vapwile nakulanjisa navaze vapwile nakulanda. Akatumwine jimesa javaka-kutambasana jimbongo, navitwamo vyavaka-kulanjisa mayembe. Kaha ambile kuli vakiko ngwenyi: ‘Vasoneka ngwavo, “Zuvo yami navakayivulukanga ngwavo zuvo yakulombela,” oloze enu munayitenge kupwa nge wina wakuswama vihwanga.’”—Mateu 21:12, 13.

Mikanda yavaYuleya yakushikulu yasolola nge vaka-kulanjisa vyuma mutembele valyapwilenga vatu hakuvalanjisa vyuma handando yayinene. Chakutalilaho, mikanda yimwe yakushikulu yamba ngwayo mulikulukaji lyamyaka lyakulivanga ndando yatukwilimba yanyinyine chikuma, kaha kakwilimba umwe vamulanjilenga nandenali yimwe. Echi chili nakulumbununa nge mutu atelele kuzata hamakumbi 25 numba alande kakwilimba umwe. Vaka-kuhutwa vavetavishile kuhana wana wamayembe, chipwe tukwilimba, chipwe tutela. Oloze halwola kana chapwile chachikalu kulanda ava tujila. (Levi 1:14; 5:7; 12:6-8) Lapi Simeon ben Gamaliel apihililile hachuma kanechi, kaha atepulwile ndando yavimuna vakuhana mawana. Ngocho mutu azachilenga jino jola jitatu kaha hakusaka kulanda tukwilimba vavali.

Echi chasolola nge chapwile chakutamo Yesu kuvuluka vaka-kulanjisa mutembele ngwenyi “vihwanga,” mwomwo vapwile nakulyapula vatu.