CHIHANDE CHAKULINANGULA 25
“Nangutondatonda Mikoko Jami”
“Nangutondatonda mikoko jami, kaha nanguvazakamanga ami yivene.”—EZEKE. 34:11.
MWASO 105 “Kalunga Ikiye Zangi”
VYUMA NATUSHIMUTWILA *
1. Yehova alifwana ngachilihi nachisemi wapwevo uze ali nakemba?
YEHOVA ahulishile vatu jenyi vamumakumbi akapolofweto Isaya ngwenyi: “Kutala pwevo nahase kuvulyama mwanenyi wakumavele nyi? . . . Numba nge ava mapwevo navavulyama, oloze ami kangweshi kukakuvulyamako.” (Isa. 49:15) Kakavulu Yehova kalifwanyisa ivene kuli chisemi wapwevoko. Oloze halwola kanelu alifwanyishile kuli chisemi wapwevo. Yehova azachishile chakutalilaho chausoko watwama hali chisemi wapwevo namwanenyi mangana alumbunune ngwenyi azanga chikuma vatu jenyi. Visemi vamapwevo vavavulu vanahase kwitavila mazu ahanjikile ndumbwetu Jasmin uze ambile ngwenyi, “Pwevo uze ali nakemba, eji kuhakanga chikuma mangana kuli mwanenyi nakulizanga nenyi chikuma.”
2. Yehova eji kwivwanga ngachilihi nge mwanenyi umwe mwecha kumuzachila?
2 Yehova eji kumonanga kachi nge mwanenyi umwe mwecha kulikata nachikungulwilo nakwecha nawa kwazana mumulimo wakwambulula. Achishinganyekenu kukola eji kwivwanga kumuchima hakumona vangamba jenyi vavavulu vali nakuzeya * mwaka himwaka.
3. Yehova asaka ika kuli vaze vanazeye kushipilitu?
3 Ava vandumbwetu vamwe veji kukindulukanga cheka kuchikungulwilo, kaha veji kuvatambulanga nachisambo. Yehova asaka vakinduluke kuli ikiye, kahomu mukiko twasaka nayetu. (Petu. 1, 2:25) Uno tunahase kuvakafwa ngachilihi vakinduluke? Shimbu kanda tukumbulule chihula kana, tuvangilenu kushimutwila havyuma vyeji kulingisanga vamwe vechenga kukunguluka nakwazana mumulimo wakwambulula.
MWOMWO IKA VAMWE VEJI KWECHELANGA KUZACHILA YEHOVA?
4. Milimo veji kuzatanga vamwe yeji kuvahakanga muukalu muka?
4 Vamwe veji kwechanga kuzachila Yehova mwomwo yakumona milimo yavo kupwa yayilemu chikuma. Ndumbwetu Hung * wakuAsia ambile ngwenyi, “Ngwahakile chikuma kulutwe milimo yami yakukaye ngwapwile nakuzata, mwomwo ngwashinganyekele ngwami ngunahase kuzachila kanawa Yehova nge nangupwa naluheto. Ngocho ngwaputukile kuzata jiola jajivulu kumilimo. Kufumaho ngwaputukile kuhona kupwanga kukukunguluka nakuheta jino haseteko yakwecha kulikata nachikungulwilo. Chasoloka nge Satana eji kuzachisanga kaye atangule vatu vasosoloke kuli Kalunga chindende chindende.”
5. Ukalu ahichilemo ndumbwetu umwe wamulingishile ahone kulinga ika?
5 Vandumbwetu vavavulu nawa veji kuzeyanga kushipilitu mwomwo yakuhita mumaukalu amavulu. Anne, chisemi wapwevo wakuBritain uze atwama navana vatanu ambile ngwenyi: “Mwanami umwe asemukile nautonji. Mukuhita chalwola mwanami wapwevo vamufumishile muchikungulwilo, kaha mwanami mukwavo aputukile kuviza muwongo. Ngwahombele chikuma nakungulingisa ngwechenga kuyanga kukukunguluka nakuhona kwazana mumulimo wakwambulula. Nakushimbula chiku ngwazeyele kushipilitu.” Tuli nakwivwila keke ndumbwetu Anne natanga yenyi navosena vaze vali nakuhita muukalu wakufwana ngana.
6. Uno kuhona kukavangiza mazu ahali Wavaka-Kolose 3:13, chinahase kulingisa ngachilihi mutu echenga kulikata navatu jaYehova?
6 Tangenu Wavaka-Kolose 3:13. Vangamba jaYehova vamwe veji kuzeyanga mwomwo yakulimbalaka navandumbwavo. Kaposetolo Paulu ejivile ngwenyi, lwola lumwe kunahase kupwa ‘chuma chakutulingisa tuyayavale’ hali ndumbwetu. Pamo ndumbwetu atulingile mwamupi. Shikaho nge katwazangamineko, tunahase kumulamina koko. Matoto anahase kulingisa mutu echenga kulikata navatu jaYehova. Omu mukiko chapwile nakuli ndumbwetu Pablo, wakuSouth America. Ou ndumbwetu vamuvangijikilile ngwavo alingile mulonga washili, kahechi chalingishile vakulwane vamutambule milimo apwile nakuzata muchikungulwilo. Uno alingile ngachilihi? Ambile ngwenyi: “Ngwapihililile chikuma, ngocho ngwaputukile kusosoloka kuchikungulwilo chikoki chikoki.”
7. Ukalu muka eji kupwanga nawo mutu kachi nge chivezu chenyi chili nakumuyanjisa?
7 Vatu vamwe nawa veji kwechanga kuzachila Yehova mwomwo chivezu chavo cheji kuvayanjisanga hashili valingile kunyima nakuvalingisa valivwe nge kavatelemo kuvazanga kuli Kalungako. Numba tuhu mutu wangana apihililile nakwalumuka kaha vamutetelelele, oloze nahase kulivwa nge katelemo kulikata navatu jaKalungako. Omu mukiko evwile nandumbwetu Francisco. Ambile ngwenyi: “Vakulwane vanguhanjikilile mwomwo ngwalingile ujila. Numba tuhu hakavanga ngwayilenga nakukunguluka, oloze kutwala muze ngwahombele nakulivwa nge kangwatelemo kupwa hamwe navatu jaYehovako. Chivezu chami changuyanjishilenga ngocho ngwashinganyekelenga ngwami Yehova kangukonekeleleko. Mukuhita chalwola ngwechele kulikata nachikungulwilo.” Uno mweji kwivwanga ngachilihi hali vandumbwetu vaze vali nakuhita mumaukalu ngana awa tunashimutwila? Kutala mweji kuvevwilanga keke tahi? Nyi Yehova eji kwivwanga ngachilihi?
YEHOVA AZANGA MIKOKO JENYI
Kafunga wakaIsalele azakaminenga chikuma mukoko wakujimbala (Talenu palangalafu 8-9) *
8. Uno Yehova eji kuvulyamanga vatu vaze vaneche kumuzachila tahi? Lumbununenu.
8 Yehova kavulyama vatu vaze vapwilenga nakumuzachilako, vaze vachinalitwamina kulikata navatu jenyi. Kaha nawa kavulyama milimo vamuzachilililengako. (Hepe. 6:10) Kapolofweto Isaya asonekele chakutalilaho chamwaza chize chasolola omwo Yehova eji kuzakamanga vatu jenyi. Asonekele ngwenyi: “Mwakazakamanga utanga wenyi nge muze eji kulinganga kafunga. Mwakakungulula vana vamikoko nalivoko lyenyi, kaha mwakavambachila hatulo yenyi.” (Isa. 40:11) Uno Yehova uze apwa Kafunga Wamunene, eji kwivwanga ngachilihi nge namono mukoko wenyi umwe nahanduka hautanga? Yesu asolwele omu eji kwivwanga Yehova hakulweza tumbaji twenyi ngwenyi: “Munashinganyeka muka? Kachi nge mutu ali namikoko jenyi 100, kaha nahajimbala mukoko umwe, kutala keshi kuseza vaze 99 hajipili nakuya nakutondatonda uze umwe najimbalako nyi? Kachi nge namuwane, chikupu vene nangumilweza ngwami, mwawahilila chikuma hali uze umwe kuhambakana hali vaze 99 vaze kavajimbalileko.”—Mateu 18:12, 13.
9. Uno tufunga vamwenemwene veji kuzakamanga ngachilihi mikoko javo? (Talenu muvwimbimbi wahalipapilo lyahelu.)
9 Mwomwo ika chinapwila chakutamo kufwanyisa Yehova kuli kafunga? Mwomwo tufunga vamwenemwene veji kuzakamanga chikuma mikoko javo. Chakutalilaho, Ndavichi ajihile ndumba naulusu mangana akinge mikoko jenyi. (Samwe. 1, 17:34, 35) Kafunga wamwenemwene eji kutachikizanga numba vene nge mukoko umwe najimbala. (Yowa. 10:3, 14) Kafunga wangana nahase kuseza vaze mikoko 99 mulimba chipwe kuvaseza kuli vakwavo tufunga mangana ayenga nakutonda uze najimbala. Yesu azachishile chakutalilaho kana mangana anangule chishina chachilemu. Ambile ngwenyi: “Tata uze ali mwilu, kasaka kumona umwe hali ava vavandende mwanongako.”—Mateu 18:14.
Kafunga muIsalele yakushikulu ali nakuzakama mukoko uze ajimbalanga (Talenu palangalafu 9)
YEHOVA EJI KUTONDATONDANGA MIKOKO JENYI
10. Kweseka naEzekele 34:11-16, vyuma muka ajinyine Yehova kulinga kuli mikoko jenyi vakujimbala?
10 Yehova atuzanga tuvosena, kuhakilako vene ‘navava vavandende’ vanahanduka hautanga. Ahanjikile kuhichila muli kapolofweto Ezekele ngwenyi, mwatonda mikoko jenyi vakujimbala nakuvakafwa vayoye cheka kushipilitu. Kaha avulukile navyuma ajinyine kulinga mangana ayovole mikoko jenyi, vyuma vize kafunga wamwenemwene muIsalele alingilenga kachi nge mukoko wenyi najimbala. (Tangenu Ezekele 34:11-16.) Chatete, kafunga atondelenga mukoko, kahechi chasakiwilenga lwola nakukilikita chikuma. Kaha nge namuwane, amukindulwishilenga hautanga. Nge namono ngwenyi uze mukoko nalemana chipwe ali nazala, kaha amukashilenga hajimbandu nakumumbata nakumulisa. Omu mukiko vatela kulinga natulama mwomwo veji kufunganga “utanga waKalunga” mangana vakafwe mikoko vaze vanahanduka kuchikungulwilo. (Petu. 1, 5:2, 3) Tulama veji kutondatondanga mikoko kana nakuvakafwa vakinduluke kuutanga nakuvasolwela nawa zangi hakuvakafwa kushipilitu. *
11. Chuma muka atachikijile kafunga wamwenemwene?
11 Kafunga wamwenemwene atachikijile ngwenyi mikoko vanahase kujimbala. Kaha nge mukoko umwe nafumu hautanga, kafunga kamuzangamishilengako. Achitalenu havyuma alingile Kalunga hakukafwa vangamba jenyi vamwe vaze vahandukile nakufuma kuli ikiye halwola lumwe.
12. Yehova alingile vyuma muka kuli Yona?
12 Kapolofweto Yona achinyine kuya nakuzata mulimo amuhanyine Yehova. Chipwe ngocho, Yehova kamuliwileko. Hakupwa kafunga wamwenemwene, amuyowele nakumukafwa cheka omike nakuya nakuzata mulimo amuhanyine. (Yona 2:7; 3:1, 2) Kufumaho, Kalunga azachishile liyango hakusaka kunangula Yona atachikize ngwenyi kuyoya chamutu chapwa chachilemu. (Yona 4:10, 11) Vyuma muka natulinangulako? Tulama kavatela kuliula washi vatu vaze vanazeye kushipilituko. Oloze vatela kutachikiza kanawa chuma chinalingisa mukoko alihandule kuutanga. Kaha vatela kutwalaho kusolola zangi kuli mukoko uze nakinduluka kuli Yehova.
13. Vyuma muka natulinangula kuli Yehova hachuma alingile kuli muka-kusoneka Samu 73?
13 Muka-kusoneka Samu 73 ahombele chikuma omwo apwile nakumona vaka-kuhuka vali nakufukila. Ashinganyekele ngwenyi pamo kuzachila Kalunga chapwile hikulishina kaha. (Samu 73:12, 13, 16) Uno Yehova alingile chuma muka? Kamuhanyine mulongako, oloze etavishile mazu kana vawasoneke muMbimbiliya. Mukuhita chalwola, muka-kwimba jisamu ejile nakutachikiza jino ngwenyi, kupwa nausoko wamwaza naYehova chapwa changanyo. (Samu 73:23, 24, 26, 28) Vyuma muka natulinangulako? Tulama kavatela kuhana washi mulonga vaze vali nakuhuhwasana hanganyo yakuzachila Yehovako. Oloze vatela kufwila kutachikiza chuma chili nakuvalingisa vahuhwasane. Echi nachivakafwa vawane chisoneka chize vanahase kuzachisa mangana vavakolezeze.
14. Mwomwo ika natwambila ngwetu Elija asakiwile kumukafwa, kaha Yehova amukafwile ngachilihi?
14 Kapolofweto Elija achinyine Lisano Yezevele. (Vamya. 1, 19:1-3) Ashinganyekele ngwenyi kakwapwile kapolofweto weka apwile nakuzachila Yehovako, kaha nawa ngwenyi mulimo wenyi wayile mwanganavene. Elija ahombele chikuma, shikaho ambile ngwenyi nakufwa chinawahe. (Vamya. 1, 19:4, 10) Muchishishisa chakumuhana mulonga, Yehova amufwelelesele ngwenyi kapwile uka wenyiko, kaha nawa ngwenyi atelelele kufwelela mungolo jaKalunga, nakumulweza nawa ngwenyi kwapwile milimo yayivulu atelele kuzata. Yehova evwililile vyuma apwile nakuhanjika Elija, kaha amuhanyine milimo yeka yakuzata. (Vamya. 1, 19:11-16, 18) Vyuma muka natulinangulako? Etu tuvosena, chikumanyi tulama, twatela kusolwelanga likoji mikoko jaYehova. Kachi nge mutu napihilila chipwe nashinganyeka ngwenyi Yehova keshi kukamukonekelako, tulama vatela kumwivwilila kanawa omu mwahanjika vyuma vili kumuchima wenyi. Kaha vanahase jino kumukafwa atachikize ngwenyi Yehova amuzanga chikuma.
UNO TWATELA KWIVWA NGACHILIHI HALI MIKOKO JAKALUNGA VAZE VANAJIMBALA?
15. Kweseka naYowano 6:39, Yesu amwene ngachilihi mikoko jaise?
15 Uno Yehova asaka twivwenga ngachilihi hamikoko jenyi vaze vanajimbala? Yesu atuhana chakutalilaho. Atachikijile ngwenyi Yehova amona mikoko jenyi vosena kupwa vavalemu. Echi chikiko chalingishile Yesu afwile kukafwa “mikoko vakujimbala vakuzuvo yaIsalele” vakinduluke kuli Yehova. (Mateu 15:24; Luka 19:9, 10) Hakuwana nge Yesu apwa kafunga wamwenemwene, akilikichile nawa mangana ahone kujimbalisa kala mukoko waYehova.—Tangenu Yowano 6:39.
16-17. Tulama vatela kwivwa ngachilihi hakukafwa vaze vanahanduka? (Talenu lipwata lyakwamba ngwavo, “ Omwo Eji Kwivwanga Mukoko Wakujimbala.”)
16 Kaposetolo Paulu akolezezele tulama vamuchikungulwilo chamuEfwesu valondezeze chakutalilaho chaYesu. Avasonekelele ngwenyi: “[Kafwenu] vaze vazeya, kaha mwatela kwanukanga nawa mazu aMwata Yesu, omu ambile ivene ngwenyi: ‘Kuhana cheji kunehanga kuwahilila chikuma kuhambakana kutambula.’” (Vili. 20:17, 35) Chikupu vene, namakumbi ano tulama vali namulimo wakulipwila wakuzakama vatu jaKalunga. Salvador uze apwa kalama kuSpain ambile ngwenyi: “Kushinganyeka omu Yehova eji kuzakaminangamo mikoko jenyi, cheji kungulingisanga ngukilikite mangana ngukafwe mikoko jenyi. Hakuwana nge ngwapwa ngukafunga wakushipilitu, ngwakunyuka ngwami Yehova ali nakusaka nguzakamenga mikoko jenyi.”
17 Vandumbwetu vosena tunashimutwila muchihande chino vaze vahandukile kuli Yehova vavakafwile vakinduluke cheka. Nayino shimbu nawa, vavavulu vaze vanahanduka vali nakufwila kukinduluka. Chihande chinakavangizaho chinashimutwila kanawa vyuma twatela kulinga mangana tuvakafwe vakinduluke kuli Yehova.
MWASO 139 Shinganyekenu Muli muKaye Kakahya
^ par. 5 Mwomwo ika vatu vamwe vaze vanazachilanga Yehova nakashishi hamyaka yayivulu vanahandukila kuchikungulwilo? Yehova eji kwivwanga ngachilihi havatu kana? Chihande chino nachikumbulula vihula kanevi. Nachihanjika nawa havyuma natulinangula kuli Yehova hakumonomu akafwililemo vatu vamwe kushikulu vaze vahandukile kuli ikiye.
^ par. 2 MAZU VANALUMBUNUNA: Muka-kwambulula wakuzeya apwa uze mwahona kuhana lipoti lyenyi lyamuwande hatukweji 6 chipwe kuhambakanaho. Chipwe ngocho, ava vatu vakuzeya vapwa lika vandumbwetu, kaha nawa twavazanga.
^ par. 4 Majina amwe vanawalumuna.
^ par. 10 Chihande chinakavangizaho chinahanjika hajijila jimwe jize tulama vatela kukavangiza mangana vakafwe mikoko vakujimbala.
^ par. 60 MAZU AKULUMBUNUNA MUVWIMBIMBI: Kafunga wakaIsalele nalizakamina chikuma hali mukoko wenyi uze najimbala, kaha mwaya nakumutonda nakumukindulwisa hautanga. Omu mukiko veji kulinganga natufunga vakushipilitu makumbi ano.
^ par. 64 MAZU AKULUMBUNUNA MUVWIMBIMBI: Omu ndumbwetu wakuzeya ali musacha nakuvandamina yisunuke, himwamona Vinjiho vavali vali nakulivwisa kuwaha kwambulwila kuchihela chasanga.
