“MUNAYOYO mwane!”

Twafwelela ngwetu nayenu mweji kumenekanga vatu mujila kaneyi. Hakumeneka vatu, pamo mweji kuvapakatanga mukasamba chipwe kuvameneka mulivoko. Vatu veji kulimenekanga mujijila jakulisezaseza kweseka nangalila vatwama chipwe chisemwa chavo. Oloze vyuma tweji kulimenekelanga vyapwa vyovimwe. Kaha nawa vatu vosena vamona ngwavo kuhona kumeneka mutu chipwe kukana kukumbulula vaze navatumeneka cheji kusololanga nge mutu kana katwamuzangako chipwe twatwama navilinga vyavipi.

Chipwe ngocho, vatu vamwe kavasaka kumeneka vakwavoko. Vamwe veji kwivwanga sonyi chipwe kushinganyeka ngwavo kavatelemo kumeneka vakwavoko. Veka nawa cheji kuvakaluhwilanga kumeneka vatu vakumiyachi yeka navisemwa vyeka. Vakwavo nawa cheji kuvakaluhwilanga mwomwo yajila vavalelelamo chipwe mwomwo yakuya fuma .Oloze numba vene nge natumeneka mutu mukavatu, kaha chinahase kumukolezeza chikuma.

Lihulisenu ngwenu: ‘Mwomwo ika kulimeneka chapwila chachilemu? Kaha Mazu Kalunga anahase kungunangula ngachilihi kutalisa kukulimeneka?’

Omu kaposetolo Petulu atambwile Kolonelyu muka-lifuchi lyeka muchikungulwilo chavaka-Kulishitu, ambile ngwenyi: “Kalunga katala vatu kumesoko.” (Vili. 10:34) Kufumaho asonekele ngwenyi Kalunga “azanga vosena vapihilile nakwalumuka.” (Petu. 2, 3:9) Tunahase kuzachisa mazu kana kuli vatu vaze vali nakulinangula muchano. Oloze Petulu akolezezele vakwavo vaka-Kulishitu ngwenyi: “Vumbikenunga vatu vosena, zangenunga vandumbwenu vosena.” (Petu. 1, 2:17) Mazu kana atela kutukolezeza nayetu tumenekenga vatu chamokomoko nachisemwa chavo chipwe jila vavalelelamo. Nge natulinga ngocho, kaha natusolola ngwetu twavazanga nakuvavumbika.

Kaposetolo Paulu nawa akolezezele vandumbwenyi ngwenyi: “Litambulenunga navakwenu, nge muze amitambwile Kulishitu nawa.” (Loma 15:7) Paulu avulukile majina avandumbwenyi vaze ‘vamuvendejekelenga.’ Namakumbi ano, twatela kukolezezanga chikuma vandumbwetu, hakuwana nge Satana ali nakufumbukila vatu jaKalunga.—Kolo. 4:11, kwinyikila chamwishi; Kuso. 12:12, 17.

Visoneka vyasolola nge kumeneka cheji kukafwanga vatu mujila jajivulu.

Shimbu kanda kuyoya chaYesu vachinungulwile mujimo lyaMaliya, Yehova atumine kangelo kwiza nakuhanjika naMaliya. Ou kangelo aputukile kumuhanjikisa hakwamba ngwenyi: “Mwoyo wove, ove vakisula, Yehova ali nayove.” Maliya “alikomokelele chikuma” hakumona vali nakumuhanjikisa kuli kangelo. Oloze uze kangelo amwambile ngwenyi: “Kanda nawivwa womako, mwomwo Kalunga nakwivwila uselewa.” Amulumbunwinyine ngwenyi Kalunga ikiye ajinyine ngwenyi Maliya akaseme Meshiya. Maliya katwalileho kulikomokelako, oloze alyononwene nakwamba ngwenyi: “Tala, ami ndungo yaYehova wapwevo! Chipwenga vene ngocho kweseka namazu ove.”—Luka 1:26-38.

Chapwile hikutokwa chachinene kuli ou kangelo kumutuma kuli Yehova kupwa muluwa wenyi. Chipwe ngocho, kalitohwesele hakuhanjika kuli mutu wakuhona kukupuka chipwe kumumona ulumbiko. Amuvumbikile hakuvangila kumumeneka. Vyuma muka natulinangulako? Twatela kupwanga vakulizanga kumeneka vakwetu nakuvakolezezanga. Numba tuhu katweshi kuhanjika vyavivuluko, oloze mazu natuhanjika anahase kuvakolezeza nakuvalingisa vatachikize ngwavo navatwama mutanga yaYehova.

Paulu atachikijile vandumbwenyi vavavulu muvikungulwilo vyamuAsia Minor namuEurope. Mumikanda yize asonekelenga mwatwama mazu akumeneka vatu vamwe hamajina.Kumeneka kana chaputukila mumukanda wavaka-Loma kapetulu 16. Paulu atuminenga mazu akumeneka vakwavo vaka-Kulishitu. Chakutalilaho,  asonekele ngwenyi: “Ngunajimbula ndumbwetu wapwevo Fwivi kuli enu,” kaha akolezezele vandumbwenyi ngwenyi: “Mangana muhase kumutambula muli Mwata nge omu mwatela kuli vaka-kujila, nakumukafwako muvyuma vyosena navisakiwa kumukafwa kuli enu.” Paulu amenekele nawa Pilishila naAkwila nakwamba ngwenyi: “Keshi nge yami kaha ngunavasakwililako, oloze navikungulwilo vyavaka-mafuchi eka nawa.” Amenekele nawa vatu vamwe vaze katwatachikiza kanawako makumbi ano. Chakutalilaho, ambile ngwenyi: “Menekenu mukwetu ngwazanga Epenetu.” Mumukanda woumwe asonekelemo nawa ngwenyi: “Menekenu Tulufwina naTulufwosa, mapwevo vaze vali nakuzata chikuma muli Mwata.” Chikupu vene, Paulu amenekelenga vandumbwenyi vosena.—Loma 16:1-16.

Chikupu vene, vevwile kuwaha chikuma hakutachikiza ngwavo ndumbwavo apwile nakuvanukanga lika. Kahechi chavalingishile vatwaleho lika kuzanga Paulu navandumbwavo veka. Kumeneka kana chakolezezele navakwavo vaka-Kulishitu nakuvakafwa vatwaleho lika kupwa vakuzama mulufwelelo. Kumeneka vandumbwetu nakuvasangejekanga cheji kutukafwanga tutunge usepa wakukola navakiko nakupwa tuvakulinunga.

Omu Paulu ahetele kuchau chaPuteyole chakusulikila jimbopolo ayile kuLoma, kaha vandumbwenyi vayile nakumusesa. Kahomu Paulu amwene vandumbwenyi, “amusakwililile Kalunga, kaha ajikijile.” (Vili. 28:13-15) Shimbu jimwe, tunahase kumeneka vandumbwetu hakumwesa kukanwa chipwe hakuvahana mwoyo. Kulinga chuma kana chinahase kuvendejeka mutu uze nahombo.

Kambaji Yakova atelele kuhuhumuna mujila yautenu vaka-Kulishitu vamwe vaze valingilenga ujila wakushipilitu hakulikata nakaye. (Yako. 4:4) Oloze tutalenu mujila avahuhumwinyinemo kweseka namukanda uze avasonekelele.

Ambile ngwenyi: “Ami Yakova, ndungo yaKalunga naMwata Yesu Kulishitu, nguli nakumeneka miyachi 12 yize yinalimwangila kwosena.” (Yako. 1:1) Mazu kana akafwile vandumbwenyi vetavile vyuma avahuhumwine nakutachikiza ngwavo vosena Kalunga avamwene kupwa vavalemu. Chikupu vene, kumeneka mutu chinahase kumikafwa muputuke kushimutwila nenyi vihande vyavilemu.

Numba tuhu kamweshi kuhanjika mazu amavuluko, oloze mwatela kumeneka mutu mujila nayisolola nge mwamuzakama, kaha nawa mwamuzanga. Omu mukiko mwatela kulinga numba tuhu namushinganyeka ngwenu nou namono vyuma munalingi wauchi. (Mateu 22:39) Chakutalilaho, ndumbwetu umwe wapwevo wamuIreland ayile kuZuvo yaWangana, kaha awanyine kukunguluka hinachiputuka. Omu engilile ndumbwetu weka walunga, amwesele kukanwa nakwamba ngwenyi: “Tunawahilila hakukumona.” Ngocho uze ndumbwetu ayile nakutwama.

Omu mwahichile vyalumingo vyavindende, ou ndumbwetu wapwevo ayile kuli uze ndumbwetu walunga nakumulweza ngwenyi, apwilenga nakuhita muukalu waunene mutanga. Ambile ngwenyi: “Lize likumbi ngwakotokelele mwomwo ngwapihililile chikuma, kaha kangwasakile nakwiza nakukungulukako. Kangweshi nakwanuka vyuma twalinangwile lize likumbiko, oloze nguli nakwanuka kaha mazu wahanjikile. Mazu kana angukolezezele chikuma. Shikaho nguneza nakukusakwilila.”

Ou ndumbwetu katachikijile ngwenyi mazu ahanjikile nawakolezeza ndumbwenyiko. Ambile ngwenyi: “Omu ou ndumbwetu angulwezele ngwenyi mazu ngwahanjikile amukolezezele, ngwawahililile chikuma.”

Solomone asonekele ngwenyi: “Mbila mbolo yove hameya, mwomwo omu namuhita makumbi amavulu naukayiwana cheka.” (Kwambu. 11:1) Kumenekanga vandumbwetu chinahase kuvakolezeza nakutukolezeza nayetu nawa. Shikaho twatela kumona kumeneka vakwetu kupwa chuma chachilemu chikuma.