CHIHANDE CHAKULINANGULA 25
Pendaminenunga Hali Yehova Nge Munahombo
“Nguli nakulyonyinga mumuchima.”—SAMWE. 1, 1:15.
MWASO 30 Tata, Kalunga Kami, Sepa Lyami
VYUMA NATUSHIMUTWILA *
1. Mwomwo ika twatela kwivwilila kukuhuhumuna chaYesu?
YESU apolofwetele kutalisa kumakumbi akukuminyina ngwenyi: “Lilamenunga enu vavene mangana michima yenu yizeneke kulema mwomwo . . . [ya]kulizakamina havyuma vyamukuyoya.” (Luka 21:34) Mwomwo ika twatela kwivwilila kukuhuhumuna kana? Mwomwo nayetu tweji kulitalasananga naukalu ngana uze vali nakumona vatu vosena.
2. Ukalu muka vali nakumona vandumbwetu uze unakuvahombesanga chikuma?
2 Shimbu jimwe ukalu wakulisezaseza weji kutuwananga halwola lwolumwe nakutulingisa tuhombe chikuma. Tushimutwilenu havyakutalilaho vimwe. Ndumbwetu umwe walijina lyaJohn, * uze aviza musongo vavuluka ngwavo multiple sclerosis, ahombele nakulyonyinga chikuma mumuchima omu puwenyi amuchinyine hanyima yakutwama muulo hamyaka 19. Vana venyi vamapwevo vavali nawa vechele kuzachila Yehova. Bob napuwenyi Linda navakiko nawa vapwile muukalu. Vosena vavali vavafumishile hamilimo, ngocho vafumine muzuvo vapwile nakutwama mwomwo chavakaluhwilile kuwana jimbongo jakufwetela zuvo kana. Kaha nawa Linda vamuwanyine namusongo wamuchima namusongo weka uze wazeyeselenga mujimba wenyi.
3. Vyuma muka twatela kufwelela kweseka namazu ahali Wavaka-Fwilipi 4:6, 7?
3 Twafwelela ngwetu Tengi yetu, kaha nawa Setu wazangi Yehova atachikiza kanawa omu tweji kwivwanga kachi nge tunahombo. Kaha afwila kutukafwa mangana tuhonese ukalu tweji kuhitangamo. (Tangenu Wavaka-Fwilipi 4:6, 7.) MuMbimbiliya mwatwama mijimbu yayivulu yize yahanjika hali vangamba jenyi vaze vomikile muukalu wakulisezaseza. Kaha nawa yalumbununa omu Yehova avakafwile halwola vahombele mwomwo yaukalu vahichilemo. Tushimutwilenu havyakutalilaho vimwe.
“ELIJA EVWILENGA NGANOMU TWEJI KWIVWANGA NAYETU”
4. Ukalu muka ahichilemo Elija, kaha Yehova amukafwile ngachilihi?
4 Elija azachililile Yehova mulwola lwalukalu, kaha nawa amwenenga ukalu waunene. Mwangana Ahave, uze valavila hali vamyangana vakuhona kushishika vaze vayulilenga muIsalele, ambachile Yezevele uze alemeselenga Mbale. Ou lunga napuwenyi vazalishile mulifuchi lyosena nakulemesa chaMbale, kaha nawa vajihile vapolofweto jaYehova vavavulu. Oloze Elija achinyine, ayovokele nawa kuzala yakalombolombo hakupendamina hali Yehova. (Vamya. 1, 17:2-4, 14-16) Apendaminyine nawa hali Yehova amukafwe afungulule vapolofweto navaze valemeselenga Mbale. Akolezezele vaIsalele vazachile Yehova. (Vamya. 1, 18:21-24, 36-38) Elija apwile naunjiho wauvulu uze wamulingishile afwelele ngwenyi, Yehova apwile nakumukafwa mulwola lwaukalu omu ahombele.
Yehova atumine kangelo akafwe Elija apwenga nangolo (Talenu palangalafu 5-6) *
5-6. Kweseka namazu ahali Vamyangana 1, 19:1-4, uno Elija evwile ngachilihi, kaha Yehova asolwele ngachilihi ngwenyi amuzangile?
5 Tangenu Vamyangana 1, 19:1-4. Elija evwile woma omu Lisano Yezevele amulwezele ngwenyi mwamujiha. Kaha achinyinyine kuMbele-sheva. Hakuwana nge ahombele chikuma, ngocho “alombele kachi afwenga.” Mwomwo ika? Mwomwo Elija apwile wakuhona kukupuka, kaha “evwilenga nganomu tweji kwivwanga nayetu.” (Yako. 5:17) Atela ahombele chikuma nakwivwa namuvifuwa keke. Chipwe pamo ashinganyekele ngwenyi enyekele kaha ngolo jenyi hakukundwiza kulemesa chamuchano, mwomwo vatu kavalumwine vilinga vyavoko, ngocho chasolokele nge ikiye kaha azachilililenga Yehova. (Vamya. 1, 18:3, 4, 13; 19:10, 14) Tunahase kulikomokela chikuma hakwivwa ou kapolofweto wakushishika mwahanjika vyuma kana. Oloze Yehova amwivwishishile kanawa.
6 Yehova katenukilile Elija hakuhanjika vyuma vyapwile kumuchima wenyiko. Oloze amukafwile akwate cheka ngolo. (Vamya. 1, 19:5-7) Kufumaho, Yehova olwele vishinganyeka vyaElija hakumusolwela ngolo jenyi jakukomwesa. Amulwezele nawa ngwenyi kwapwile vatu vakuheta ku 7,000 muIsalele vaze kavalemeselenga Mbaleko. (Vamya. 1, 19:11-18) Yehova hakukafwa Elija mujila kaneyi asolwele nge amuzangile chikuma.
OMU NAHASE KUTUKAFWILAMO YEHOVA
7. Uno kutachikiza ngwetu Yehova akafwile Elija cheji kutuvendejekanga ngachilihi?
7 Kutala muli nakuhita muukalu uze uli nakumihombesa tahi? Kwijiva ngwetu Yehova atachikijile ukalu apwile nakuhitamo Elija, cheji kutuvendejekanga chikuma. Mwomwo cheji kutukafwanga tumone ngwetu atachikiza ukalu tuli nakumona nayetu makumbi ano. Atachikiza hakumina ngolo jetu, kaha nawa atachikiza vishinganyeka vyetu nomu tweji kwivwanga. (Samu 103:14; 139:3, 4) Shikaho nge natupendaminanga hali Yehova ngana muze alingile Elija, kaha mwatukafwa tumike muukalu uze weji kutuhombesanga.—Samu 55:22.
8. Yehova mwamikafwa ngachilihi nge munahombo?
8 Nge munahombo munahase kushinganyeka ngwenu ukalu wenu kaweshi kukakumako. Kachi nge chili ngocho, kaha anukenu ngwenu Yehova mwamikafwa mulipike naukalu wenu. Uno nahase kumikafwa ngachilihi? Amilweza mulombenga kuli ikiye nakumulweza ukalu wenu wosena, kaha mwakumbulula kulomba chenu. (Samu 5:3; Petu. 1, 5:7) Shikaho, lombenunga kuli Yehova shimbu yosena haukalu muli nakuhitamo. Yehova keshi kuhanjika nayenu ngana muze ahanjikile naElijako, oloze mwahanjika nayenu kuhichila muMazu enyi Mbimbiliya namuliuka lyenyi. Mijimbu mweji kutanganga muMbimbiliya nayimivendejeka nakumihana lutalililo. Kaha nawa vandumbwenu navamivendejeka.—Loma 15:4; Hepe. 10:24, 25.
9. Uno sepa lyetu uze twafwelela nahase kutukafwa ngachilihi?
9 Yehova alwezele Elija ahaneko milimo yimwe kuli Elisha, kulinga ngocho chasolwele nge Yehova azakamine ngamba yenyi hakumuhana mutu wakumukafwako halwola ahombele. Nayetu nawa nge natulwezangako sepa lyetu uze twafwelela ukalu tuli nawo, kaha nahase kutuvendejeka nakutukafwa. (Vamya. 2, 2:2; Vishi. 17:17) Oloze nge kamweshi nenyiko, kaha lombenu kuli Yehova amikafwe muwane muka-Kulishitu wakuhya uze nahase kumikafwa nakumikolezeza.
10. Vyuma ahichilemo Elija vyatukafwa ngachilihi, kaha mazu atwama hamukanda waIsaya 40:28, 29 atukolezeza ngachilihi?
10 Yehova akafwile Elija alipike naukalu wenyi, kahechi chamukafwile azate nakashishi hamyaka yayivulu. Vyuma ahichilemo Elija vyatukafwa nayetu tupwenga nalutalililo. Shimbu jimwe tunahase kupwa muukalu uze nautulingisa tuhombe chikuma nakutuzeyesa kumujimba. Oloze nge natupendamina hali Yehova, kaha mwatuhana ngolo jize najitukafwa tutwaleho lika kumuzachila.—Tangenu Isaya 40:28, 29.
HANA, NANDAVICHI NAMUKA-KWIMBA JISAMU VAPENDAMINYINE HALI YEHOVA
11-13. Uno vangamba jaKalunga vatatu vahombele ngachilihi?
11 MuMbimbiliya vavulukamo navatu veka vaze vahombele chikuma mwomwo yaukalu. Chakutalilaho, Hana kapwile namwanako ngocho vamutolekelenga kuli muhalika wenyi. (Samwe. 1, 1:2, 6) Ukalu kanou ahichilemo Hana wamuhombesele nakumulingisa alile nakuhona kupwa nachipepa chavyakulya.—Samwe. 1, 1:7, 10.
12 Mwangana Ndavichi nayikiye kakavulu ahombelenga. Achishinganyekenu haukalu ahichilemo. Ahombelenga mwomwo yavyuma alimbenjelenga. (Samu 40:12) Mwanenyi Avasalome alikangile kuli ikiye, kutwala muze Avasalome afwile. (Samwe. 2, 15:13, 14; 18:33) Kaha nawa sepa lyaNdavichi wahamuchima amufumbukilile. (Samwe. 2, 16:23–17:2; Samu 55:12-14) Myaso yayivulu embile Ndavichi yasolola kuhomba chenyi nalufwelelo lwakukola apwile nalwo hali Yehova.—Samu 38:5-10; 94:17-19.
Chuma muka chakafwile muka-kwimba jisamu aputuke cheka kuzachila Yehova nakuwahilila? (Talenu palangalafu 13-15) *
13 Muka-kwimba Jisamu nawa evwililile lwiso jila vayoyelelengamo vaka-kuhuka. Chasoloka nge ou muka-kwimba jisamu apwile wakuchisaka chakaLevi Asafwe, kaha azachililenga “muchihela chajila chaKalunga.” Ou lunga ahombelenga chikuma ngocho kapwile wakuwahililako. Kaha aputukile kuhuhwasana numba nge kuzachila Kalunga chikwechi nganyo nyi chiku.—Samu 73:2-5, 7, 12-14, 16, 17, 21.
14-15. Vyuma muka natulinangula kuli vangamba jaYehova vatatu nge tuli muukalu?
14 Ava vangamba jaKalunga vosena tunavuluka vapendaminyine hali Yehova avakafwe. Vamulwezele ukalu wavo kuhichila mukulomba. Vamulwezele hatoma vyuma vyosena vize vyavalingishile vahombe. Kaha nawa vatwalileho lika kuyanga kutembele yaYehova.—Samwe. 1, 1:9, 10; Samu 55:22; 73:17; 122:1.
15 Yehova avevwililile keke nakukumbulula kulomba chavo. Echi chakafwile Hana aunde muchima. (Samwe. 1, 1:18) Kaha nawa Ndavichi asonekele ngwenyi: “Muka-kwoloka eji kumonanga ukalu wauvulu, oloze Yehova eji kumupulululanga muukalu wenyi wosena.” (Samu 34:19) Mukuhita chalwola muka-kwimba jisamu naikiye amwene ngwenyi Yehova ‘amukwachililile kulivoko lyenyi lyachilyo’ hakumukafwa mujila yazangi. Ngocho embile ngwenyi: “Chinapu chamwaza kuli ami kupandama kuli Kalunga. Ngunalingisa Mwata Wakulitulaho Yehova kupwa uchinyino wami.” (Samu 73:23, 24, 28) Vyuma muka tunalinangula kuvatu kana? Shimbu jimwe tweji kupwanga muukalu waunene uze unahase kutuhombesa. Oloze tunahase kupwa vakumika nge natushinganyekanga omu Yehova nakafwenga vakwetu, nakulombanga kuli ikiye, nakumwononokanga hakulinga vyuma mwatulweza.—Samu 143:1, 4-8.
PENDAMINENU HALI YEHOVA NGE MULI MUUKALU
Hakavanga ndumbwetu umwe wapwevo alihandwile kuli vakwavo, oloze vyuma vyalumukile omu afwililile kuwanako jijila jakukafwilamo vakwavo vaze vapwile muukalu (Talenu palangalafu 16-17)
16-17. (a) Mwomwo ika katwatela kulihandula kuli Yehova nakuli vandumbwetuko? (b) Uno tunahase kupwa ngachilihi nangolo?
16 Vyakutalilaho vyavatu vatatu tunashimutwila vinasolola nge katwatela kulihandula kuli Yehova nakuli vandumbwetuko. (Vishi. 18:1) Nancy uze vachinyine kuli lunga lyenyi ambile ngwenyi: “Makumbi amwe kangwasakilenga kuhanjika chipwe kumona kala mutu muliso lyamiko. Oloze kulihandula kuli vakwetu changulingishile nguhombe chikuma.” Vyuma vyalumukile omu Nancy afwililile kuwanako jijila jakukafwilamo vakwavo vaze vapwile muukalu. Ambile ngwenyi: “Ngwevwilililenga kanawa omu vakwetu vangulwezelenga ukalu wavo. Kaha kuvevwila keke changukafwile nguhone kushinganyeka chikuma haukalu wami.”
17 Kukunguluka cheji kutukafwanga tupwenga nangolo. Nge tuli kukukunguluka, Yehova eji ‘kutukafwanga, nakutuvendejeka.’ (Samu 86:17) Kaha nawa kukiko eji kutujikijishilanga kuzachisa shipilitu yenyi yajila, naMazu enyi navatu jenyi. Kukunguluka nawa cheji kutukafwanga “mangana tuhase kulikolezeza” navandumbwetu. (Loma 1:11, 12) Ndumbwetu wapwevo Sophia ambile ngwenyi: “Yehova navandumbwami vangukafwile ngumike. Oloze chuma changukafwile chikuma shina kupwanga kukukunguluka. Kaha nawa kuzata chikuma mumulimo wakwambulula hamwe navandumbwami chinangukafwe ngukeheseko kuhomba nakulizakamina.”
18. Yehova eji kutukafwanga ngachilihi nge tunahombo?
18 Kachi nge tunahombo, kaha twatela kwanuka ngwetu Yehova mwatukafwa, atushika nawa ngwenyi kulutwe mwakafumisako ukalu wosena uze weji kutulingisanga tuhombe. Eji kutujikijisanga nakutuhana “muchima wakufwila kulinga vyuma nangolo” jakumika nge tunahombo.—Fwili. 2:13.
19. Mazu muka akutufwelelesa atwama hali Wavaka-Loma 8:37-39?
19 Tangenu Wavaka-Loma 8:37-39. Kaposetolo Paulu atufwelelesa ngwenyi, kakweshi chuma numba chimwe chinahase kutuhandununa kuzangi yaKalungako. Uno tunahase kukafwa ngachilihi vandumbwetu vaze vanahombo? Chihande nachikavangizaho nachisolola omu tunahase kulondezeza Yehova hakusolwela vandumbwetu keke nakuvakafwa nge vanahombo.
MWASO 44 Kulomba chaMutu Wakukalikiza
^ par. 5 Kachi nge natuhombanga halwola lwalusuku, kaha chinahase kutunehela ukalu kumujimba namuvishinganyeka. Uno Yehova nahase kutukafwa ngachilihi? Natushimutwila tumone omu Yehova akafwile Elija uze ahombele. Natushimutwila nawa vyakutalilaho vikwavo vyamuMbimbiliya vize navitukafwa tupendaminenga hali Yehova nge tunahombo.
^ par. 2 Majina ali muno muchihande vanawalumuna.
