SATANA asaka tulitwamine kuzachila Yehova. Hakusaka atesemo kulinga chuma kana, eji kutuhungumwisanga tushinganyeke mujila yakuhenga mangana tulinge vyuma asaka. Satana afwila kutwonga chipwe kutuhungumwisa navyuma twasaka.—Tangenu Wavaka-Kolose 2:4, 8.

2-3. (a) Mwomwo ika mazu akuhuhumuna atwama hali Wavaka-Kolose 2:8 apwila amalemu chikumanyi kuli etu? (b) Vyuma muka natushimutwila muchihande chino?

² Uno chikupu vene tuli muponde yakutuhungumwisa kuli Satana tahi? Eyo, tuli muponde chikupu. Anukenu ngwenu, omu Paulu asonekele mukanda Wavaka-Kolose 2:8, kapwile nakuhuhumuna vatu vaze kavapwile vaka-kwitavako. Apwile nakusonekela vaka-Kulishitu vaze vapwile vakuwavisa nashipilitu yajila. (Kolo. 1:2, 5) Vaka-Kulishitu kanava vapwile muukalu, olozenyi makumbi ano, etu yetu tuli muukalu waunene chikuma. (Koli. 1, 10:12) Mwomwo ika? Mwomwo Satana vamumbila lyehi hano hamavu, kaha ali nakufwila kuhungumwisa vangamba jaKalunga vakushishika. (Kuso. 12:9, 12, 17) Kaha nawa mwomwo tuli nakuyoyela mulwola luze vatu vakuhuka navaka-kuhungumwisa vakwavo “navayanga nakupihilako lika.”—Chimo. 2, 3:1, 13.

³ Muchihande chino natushimutwila omu Satana eji kuzachisanga “kutangisa chamokomoko” mangana atuhungumwise hakushinganyeka vyuma vyakuhenga. Natushimutwila nawa ‘tufuta’ chipwe jijila jitatu jize eji kuzachisanga. (Efwe. 6:11) Kaha chihande nachikavangizaho nachihanjika  omu tunahase kwalumuna vishinganyeka vyakuhenga vize tunahase kupwa navyo mwomwo yatufuta twenyi. Tuchivangilenu kushimutwila jijila azachishile Satana mangana ahungumwise vaIsalele omu valingile hivanengila lyehi muLifuchi lyaLushiko, nakumona vyuma natulinangulako.

4-6. Kweseka namukanda waLushimbi lwamuchivali 11:10-15, jijila muka jakuliminamo jize valumwineko vaIsalele omu vatwamine muLifuchi lyaLushiko?

⁴ Satana ahungumwishile vaIsalele mujila yakuzangama mangana valemese makombelo. Avahungumwishile ngachilihi? Satana atachikijile ngwenyi vaIsalele vasakiwile vyakulya, ngocho awanyine kengililo hachuma kana mangana valinge vyuma asakile. Omu vaIsalele valingile hivanatwame lyehi muLifuchi lyaLushiko, valumwine jijila jakuliminamo jimbuto javo. Halwola vapwile muEjipitu, jimbuto javo valiminenga valingilenga jakutukumwina nameya akufuma mukalwiji Nyile. Oloze muLifuchi lyaLushiko, jimbuto javo valiminenga jakolelenga navula nalyume mwomwo mulifuchi kana kamwapwile kalwiji wamuneneko. (Tangenu Lushimbi lwamuchivali 11:10-15; Isa. 18:4, 5) Shikaho, echi chikiko chalingishile valinangule jijila jajihya jakuliminamo. Kulinangula jijila kana kachapwile chachashiko, mwomwo vaIsalele vavavulu vaze vapwile vakuluwa muunjimi vafwililile mupambo.

⁵ Yehova alumbunwinyine vatu jenyi kwalumuka kanechi. Kufumaho, avahuhumwine ngwenyi: “Lilamenunga kuchina michima yenu nayikamizondola nakumihungumwisa, kaha namukaputuka kulemesa tulunga veka nakulifukula kuli vakiko.” (Lushi. 11:16, 17) Mazu kana asolokele nge kawapandamine kuunjimiko. Mwomwo ika Yehova ahuhumwine vatu jenyi valihende kukulemesa tulunga veka okunyi apwile nakuhanjika chihande chakulinangula jijila jajihya jakuliminamo?

 ⁶ Yehova atachikijile ngwenyi vaIsalele vanahase kukavahungumwisa kuvatu vaze valemeselenga tulunga vamakuli mangana vakalinangule jijila jakuliminamo. Vatu vaze valemeselenga tulunga vamakuli, vapwile vakuluwa muunjimi nakulingisa vatu jaKalunga valinangule kuli vakiko, olozenyi vapwile muponde yakuvahungumwisa. Vanjimi vamuKanane valemeselenga chikuma Mbale. Vamwene Mbale kupwa ikiye mwenya lilu, kaha nawa muka-kuhana vula. Yehova kasakile vatu jenyi vafwelele vyuma kanevi vyamakuliko. Oloze vaIsalele vaputukile kulemesa Mbale mapapa kakavulu. (Kula. 25:3, 5; Kuyu. 2:13; Vamya. 1, 18:18) Tushimutwilenu jino tumone omu Satana atwalile vaIsalele muundungo.

7. Cheseko muka vahichilemo vaIsalele omu vapwile muLifuchi lyaLushiko?

⁷ Jila yatete, Satana azachishile vyuma vize vamona vatu kupwa vyavilemu mukuyoya chavo, vyakufwana nge vula. Kusongo yakakweji waApril swi namuSeptember, muLifuchi lyaLushiko kamwanokelenga vula yayinene mwaka himwakako. Kuyoya chavaIsalele nakupwa navyakulya vyavivulu chapendaminyine havula yize yaputukilenga kunoka muji October. Satana ahungumwishile vaIsalele vafwelele ngwavo, kuyoya kanawa nakupwa navyakulya vyavivulu chapendaminyine hakutachikiza jijila jakuliminamo jize vazachishilenga vaka-mafuchi vaze valihachile navo. Vaka-mafuchi kana vafwelelele ngwavo kukavangiza visemwa vimwe chalingishile tulunga twavo vavahane vula. VaIsalele vamwe kavapwile nalufwelelo lwakukolako, ngocho vakundwijile visemwa vize vyavumbikilenga kalunga wamakuli Mbale, mwomwo vamwene ngwavo kulinga chuma kana nachilingisa kuhone kupwa changa chachinene.

8. Jila muka yamuchivali azachishile Satana mangana ahungumwise vaIsalele? Lumbununenu.

⁸ Jila yamuchivali, Satana azachishile ujila mangana ahungumwise vaIsalele. Vaka-mafuchi eka valingilenga ujila mangana valemese tulunga twavo. Vilinga kanevi vyaunyengwe vavilingililenga nahatembele yavo. Kulisavala chavatu vausonyi woumwe navilinga vyeka vyaunyengwe vavimwene kupwa vyakwoloka. (Lushi. 23:17, 18; Vamya. 1, 14:24) Vaka-mafuchi kana vafwelelele ngwavo, visemwa kanevi vyaunyengwe vyalingishilenga tulunga twavo vakisule lifuchi lyavo kupwa nawilo. VaIsalele vavavulu navakiko vaputukile kwazana muvilinga kanevi vyaunyengwe nakuvahungumwisa vazachile tulunga vamakuli. Chikupu vene, vaIsalele vengilile muundungo chipwe ngwetu vavahungumwishile.

9. Kweseka nachisoneka chaHozeya 2:16, 17, uno Satana alingishile ngachilihi vaIsalele vavulyame Yehova?

⁹ Jila yamuchitatu, Satana alingishile vaIsalele vavulyame Yehova. Mumakumbi akapolofweto Yelemiya, Yehova ahanjikile ngwenyi vapolofweto vamakuli valingishile vatu jenyi vavulyame lijina lyenyi “mwomwo yaMbale.” (Yele. 23:27) Vatu jaKalunga vechele kuzachisa lijina lyaYehova nakuzachisa lijina lyaMbale, lize lyalumbununa “Mwenyacho” chipwe “Kaka.” Echi chalingishile vaIsalele vahone kumona chihandwa chapwile hali Yehova naMbale, ngocho visemwa vyaMbale vavifutwile najila yize valemeselelengamo Yehova.—Tangenu Hozeya 2:16, 17 nakwinyikila chamwishi.

10. Jijila muka ali nakuzachisa Satana makumbi ano?

¹⁰ Satana ali nakuzachisa jijila jojimwe namakumbi ano. Ali nakuhungumwisa vatu hakuvalingisa vavulyame Yehova, nakuzanga ujila, kaha nawa eji kuzachisanga vyuma vize vamona kupwa vyavilemu mukuyoya chavo. Tuvangilenu kushimutwila omu Satana anakuhungumwisa vatu hakuvalingisa vavulyame Yehova.

11. Uno Satana nalingisa ngachilihi vatu vavulyame Yehova?

 ¹¹ Satana eji kulingisanga vatu vavulyame Yehova. Omu vafwile tumbaji twaYesu vosena, vatu vaze valivulukilenga ngwavo vaka-Kulishitu, vaputukile kutandakanyisa kunangula chamakuli. (Vili. 20:29, 30; Teso. 2, 2:3) Ava vaka-kusosoloka kulufwelelo, vaputukile kulingisa vatu vavulyame Kalunga wamuchano. Chakutalilaho, vechele kuzachisa lijina lyaKalunga mujiMbimbiliya javo nakuhakamo mazu akufwana nge “Mwata.” Hakufumisa lijina lyaKalunga mujiMbimbiliya nakushishisamo “Mwata,” chalingishile vatu vachiwane kupwa chachikalu kutachikiza chihandwa chatwama hali Yehova “navamyata” veka vavuluka muVisoneka. (Koli. 1, 8:5) Vazachishilenga lizu “Mwata” hakuvuluka Yehova naYesu, ngocho chapwile chachikalu kutachikiza chihandwa chatwama hali Yehova naMwanenyi, nakuhona nawa kutachikiza vihela vyakulihandununa vatwama navyo. (Yowa. 17:3) Echi chalingishile kupwenga kunangula chaTulunga Vatatu, kunangula chize kachatwama muMazu aKalungako. Kunangula kana chalingisa vatu vavavulu vamone ngwavo Kalunga apwa wakukomwesa, nakushinganyeka ngwavo kaveshi kuhasa kumutachikizako. Awa himakuli amanene chikuma.—Vili. 17:27.

12. Kwitava chamakuli chinakundwiza vilinga muka, kaha ukalu muka unafumumo kweseka nomu valumbununa hali Wavaka-Loma 1:28-31?

¹² Satana eji kuzachisanga ujila. Mumakumbi avaIsalele, Satana azachishile kwitava chamakuli mangana ahungumwise vatu valinge ujila. Ali nakulinga mwomumwe namakumbi ano. Kwitava chamakuli cheji kukundwizanga vilinga vyaujila nakuvimona kupwa vyakutamo. Chaluvinda navatu vamwe vaze valivuluka kupwa vaka-kulemesa Kalunga vahumbula jishimbi jakatwamino katoma. Mumukanda uze Kaposetolo Paulu asonekelele vaka-Kulishitu muLoma, avulukilemo ukalu watwama hakuhumbula jishimbi jakatwamino katoma. (Tangenu Wavaka-Loma 1:28-31.) Ujila, kuhakilako vene nakulisavala chavatu vausonyi woumwe vavivulukila havyuma “vize kavyatelamoko.” (Loma 1:24-27, 32; Kuso. 2:20) Ocho kutokwa kana kachi nge natukavangizanga vyuma vyakwoloka vize vatunangula muMbimbiliya!

13. Jila muka yikwavo ali nakuzachisa Satana?

¹³ Satana eji kuzachisanga vyuma vize vamona vatu kupwa vyavilemu mukuyoya chavo. Twafwila kulinangulako milimo yimwe yize nayitukafwa mwakuwanyina vyuma vyakulikafwa navyo etu vavene najitanga jetu.  (Chimo. 1, 5:8) Kakavulu tweji kulinangulanga milimo kana hakuya kumashikola. Oloze twatela kupwa vakuzangama. Mashikola amavulu mumafuchi amwe kawakumina kaha hakunangula vatu milimo yize nayikavakafwa kuwana mwakuyoyelako, oloze eji kunangulanga nawa namangana autu. Vaka-shikola veji kuvakolezezanga vafwelele ngwavo kakwatwama Kalungako, kaha nawa ngwavo Mbimbiliya yapwa yamavokovoko. Veji kuvanangulanga ngwavo, vatu vamangana vatela kufwelela ngwavo vyuma vyalijilile vivene. (Loma 1:21-23) Kunangula kana chalimbalaka ‘namangana aKalunga.’—Koli. 1, 1:19-21; 3:18-20.

14. Uno mangana autu eji kukundwizanga vilinga muka?

¹⁴ Mangana autu kawavumbika jindongi jaKalunga jakwolokako. Kawakundwiza mihako yashipilitu yaKalungako, oloze akundwiza “vilinga vyakumujimba.” (Ngale. 5:19-23) Akundwiza nawa kulivwimba, kahechi cheji kulingisanga vatu vapwenga “vaka-kulizanga vavene.” (Chimo. 2, 3:2-4) Vilinga kana vyalimbalaka navilinga vize valweza vangamba jaKalunga kupwa navyo, vyakufwana nge kulinyisa nakupwa vavavwovu. (Samwe. 2, 22:28) Vaka-Kulishitu vamwe vaze vanayinga kumashikola ahelu vanavalingisanga vaputuke kushinganyeka ngana mwavaka-kaye muchishishisa chakushinganyeka ngana muze eji kushinganyekanga Kalunga. Tushimutwilenu havyuma vinahase kusoloka kachi nge natuhumbula mangana aKalunga.

15-16. Vyuma muka munalinangula kuli ou ndumbwetu havyuma ahichilemo?

¹⁵ Ndumbwetu umwe wapwevo uze nazatenga mulimo washimbu yosena hamyaka 15, ambile ngwenyi: “Vyuma ngwevwilenga nakutanga vyangukafwile ngutachikize ukalu vahichilengamo vatu vaze vayilenga kumashikola  ahelu, oloze ngwahumbwile kuhuhumuna kana. Ngwashinganyekele ngwami kangweshi kuhasa kupwa muponde kanako.” Jino ukalu muka amwene? Ambile ngwenyi: “Omu ngwapwilenga kushikola kaneyi ngwahakilenga chikuma mangana kukulinangula chami, kahechi changulingishilenga nguhone kupwa nalwola lwaluvulu lwakulomba, nalwakwazana mumulimo wamuwande nakuliwahisa vyakukunguluka ngana muze ngwalingilenga hakavanga. Jino omu ngwamwene ngwami shikola yahelu yinakwenyeka usoko wami naYehova, kaha ngwechele shikola kana.”

¹⁶ Uno vishinganyeka vyenyi vyalyenyekele ngachilihi hakuya kushikola yahelu? Ambile ngwenyi: “Kuhanjika muchano, shikola kana yangulingishile ngupwenga namuchima wakuwanyina vakwetu tutenga, chikumanyi ngwasakilenga vandumbwami valingenga kaha vyuma vize ngwamwene yami kupwa vyakwoloka, kaha nawa ngwalihandwilenga kuli vakiko. Chambachile lwola numba ngwalumune kanawa vishinganyeka vyami. Vyuma ngwahichilemo vyangukafwile ngumone ponde yinahase kufuma hakuhumbula jindongi ali nakutuhana Setu wamwilu kuhichila muliuka lyenyi. Yehova angutachikijile kanawa kuhambakanomu ngwalitachikijile ami yavene. Nge ngwevwililile kachi kangwamwene ukalu kanako.

17. (a) Vyuma muka twatela kufwila kulinga? (b) Vyuma muka natushimutwila muchihande chinakavangizaho?

¹⁷ Kanda namwitavila vamitwale muundungo ‘namangana autu, nakutangisa chamokomoko’ chamukaye kaSatanako. Kanda kwechelela Satana amihungumwiseko. (Koli. 1, 3:18; Koli. 2, 2:11) Satana katela kumyonga mangana muvulyame Yehovako. Mwatela kukavangiza jindongi jaYehova jakwoloka. Kanda namwechelela Satana amyonge mangana muhumbule kuhuhumuna chakuli Yehovako. Vyuma muka mwatela kulinga kachi nge munamono ngwenu muli navishinganyeka vyavaka-kaye? Chihande chinakavangizaho nachitukafwa tumone omu mazu aKalunga anahase kutukafwa kukatumuna vishinganyeka navilinga “vize vyazama chikuma.”—Koli. 2, 10:4, 5.