1, 2. Yehova eji kutuvendejekanga ngachilihi muvyeseko vyetu, kaha Mazu enyi atufwelelesa vyuma muka?

NDUMBWETU walunga wamukweze wamujike apwile nakushinganyeka havyuma vimwe, kaha alwezeleko Stephen mukulwane umwe uze ambata. Ou mukweze apwile nakushinganyeka hamazu vasoneka hamukanda Wavaka-Kolinde 1, 7:28, uze wamba ngwawo: “Vaze [navengila muulo] navamonanga luyando mumijimba yavo.” Amuhulishile ngwenyi, “Uno ‘luyando’ muka vavuluka, kaha nangukaluhonesa ngachilihi nge ngunambate?” Shimbu kanda amukumbulule, ndumbwetu Stephen alwezele ou ndumbwetu wamukweze ashinganyeke havyuma vyeka asonekele kaposetolo Paulu ngwenyi, Yehova apwa “Kalunga muka-kuvendejeka chosena, uze eji kutuvendejekanga muvyeseko vyetu vyosena [“muluyando lwetu lwosena,” kwinyikila chamwishi].”—Koli. 2, 1:3, 4.

² Chikupu vene Yehova apwa Setu wazangi, kaha eji kutuvendejekanga nge tuli muukalu. Pamo muli nakwanuka lwola  amikafwile Kalunga kuhichila muMazu enyi. Tunahase kufwelela ngwetu asaka kutulingila vyuma vyamwaza nganomu alingile kuli vangamba jenyi vakushikulu.—Tangenu Yelemiya 29:11, 12.

3. Vihula muka natushimutwila?

³ Tunahase kumika muukalu kachi nge natwijiva ovyo vinanehe ukalu chipwe vyeseko kana. Omu mukiko chapwa namumalo namujitanga. Vyuma muka vyeji kunehanga “luyando mumijimba” luze avulukile Paulu? Vyakutalilaho muka vyakunyima navyamakumbi ano vize navitukafwa kwakuwana kuvendejeka? Kutachikiza vyakutalilaho kana nachitukafwa tumikenga.

4, 5. Vyuma vimwe muka vyeji kunehanga “luyando mumijimba”?

⁴ Omu Kalunga akumishile kutenga vatu, ambile ngwenyi: “Lunga mwakaseza ise nanaye nakukalipanjika napwevo lyenyi, kaha navakapwanga mujimba umwe.” (Kupu. 2:24) Yehova ahanjikile mazu kana omu ahakileko ulo watete. Chipwe ngocho, mumalo namujitanga munahase kupwa ukalu mwomwo katwakupukako. (Loma 3:23) Nge pwevo nasomboka, lunga lyenyi ikiye eji kupwanga nawata hali ikiye, keshi visemi jenyiko. Kalunga ahana lunga lisesa lyakupwa mutwe wapuwenyi. (Koli. 1, 11:3) Oloze chapwa chachikalu kuli valunga napwevo vaze vanengila muulo kalinwomu kukavangiza jindongi kaneji. Kweseka naMazu aKalunga, pwevo atela kutachikiza ngwenyi vatela kumutwaminyina kuli lunga lyenyi, keshi kuli visemi jenyiko. Oloze vatanga vanahase kuneha ukalu muulo.

⁵ Kaha nawa nge pwevo nemita, lunga eji kulizakaminanga. Numba tuhu vapwevo nalunga navawahilila ngwavo navapwa namwana, oloze veji kulizakaminanga omu pwevo mwaputuka kuvizaviza, nahalwola mwakasapuluka. Veji kupwanga nawa naukalu wajimbongo mwomwo vyakulandalanda vyeji kuvulanga. Kweji kupwanga nawa vyuma vyeka vyeji kusakiwanga nge kemba nasemuka. Pwevo jino eji kuzachisanga lwola lwaluvulu hakuzakama kemba. Echi cheji kulingisanga lunga ashinganyeke ngwenyi puwenyi namusuvilila. Kaha nawa milimo yalunga mutanga yeji kuvulilangako chikuma, mwomwo atela jino kuzakama nakemba uze nasemuka.

6-8. Kuhona kupwa navana chinahase kuneha ukalu muka?

⁶ Kwatwama ukalu weka veji kumonanga vatu vamwe vaze valimbata. Vamwe veji kufwilanga kupwa navana, oloze vapwa vomba. Pwevo eji kuhombanga chikuma nge mwahona kupwa namwana. Oloze numba tusomboka nakupwa navana, natutwalangaho lika kulizakamina. Chipwe ngocho, nge mutu ali nakufwila kupwa namwana oloze mwahona kupwa nenyi, cheji kupwanga “luyando mumijimba.” (Vishi. 13:12) Kushikulu vatu vamwenenga kusema vana kupwa chachilemu chikuma. Lakele pwevo lyaYakova evwilile yayenyi lwiso omu apwile navana. (Kupu. 30:1, 2) Vamishonali vaze vazachila mumafuchi muze vatu vazanga kupwa navana vavavulu veji kuvahulisanga ngwavo, “mwomwo ika kamwapwila navanako?” Numba tuhu veji kuvakumbululanga mukuzangama, oloze veji kuvalwezanga ngwavo, “Chinapihi, Kalunga mwamikafwa mupwenga navana.”

⁷ Ndumbwetu wapwevo wakuEngland asakile kupwa navana, oloze vyuma afwililile kavyateselemoko swi nomu achinyikile. Ambile ngwenyi evwile kupihya chikuma kumuchima, mwomwo atachikijile ngwenyi keshi kukapwa navana mukaye kanoko.  Ngocho valivwasanyine nalunga lyenyi vatambule mwana mangana vamulele nakupwa wavo. Chipwe ngocho ambile ngwenyi: “Ngweji kulinyenganga chikuma, mwomwo ngwatachikiza ngwami, mwana wakulela keshi kulyeseka namwana wakulisemenako.”

⁸ Mbimbiliya yahanjika ngwayo, pwevo muka-Kulishitu “mwakapwa wakukingiwa kuhichila mukusema vana.” (Chimo. 1, 2:15) Oloze kacheshi nakulumbununa nge kupwa navana chikiko nachilingisa mutu akayoye haya myaka yosenako. Kupwa navana cheji kukafwanga mutu apwenga navyakulinga muchishishisa chakundupukila mujitato jakuliyongolanga nakuhanjika havyuma vize kavyamupandamineko. (Chimo. 1, 5:13) Oloze mutu numba asomboka chipwe apwa navana, nahase kumona luyando mukuyoya chenyi.

9. Uno kufwisa muka-mahyamutu chapwa ngachilihi cheseko?

⁹ Kwatwama ukalu umwe veji kumonanga vaze valimbata, uze kavashinganyeka chikuma vatuko. Uno ukalu muka? Ukalu wakufwisa muka-mahyamutu. Vaze vafwisa vaka-mahyavo kavashinganyekele ngwavo ukalu kana unahase kuvasolokela mukaye kanoko. Vaka-Kulishitu vafwelela lushiko lwakusanguka luze ashikile Yesu. (Yowa. 5:28, 29) Uno lutalililo kana lweji kukafwanga ngachilihi vaze vafwisa vaka-mahyavo? Lweji kuvavendejekanga. Eyi yikiko jila Setu eji kuzachishilangamo Mazu enyi hakuvendejeka vaze vali nakumona luyando. Tushimutwilenu omu vangamba jaKalunga vamwe vanganyalile hakuvavendejeka kuli Yehova.

10. Chuma muka chavendejekele Hana muukalu wenyi? (Talenu muvwimbimbi wakulivanga.)

¹⁰ Hana pwevo lyaElekana ahichile mucheseko. Apwile mumba, oloze muhalika wenyi Penyina apwile navana. (Tangenu Samwele 1, 1:4-7.) Hana vamutolekelenga kuli Penyina “mwaka himwaka.” Echi chalingishile Hana alinyenge nakwivwa kukola kumuchima. Alombelenga kuli Yehova amuvendejeke. Chapundu vene, “atwalileho lika kulomba kumeso aYehova.” Kutala afwelelele ngwenyi Yehova mwamukumbulula tahi? Mukiko vene. Mwomwo kufuma vene haze “kahombele chekako.” (Samwe. 1, 1:12, 17, 18) Afwelelele ngwenyi Yehova mwamuhana lusemo chipwe kumukafwa mujila yeka.

11. Kulomba chinahase kutuvendejeka ngachilihi?

¹¹ Hakuwana nge katwakupukako, kaha nawa tunakuyoyela mukaye kaSatana, vyeseko naluyando navitwalangaho lika. (Yowa. 1, 5:19) Oloze tweji kuwahililanga hakutachikiza ngwetu Yehova apwa “Kalunga muka-kuvendejeka chosena.” Nge tuli muukalu, kaha twatela kulomba Yehova atukafwe tulipike naukalu kana. Hana alombele kuli Yehova namuchima wenyi wosena. Chochimwe nayetu nawa, nge tuli nakumona luyando, kaha twatela kulweza Yehova omu tuli nakwivwa. Twatela kulembelelanga Yehova nakumulweza vyuma vyosena vili kumuchima wetu.—Fwili. 4:6, 7.

12. Chuma muka chakafwile tuliwe Ana apwenga wakuwahilila?

¹² Numba tuhu natuhita muukalu wakuhona kusema, chipwe kufwisa muka-mahyetu, oloze Yehova mwatuvendejekanga. Mumakumbi aYesu, kwapwile kapolofweto wapwevo Ana uze afwishile lunga lyenyi hanyima yakutwama myaka 7 kaha muulo. Mbimbiliya kayahanjika ngwayo Ana apwile navanako. Uno alingilenga ika nahalwola apwile namyaka 84? Hali Luka 2:37 vasonekaho ngwavo: “Ikiye ejilenga shimbu yosena kutembele nakuzatanga mulimo wajila naufuku  namusana, nakulijilikanga kulya nakulembelela Kalunga.” Chapundu vene, kuzachila Yehova chavendejekelanga Ana nakumulingisa kupwa wakuwahilila.

13. Hanenu chakutalilaho chakusolola omu masepa vanahase kuvendejeka vakwavo, numba tuhu vausoko wavo kaveshi kuvavendejekako.

¹³ Nge natulikatanga chikuma navandumbwetu, kaha natupwa namasepa vamwenemwene. (Vishi. 18:24) Chakutalilaho, Paula eji kwanukanga omu evwile halwola naye asezele muchano. Halwola kana Paula apwile namyaka yakusemuka 5. Kumika muukalu kana kachapwile chachashiko. Oloze vamukafwile azame kushipilitu kuli ndumbwetu wapwevo Ann uze apwa payiniya muchikungulwilo chavo. Paula ahanjikile ngwenyi: “Numba tuhu Ann kapwile kausoko ketuko, oloze anguvendejekelenga nakungukafwa chikuma. Echi changukafwile chikuma ngutwaleho kuzachila Yehova.” Paula achili lika nakuzachila Yehova. Apwa jino wakuwahilila chikuma, mwomwo naye ali cheka nakuzachila Yehova. Ann nawa eji kwivwanga kuwaha mwomwo apwa naye yaPaula wakushipilitu.

14. Nganyo muka yeji kufumanga hakuvendejeka vakwetu?

¹⁴ Kukafwa vakwetu vali muukalu chinahase kutulingisa tuvulyame ukalu wetu. Vandumbwetu vakusomboka navaze kavasombokako, vatachikiza ngwavo kwambulula  mujimbu wamwaza cheji kunehanga kuwahilila. Vafwila kuvumbika Kalunga hakulinga mwaya muchima wenyi. Vandumbwetu vamwe veji kwambanga ngwavo, kwazana mumulimo wakwambulula chapwa nge hivitumbo. Chapundu vene, tuvosena tweji kulingisanga chikungulwilo chilinunge hamwe nge natuzakamanga vandumbwetu, navatu vaze tweji kwambulilanga. (Fwili. 2:4) Kaposetolo Paulu atusela chakutalilaho chamwaza. Azakaminenga chikuma chikungulwilo chamuTesolonyika “nganomu pwevo ali nakwamwisa” eji kuzakamanga vana venyi, kaha nawa apwile sevo wakushipilitu.—Tangenu Wavaka-Tesolonyika 1, 2:7, 11, 12.

15. Veya vatwama namulimo wakunangula vana muchano?

¹⁵ Chuma chikwavo chasakiwa shina kuvendejeka nakukafwa jitanga. Shimbu jimwe vaze vavahya mumuchano vanahase kulweza vandumbwetu vakuhya vavanangwileko vana vavo, nakuvatetekela vilongesa vyaMbimbiliya. Kweseka naVisoneka, visemi vakiko vatwama namulimo wakunangula vana vavo. (Vishi. 23:22; Efwe. 6:1-4) Oloze shimbu jimwe vanahase kulomba vandumbwavo vavakafweko. Chipwe ngocho kavatela kusuvilila mulimo wavo hakupwa visemiko. Vatela kutwalaho kushimutwilanga navana vavo.

16. Nge tuli nakunangula vana vavakwetu, chuma muka twatela kwanukanga?

¹⁶ Nge visemi navalomba ndumbwetu anangulenga mwanavo, ou ndumbwetu katela kulitwika mulimo wavisemiko. Shimbu jimwe vandumbwetu vanalinangulanga navana vaze vakwechi visemi javo kavapwa Vinjihoko. Shikaho ndumbwetu atela kwanuka ngwenyi, keshi ikiye chisemi chauze mwanako oloze ali nakumukafwa kaha azovoloke kushipilitu. Kaha nawa vatela kulinangwilanga hembo lyauze kanyike navisemi jenyi vamoneko chipwe kuya hamwe nandumbwenyi wakulindunuka, chipwe kulinangwila haweluka haze navavamona kuvatu vosena. Echi nachilingisa vatu vahone kumushinganyekela vyuma vyavipi. Kaha nawa atela kufwelela ngwenyi mukuhita chamakumbi, vavene visemi navakazata mulimo wakunangula mwanavo.

17. Vana vanahase kuvendejeka ngachilihi visemi javo?

¹⁷ Vanyike vaze vali nakufwila kuzanga Kalunga wamuchano nakukavangiza jindongi jamuMbimbiliya veji kukafwanga jitanga javo. Veji kulinganga ngocho hakuvumbika visemi javo nakuvakafwa milimo yahazuvo. Vanahase nawa kukafwa visemi javo kushipilitu. Shimbu kanda Livaji lyaNowa lizenga, Sete kakuluka yaLameke alemeselenga Yehova. Lameke ahanjikile hali mwanenyi Nowa ngwenyi: “Ikiye mwakatuvendejeka kumilimo yetu nakukukilikita chamavoko etu mwomwo yamavu aze vangwile kuli Yehova.” Upolofweto kana wateselemo omu Yehova afumishile changu hamavu. (Kupu. 5:29; 8:21) Ngocho vana vaze vazanga kulemesa chamuchano vanahase kuvendejeka visemi javo nakuvakafwa vomike muvyeseko nakukayovoka haAlamangetone.

18. Vyuma muka navitukafwa tumike chamokomoko naluyando natumonanga?

¹⁸ Kulomba, nakushinganyeka havyakutalilaho vyamuMbimbiliya, nakulikata navandumbwetu cheji kuvendejekanga vatu vavavulu muvyeseko vyavo vyosena. (Tangenu Samu 145:18, 19.) Kutachikiza ngwetu Yehova apwa muka-kuvendejeka nachitukafwa tumikenga mukala vyeseko natumona oholyapwa nakulutwe.