TUVOSENA twafwelela ngwetu, Yehova ali nakutetekela vatu jenyi nakuvahana vyakulya vyakushipilitu ‘mumakumbi ano akukuminyina.’ (Chimo. 2, 3:1) Chipwe ngocho, twatela kusakula etu vavene kwononoka Yehova. Makumbi ano nayetu tuli ngana mwavaIsalele omu vapwile mupambo. Vatelelele kwakula kuvivumo vyajineta.

Yehova alwezele Mose afule jineta jivali japalata mangana ajizachisenga “hakusanyika lizavu, nahakukatula vatu muvilombo.” (Kula. 10:2) Vapilishitu vatelelelenga kwimba jineta mujijila jakulisezaseza kweseka navyuma vasakilenga kulweza vatu valinge. (Kula. 10:3-8) Namakumbi ano nawa, vatu jaKalunga veji kutambulanga jindongi mujijila jakulisezaseza. Muchihande chino natushimutwila hajijila jitatu, kaha natwesekesa jijila kana kuvivumo vyajineta vize vyapwileko kushikulu. Natushimutwila omu vatu jaKalunga makumbi ano veji kuvasanyikanga kukukunguluka chachinene, nomu tulama muvikungulwilo veji kuvanangulanga nomu nawa veji kwalumunangako vyuma muvikungulwilo.

Omu Yehova asakilenga “lizavu lyosena” lilikungulwile kumututuko watavanaku, vapilishitu vembilenga jineta josena jivali. (Kula. 10:3) Miyachi yosena yavaIsalele yize yapwilenga mumazavu awana aze ajingilikile tavanaku, yevwilenga chivumo chaluneta kana. Vaze vatwaminenga kwakamwihi nawingililo vakwilengako washi. Kaha veka vatwaminenga kwakusuku shikaho hahichilenga lwola numba vahete kutavanaku. Kala mwoshomwo chapwile, Yehova asakilenga vosena vakunguluke nakunganyala kuvyuma vavasanyikililenga.

Numba tuhu makumbi ano katwakungulukila kutavanakuko, oloze veji kutusanyikanga tukunguluke hamwe navatu jaKalunga. Kukunguluka chimwe tweji kupwanga nacho shina changalila nakukunguluka cheka chakulipwila kuze tweji kutambwilanga jindongi. Vatu jaYehova mukaye kosena veji kulyanga kulya chochimwe chakushipilitu. Shikaho vosena vaze veji kwakulanga kumutambi kana veji kupwanga vakuwahilila. Veka veji kutambukanga jitunda jajisuku kaha vakwavo vatwama mwakamwihi. Chipwe ngocho vosena vaze veji kwizanga veji kumonanga chikupu ngwavo kupwa kukukunguluka kana cheji kuvanganyalisanga chikuma.

Nyi ngachilihi vaze vatwamina kwakusuku chikuma nakuvihela vyakukungulukila chachinene? Kuzovoloka chamakina chili nakukafwa ava vatu mangana navakiko vanganyale kuvyuma kana nakwivwa kwijiva nge navakiko vapwanga hamwe navandumbwavo kuchihela kuze kwapwilanga kukunguluka. Chakutalilaho, omu muka-kwimanyinako chikota atambukilile lifuchi lyaBenin, mutango waBenin wahakile polongalamu kana hapeho mangana vayitale kuli vatu vamulifuchi lyaNiger mumbaka yaArlit yize yatwama halitungu lyaSahara kuze veji kufulanga ndenga. Kaha vatu vakungulukile nakutala polongalamu kana vapwile 21. Numba tuhu vapwile kwakusuku oloze vevwile kwijiva nge vali hamwe navandumbwavo  44,131 vaze vapwile kuchihela kuze kwapwilile polongalamu kana. Ndumbwetu umwe asonekele ngwenyi: “Tunamisakwilila chikuma namichima yetu yosena hakuhaka polongalamu kana hapeho mangana nayetu tuyitale. Echi chinasolola hatoma nge mwatuzanga.”

Omu kapilishitu kavaIsalele embilenga luneta lumwe kaha, ‘vamyata, navatwamina jamakombakaji’ vakiko kaha vayilenga kumbalaka yakuliwanyina. (Kula. 10:4) Vayilenga kumbalaka kana mangana Mose akavanangule nakuvahana jindongi jize javakafwilenga vazate kanawa milimo yavo yamumiyachi yavo. Kachi nge nayenu mwapwile hali vaze vamyata, kutala kachi kamwevwilenga kuwaha kuwanyiwa kuchihela kanako tahi?

Makumbi ano tulama muvikungulwilo kavapwa ngana mwavaze ‘vamyatako,’ kaha nawa kaveshi kulilingisa kupwa vakaka kuutanga uze vavahana kulamako. (Petu. 1, 5:1-3) Oloze veji kukilikitanga nangolo javo josena mangana vafunge utanga. Shikaho veji kwakulanga kumutambi wakuvalweza vayenga nakuvanangula, wakufwana nge kuya nakuvanangula kuShikola yaMulimo waWangana. Halwola lwakufwana ngana, tulama veji kuvanangulanga mwakuzakamina kanawa chikungulwilo. Kahechi cheji kukafwanga vosena muchikungulwilo vazovoloke chikuma kushipilitu. Numba tuhu kanda muyengangaho lyehi kumashikola kana, oloze nayenu pamo muli nakunganyala hakumona omu tulama vali nakuzachishilamo vyuma vavanangwile.

Shimbu jimwe vapilishitu vavaIsalele vembilenga luneta lwachivumo chakulihandununa handununa. Kahechi chalingishilenga vosena vatachikize ngwavo Yehova ali nakusaka chilombo chosena chaluke. (Kula. 10:5, 6) Omu vatu vanungulukililenga kuvilombo vyeka valingilenga ngocho mukulinunga, oloze chasakiwilenga kukilikita chikuma. Shimbu jimwe vaIsalele vamwe kavasakilenga kwalukila kuvihela vyekako. Mwomwo ika?

Pamo vamwe vevwilenga chikela mwomwo ngwavo mutambi wakuvalweza kwaluka wejilenga kuswa kumwe kaha nawa mukukasumuna. Mbimbiliya yamba ngwayo: “Shimbu jimwe lize livwi lyatwaminenga hatavanaku kufuma hakajimbavenyi palanga nakuchimene kaha.” Yamba cheka ngwayo shimbu yikwavo lyatwaminenga “makumbi avali, chipwe kakweji, chipwe tando yayisuku” hatavanaku numba likatuke. (Kula. 9:21, 22) Jino valukile mapapa kangahi? Mumukanda waKulava kapetulu 33 vavulukamo jingalila kafwe 40 muze vaIsalele vatungile vilombo.

Lwola lumwe vaIsalele vamwe vawanyinenga vihela vize vyapwilenga namivule. Kaha valivwishilenga kuwaha kutunga vilombo muvihela vyangana mwomwo vahichilenga “mupambo yayinene yakwivwisa woma.” (Lushi. 1:19) Ngocho pamo vashinganyekelenga ngwavo nge navaluka navakashikishila kuchihela chachipi chikuma.

Kahomu vaputukilenga kwaluka, vamwe chavakaluhwililenga kuvandamina lwola lwavo lwakukatuka. Vosena vevwilenga chivumo chaluneta chakulihandununa handununa, oloze kavakatukilenga nakuya halwola lwolumweko. Omu lwavuminenga elu luneta lwanukishilenga miyachi yize yapwililile kumututuko, yakufwana nge muyachi waYuta, nawaIsakale, nawaZevulune yikatuke nakuya. (Kula. 2:3-7; 10:5, 6) Omu valingile vanakatuka lyehi, vapilishitu vembilenga cheka luze luneta kamuchivali mangana vanukise miyachi yitatu yize yapwililile kusulo yikatuke nakuya. Vapilishitu valingilenga mwomumwe palanga nomu yalingilenga miyachi yosena yinakatuka nakuya.

Pamo cheji kumikaluhwilanga chikuma kukavangiza vyuma vimwe veji kwalumunangako muliuka. Pamo mwashinganyekele ngwenu liuka linasweze chikuma kwalumuna alumuna vyuma. Nyi pamo kuli vyuma vimwe mwapwile nakulivwisa kuwaha vize kamwasakile vyalumukeko. Pamo chamikaluhwilile chikuma kwijilila vyuma vyavihya vize liuka lyahakileko. Chipwe ngocho, kachi nge natwakulanga kanawa kuvyuma vize navyalumukanga kaha natumona ngwetu Yehova ali nakutukisula nakutwivwila nawa uselewa.

Mumakumbi aMose, Yehova atwaminyinyine vatu jenyi vavavulu chikuma omu vapwile nakuhita mupambo. Kachi nge Yehova kavazakamine nakuvatwaminyinako kachi kavahashile kuliyoyelako. Namakumbi ano, Yehova ikiye ali nakututwaminyina mukaye kano kakuhuka numba tuyoye kushipilitu. Shikaho, tuvosena tufwilenu kwakula kuvivumo vyosena vyajineta ngana muze valingilenga vaIsalele vakushishika.