1. Vyuma muka vize kaposetolo Paulu ahuhumwine vaka-Kulishitu vawavisa?

KAPOSETOLO PAULU asonekele ngwenyi: “Kanda namwitavila katwamino kamyaka yino kamyalumuneko.” (Loma 12:2) Paulu asonekele mazu awa kuli vaka-Kulishitu vamulikulukaji lyamyaka lyakulivanga. Mwomwo ika Paulu ahuhumwinyine vaka-Kulishitu mujila kaneyi okunyi vapwile vakulihana kuli Kalunga kaha nawa vakuwavisa nashipilitu yajila?—Loma 1:7.

2-3. Uno Satana eji kutuhungumwisanga ngachilihi mangana tufume kuli Yehova, kaha tunahase kufumisa ngachilihi vyuma vyavipi “vize vyazama chikuma” muvishinganyeka vyetu?

² Paulu alizakaminyine mwomwo vaka-Kulishitu vamwe vavahungumwishile navilinga vyavipi vyamukaye kaSatana. (Efwe. 4:17-19) Chuma kana chinahase kusoloka nakuli etu. Satana uze apwa kalunga wakatwamino kamyaka yino, eji kuzachisanga jijila jajivulu mangana atuhungumwise tufume kuli Yehova. Jila yimwe eji kuzachisanga shina kutulingisa tumone vyuma vize twafwila etu vavene kupwa vyavilemu chikuma. Satana nahase kutuhungumwisa kuzachisa vyuma vyakufwana nge visemwa vyetu, nachiyoyelo chetu, nachinyingi tunalinangula chipwe uhashi twatwama nawo.

³ Uno chapwa chachashi kufumisa vyuma vize “vyazama chikuma” muvishinganyeka vyetu tahi? (Koli. 2, 10:4) Paulu akumbulwile ngwenyi: “Tweji kukatumunanga vishinganyeka vyavo, navyuma vyosena vyakuzezuka helu vyakuzungisa chinyingi  chaKalunga, kaha tuli nakutwalanga vishinganyeka vyosena muufunge mangana vyononokenga kuli Kulishitu.” (Koli. 2, 10:5) Chikupu vene, Yehova nahase kutukafwa mangana tumbile vishinganyeka vyavipi vize tunahase kupwa navyo. Ngana muze vitumbo vinahase kufwomona ulembe, naMazu aKalunga anahase kutukafwa mangana tufungulule vilinga vyavipi vyamukaye kano kaSatana.

4. Vyuma muka twalumwineko mukuyoya chetu omu twalinangwile muchano?

⁴ Shinganyekenu vyuma mwalumwineko mukuyoya chenu omu mwalinangwile muchano nakulisuula mangana muzachile Yehova. Etu vamwe twasezele vilinga vyavipi vize twapwilenga navyo. (Koli. 1, 6:9-11) Chikupu vene, twasakwilila Yehova hakutukafwa mangana tuseze vilinga kanevi.

5. Kweseka namazu ahali Wavaka-Loma 12:2, vyuma muka vivali vize vatulweza kulinga?

⁵ Katwatela kushinganyeka ngwetu kwalumunako vyuma vimwe mukuyoya chetu chatwama noho chakuminako. Numba tuhu katweshi nakulinga shili yayinene yize twalingilenga shimbu kanda vatumbapachiseko, oloze twatela kutwalaho lika kukilikita nakulihenda kuvyuma vize vinahase kutulingisa mangana tukindulukile kuvilinga vyavipi vize twalingilenga kunyima. Uno tunahase kulinga ngachilihi ngocho? Paulu ambile ngwenyi: “Kanda namwitavila katwamino kamyaka yino kamyalumuneko, oloze alumukenu hakulingisa vishinganyeka vyenu kupwa vyavihya.” (Loma 12:2) Shikaho twatela kulinga vyuma vino vivali. Chatete, katwatela ‘kwitavila vatwalumune,’ chipwe kutufungulula kukaye kanoko. Chamuchivali, twatela ‘kwalumuka’ hakulingisa vishinganyeka vyetu kupwa vyavihya.

6. Kweseka namazu ahanjikile Yesu hali Mateu 12:43-45, vyuma muka natulinangulako?

⁶ Kwalumuka apwile nakuvuluka Paulu, kachalumbununa kaha kwalumuna solokeso yetuko. Oloze chalumbununa kwalumuka muvyuma vyosena. (Talenu lipwata lyakwamba ngwavo “Uno Mwalumuka Tahi, Nyi Mwalyonga?”) Twatela chikupu kwalumuna vishinganyeka vyetu, navilinga vyetu navyuma  twafwila. Shikaho tuvosena twatela kulihulisa ngwetu, ‘Uno vyuma nguli nakwalumunako mukuyoya chami mangana ngupwenga ngumuka-Kulishitu, nguli nakuvisolola kaha kumeso avatu tahi, nyi nguli nakwalumuna omu ngwapwa mumuchima?’ Chapwa chamwaza kwalumunako vilinga vyetu. Yesu atulweza vyuma vize twatela kulinga hali Mateu 12:43-45. (Tangenu.) Mazu kana atunangula chishina chino chachilemu: Kachasakiwa kaha kufumisa vishinganyeka vyavipi mumichima yetuko, oloze chasakiwa nawa kuvishishisa navishinganyeka vize etavila Kalunga.

7. Uno tunahase kwalumuna ngachilihi vishinganyeka vyamichima yetu?

⁷ Uno chapwa chachashi kwalumuna vyuma twafwila chipwe omu twapwa muvishinganyeka vyamichima yetu tahi? Mazu aKalunga amba ngwawo: “Pwenunga lika muvavahya muvishinganyeka vyamichima yenu, kaha nawa vwalenu mutu wamuhya uze vatengele kweseka nomu mwaya muchima waKalunga namukwoloka chamuchano namukushishika.” (Efwe. 4:23, 24) Chikupu vene tunahase kwalumunako omu twapwa mumichima yetu, oloze chuma kana kachapwa chachashiko. Mwomwo chasakiwa kwalumuka ‘muvishinganyeka vyamichima yetu’ keshi kukumina kaha hakuhonesa vishinganyeka navilinga vyavipiko. Kaha nawa twatela kwalumunako vyuma twafwila najitato twatwama najo, novyo vyeji kutulingisa tulinge vyuma vimwe. Kulinga vyuma kana chasakiwa kuzata nangolo.

8-9. Chakutalilaho chayou ndumbwetu chinasolola ngachilihi ovyo chapwila chachilemu kwalumuna vishinganyeka vyamuchima wetu?

⁸ Tushimutwilenu hali ndumbwetu walunga uze apwilenga chilyanyi navilinga vyeka vyavipi. Ou ndumbwetu apwilenga muka-kuzunga kaha nawa chitakwa, jino omu echele vilinga kanevi vamumbapachishile. Kaha vatu muchitungilo valikomokelele chikuma hakumumona nalumuka nakuseza vilinga vyenyi vyavipi. Oloze likumbi limwe nachingoloshi apwile mucheseko. Lunga umwe uze apendele ejile kuzuvo yenyi mangana ngwenyi vazunge. Hakavanga ou ndumbwetu kasakile kuzungako, oloze omu ahanjikile mazu amapi akusaula lijina lyaYehova, ndumbwetu apihililile chikuma, ngocho amuvetele. Mwomwo ika ou ndumbwetu alingililile chuma kana? Numba tuhu kulinangula Mbimbiliya chamulingishile aseze vilinga vyavipi, oloze kalumwine vishinganyeka vyamuchima wenyiko.

⁹ Chipwe ngocho ou ndumbwetu atwalileho lika kwalumunako vilinga vyenyi. (Vishi. 24:16) Kaha tulama nawa vamukafwile atwaleho lika kuzovoloka kushipilitu. Kutwala muze vamutongwele kupwa kalama. Likumbi limwe nachingoloshi, omu vapwile haZuvo yaWangana, ou ndumbwetu apwile cheka mucheseko ngana chize apwilemo hakavanga. Kwejile lunga wakupenda, kaha asakile kuveta kalama umwe haze haZuvo yaWangana. Vyuma muka alingile ou ndumbwetu hakumona mukwavo kalama vali nakusaka kumuveta? Akafwile ou muka-kupenda nakuhanjika nenyi mujila yakuunda, nakumushinjikiza ayenga kwimbo lyenyi. Mwomwo ika ou ndumbwetu ahonene kuzunga halwola kanelu? Ou ndumbwetu alumwine vishinganyeka vyamuchima wenyi, navilinga vyenyi, nakupwa jino mutu wakuunda kaha nawa wakulinyisa. Kahechi chanehele kavumbi hali Yehova.

10. Chuma muka twatela kulinga numba twalumune vishinganyeka vyamichima yetu?

¹⁰ Katweshi kuhasa kwalumuna vishinganyeka vyamichima yetu mulikumbi lyangongoko. Oloze twatela ‘kuzata chikuma nangolo hamyaka yayivulu.’ (Petu. 2, 1:5) Kwalumuna vishinganyeka vyamuchima kachapendamina nawa hatando tunatwame “mumuchano[ko].” Chasakiwa kuzata nangolo hakusaka twalumune vishinganyeka vyetu. Kuli jijila jajivulu jize jinahase kutukafwa tulinge ngocho. Tushimutwilenuko hajijila jimwe.

11. Uno kulomba nachitukafwa ngachilihi mangana twalumune vishinganyeka vyamichima yetu?

¹¹ Jila yatete shina Kulomba. Twatela kulomba ngana muze alombele muka-kwimba jisamu uze asonekele ngwenyi: “Ove Kalunga, tenga muchima utoma muli ami, haka shipilitu yayihya yakuzama mbe muli ami.” (Samu 51:10) Twatela kumona ngwetu chapwa chachilemu kwalumuna vishinganyeka vyamichima yetu nakulomba Yehova atukafwe. Chuma muka chinahase kutulingisa tufwelele ngwetu Yehova mwatukafwa? Chuma nachitukafwa shina kushinganyeka hamazu aze Yehova ashikile vaIsalele vakukakama michima vaze vayoyelele mulwola lwaEzekele. Avashikile ngwenyi: “Nangukamilingisa mukalinunge hamwe, kaha nangukahaka nawa shipilitu yayihya muli enu . . . nakumihana muchima wauvwovu nge nyama, [kulumbununa, muchima wakusaka Kalunga avatwaminyine].” (Ezeke. 11:19 kwinyikila chamwishi) Yehova afwililile kukafwa vaIsalele valumuke, kaha ali nakufwila kutukafwa nayetu nawa.

12-13. (a) Twatela kushinganyeka havyuma muka kweseka namazu ahali Samu 119:59? (b) Vihula muka vize mutu himutu atela kulihulisa?

¹² Jila yamuchivali shina kushinganyeka. Omu natutanganga Mazu aKalunga hakumbi hakumbi, twatela kushinganyekanga nakuhunanana havyuma natutanga, mangana tumone vilinga vimwe vize twatela kwalumunako mukuyoya chetu. (Tangenu Samu 119:59; Hepe. 4:12; Yako. 1:25) Twatela kulikekesa tumone numba nge tuli navishinganyeka vyakukaye. Kufumaho, twatela kwitavila tutenga twetu nakutuseza, nakuzata nangolo mangana tuhonese tutenga kana.

¹³ Chakutalilaho, lihulisenu ngwenu: ‘Kutala ngweji kwivwilanga vakwetu lushiushiu chipwe lwiso tahi?’ (Petu. 1, 2:1) ‘Uno ngweji kulivwimbanga mwomwo yachiyoyelo chami, chipwe mwomwo yachinyingi naluheto ngwatwama navyo tahi?’ (Vishi. 16:5) ‘Kutala ngwamona vakwetu vaze kavatwama navyuma vize ngwatwama navyo yami chipwe vaze vafuma kuchisemwa cheka kupwa vamokomoko tahi?’ (Yako. 2:2-4) ‘Uno ngweji kumonanga vyuma vyamukaye kaSatana kupwa vyamwaza tahi?’ (Yowa. 1, 2:15-17) ‘Kutala ngwazanga kuhemahema chize chakundwiza vilinga vyaujila naukenya tahi?’ (Samu 97:10; 101:3; Amo. 5:15) Jila mwakumbulwilamo mutu himutu vihula kanevi nayimukafwa amone vyuma vize atela kwalumunako mukuyoya chenyi. Kachi nge natufumisa vyuma vize vyasoloka nge “vyazama chikuma” mumichima yetu, kaha natwivwisa Setu wamwilu Yehova kuwaha.—Samu 19:14.

14. Mwomwo ika chapwila chachilemu kupwanga namasepa vamwenemwene?

¹⁴ Jila yamuchitatu shina kupwa namasepa vamwenemwene. Twatela kutachikiza ngwetu masepa jetu veji kwalumunanga vilinga vyetu. (Vishi. 13:20) Vatu vaze tweji kupwanga navo kushikola chipwe kumilimo vanahase kutulingisa tupwenga navilinga vize ahunga Kalunga. Oloze tunahase kuwana masepa vamwenemwene kukukunguluka chetu chavaka-Kulishitu, mwomwo kukiko tunahase kuwana vatu vaze vanahase kutukolezeza tusolole “zangi navilinga vyamwenemwene.”—Hepe. 10:24, 25.

15-16. Uno Satana afwila kwalumuna ngachilihi vishinganyeka vyetu?

¹⁵ Anukenu ngwenu Satana afwila kwalumuna vishinganyeka vyetu. Eji kuzachisanga kunangula chamukaye mangana atufungulule tuseze muchano wamuMazu aKalunga uze twatachikiza.

¹⁶ Satana achili lika nakuhulisa chihula chize ahulishile Eve mulitepa lyaEtene ngwenyi: “Uno Kalunga nambe chikupu ngwenyi . . . ?” (Kupu. 3:1) Mukaye kano kaSatana, vatu vavavulu veji kuhulisanga vihula vize vinahase kutulingisa tuhuhwasane vyuma twafwelela, vyakufwana nge: ‘Uno Kalunga nambe chikupu ngwenyi chapwa chakuhenga  kulimbata namutu wausonyi woumwe tahi? Uno Kalunga nambe chikupu ngwenyi chapwa chakuhenga kwazana muvilika vyaKulisimasi navyamakumbi akusemuka tahi? Uno Kalunga nambe chikupu ngwenyi chapwa chakuhenga kwitavila kumihaka manyinga tahi? Uno Kalunga wazangi nambe chikupu ngwenyi kamwatela kulikata namutu uze vafumisa muchikungulwiloko tahi?’

17. Vyuma muka twatela kulinga kachi nge navatuhulisa vihula vize navitulingisa tuhuhwasane vyuma twafwelela, kaha mukanda Wavaka-Kolose 2:6, 7 wasolola vyuma muka?

¹⁷ Twatela kukunyuka havyuma twafwelela. Kachi nge katweshi kuwana mwakukumbulwila vihula vize vyahanjika havyuma twafwelelako, kaha tunahase kuputuka kuhuhwasana numba nge vyuma twafwelela vyamuchano nyi chiku. Echi chinahase kwenyeka vishinganyeka vyetu nakuzeyesa lufwelelo lwetu. Vyuma muka twatela kulinga? Mazu aKalunga atulweza kwalumuna vishinganyeka vyetu mangana tutachikize kanawa “mwaya muchima waKalunga, [ngwetu] mwamwaza, mukiko vetavila, kaha mwakukupuka.” (Loma 12:2) Kachi nge natutwalaho lika kulinangulanga mazu aKalunga, kaha nachitukafwa tufwelele muchano wamuMbimbiliya, nakumona ngwetu jindongi jaYehova japwa jakwoloka. Ngana mwamutondo ukwechi miji yakuzama, nayetu natupwa ‘vakuzama mbe mulufwelelo.’—Tangenu Wavaka-Kolose 2:6, 7.

18. Vyuma muka navitukafwa tuhonese makuli amukaye kano kaSatana?

¹⁸ Kakweshi mutu weka mwahasa kuzamisa lufwelelo lwenuko. Shikaho twalenuho lika kwalumuna vishinganyeka vyamichima yenu. Lombenunga shimbu yosena, nakulembelela shipilitu yaYehova yimitwaminyine. Shinganyekenunga havyuma namutanga, nakutwalaho lika kukekesa vishinganyeka vyenu navyuma mwafwila mukuyoya chenu. Fwilenu kupwa namasepa vamwenemwene vaze navamikafwa mupwenga navilinga vyamwaza. Kulinga ngocho nachimikafwa mulikinge enu vavene kumakuli amukaye kano kaSatana nakumikafwa ‘mukatumune vishinganyeka vyakuhenga, navyuma vyosena vyakuzezuka helu vize vyakuzungisa chinyingi chaKalunga.’—Koli. 2, 10:5.