“Omu ngwapwile nakuliveta namusonyami, ngwamukwachile hamiliu nakuputuka kumuchikita. Ngwasakile kumujiha.”—Paul.

“Ngwapihilililenga washi numba hakachuma kakandende chikuma. Kaha cheshocho ngwapwilenga nacho mulivoko ngwachimbililenga hamavu.”—Marco.

Numba tuhu etu vamwe katweshi kuhasa kulinga nganomu valingile ava vatu tunavulukako, oloze tuvosena cheji kutukaluhwilanga kulikanyisa, mwomwo yashili twaswana kuli Alama. (Loma 5:12) Ngana mwaMarco naPaul vaze tunavuluka, navatu vamwe cheji kuvakaluhwilanga chikuma kuunjisa matoto. Vamwe nawa cheji kuvakaluhwilanga kwalumuna vishinganyeka vyavo. Chakutalilaho, veji kushinganyekanga chikuma havyuma vize vyeji kuvevwisanga woma chipwe havyuma vyavipi. Kaha vamwe nawa cheji kuvakaluhwilanga kulikanyisa kulinga ujila, nakunwa wala mujila yayipi chipwe kuzachisa vitumbo mujila yakuhenga.

Vosena vaze veji kuhonanga kwalumuna vishinganyeka vyavo navyuma vafwila navilinga vyavo, veji kwingilanga muukalu. Oloze tunahase kulihenda kuukalu kana. Mujila muka? Hakupwa namuchima wakulikanyisa. Hakusaka tupwenga namuchima kana tuvangilenu kushimutwila havihula vino vitatu: (1) Uno muchima wakulikanyisa wapwa uka? (2) Mwomwo ika muchima kana wapwila waulemu? (3) Kaha vyuma muka twatela kulinga numba tupwenga namuchima kanou uze wapwa ‘muhako washipilitu’? (Ngale. 5:22, 23) Kufumaho natushimutwila havyuma twatela kulinga kachi nge tunahono kupwa namuchima wakulikanyisa.

Mutu uze atwama namuchima wakulikanyisa keshi kulinga kala vyuma naufwila muchima wenyiko. Oloze eji kulikanyisanga kuhanjika chipwe kulinga vyuma vize navivwisa kupihya Kalunga.

Yesu atusela chakutalilaho chakusolola omwo wapwa muchima wakulikanyisa. Mbimbiliya ngwayo: “Omu vapwile nakumutukana, ikiye kavahilwishililenga matukako. Omu apwile nakuyanda, ikiye kavakinjilileko, oloze alihanyine mumavoko ayaUze eji kuyulanga mwakwoloka.” (Petu. 1, 2:23) Asolwele muchima wakulikanyisa omu vatu vamutolekelenga oku vanamusukika hachitondo chakuyanjishila. (Mateu 27:39-44) Ou muchima kana avangilile nawa kuusolola omu vatwamina vamukwitava vaze vamuhungile, vamuhulishilenga vihula vyavivulu mangana vamuwanyine katenga muvyuma ahanjikilenga. (Mateu 22:15-22) Asolwele nawa chikuma muchima wakulikanyisa omu vaYuleya vevwile matoto nakusaka kumwasa malolwa. Muchishishisa chakuvalinga mwamupi, Mbimbiliya ngwayo, “Yesu aswamine, kaha alovokele mutembele.”—Yowa. 8:57-59.

Kutala tunahase kulondezeza Yesu tahi? Eyo, tunahase vene kumulondezeza noho hakumina ngolo jetu. Kaposetolo Petulu asonekele ngwenyi: “Kulishitu nawa ayanjile hali enu, nakumisela chakutalilaho mangana mukavangizenga kanawa mujitambo jenyi.” (Petu. 1, 2:21) Numba tuhu katwakupukako, tunahase kulondezeza mujitambo jaYesu nakusolola muchima wakulikanyisa. Mwomwo ika chapwila chachilemu kulinga ngocho?

Twatela kupwa namuchima wakulikanyisa numba Yehova atwivwile kuwaha. Numba tuhu tunazachilanga Yehova nakashishi hamyaka yayivulu, tunahase kujimbalisa usoko wetu naikiye kachi nge katweshi kupwa namuchima wakulikanyisa muhanjikiso namuvilingako.

Mose apwile “mutu wamuvwovu kuhambakana vatu vosena hamavu.” (Kula. 12:3) Hamyaka yayivulu asolwele muchima wakutalilila chikoki omu vaIsalele vayayavalilenga, oloze kutwala muze ahonene kupwa namuchima wakulikanyisa. Apihililile omu vayayavalile cheka mwomwo yakuhona kupwa nameya. Avatenukilile ngwenyi: “Ivwenu jino, enu vaka-kulikanga! Uno munasake ngwenu tumilowele meya kulilolwa lino nyi?”—Kula. 20:2-11.

Mose ahonene kulikanyisa. Ahonene kutohwesa Yehova hakuvahana meya mujila yakukomwesa. (Samu 106:32, 33) Echi chalingishile Yehova amukanyise kwingila muLifuchi lyaLushiko. (Kula. 20:12) Twafwelela ngwetu Mose aliveyele hakuhona kupwa namuchima wakulikanyisa nakufungulula matoto.—Lushi. 3:23-27.

Chishina muka natulinangulako? Numba tuhu tunashimbula mumuchano, oloze katwatela kuhanjikanga mazu amapi kuli vaze vanatufutwisa kumuchima, chipwe vaze vali nakusakiwa kuvahuhumunako. (Efwe. 4:32; Kolo. 3:12) Omu tweji kushinakajiwanga, lwola lumwe cheji kutukaluhwilanga kupwa namuchima wakutalilila chikoki. Oloze twatela kwanukanga Mose. Katweshi nakusaka kupihisa lijina lyetu lyamwaza lize tunatungu kuli Yehova mwomwo yakuhona kupwa namuchima wakulikanyisa. Vyuma muka twatela kulinga numba tupwenga namuchima kanou waulemu ngana?

Lombenu Kalunga amihane shipilitu yajila. Mwomwo ika? Mwomwo muchima wakulikanyisa wapwa muhako washipilitu yaKalunga, kaha eji kuyihananga kuli vaze navamulombayo. (Luka 11:13) Yehova nahase kutuhana ngolo kuhichila mushipilitu yenyi. (Fwili. 4:13) Nahase kutukafwa nawa tupwenga namihako yikwavo yashipilitu, yakufwana nge zangi, yize nayitukafwa tuzamise muchima wetu wakulikanyisa.—Koli. 1, 13:5.

Lihendenu kuvyuma vize navimihonesa kupwa namuchima wakulikanyisa. Chakutalilaho, kanda kuyanga hajikeyala jimwe jahaInternet chipwe kutalanga vyakuhemahema vize navisolola vilinga vyavipiko. (Efwe. 5:3, 4) Echi chili nakulumbununa nge twatela kulihenda kukala chuma  nachilingisa mutu alinge chuma chachipi. (Vishi. 22:3; Koli. 1, 6:12) Chakutalilaho, nge mutu atachikiza ngwenyi atwama namuchima wakufwila kulinga vyuma vyauvumbi, kaha nahase kulihenda kukutanganga mikanda chipwe kukutalanga jivindiyo jakusolola zangi veji kulisolwelanga vapwevo nalunga.

Pamo chinahase kutukaluhwila kukavangiza awa mazu. Oloze nge natuzata nangolo, kaha Yehova mwatukafwa tupwenga namuchima wakulikanyisa. (Petu. 2, 1:5-8) Mwatukafwa tupwenga namuchima wakulikanyisa muvilinga namuhanjikiso, namuvishinganyeka. Paul naMarco vaze twavulukanga hakavanga valinangwile mwakuhonesela muchima wamatoto. Kaha nawa ndumbwetu weka apwilenga nakupihilila washi nakulikokojwesa navakwavo vanyamutekenya okunyi ali nakutambukisa munyau. Vyuma muka vyamukafwile ambile muchima kana? Ambile ngwenyi: “Ngwalombelenga hakumbi hakumbi. Kaha nawa ngwatangilenga vihande vyamumikanda yetu vize vyahanjika hamuchima wakulikanyisa nakulamina nawa Visoneka mumutwe. Numba tuhu ngunalipiki namuchima kana hamyaka yayivulu, oloze chimene hichimene ngweji kulishikanga namuchima wami ngwami ngwatela kulikanyisa kukwata matoto. Kaha nawa ngweji kulivanganga kuya kumilimo kuchina nangutambuka mulumbushi.”

Lwola lumwe tweji kuhonanga kusolola muchima wakulikanyisa. Ngocho tunahase kwivwa sonyi kulomba kuli Yehova hachuma kana. Oloze halwola kana hakiko twatela kulomba chikuma. Shikaho, twatela kumulomba hahaze vene, mangana atukonekele, nakutukafwa nakumushika nawa ngwetu katweshi kukakindulukilahoko. (Samu 51:9-11) Kanda kushinganyeka ngwenu Yehova keshi kwivwilila omu namumulombako. (Samu 102:17) Kaposetolo Yowano ambile ngwenyi manyinga aMwanaKalunga eji ‘kututomesanga kushili yosena.’ (Yowa. 1, 1:7; 2:1; Samu 86:5) Anukenu ngwenu Yehova alweza vangamba jenyi vakonekelenga vakwavo lwola lwosena. Shikaho twafwelela ngwetu naikiye mwatukonekela.—Mateu 18:21, 22; Kolo. 3:13.

Yehova evwile kupihya omu Mose ahonene kusolola muchima wakulikanyisa halwola vapwile mupambo. Chipwe ngocho amukonekelele. Kaha nawa Mbimbiliya yamba ngwayo Mose apwile mutu walufwelelo lwakukola. (Lushi. 34:10; Hepe. 11:24-28) Numba tuhu Yehova ketavishile Mose kwingila muLifuchi lyaLushikoko, oloze mwakamusangula muPalachise mangana akalivwise kuwaha kuyoya chahaya myaka yosena. Nayetu tunahase kutalilila chiyoyelo kana kachi nge natukilikita mangana tupwenga namuchima wakulikanyisa.—Koli. 1, 9:25.