CHIHANDE CHAKULINANGULA 26
“Kindulukenu Kuli Ami”
“Kindulukenu kuli ami, kaha ami nawa nangukinduluka kuli enu.”—MALA. 3:7.
MWASO 102 ‘Kafwenunga Vaze Vazeya’
VYUMA NATUSHIMUTWILA *
1. Yehova eji kwivwanga ngachilihi hakumona mukoko mwakinduluka kuli ikiye?
NGANA MUZE twashimutwilanga muchihande chinafumuho, Yehova alifwanyisa kukafunga wamwenemwene uze eji kuzakamanga mikoko jenyi. Ngocho eji kutondatondanga vosena vaze veji kulalukanga hautanga. Alwezele vaIsalele vaze vechele kumuzachila ngwenyi: “Kindulukenu kuli ami, kaha ami nawa nangukinduluka kuli enu.” Twatachikiza ngwetu noholili eji kwivwanga mwomumwe, mwomwo ambile ngwenyi: “Kangwalumukako.” (Mala. 3:6, 7) Yesu nawa ambile ngwenyi Yehova navangelo veji kuwahililanga chikuma hakumona ngamba yaYehova umwe mwakinduluka kuli ikiye.—Luka 15:10, 32.
2. Vyuma muka natushimutwila muchihande chino?
2 Tushimutwilenu havifwanyisa vitatu vize ahanjikile Yesu, vize navitulingisa tufwile kukafwa vaze vaneche kuzachila Yehova. Natushimutwila nawa havilinga vize twatela kupwa navyo numba tukafwe mikoko vakujimbala vakinduluke kuli ikiye. Kaha nawa natumona ovyo chapwila chachilemu kukafwa vaze vazeya.
TONDENU LUMBONGO LWACHICHELE LWAKUJIMBALA
3-4. Mwomwo ika uze pwevo vavuluka hali Luka 15:8-10 atondelele chikuma luze lumbongo lwajimbalile?
3 Twatela kuzata nangolo mangana tuwane vatu vaze vali nakusaka kukinduluka kuli Yehova. Muchifwanyisa chize vasoneka mumukanda waMujimbu Wamwaza waLuka, Yesu alumbunwine omwo pwevo umwe atondele lumbongo lwachichele lwandalakima luze ajimbalishile. Mujimbu kana wasolola nge chapwile chachikalu kutonda lumbongo kana.—Tangenu Luka 15:8-10.
4 Yesu alumbunwine ngwenyi uze pwevo awahililile chikuma omu awanyine luze lumbongo lwandalakima. Mumakumbi aYesu, nge pwevo ali nakusomboka, naye amuhanyinenga kafwe jimbongo jachichele 10 halikumbi lyawenga. Chasoloka nge mukiko chapwile nakuli uze pwevo avulukile Yesu. Uze pwevo ashinganyekele ngwenyi pamo lumbongo lwenyi lwaholokelele hamavu. Ngocho ambachile linongo nakuputuka kutondatonda, oloze kalumweneko. Pamo linongo lyenyi kalyamunyikilenga chikuma, mangana amone lumbongo lwenyiko. Kutwala muze ashinganyekele jino kukomba zuvo yosena. Kaha amwene jino lumbongo lwenyi luli nakukejima vyakuvyaku hamavu aze akombele. Evwile jino nakumuchima hwo! Shikaho asanyikile masepa jenyi navaze alihachile navo mangana avalweze ou mujimbu wamwaza.
5. Mwomwo ika chapwila chachikalu kuwana vaze vahanduka kuchikungulwilo?
5 Echi chifwanyisa chaYesu chatunangula nge chasakiwa kukilikita numba mutu awane chuma chize chinajimbala. Shikaho nayetu nawa twatela kukilikita numba tuwane vaze vecha kulikata nachikungulwilo. Pamo hanahichi myaka yayivulu kufuma haze vechele kulikata nayetu. Nyi pamo valukila kuchihela kuze vandumbwetu vakungalila kana kaveshi kuvejivako. Chipwe ngocho, twatela kufwelela ngwetu vamwe vali nakufwila kukinduluka kuli Yehova. Numba tuhu vali nakusaka kuzachila cheka Yehova hamwe kaha navandumbwavo, oloze kuvanga tuvakafwe numba valinge ngocho.
6. Uno vatu vosena muchikungulwilo vanahase kuzata ngachilihi mulimo wakutondatonda vaze vazeya?
6 Veya vatela kwazana mumulimo wakutondatonda vaze vanazeye? Tuvosena muchikungulwilo. Tulama, navapayiniya, navausoko javaze vazeya, navaka-kwambulula vosena vanahase kwazana mumulimo kanou wakutondatonda vaze vajimbala. Kutala muli nasepa lyenu chipwe kausoko uze azeya tahi? Kutala mwawanaho lyehi mutu wakuzeya kushipilitu omu mweji kwambulwilanga kuzuvo hizuvo chipwe kuvihela vyasanga tahi? Mulwezenu ngwenu nge mwasaka kumutambukila, kaha namuwahilila chikuma nakuhana keyala yenyi chipwe nambala yenyi yashinga kuli vakulwane muchikungulwilo.
7. Vyuma muka munalinangula kumazu ahanjikile Thomas uze apwa mukulwane?
7 Vyuma muka vatela kulinga vakulwane muchikungulwilo mangana vawane vatu vaze vali nakusaka kukinduluka kuli Yehova? Ivwenu mazu ahanjikile Thomas * uze apwa mukulwane muchikungulwilo mulifuchi lyaSpain. Nakafwe Vinjiho vakuzomboka kafwe 40 vakinduluke kuli Yehova. Ambile ngwenyi: “Ngweji kuvangilanga kuhulisa vandumbwami vaze vanejiva okwo vatwama vatu vaze vazeya kushipilitu. Chipwe kuvahulisa nge vanahase kwanukako vamwe vaze vecha lyehi kukunguluka. Vandumbwetu vavavulu muchikungulwilo veji kwakulangako kanawa mwomwo veji kumonanga ngwavo navakiko vali nakwazana mumulimo wakutondatonda vaze vajimbala. Kahomu ngweji kutambukilanga vandumbwetu vakuzeya ngweji kuvahulisanga ngwijive omu vali vana vavo navausoko wavo veka. Ava vandumbwetu vamwe vejilenga navana vavo kukukunguluka kaha nawa pamo navana vavo vapwilenga vaka-kwambulula. Shikaho navana kana tunahase kuvakafwa vakinduluke kuli Yehova.”
KINDULWISENU VANA VAYEHOVA VAKUJIMBALA KUCHIKUNGULWILO
8. Uno chisemi wamuchifwanyisa vasoneka hali Luka 15:17-24, atambwile ngachilihi mwanenyi?
8 Vilinga muka twatela kupwa navyo numba tuhase kukafwa vaze vali nakufwila kukinduluka kuli Yehova? Tukekesenu havishina vimwe tunahase kulinangula kuchifwanyisa ahanjikile Yesu kutalisa kuli mwana uze afumine hembo. (Tangenu Luka 15:17-24.) Yesu alumbunwine ngwenyi uze mwana amwene jino ngwenyi alimbenjele, ngocho ashinganyekele kukinduluka kwimbo. Ise amulahililile nakumupakata mukasamba mangana mwanenyi amone ngwenyi amuzanga. Ou mwana evwilenga kukola chikuma kumuchima nakulimona ngwenyi katelemo cheka kumuvuluka ngwavo mwanako. Oloze omu alwezele ise omwo apwile nakwivwa, ise amwivwililile keke. Ise alingile vyuma vize vyasolwele hatoma nge amutambwile kanawa mwanenyi nakumumona kupwa wamulemu keshi nge hindungoko. Hakusaka asolole ngwenyi azangile mwanenyi, amuwahishilile chilika nakumuhana uvwalo wamwaza mwomwo mwana kana apihililile nakwalumuka.
9. Vilinga muka twatela kupwa navyo hakusaka kukafwa vaze vazeya vakinduluke kuli Yehova? (Talenu lipwata lyakwamba ngwavo, “ Mwakukafwila Vaze Vali Nakusaka Kukinduluka Kuli Yehova.”)
9 Yehova apwa ngana mwauze chisemi wamuchifwanyisa tunashimutwila. Azanga chikuma vandumbwetu vaze vazeya kushipilitu, kaha afwila vakinduluke kuli ikiye. Kachi nge natulondezeza Yehova, kaha tunahase kuvakafwa vakinduluke. Hakusaka tulinge ngocho, twatela kupwa namuchima wakutalilila chikoki, nakutetela nazangi. Mwomwo ika twatela kusolwela vilinga kana, kaha tunahase kuvisolola ngachilihi?
10. Mujila muka kutalilila chikoki mutu uze nazeye kushipilitu chinahase kumukafwa akinduluke kuli Yehova?
10 Twatela kupwa namuchima wakutalilila chikoki mwomwo cheji kumbatanga lwola numba mutu akinduluke kuli Yehova. Vandumbwetu vaze vazeyele kushipilitu veji kuhanjikanga ngwavo chuma chavakafwile shina kuvatambukila kuswakumwe kuli vakulwane navandumbwavo veka. Ndumbwetu Nancy wakuAsia asonekele ngwenyi: “Sepa lyami umwe muchikungulwilo ikiye angukafwile chikuma. Anguzangile kwijiva nge nguyayenyi. Angwanukishilenga vyuma vyamwaza twalivwishilenga kuwaha kunyima. Angwivwilililenga kanawa omu ngwamulwezelenga ukalu wami, kaha nawa apwilenga nakungweulula. Chikupu vene apwile sepa wamwenemwene uze angukafwilenga lwola lwosena.”
11. Mwomwo ika twatela kupwa namuchima wakutetela hakusaka kukafwa mutu uze azeya mwomwo yakumuhukanyisa?
11 Kutetela chapwa ngana mwamaji aze veji kuhakanga hambandu mangana yiyoye. Shikaho nge mutu vanamwivwisa kupihya kumuchima cheji kupwanga kwijiva nge vanamutu mbandu kaha hakusaka alikangule, kuvangila vamutetele. Vatu vamwe vazeyele mwomwo yakuvahukanyisa kuli vandumbwavo, shikaho vanahase kupwa lika namatoto nakuvalingisa vahone kukinduluka kuli Yehova. Vamwe vanahase kulivwa nge vavalingile mwamupi chikuma. Vatu vangana vasaka mutu uze mwavevwilila kanawa nakwivwishisa nawa ukalu wavo. (Yako. 1:19) María uze azeyele kushipilitu ambile ngwenyi, “Ngwasakiwile mutu uze mwangwivwilila kanawa nakunguvendejeka nakungweulula nawa.”
12. Hanenu chakutalilaho chize chasolola omwo zangi yaYehova yeji kukafwanga vaze vazeya vakinduluke kuli ikiye.
12 Mbimbiliya yafwanyisa zangi yaYehova yakuzanga vatu jenyi kumukole. Mujila muka? Achishinganyekenu muli nakuvomba hakalungalwiji, kaha mukwenu mwamyashila chuma chize namukwachililako mangana muhone kulondomana. Chikupu vene namumusakwilila chikuma hakumikafwa mujila kana. Chipwe ngocho chize chuma namihane kacheshi kumikafwa muyoye likako, mwomwo meya apwa atuta ngocho hakusaka muyovoke, mwatela kuya nakunyina muwato. Shikaho kwatela kupwa mutu mwamyashila mukole mangana amikoke muyenga kuwato. Yehova ahanjikile hali vaIsalele vaze vechele kumuzachila ngwenyi: “Ngwavakokelenga nalikoji namikole yazangi.” (Hoze. 11:4; kwinyikila chamwishi) Omu mukiko eji kwivwanga nahali vatu vaze valitwamina kumuzachila vaze vanalondomana mumaukalu akulisezaseza. Shikaho Yehova ali nakusaka vatachikize ngwavo avazanga chikuma kaha ali nakufwila vakinduluke kuli ikiye. Kaha Yehova nahase kumizachisa yenu musolole eyi zangi yenyi kuli vakiko.
13. Hanenu chakutalilaho chize chasolola omwo kusolwela likoji vandumbwetu chinahase kuvalingisa vakinduluke kuli Yehova.
13 Chapwa chachilemu kufwelelesanga vaze vazeya ngwetu Yehova avazanga chikuma kaha nayetu twavazanga. Pablo uze twavulukanga muchihande chinafumuho, uze azeyele hamyaka yakuzomboka 30, ambile ngwenyi: “Likumbi limwe omu ngwapwile nakufuma hembo nachimene, ngwaliwanyine nandumbwetu umwe wapwevo wakashinakaji kaha anguhanjikishile mujila yalikoji. Ngwaputukile kulila kwijiva nge mwana wamundende. Kaha ngwamulwezele ngwami chapwile kwijiva nge Yehova ikiye amutumine ezenga nakunguhanjikisa. Aha jino hakiko ngwajinyine kukinduluka kuli Yehova.”
KAFWENU VAZE VAZEYA MUJILA YAZANGI
14. Vyuma muka alingile kafunga wamuchifwanyisa vasoneka hali Luka 15:4, 5, omu awanyine uze mukoko ajimbalile?
14 Twatela kutwalaho lika kukafwanga vaze vazeya. Ngana mwamwana wakujimbala wamuchifwanyisa ahanjikile Yesu, navakiko chinahase kuvakaluhwila kupwa vakukasunuka. Kaha nawa hakuwana nge vanapunga mukaye kaSatana ngocho kavapandamine chikuma kuli Yehova ngana muze vapwile hakavangako. Shikaho twatela kuvakafwa vazamise cheka lufwelelo lwavo. Muchifwanyisa chamukoko wakujimbala, Yesu alumbunwine omu kafunga akulikile uze mukoko hamahye nakumutwala kuutanga. Uze kafunga azachishile lwola lwenyi nangolo jenyi numba awane uze mukoko ajimbalile. Oloze amwene ngwenyi atelelele kumukulika nakumukindulwisa kuutanga, mwomwo uze mukoko kapwile nangolo jakutambukako.—Tangenu Luka 15:4, 5.
15. Tunahase kukafwa ngachilihi vaze vazeya vakinduluke kuli Yehova? (Talenu lipwata lyakwamba ngwavo “ Chinoma Chachilemu Chikuma.”)
15 Hakusaka tukafwe vaze vazeya mangana vajikize cheka kushipilitu, chasakiwa lwola nangolo. Oloze nge natulomba Yehova atuhane shipilitu yenyi nakuzachisa Mazu enyi namikanda vali nakutuhana kuliuka, kaha tunahase kuvakafwa vajikize cheka kushipilitu. (Loma 15:1) Uno tunahase kulinga ngachilihi ngocho? Kalama umwe uze apwa sachitetahundu ambile ngwenyi, “Vaka-kwambulula vavavulu vaze vazeya, vasakiwa kuvanangula cheka Mbimbiliya kachi nge vanakufwila kukinduka kuli Yehova.” * Shikaho nge vanamilweze kunangula muka-kwambulula uze azeya kushipilitu mwatela kuwahilila chikuma hamulimo kana. Kalama youmwe ambile ngwenyi, “Muka-kwambulula uze mwanangula mutu wakuzeya atela kupwa sepa wamwenemwene, kaha nawa mutu uze navafwelela chikuma kuli uze mutu wakuzeya.”
KUWAHILILA MWILU NAHAMAVU
16. Uno twejiva ngachilihi ngwetu vangelo veji kutukafwanga tuwane vaze vazeya?
16 Mijimbu yayivulu yasolola nge vangelo veji kuzachilanga hamwe nayetu hakukafwa vaze vazeya vaze veji kufwilanga kukinduluka kuli Yehova. (Kuso. 14:6) Chakutalilaho, Silvio, wakuEcuador alombele namuchima wenyi wosena mangana ngwenyi akinduluke cheka kuchikungulwilo. Omu apwile nakulomba, evwile vatu navangongomweza kuchikolo. Kaha hakusokolola kuchikolo, awanyineko tulama vavali. Ava tulama vaputukile jino kumukafwa akinduluke kuli Yehova.
17. Kuwaha muka tweji kuwananga hakukafwa vaze vazeya kushipilitu?
17 Kachi nge natukafwa vaze vazeya vakinduluke kuli Yehova kaha natupwa vakuwahilila chikuma. Salvador uze apwa payiniya uze nawa ahaka chikuma mangana kukukafwa vaze vajimbala ambile ngwenyi: “Ngweji kuwahililanga chikuma hakushinganyeka ngwami Yehova nayovola mukoko wenyi kufuma mukaye kaSatana, kaha nawa ngwami ngunazachila hamwe naYehova mumulimo kana. Kahechi cheji kungulingisanga ngusotole masoji.”—Vili. 20:35.
18. Kachi nge mwazeya kushipilitu, chuma muka mwatela kutachikiza?
18 Kachi nge mwecha kulikata navatu jaYehova, tachikizenu ngwenu Yehova hanga amizangila. Kaha ali nakusaka mukinduluke kuli ikiye. Chipwe ngocho kuli vyuma vimwe mwatela kulinga numba mukinduluke kuli Yehova. Oloze ngana mwauze chisemi wamuchifwanyisa ahanjikile Yesu, Yehova ali nakumivandamina mukinduluke kaha mwamitambula nachisambo.
MWASO 103 Tufunga Vapwa Wana
^ par. 5 Yehova ali nakusaka vaze vecha kwambulula chipwe kukunguluka mangana vakinduluke kuli ikiye. Ambile ngwenyi: “Kindulukenu kuli ami.” Kuli vyuma vyavivulu twatela kulinga mangana tuvakafwe vaputuke cheka kumuzachila. Muchihande chino natushimutwila hajijila tunahase kuvakafwilamo mangana vakinduluke kuli ikiye.
^ par. 7 Majina amwe vanawalumuna.
^ par. 15 Vatu vamwe vaze vazeya vanahase kuvakafwa hakuvanangula tupetulu vamwe vamumukanda waMwakutwamina muZangi yaKalunga, kaha veka vananganyala chikuma hakulinangula tupetulu vamwe vamumukanda waPandama Kuli Yehova. Komiti yaMulimo yaChikungulwilo yikiko yinahase kusakula ndumbwetu uze nahase kunangula mutu uze nazeye kushipilitu.
^ par. 68 MAZU AKULUMBUNUNA MUVWIMBIMBI: Vandumbwetu vamalunga vatatu vali nakukafwa ndumbwavo uze ali nakufwila kukinduluka kuli Yehova. Veji kumukafwanga hakushimutwila nenyi, nakumufwelelesa ngwavo vamuzanga, nakumwivwilila kanawa.
