1, 2. (a) Vyuma muka vili nakulingisa vatu mukaye vahone kupwa vakulinunga? (b) Vihula muka natushimutwila?

NDUMBWETU umwe wapwevo wakusulo yalitungu lyaEurope anukile chiyoyelo chenyi chakunyima, kaha ambile ngwenyi: “Kufuma vene kuunyike wami, ngunamononga vilinga vyavipi vyavivulu. Echi changulingishile ngukane kwazana mumauka amapolitiki nakuputuka jino kukundwiza vaze vasaka kuneha chiyulo mujila yayipi. Kaha nawa hamyaka yayivulu ngwapwilenga nakajila kami uze apwile chihwanga.” Ndumbwetu weka walunga wakusulo yalitungu lyaAfrica azanyinenga muvilinga vyaulyanyi. Ambile ngwenyi: “Ngwamwenenga ngwami muyachi wami wapwile waulemu chikuma kuhambakana miyachi yosena, ngocho ngwengilile muliuka limwe lyavaka-mapolitiki. Vatulwezele ngwavo twatela kujiha vaka-kole jetu kuhakilako vene navaka-muyachi wetu vaze vakundwijilenga mauka eka amapolitiki.” Ndumbwetu mukwavo wapwevo wakucentral Europe ambile ngwenyi: “Vatu vatumwenenga chikuma ulumbi, kahechi chakulingishile nguhunge vatu vakumafuchi eka chipwe vamumauka eka akwitava.”

² Vishinganyeka vapwilenga navyo ava vandumbwetu vikiko vinalisale mukaye. Kaha nawa mauka avaka-ulyanyi vaze vasaka kusokoka ali nakuvulilako lika. Mumauka amapolitiki nawa chivwasano chinakehe  ngocho echi chili nakuvalingisa valimwange. Kaha nawa mumafuchi amavulu vatu veji kuyanjisanga vamwiza. Ngana muze yahanjikile chimweza Mbimbiliya, makumbi ano vatu “kaveshi kwitavila vivwasanoko.” (Chimo. 2, 3:1, 3) Uno vaka-Kulishitu navahasa ngachilihi kupwa vakulinunga mukaye kano kanazale navikokojola ngana? Natunganyala chikuma hakushimutwila omu Yesu ahoneselelemo ukalu wapwile mulikulukaji lyamyaka lyakulivanga omu vaka-kuyula vahonene kulinga mwaya chiyulo. Tuchishimutwilenu vihula vino vitatu: Mwomwo ika Yesu akanyinyine kwazana mumauka avaka-kulikanga kuli vaka-kuyula? Uno asolwele ngachilihi ngwenyi vangamba jaKalunga kavatela kwazana muvihande vyamapolitikiko? Yesu atunangula ngachilihi tumone ngwetu katwatela kulingisa muvilinga vyaulyanyiko numba tuhu vanatulingi mwamupi?

3, 4. (a) Vyuma muka vapwile nakutalilila vaYuleya vamumakumbi aYesu? (b) Kaha vishinganyeka kana vyalingishile tumbaji twaYesu valinge ika?

³ VaYuleya vavavulu vaze anangwilenga Yesu vatondelenga kusokoka kuchiyulo chavaLoma. VaYuleya vakulikanga vakiko vakunywilenga vakwavo mangana vapwenga navishinganyeka kanevi. Vavavulu vakavangijilenga vishinganyeka vyaYuta wakuNgalileya. Ou lunga apwile meshiya wamakuli wamulikulukaji lyamyaka lyakulivanga uze ahungumwishile vatu vavavulu. Josephus, kaYuleya uze alinangula vyakushikulu ambile ngwenyi, Yuta “ahungumwishile vakwavo mangana valikange hakwamba ngwenyi vapwile vipumbu mwitavila hakwitavila kufweta mitelo kuli vaLoma.” VaLoma vajihile Yuta. (Vili. 5:37) Vaka-kulikanga vamwe valingishilenga muvilinga vyaulyanyi mangana vatesemo vyuma vapwile nakusaka.

⁴ Oloze vaYuleya vavavulu vapwile nakuvandamina kwiza chaMeshiya. Vashinganyekele ngwavo omu mwakeza Meshiya, mwakavasokola kuundungo wavaLoma. (Luka 2:38; 3:15) Vavavulu vashinganyekele ngwavo Meshiya mwakaneha wangana muli vaIsalele hano hamavu, mangana vaYuleya vaze valimwangilile kuvihela vyakwakusuku vakinduluke kulifuchi lyavo. Yowano muka-kumbapachisa ahulishile Yesu ngwenyi: “Ove yove Uze vambile ngwavo ali nakwiza tahi, nyi twatela kutalililako weka?” (Mateu 11:2, 3) Yowano asakile kutachikiza numba nge Yesu ikiye mwasokola vaYuleya nyi mutu weka. Tumbaji vavali vaze valiwanyine naYesu mujila yakuya kuEmau omu asangukile, navakiko vashinganyekele ngwavo Meshiya ejile nakusokola vaYuleya. (Tangenu Luka 24:21.) Nakushimbula chiku, vaposetolo jenyi nawa vamuhulishile ngwavo: “Ove Mwata, uno wangana nauukindulwisa kuli vaIsalele halwola luno tahi?”—Vili. 1:6.

5. (a) Mwomwo ika vaka-Ngalileya vasakilile Yesu apwenga mwangana? (b) Kaha Yesu olwele ngachilihi vishinganyeka vyavo?

⁵ Vyuma vapwile nakutalilila vatu hali Meshiya vyalingishile vaka-Ngalileya vatonde kuswanyisa Yesu hawangana. Vatu kana vafwelelelele ngwavo Yesu kachi apwile twamina wamwenemwene mwomwo apwile ngaji kaha nawa kachi avokilenga kumisongo yavo nakuhana vaka-kukalikiza vyakulya. Omu Yesu akumishile kulisa vatu 5,000, amwene vyuma vapwile nakushinganyeka. Mbimbiliya ngwayo, “Omu Yesu atachikijile ngwenyi vatu vali nakusaka kwiza nakumukwata mangana vamulingise kupwa mwangana, afumine kuze nakuya cheka kupili kwauka wenyi.” (Yowa. 6:10-15) Lichako, omu vapwile musali yaKalungalwiji waNgalileya, Yesu avalumbunwinyine jino mulimo akatukilile hano hamavu. Avalumbunwinyine ngwenyi ejile nakuvasokola kushipilitu keshi nge kumujimbako. Avalwezele ngwenyi: “Kanda kuzachila kulya chize cheji kupolangako, oloze zachilenu kulya chize cheji kwililanga nakutwala kukuyoya chahaya myaka yosena.”—Yowa. 6:25-27.

6. Uno Yesu asolwele ngachilihi hatoma ngwenyi kasakile kupwa mwangana hano hamavuko? (Talenu muvwimbimbi wakulivanga.)

⁶ Omu Yesu apwile kwakamwihi nakufwa, amwene ngwenyi vaka-kumukavangiza vamwe vashinganyekelenga ngwavo mwahaka wangana muYelusalema.  Oloze olwele vishinganyeka vyavo hakuvalweza chifwanyisa chajimina. Echi chavanangwile vatachikize ngwavo Yesu uze apwile ‘mutu wamulemu’ atelelele kuvaseza kaha nawa hatelelele kuhita lwola lwalusuku. (Luka 19:11-13, 15) Yesu nawa alumbunwinyine vaLoma ngwenyi kazanyinenga muvihande vyalifuchi nachiyuloko. Chakutalilaho, Pondeu Pilatu amuhulishile ngwenyi: “Ove yove Mwangana wavaYuleya tahi?” (Yowa. 18:33) Pamo ou nguvulu alizakaminyine ngwenyi Yesu nahase kuneha pindangano, kahechi chikiko chuma kazangile Pilatu chisoloke muchiyulo chenyiko. Oloze Yesu amukumbulwile ngwenyi: “Wangana wami kaweshi wamukaye kanoko.” (Yowa. 18:36) Yesu kazanyinenga muvihande vyamapolitikiko mwomwo Wangana wenyi wapwile wamwilu. Ngocho alwezele Pilatu ngwenyi mulimo ejilile hano hamavu shina wakuhana “unjiho wakuvuluka muchano.”—Tangenu Yowano 18:37.

7. Mwomwo ika chapwila chachikalu kulihenda kukukundwiza mauka avaka-kusaka kulimanyina?

⁷ Nge natutachikiza kanawa mulimo wetu ngana muze alingile Yesu, kaha katweshi kukundwiza vaka-mapolitiki chipwe mauka avaka-kusaka kulimanyinako. Chipwe ngocho, echi kachapwa chachashiko. Kalama wakujinguluka umwe ambile ngwenyi: “Vatu vamungalila yetu vatwama namuchima wakulikanga chikuma. Vatu kana vasaka kulimanyina mwomwo veji kushinganyekanga ngwavo nge kaveshi kuvayula kuli vaka-lifuchi lyeka chipwe fulumende yimwe yize kavazangileko, kaha navapwa vakuwahilila nakupwa nachiyoyelo chamwaza. Oloze tweji kwivwanga kuwaha hakuwana nge vandumbwetu vapwa vakulinunga nakuhaka kaha muchima kumulimo wakwambulula mujimbu wamwaza waWangana. Ava vandumbwetu vatalilila kaha kuli Kalunga mangana afumiseko ukalu wosena tuli nakumona.”

8. Ukalu muka vamwenenga vaYuleya vamulikulukaji lyamyaka lyakulivanga? Hanenu chakutalilaho.

⁸ Chuma cheji kulingisanga vatu vazane muvihande vyamapolitiki shina kumona omu vaka-kuyula vali nakuhengesa chiyulo. Mumakumbi aYesu vatu valipikililenga hachihande chakufweta mitelo. Echi chikiko chalingishile naYuta wakuNgalileya uze twavulukanga hakavanga alikange mwomwo vavalwezele ngwavo valisonekese mangana vatu vafwetenga mitelo kuli vaLoma. Vatu vamuchiyulo chavaLoma kuhakilako vene navaze vevwililile kuli Yesu vapwile nachilika chakuhana mitelo yayivulu yakufwana nge vikumba, namisuka yamavu najizuvo. Chuma kana chapwile hichiteli mwomwo vapwilenga nakuvalyapula kuli vaka-kutambula mitelo. Vaka-kutambula mitelo valanjishilenga mitelo yize vatambwilenga kuvatu mangana vanganyalileho. Chakutalilaho, Zakeu mukulwane wavaka-kutambula mitelo apwile naluheto lwaluvulu luze atambwilenga kuvatu mulizangamina. (Luka 19:2, 8) Chasoloka nge vilinga vyenyi vikiko  valondezezelenga navakwavo vaka-kutambula mitelo.

9, 10. (a) Yesu vamwesekele ngachilihi kuli vaka-kole jenyi mangana azane muvihande vyamapolitiki? (b) Chishina muka natulinangula kumazu akumbulwile Yesu? (Talenu muvwimbimbi wakulivanga.)

⁹ Yesu vamwesekele kuli vaka-kole jenyi hakumuhulisa hachihande chakufweta mitelo. Vamuhulishile hamutelo wandenali uze vahanyinenga kuli vaLoma. (Tangenu Mateu 22:16-18.) VaYuleya kavazangilenga kuhana mutelo kanako mwomwo kuhana mutelo kana chasolwele nge vetavilile kupwa muchiyulo chavaLoma. Vaka-lizavu “lyavatu jaHelote” vaze vahulishile echi chihula vashinganyekele ngwavo nge Yesu mwahanjika ngwenyi kuhana mitelo chapwile chachipi, kaha navamuwanyina mulonga. Kaha nawa nge ambile ngwenyi vatu vatelelele kuhananga mitelo vavateleselenga, kachi vatu valitwaminyine kumukavangiza.

¹⁰ Oloze Yesu avakumbulwile mujila yakuzangama. Ambile ngwenyi: “Hanenunga vyuma vyaKesale kuli Kesale, oloze vyuma vyaKalunga kuli Kalunga.” (Mateu 22:21) Chipwe ngocho, atachikijile vene ngwenyi vaka-kutambula mitelo valyapwilenga vatu. Oloze ikiye kasakile chihande kana chimuhonese kuhaka mangana kuchuma chize chapwile chachilemuko. Chuma kana shina Wangana waKalunga uze naukeza nakufumisako ukalu wosena. Yesu asela vaka-kumukavangiza chakutalilaho chamwaza. Kavatela kwazananga muvihande vyamapolitikiko numba tuhu navashinganyeka ngwavo kulinga ngocho chikiko nachikumisa ukalu. Vaka-Kulishitu vatela kutondanga kaha Wangana waKalunga nakwoloka chenyi. Chipwe ngocho, kaveshi kushinyinyika vakwavo chipwe kuhanjika mazu amapi hali vaze vali nakuhengesa chiyuloko.—Mateu 6:33.

11. Chuma muka twatela kulinga kachi nge vali nakutuyanjisa kuli vaka-kuhengesa chiyulo?

¹¹ Vatu vamwe vazanyinenga muvihande vyamapolitiki shimbu kanda valinangule muchano nakupwa Vinjiho jaYehova, oloze valumuna lyehi vishinganyeka vyavo. Ndumbwetu wapwevo ambile ngwenyi: “Omu ngwayile kuyunivesiti, ngwakalinangwile vyuma vize vyangulingishile ngupwenga navishinganyeka vyakusaka kukundwiza vaze vasaka kuneha chiyulo mujila yayipi. Ngwasakilenga kuhakwila lisesa lyayetu vatu velava mwomwo vatumwenenga chikuma ulumbi. Numba tuhu ngwahoneselenga vakwetu hakulipula jipami, oloze kangwapwilenga nguwakuwahililako. Kangwatachikijile ngwami vatu vatela kuvakafwa mangana vaseze vishinganyeka vyakulimona ulumbiko. Oloze omu ngwaputukile kulinangula Mbimbiliya, hakiko jino ngwamwene ngwami ami yami ngwatelelele kupwa watete kumbila vishinganyeka kana. Ndumbwetu umwe wachindele angutalililile chikoki nakungukafwa mangana ngwalumune vishinganyeka vyami. Oholyapwa jino nguli nakuzata upayiniya washimbu yosena muchikungulwilo chize chazachisa lilimi lyatuveveve.”

12. Chimbalwila muka chize Yesu alwezele tumbaji twenyi valihendeko?

¹² Mumakumbi aYesu vatu vazanyinenga chikuma muvihande vyamapolitiki. Chakutalilaho, mukanda waDaily Life in Palestine at the Time of Christ wamba ngwawo, “vaYuleya valihandunwine nakutunga mazavu akwitava, kaha mazavu kana apwile kwijiva nge avaka-mapolitiki.” Ngocho Yesu ahuhumwine tumbaji twenyi ngwenyi: “Tonenunga, zangamenu nachimbalwila chavaFwaliseu nachimbalwila chaHelote.” (Mako 8:15) Omu Yesu avulukile Helote, pamo apwile nakuhanjika vyalizavu lyavatu jaHelote. VaFwaliseu vafwilililenga kusokoka chavaYuleya. Mumujimbu asonekele Mateu, Yesu avulukile nawa vaSatuse vaze vazangile ngwavo kachi vyuma vipwenga vene muze vyapwile. VaSatuse vavavulu vapwilenga nalisesa lyakulinga vyuma vyavivulu muchiyulo chavaLoma. Shikaho, Yesu ahuhumwine tumbaji twenyi valihende kukunangula chavaFwaliseu navaSatuse chize chalifwanyine nachimbalwila. (Mateu 16:6, 12) Yesu ahanjikile mazu kana omu mwahichile makumbi amandende kaha kufuma haze vasakile kumulingisa kupwa mwangana.

13, 14. (a) Uno vaka-mapolitiki namauka akwitava valingishile ngachilihi kupwenga ulyanyi nakulimona ulumbi? (b) Mwomwo ika katwatela kulingisa muvilinga vyaulyanyiko numba tuhu vanatulingi mwamupi? (Talenu muvwimbimbi wakulivanga.)

 ¹³ Kachi nge mauka akwitava nawalifutakana namauka amapolitiki, kaha kunahase kupwa ulyanyi. Yesu alwezele tumbaji twenyi ngwenyi vatela kulihenda kuvihande vyamuyachou. Evi vikiko vyalingishile vapilishitu navaFwaliseu vatonde kujiha Yesu. Vashinganyekelenga ngwavo apwile muka-mapolitiki, kaha mwavatambula ngolo jakuyula. Vambile ngwavo: “Kachi nge natumwechelela ngana, vatu vosena navamufwelela, kaha vaLoma navakeza nakututambula chihela chetu nalifuchi lyetu.” (Yowa. 11:48) Kufumaho, Kayafwase Kapilishitu Wakulitulaho atwaminyinyine jino mulimo wakujiha Yesu.—Yowa. 11:49-53; 18:14.

¹⁴ Kuheta naufuku, Kayafwase atumine maswalale vayenga nakukwata Yesu. Yesu atachikijile vyuma vapwile nakushinganyeka, ngocho halwola vapwile nakulya kulya chamakumishilo, alwezele tumbaji twenyi vambate jipoko jamikwale mangana avanangule chishina chachilemu chikuma. Shikaho vambachile jipoko jivali. (Luka 22:36-38) Kaha nawa haufuku woumwe, Petulu azachishile poko yamukwale hakulemeka mutu umwe hali vaze vejile nakukwata Yesu. Chakuzeneka kukakasana, matoto akiko amulingishile alinge chuma kana. (Yowa. 18:10) Oloze Yesu alwezele Petulu ngwenyi: “Kindulwisa poko yove yamukwale muchindalo chayo, mwomwo vosena vaze navakwata poko yamukwale navakanonga kupoko yamukwale.” (Mateu 26:52, 53) Mazu kana alifwanyine nawaze ahanjikile mukulomba nachingoloshi, ngwenyi tumbaji twenyi kavatelelele kupwa vakukayeko. (Tangenu Yowano 17:16.) Vatu vatelelele kupendamina hali Kalunga mangana akumise kala ukalu vapwile nakumona.

15, 16. (a) Uno Mbimbiliya yinakafwe ngachilihi vaka-Kulishitu valihende kuvikokojola? (b) Chihandwa muka eji kumonanga Yehova omu eji kutalanga mukaye?

¹⁵ Ndumbwetu wapwevo wakusulo yalitungu lyaEurope uze twavulukanga hakavanga ambile ngwenyi: “Ulyanyi kaweshi kuhasa kuneha chiyulo chakwolokako. Ngwalinangwile jino ngwami kulinga ulyanyi cheji kunehanga kufwa. Veka nawa cheji kuvakokelanga kaha ukalu nakuhona kupwa vakuwahilila. Oloze ngwawahililile hakulinangula vyuma yahanjika Mbimbiliya ngwayo, Kalunga kaha ikiye mwakaneha chiyulo chakwoloka hano hamavu. Ou ukiko mujimbu ngunambululanga hamyaka 25 yinahichimo.” Ndumbwetu walunga wakusulo yalitungu lyaAfrica nawa ambilile poko yamukwale, kulumbununa muchima wandombo uze apwilenga nawo kaha eji kuzachisanga jino “poko yamukwale yashipilitu,” yikiko mazu aKalunga hakwambulila vatu vakumiyachi yakulisezaseza. (Efwe. 6:17) Kaha nawa, ndumbwetu wakucentral Europe omu alinangwile muchano asombokele kuli ndumbwetu wakuchisemwa cheka chize ajinjile hakavanga. Vandumbwetu vosena ava tunavuluka valumwine vishinganyeka vyavo mwomwo vafwililile kulondezeza Kulishitu.

¹⁶ Chikupu vene ava vandumbwetu valingile chuma chachilemu chikuma. Mbimbiliya yafwanyisa vatu kukalungalwiji wakunganjanga muze kamwatwama kuundako. (Isa. 17:12; 57:20, 21; Kuso. 13:1) Numba tuhu vatu makumbi ano vali nakulihandununa mwomwo yakuhona chivwasano, oloze etu twatwama mukuunda nakulinunga. Ngocho, omu Yehova eji kutalanga mukaye, eji kwivwanga kuwaha chikuma mwomwo yakulinunga chavatu jenyi.—Tangenu Zefwanyiya 3:17.

17. (a) Jijila muka jitatu tweji kukundwijilangamo kulinunga chetu? (b) Vyuma muka natushimutwila muchihande nachikavangizaho?

¹⁷ Tunalinangula nge tunahase kukundwiza kulinunga chavaka-Kulishitu mujijila jino jitatu: (1) Twafwelela ngwetu Wangana waKalunga ukiko kaha naukolola vyuma, (2) katwasaka kwazana muvihande vyamapolitikiko, kaha (3) katweshi kulinga ulyanyiko. Chipwe ngocho, lwola lumwe tunahase kuputuka kulimona ulumbi navandumbwetu. Shikaho chihande nachikavangizaho nachitukafwa mwakukumishila ukalu kana, ngana muze valingile vaka-Kulishitu vamulikulukaji lyamyaka lyakulivanga.