1. Chuma muka chalingisa vatu valihandunune kutunyama?

VATU valihandununa natunyama mwomwo vatu vakwechi chivezu. Omu Alama naEve vahokwele lushimbi lwaYehova, vaswamine. Echi chasolola nge vivezu vyavo vyapwile nakuvahana mulonga.

2. Uno chivezu chetu chalifwana ngachilihi namukovocho? (Talenu muvwimbimbi wakulivanga.)

² Nge chivezu kavachinangwile kanawako, kaha chinahase kulifwana nambopolo yize yili namukovocho uze kavakashile kanawako. Chuma kana chapwa chaponde mwomwo makimba napeho vinahase kuhungumuna mbopolo. Oloze nge mukovocho wambopolo kana vanaukase kanawa, kaha unahase kukafwa muka-kuyitambukisa. Shikaho chivezu chetu tunahase kuchifwanyisa kumukovocho uze vanakase kanawa kuchina mbopolo nayihungumuka. Ngocho twatela kuchinangulanga kanawa.

3. Chuma muka chinahase kusoloka nge katweshi kunangula kanawa chivezu chetuko?

³ Nge mutu kanangwile kanawa chivezu chenyiko, kaha kacheshi kumukinga kuvyuma vyavipiko. (Chimo. 1, 4:1, 2) Chivezu kana  chinahase kutulingisa tumone vyuma vyavipi kupwa vyamwaza. (Isa. 5:20) Yesu ahuhumwine vaka-kumukavangiza ngwenyi: “Ola yili nakwiza omu vosena vaze navakamijiha navakashinganyeka ngwavo vanazate mulimo wajila kuli Kalunga.” (Yowa. 16:2) Omu mukiko chapwile kuli vaze vajihe Setefwano, kaha nawa mukiko chili namakumbi ano. (Vili. 6:8, 12; 7:54-60) Vatu vavavulu vanajihinga vatu nakulyonga ngwavo vali nakuzata mulimo waKalunga. Oloze omu keshi mukiko yahanjika Mbimbiliyako. (Kulo. 20:13) Echi chasolola nge vivezu vyavo vyeji kuvahungumwisanga.

4. Vyuma muka navitukafwa tupwenga nachivezu chachitonyi?

⁴ Vyuma muka navitukafwa tupwenga nachivezu chachitonyi? MuMazu aKalunga mwatwama jishimbi najindongi, kaha “[jawahila] kunangula, nakuhanjikila, nakwolola vyuma, nakuzangamisa mukwoloka.” (Chimo. 2, 3:16) Shikaho kulinangula Mbimbiliya, nakushinganyeka havyuma yanangula, nakuvizachisa mukuyoya chetu, nachitukafwa tunangule chivezu chetu mangana chitutwaminyine nakulinga vyuma kweseka namwaya muchima waKalunga. Tushimutwilenu hajijila tunahase kunangwilamo chivezu chetu kuzachisa jishimbi najindongi jaYehova.

5, 6. Nganyo muka yatwama hakukavangiza jishimbi jaKalunga?

⁵ Hakusaka jishimbi jaKalunga jitunganyalise, katwatela kujitanganga kaha mangana tujitachikizeko, oloze twatela kujimona kupwa jajilemu. Mazu aKalunga amba ngwawo: “Hungenu vyuma vyavipi nakuzanga vyuma vyamwaza.” (Amo. 5:15) Uno natuhasa kulinga ngachilihi ngocho? Chuma nachitukafwa shina kutachikiza omu Yehova amona vyuma nakufwila kumulondezeza. Chakutalilaho, twambenga ngwetu cheji kumikaluhwilanga kusavala tulo. Kahomu namuya kuchipatela, ndotolo mwamihana vitumbo nakumilweza mulinyukenga mujimba, nakumikanyisa kulya vyakulya vimwe. Kaha mukuhita chalwola namumona jino ngwenu kukavangiza vyuma namilweze chinamikafwe. Twafwelela ngwetu namusakwilila chikuma ou ndotolo hakumikafwa mupwenga cheka vakulikangula.

⁶ Chochimwe nawa, Tengi yetu atuhana jishimbi jize jeji kutukinganga kuponde yize yeji kwizanga mwomwo yakuvulumuna shili nakutulingisa jino tulivwise kuwaha kuyoya. Chakutalilaho, Mbimbiliya yatulweza tulihende kukwonga, nakukwiva, nakukulinga ujila, nakuulyanyi, nakukupanda. (Tangenu Vishimo 6:16-19; Kuso. 21:8) Nge natutachikiza nganyo yatwama hakukavangiza jishimbi jaYehova, kaha nachitukafwa tuzange jishimbi jenyi nakumuzanga nawa ikiye.

7. Kutanga mijimbu vasoneka muMbimbiliya nakushinganyekaho nachitukafwa ngachilihi?

⁷ Katwatela kuhokola jishimbi jaKalunga nakumona ukalu, numba jino twijive ngwetu japwa jajilemuko. Tweji kulinangula kuvyuma valimbenjele vatu vaze vasoneka muMazu aKalunga. Mukanda waVishimo 1:5 wamba ngwawo: “Muka-mangana eji kwivwililanga nakutambula jindongi jajivulu.” Chikupu vene, kutanga mijimbu yavatu vasoneka muMbimbiliya nakushinganyekangaho nachitukafwa chikuma. Chakutalilaho, achishinganyekenu haukalu alikokelelele Mwangana Ndavichi omu ahokwele lushimbi lwaYehova hakulinga ujila naMbate-sheva. (Samwe. 2, 12:7-14) Omu natutanganga nakushinganyeka hamujimbu kana, tunahase kulihulisa ngwetu: ‘Uno vyuma muka atelele kulinga Mwangana Ndavichi mangana alihende kuukalu uze amwene mwomwo yakulinga ujila naMbate-sheva? Kachi nge yami ngwapwanga mucheseko kana,  kutala kachi ngunachifungulula tahi? Kutala kachi ngunalingi ngana muze alingile Yosefwe nyi muze alingile Ndavichi?’ (Kupu. 39:11-15) Kushinganyeka haukalu weji kwizanga mwomwo yakuvulumuna shili nachitukafwa ‘tuhunge vyuma vyavipi.’

8, 9. (a) Chivezu cheji kutukafwanga tulinge vyuma muka? (b) Uno jindongi jaYehova jeji kukafwanga ngachilihi chivezu chetu?

⁸ Pamo tunahase kulihenda kuvilinga vize ahunga Kalunga. Chipwe ngocho, kuliko vyuma vyeka vize kavavuluka hatoma muMbimbiliyako. Nge mukiko, kaha natutachikiza ngachilihi vyuma azanga Kalunga navize ahunga? Halwola kana hakiko jino chivezu chetu chatela kuzata.

⁹ Yehova atuhana jindongi jize jinahase kutwaminyina chivezu chetu. Amba ngwenyi: “Ami Yehova yami Kalunga kenu, Ou eji kuminangulanga mangana munganyale, Ou eji kumitwaminyinanga mujila yize mwatela kuya.” (Isa. 48:17, 18) Kushinganyekanga hajindongi jamuMbimbiliya nachitukafwa tunangule chivezu chetu. Kahechi chinahase kutukafwa tusakule kanawa vyakulinga.

10. Uno jindongi japwa jika, kaha Yesu ajizachishile ngachilihi?

¹⁰ Lundongi lwapwa “chikota chajishimbi chipwe ngwetu muchano uvene uze weji kulingisanga mutu alinge vyuma vimwe.” Kutachikiza jindongi jaYehova nachitukafwa tutachikize vishinganyeka vyenyi navyuma vyamulingishile numba ahakeko jishimbi. Omu Yesu apwile hano hamavu anangwilenga tumbaji twenyi vatachikize ukalu weji kwizanga mwomwo yakulinga vyuma vimwe. Chakutalilaho, ambile ngwenyi koko yeji kulingisanga mutu apwenga navilinga vyaulyanyi, kaha nawa peha yayipi yakusaka kulisavala yeji kulingisanga mutu alinge ukoji. (Mateu 5:21, 22, 27, 28) Hakusaka tunangule chivezu chetu, twatela kwitavila jindongi jaKalunga jitutwaminyine. Kahechi nachitukafwa tutohwese Kalunga.—Koli. 1, 10:31.

11. Uno vivezu vyavaka-Kulishitu vyalihandununa ngachilihi?

¹¹ Shimbu jimwe vaka-Kulishitu vaze vanangula chivezu chavo kuzachisa Mbimbiliya vanahase kumona vyuma mujila yakulihandununa. Chakutalilaho chimwe shina chakunwa wala. Mbimbiliya yetavisa kunwako tuwala twatundende kaha, oloze nawa yakanyisa kunwa wala wauvulu nakupenda. (Vishi. 20:1; Chimo. 1, 3:8) Uno echi chili nakulumbununa nge muka-Kulishitu atela tuhu kunwa wala heshoho nazangila tahi? Nduma. Numba tuhu chivezu chenyi nachimwitavisa kunwa wala, oloze atela nawa kushinganyeka havivezu vyavakwavo.

12. Mazu ahali Wavaka-Loma 14:21 nawatukafwa ngachilihi tuvumbike chivezu chavandumbwetu?

¹² Paulu ahuhumwine vaka-Kulishitu vavumbikenga vivezu vyavakwavo. Ambile ngwenyi: “Chinawahe kukana kulya nyama chipwe kunwa vinyo chipwe kulinga chuma chimwe chize nachihukanyisa ndumbwove.” (Loma 14:21) Kutala namulisuula kuhona kulinga vyuma vimwe kuchina namuhukanyisa chivezu chandumbwenu tahi? Twafwelela ngwetu namulinga vene ngocho. Shimbu kanda vandumbwetu vamwe valinangule muchano vapwilenga vitakwa, oloze oholyapwa jino vanalitwamina. Chipwe ngocho, katwasaka kulinga vyuma vize navihukanyisa vandumbwetu nakuvalingisa valimbenjeko. (Koli. 1, 6:9, 10) Shikaho nge munasanyika ndumbwenu kwiza kuzuvo yenu, kamwatela kumushinjila anwenga wala nge ivene kazangileko.

13. Chimoteu alingile chuma muka chize chasolola nge ahakile Wangana kulutwe?

 ¹³ Omu Chimoteu apwile achili mukweze, alisuwile vamujihane mwomwo kasakile kuhukanyisa vaYuleya vaze ambulililengako. Chimoteu apwile namuchima ngana uze apwile nawo Paulu. (Vili. 16:3; Koli. 1, 9:19-23) Kutala namulondezeza Chimoteu hakulisuula kulinga vyuma vimwe kuchina kuhukanyisa vandumbwenu tahi?

14, 15. (a) Uno kukula chalumbununa ika? (b) Vaka-Kulishitu vatela kumona ngachilihi vandumbwavo?

¹⁴ Vaka-Kulishitu vosena vatela kuseza ‘kunangula chamaputukilo chakuvuluka Kulishitu, nakulihakaho mangana vakule.’ (Hepe. 6:1) Oloze kulinga ngocho kachapwa chachashiko. Twatela ‘kulihakaho’ chipwe ngwetu kutwalaho kukilikita. Kukula chalumbununa kuzovoloka muchinyingi namumangana. Evi vikiko veji kutukolezezelanga tutangenga Mbimbiliya hakumbi hakumbi. (Samu 1:1-3) Kutala nayenu mwalitomena kulinga chuma kana tahi? Kulinga chuma kana nachimilingisa mupwenga namangana aze nawamikafwa mwivwishise jishimbi najindongi jaKalunga.

¹⁵ Lushimbi lwalulemu vatela kukavangiza vaka-Kulishitu shina zangi. Yesu alwezele tumbaji twenyi ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowa. 13:35) Yakova songo yaYesu ambile ngwenyi, zangi yapwa “lushimbi lwawangana” (Yako. 2:8) Paulu ambile ngwenyi: “Zangi yikiko yatesamo jishimbi.” (Loma 13:10) Chuma kana kachapwa chaungejiko mwomwo Mbimbiliya yatulweza ngwayo “Kalunga ikiye zangi.” (Yowa. 1, 4:8) Chikupu vene, Kalunga atuzanga. Yowano ambile ngwenyi: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye.” (Yowa. 1, 4:9) Chapundu vene, zangi yikiko yalingishile Kalunga alinge chuma kana. Nge natuzanga Yehova, naMwanenyi, navandumbwetu, navatu vosena, kaha natusolola hatoma ngwetu tunakulu kushipilitu.—Mateu 22:37-39.

16. Mwomwo ika twatela kumona jindongi kupwa jajilemu omu natutwalaho lika kukula kushipilitu?

 ¹⁶ Kukilikita nangolo mangana mukule kushipilitu, nachimikafwa mumone jindongi kupwa jajilemu. Jishimbi jalihandununa najindongi mwomwo jishimbi japwa jikakukanyisa kulinga chuma chimwe oloze jindongi jinahase kuzata muvyuma vyavivulu. Chakutalilaho, mwana keshi kutachikiza ponde yatwama hakulikata navatu vavilinga vyavipiko, shikaho chisemi wamangana atela kulweza mwanenyi jishimbi jize najimukinga kuvilinga vyavipi. (Koli. 1, 15:33) Oloze omu mwakola ou mwana, kaha mwaputuka kumona jindongi jamuMbimbiliya kupwa jajilemu. Echi nachimukafwa asakulenga kanawa masepa vakulikata navo. (Tangenu Wavaka-Kolinde 1, 13:11; 14:20.) Nge natushinganyekanga hajindongi jaKalunga, kaha chivezu chetu nachitutwaminyina tumone vyuma ngana muze avimona Kalunga.

17. Mwomwo ika natwambila ngwetu tuli navinoma vyavivulu vyakutukafwa tusakulenga kanawa vyakulinga?

¹⁷ Kutala kuli vyuma navitukafwa mangana tusakulenga vyuma vize navivwisa Yehova kuwaha tahi? Eyo. Kukavangiza kanawa jishimbi najindongi jamuMazu aKalunga nachitukafwa ‘tutengamo mwosena, nakulizanga mwosena kuzata milimo yamwaza yosena.’ (Chimo. 2, 3:16, 17) Ngocho, mwatela kuhehwojolanga muwane jindongi jamuVisoneka mangana ‘mutachikize mwaya muchima waYehova.’ (Efwe. 5:17) Fwilenu kuzachisanga vinoma vatuhana kuliuka lyetu vyakufwana nge Watch Tower Publications Index, naChinoma Chakukafwa Vinjiho jaYehova Kuhehwojola, naChisete chaMikanda, naCHISETE CHAMIKANDA CHAHAINTERNET, naChisete cha JW. Evi vinoma navitukafwa tunganyale hachilongesa chauka nechi chatanga.

18. Nganyo muka yeji kufumanga hakukavangiza jishimbi najindongi jaYehova?

¹⁸ Kukavangiza jishimbi najindongi jaYehova cheji kunganyalisanga mwamunene. Chisoneka chaSamu 119:97-100 ngwacho: “Jishimbi jove omu ngwajizanga! Ngweji kujishinganyekanga lwola lwosena. Jishimbi jove jeji kungulingisanga ngupwenga namangana kuhambakana vaka-kole jami, mwomwo ngwatwama najo haya myaka yosena. Ngwanangakana chikuma kuhambakana vaka-kungunangula vosena, mwomwo ngweji kushinganyekanga hamazu ove akwanukisa. Ngweji kulinganga vyuma mukunangakana kuhambakana vakulwane, mwomwo ngweji kulamanga jindongi jove.” Shikaho, “kushinganyekanga” hajishimbi najindongi jaKalunga nachitukafwa tupwenga namangana, nakunangakana, nachinyingi. Nge natukilikita nangolo nakwitavila jishimbi najindongi jaKalunga vinangule chivezu chetu, kaha natuheta “kuseteko yachivuvu chakuzala chize aheteleho Kulishitu.”—Efwe. 4:13.