1. Petulu alwezele lizavu lize lyalikungulwilile muYelusalema kulinga vyuma muka?

LIKUMBI limwe, lizavu lyavatu lyalikungulwilile muYelusalema. Vatu kana vafumine kumafuchi akulisezaseza, kaha vahanjikilenga malimi akulisezaseza. Omu valikungulwilile muYelusalema, kwapwile chuma chakulipwila chasolokele. VaYuleya vamwe vaputukile kuhanjika malimi avatu vaze valikungulwile. Numba tuhu chuma kanechi chavakomwesele, oloze mazu ahanjikile kaposetolo Petulu akiko avakomwesele chikuma. Avalwezele ngwenyi nge navafwelela Yesu Kulishitu, kaha navavalwila. Mazu kana ahetele vatu kumichima. Echi chikiko chavalingishile vahulise ngwavo: “Natulinga muka?” Kaha Petulu avakumbulwile ngwenyi: ‘Pihililenu nakwalumuka, kaha navamimbapachisa mutu himutu.’—Vili. 2:37, 38.

2. Vyuma muka natushimutwila muchihande chino? (Talenu muvwimbimbi wahalipapilo lyahelu.)

² Kwasolokele chuma chikwavo chakukomwesa. Halikumbi vene lize, vatu kafwe 3,000 vavambapachishile nakupwa tumbaji twaKulishitu. Aha hakiko haputukilile mulimo wakunangula vatu vapwenga tumbaji, uze Yesu alwezele vaka-kumukavangiza vazatenga. Mulimo kana ukiko tuli nakuzata namakumbi ano. Oloze makumbi ano katweshi kuhasa kunangula mutu nakutamo kumumbapachisa mulikumbi lyangongoko. Hanahase kuhita tukweji chipwe vene myaka numba jino atengamo kumumbapachisa. Chasakiwa kukilikita numba mukafwe mutu atengamo kupwa kambaji kaKulishitu. Muchihande chino, natushimutwila havyuma mwatela kulinga mangana mukafwe vilongesa vyenu vatengamo kuvambapachisa.

3. Kweseka naMateu 28:19, 20, vyuma muka atela kulinga chilongesa mangana atengamo kumumbapachisa?

³ Hakusaka chilongesa chaMbimbiliya atengamo kumumbapachisa, atela kukavangizanga vyuma ali nakulinangula muMbimbiliya. (Tangenu Mateu 28:19, 20.) Nge chilongesa mwakavangiza vyuma ali nakulinangula, kaha mwapwa nge “lunga wakuzangama” uze atungile zuvo yenyi hamalolwa, uze Yesu ahanjikile muchifwanyisa chenyi. (Mateu 7:24, 25; Luka 6:47, 48) Tunahase kukafwa ngachilihi chilongesa akavangizenga vyuma ali nakulinangula? Tushimutwilenu hajijila jitatu tunahase kulingilamo ngocho.

4. Tunahase kukafwa ngachilihi chilongesa azovoloke nakutamo kumumbapachisa? (Talenu nawa lipwata lyakwamba ngwavo “ Kafwenu Chilongesa Chenu Alitomene Vyakulinga Nakuvitesamo.”)

⁴ Kafwenu chilongesa chenu alitomene vyakulinga. Mwomwo ika mwatela kumukafwila? Achitalenu hachakutalilaho chino: Nge munakuya ungeji wausuku nakinga, munahase kwimana nakutala vihela vyamwaza vize namuwana mujila. Echi nachimivwisa kuwaha nakulingisa ungeji kana usoloke nge wawihi. Chochimwe nawa, nge chilongesa mwalitomena kulinga vyuma vize mwatesamo hatando yayindende chinafwane nge nemana nakutala vihela vyamwaza, kaha nachimukafwa atesemo vyuma vize vyasakiwa mangana atengamo kumumbapachisa. Hakusaka kukafwa chilongesa chenu alitomene vyuma vyakulinga, zachisenu lipwata lyakwamba ngwavo “Chuma Watela Kulinga,” lili mumukanda waLivwise Kuwaha Kuyoya Haya Myaka. Kusongo hisongo yachilongesa, shimutwilenu omu lipwata kana linahase kukafwa chilongesa chenu akavangize vyuma ali nakulinangula. Nge munakushinganyekako chuma cheka chize atela kutesamo chilongesa chenu, kaha chisonekenu mulipwata lyakwamba ngwavo “Chuma Cheka.” Shimutwilenunga kuswa kumwe nachilongesa chenu kuzachisa eli lipwata, mangana awane vyuma vize nahase kulitomena nakutesamo hatando yayindende, nahatando yayisuku.

5. Kweseka namazu atwama hali Mako 10:17-22, chuma muka Yesu alwezele lunga umwe muka luheto alinge, kaha mwomwo ika?

 ⁵ Kafwenu chilongesa chenu alumuneko chiyoyelo chenyi. (Tangenu Mako 10:17-22.) Yesu atachikijile ngwenyi chinahase kupwa chachikalu kuli muka-luheto kulanjisa vikumba vyenyi vyosena. (Mako 10:23) Oloze alwezele lunga umwe muka-luheto alanjise luheto lwenyi lwosena. Mwomwo ika? Mwomwo amuzangile chikuma. Lwola lumwe, tunahase kuhona kukolezeza chilongesa chetu akavangize vyuma ali nakulinangula mwomwo yakushinganyeka ngwetu keshi kuhasa kulinga ngocho halwola kanako. Chinahase kumbata lwola numba mutu azule mutu wamwaka, nakuvwala mutu wamuhya. (Kolo. 3:9, 10) Kachi nge namukafwa chilongesa chenu alumuneko chiyoyelo chenyi hahaze vene namuputuka kulinangula, kaha nachimwashiwila kuzachilaho. Kushimutwila nenyi havyuma kana nachimulingisa amone ngwenyi mwamuzanga.—Samu 141:5; Vishi. 27:17.

6. Mwomwo ika twatela kuhulishilanga chilongesa chetu vihula vize navimulingisa ahanjike vyuma vili kumuchima wenyi?

⁶ Twatela kuhulisanga chilongesa vyuma ali nakushinganyeka hachihande tuli nakumunangula. Kahechi nachimikafwa mutachikize vyuma afwelela, nomu nevwishishilamo chihande kana. Kushimutwila nenyi lwola lwosena mujila kana, nachimilingisa muchiwane kupwa chachashi kushimutwila nenyi nahavihande vize navipwa vyavikalu kuli ikiye kwitavila. Mumukanda waLivwise Kuwaha Kuyoya Haya Myaka, muli vihula vyavivulu vize navilingisa chilongesa ahanjike vili kumuchima wenyi. Chakutalilaho, muchilongesa 04 muli chihula chakwamba ngwavo: “Uno Yehova eji kwivwanga ngachilihi nge naumuvuluka halijina lyenyi?” Kaha muchilongesa 09 muli chihula chakwamba ngwavo: “Vyuma muka vimwe uli nakusaka kumulomba Kalunga?” Hakavanga, chinahase kukaluhwila chilongesa chenu kukumbulula vihula kanevi. Mwatela kumukafwa atange visoneka vanenyikilako, nakutala mivwimbimbi nakushinganyekaho mangana chimukafwe akumbulule vihula kana.

7. Tunahase kuzachisa ngachilihi mijimbu yakuyoya chavandumbwetu hakukafwa vilongesa vyetu?

⁷ Kachi nge chilongesa chenu natachikiza vyuma atela kulinga, kaha mwatela kumulwezako mijimbu yavandumbwetu vaze vapwile muukalu nganou alimo ikiye. Chakutalilaho, nge chilongesa chenu cheji kumukaluhwilanga kuya nakukunguluka lwola lwosena, kaha munahase kumutalisa vindiyo yakwamba ngwavo Yehova Anguzakamine, yize yili muchilongesa 14, muchihanda chakwamba ngwavo “Wana Vyavivulu.” Mijimbu kaneyi yavandumbwetu, munahase kuyiwana mumukanda wakwamba ngwavo Livwise Kuwaha Kuyoya Haya Myaka, muchihanda “[cha]Linangule Vyakujiminyina” chipwe “[cha]Wana Vyavivulu.” * Kamwatela kwesekesanga chilongesa chenu kumutu wekako hakumulweza ngwenu, “Kachi nge ou nalingimo, kaha nayove unahase kulingamo.” Echenu chilongesa alisakwile ivene vyakulinga. Oloze mwatela kuhanjika kaha havishina vyalingishile mutu vanahanjika muvindiyo, akavangize vyuma yanangula Mbimbiliya. Pamo munahase kuvuluka chisoneka chipwe kala chuma chachilemu chize chamukafwile. Munahase nawa kuvuluka omwo Yehova akafwile mutu kana.

8. Tunahase kukafwa ngachilihi chilongesa chetu azange Yehova?

⁸ Kafwenu chilongesa chenu azange Yehova. Mujila muka? Mukafwenu atachikize vilinga vyaYehova, nakutachikiza nawa ngwenyi Yehova apwa Kalunga wakuwahilila, uze eji kukafwanga vaze vamuzanga. (Chimo. 1, 1:11; Hepe. 11:6) Mulwezenu ngwenu mwanganyala nge mwakavangiza  vyuma ali nakulinangula, nakumulweza nawa ngwenu nganyo kana nayisolola nge Yehova amuzanga. (Isa. 48:17, 18) Nge chilongesa chenu mwazanga chikuma Yehova, kaha nachimukafwa alumuneko vyuma vimwe mukuyoya chenyi.—Yowa. 1, 5:3.

9. Kweseka naMako 10:29, 30, chuma muka chinahase kukafwa chilongesa mangana alisuule kuseza vyuma vimwe nakutamo kumumbapachisa?

⁹ Chilongesa chenu atela kulisuula kwecha kulingako vyuma vimwe numba azovoloke nakutamo kumumbapachisa. Ngana muze chapwile kuli lunga muka-luheto uze twavulukanga hakavanga, vilongesa vamwe vatela kulisuula kuseza luheto lwavo. Chakutalilaho, nge milimo vazata kayalitombola najindongi jamuMbimbiliyako, kaha vanahase kwecha kuzata milimo kana. Vamwe nawa vanahase kwecha kulikata namasepa vaze kavazanga Yehovako. Kaha veka nawa vanahase kuvahunga kuli vausoko wavo vaze kavazanga Vinjiho jaYehovako. Yesu ambile ngwenyi, chinahase kupwa chachikalu kuli vatu vamwe kulisuula kulinga vyuma kanevi. Oloze ambile ngwenyi vosena vaze navamukavangiza kaveshi kukavevwisa sonyiko, mwomwo navakapwa mutanga yayinene yakushipilitu. (Tangenu Mako 10:29, 30.) Uno munahase kukafwa ngachilihi chilongesa chenu mangana apwenga mutanga kaneyi yayinene yakushipilitu?

10. Vyuma muka natulinangula kuli ndumbwetu Manuel?

¹⁰ Likatenu usepa nachilongesa chenu. Chapwa chachilemu kuzakama chilongesa chenu. Mwomwo ika? Ivwenu vyuma ahanjikile ndumbwetu Manuel, uze atwama mulifuchi lyaMexico. Eji kwanukanga halwola luze vapwile nakumunangula Mbimbiliya, ngocho ambile ngwenyi: “Shimbu kanda tuputuke kulinangula, muka-kungunangula anguhulishilenga evwenga omu ngunayoyela. Angukafwilenga ngupwenga nguwakukasunuka, nakumulweza vyuma vyosena vyapwilenga kumuchima wami. Ngocho ngwamwene ngwami anguzakaminenga.”

11. Uno vilongesa vyetu vanahase kunganyala ngachilihi nge natushikamanga navo?

¹¹ Shikamenunga navilongesa vyenu ngana muze Yesu ashikaminenga navaka-kumukavangiza. (Yowa. 3:22) Nge chinahase, sanyikenu  vilongesa vyenu vaze vali nakuzovoloka kuzuvo yenu mangana mulile hamwe vyakulya, chipwe kutalila hamwe vindiyo yabroadcasting. Vilongesa vyenu vanahase kuwahilila chikuma kachi nge namuvasanyika halwola luze vanevu uli mwomwo masepa javo, chipwe vausoko wavo vali nakwazana muchilika chize chalimbalaka najindongi jamuMbimbiliya. Ndumbwetu Kazibwe, wamuUganda ambile ngwenyi: “Ngwalinangwile vyavivulu hali Yehova mwomwo yakushikamanga namuka-kungunangula. Echi changukafwile ngumone ngwami Yehova azakama vatu jenyi, kaha nawa vapwa vakuwahilila. Ngocho ngwafwililile kupwa nachiyoyelo kana.”

12. Mwomwo ika twatela kuyilanga navandumbwetu vakulisezaseza kuchilongesa chaMbimbiliya?

¹² Yenunga navandumbwenu vakulisezaseza kuchilongesa chenu. Shimbu jimwe tunahase kushinganyeka ngwetu, chinahase kupwa chachashi kuyanga kuchilongesa ukawetu chipwe nandumbwetu youmwe lwola lwosena. Oloze shimbu jimwe nge natuyanga navandumbwetu vakulisezaseza kuchilongesa chetu, kaha mwazovoloka. Ndumbwetu Dmitrii, wamulifuchi lyaMoldova ambile ngwenyi: “Muka-kwambulula himuka-kwambulula uze ejilenga namuka-kungunangula ahanjikilenga vyuma vize vyangukafwile. Echi changukafwile ngumone jijila jakulisezaseza jize ngunahase kuzachishilamo vyuma vize ngwalinangwilenga. Kahomu ngwayile nakukunguluka halwola lwatete, kangwevwile sonyi chikumako, mwomwo vatu vavavulu vaze ngwawanyine kuze ngwavatachikijile lyehi.”

13. Mwomwo ika twatela kukafwila chilongesa chetu ayenganga kukukunguluka?

¹³ kafwenu chilongesa chenu ayenganga kukukunguluka. Mwomwo ika? Mwomwo Yehova alweza vangamba jenyi valikungulwilenga hamwe mangana vamulemese. (Hepe. 10:24, 25) Kaha nawa vandumbwetu muchikungulwilo vapwa tanga yetu yakushipilitu. Nge tunalikungulwila hamwe navandumbwetu, kaha chinafwane nge tuli kuzuvo nakulila hamwe vyakulya. Nge namukafwa chilongesa chenu ayenganga kukukunguluka, kaha muli nakumukafwa alinge chuma chize nachimukafwa atengamo kumumbapachisa. Oloze chinahase kumukaluhwila kuputuka kuya nakukunguluka. Uno mukanda waLivwise Kuwaha Kuyoya Haya Myaka unahase kukafwa ngachilihi chilongesa chenu afungulule ukalu kana?

14. Tunahase kukafwa ngachilihi chilongesa chetu ayenganga kukukunguluka?

¹⁴ Zachisenu chilongesa 10 chamumukanda waLivwise Kuwaha Kuyoya Haya Myaka mangana mukolezeze chilongesa chenu ayenganga kukukunguluka. Shimbu kanda valovole ou mukanda, vaka-kwambulula vamwe vavalwezele vazachise echi chilongesa mangana vakafwe vilongesa vyavo. Ava vaka-kwambulula vambile ngwavo chilongesa kana chakafwile vilongesa vyavo vaputuke kuyanga kukukunguluka. Chipwe ngocho, munahase kukafwa chilongesa chenu ayenganga kukukunguluka numba tuhu kanda muchihete muchilongesa 10. Mwatela kumukolezeza ayenganga kukukungulula hahaze vene namuputuka kulinangula. Tachikizenu ngwenu vilongesa veji kumonanga ukalu wakulisezaseza. Ngocho mwatela kutachikizanga ukalu wavilongesa vyenu nakumona nge munahase kuvakafwa. Talililenunga chikoki chilongesa chenu uze keshi nakuya nakukungulukako, nakutwalaho lika kumukolezeza mangana ayenganga kukukunguluka.

15. Vyuma muka vinahase kulingisa vilongesa vyetu vevwenga woma?

¹⁵ Kutala mwevwile woma omu mwejile nakupwa muVinjiho jaYehova tahi? Pamo mwevwile woma mwomwo yakushinganyeka ngwenu kamweshi kuhasa kuya nakwambulwila kuzuvo hizuvoko. Chipwe pamo mwevwile woma mwomwo yakushinganyeka ngwenu vausoko wenu chipwe masepa jenu navamihunga. Nge mukiko mwevwile, kaha mukiko nahase kwivwa nachilongesa chenu. Yesu ambile ngwenyi, vatu vamwe vanahase kwivwa woma mwomwo yavyuma kana. Oloze akolezezele vaka-kumukavangiza ngwenyi kavatela  kwechelela woma uvalingise vahone kuzachila Yehovako. (Mateu 10:16, 17, 27, 28) Uno Yesu akafwile ngachilihi vaka-kumukavangiza vahone kwivwa woma? Kaha munahase kulondezeza ngachilihi Yesu?

16. Tunahase kukafwa ngachilihi chilongesa chetu alwezengako vakwavo vyuma ali nakulinangula?

¹⁶ Twalenuho lika kukafwa chilongesa chenu alwezengako vakwavo vyuma ali nakulinangula. Pamo tumbaji twaYesu vevwile woma omu vavatumine vayenga nakwambulula mujimbu. Oloze Yesu avakafwile hakuvalweza mujimbu vatela kwambulula, nakuvihela vatela kuya nakwambulwila. (Mateu 10:5-7) Tunahase kulondezeza ngachilihi Yesu? Kafwenu chilongesa chenu atachikize vatu atela kwambulila. Chakutalilaho, munahase kumuhulisa nge natachikizako mutu umwe uze nahase kwambulilako vyuma ali nakulinangula. Kufumaho mulwezenuko jila yayashi yize nahase kwambulilamo mutu kana. Nge chinahase, kaha zachisenu chihanda chakwamba ngwavo “Vatu Vamwe Ngwavo” nechi chakwamba ngwavo, “Mutu Nahase Kuhulisa Ngwenyi,” vize vili mumukanda waLivwise Kuwaha Kuyoya Haya Myaka. Omu namuzachisa vihanda kana, fwilenu kukafwa chilongesa chenu azachisanga Mbimbiliya hakukumbulula vatu mujila yayashi, kaha nawa yakuzangama.

17. Tunahase kuzachisa ngachilihi mukanda waMateu 10:19, 20, 29-31 hakukafwa chilongesa chetu afwelelenga Yehova?

¹⁷ Kafwenu chilongesa chenu afwelelenga Yehova. Yesu alwezele tumbaji twenyi ngwenyi, Yehova mwavakafwanga mwomwo avazanga. (Tangenu Mateu 10:19, 20, 29-31.) Lwezenu chilongesa chenu ngwenu, Yehova mwamukafwa ngana muze akafwile tumbaji. Munahase kumukafwa apendamine hali Yehova hakulombela hamwe nenyi nakuvuluka vyuma nalitomena kulinga mukulomba. Ndumbwetu Franciszek wamuPoland ambile ngwenyi: “Kakavulu muka-kungunangula avulukilenga vyuma ngwalitomenene kulinga mukulomba. Omu Yehova akumbulwilenga kulomba chamuka-kungunangula, changulingishile nayami nguputuke kulomba. Ngwamwene ngwami Yehova akumbulwilenga kulomba chami, omu vangwitavishilenga makumbi amwe kumilimo mangana nguyenga kukunguluka chachikungulwilo, nechi changalila.”

18. Uno Yehova amona ngachilihi mulimo veji kuzatanga vaka-kwambulula?

¹⁸ Yehova azakama chikuma vilongesa vyetu. Eji kumonanga mulimo veji kuzatanga vaka-kwambulula wakukafwa vatu vapandame kuli ikiye kupwa waulemu. Ngocho avazanga hakukilikita chavo. (Isa. 52:7) Kachi nge oholyapwa kamweshi nachilongesako, kaha munahase kukafwa vilongesa vyaMbimbiliya vazovoloke nakutamo kuvambapachisa, hakuyanga navandumbwenu kuvilongesa vyavo.