1. Chuma muka nalingi Yehova kuli etu tuvosena?

TUVOSENA Yehova atukoka mangana tupandame kuli ikiye. (Yowa. 6:44) Uno echi chalumbununa ika? Echi chalumbununa nge Yehova akekesele kanawa havatu vosena hano hamavu, kaha amwene ngwenyi mwapwile namuchima wamwaza, kaha munahase kumuzanga, ngocho amimwene kupwa muvavalemu. (Miji. 1, 28:9) Yehova amitachikiza, amizanga, kaha nawa amivwishisa kanawa omwo mwapwa. Kutachikiza chuma kana cheji kutukolezezanga chikuma.

2. Uno Yesu asolwele ngachilihi ngwenyi Yehova azanga vatu jenyi vosena?

² Yehova amizanga chikuma, kaha nawa azanga navandumbwenu vosena. Hakusaka twivwishise ovyo tunambila ngocho, tutalenu hachakutalilaho chino. Yesu afwanyishile Yehova kuli kafunga. Kachi nge kafunga ali namikoko 100, kaha nahajimbala umwe, vyuma muka eji kulinganga kafunga? Eji ‘kusezanga vaze 99 hajipili nakuya nakutondatonda uze umwe najimbala.’ Nge kafunga nawane uze mukoko ajimbalanga, keshi kupihilila nauze mukokoko oloze eji kuwahililanga. Chishina muka natulinangulako? Mutu himutu apwa wamulemu kuli Yehova. Yesu ambile ngwenyi: ‘Tata uze ali mwilu, kasaka kumona umwe hali ava vavandende mwanongako.’—Mateu 18:12-14.

3. Vyuma muka natushimutwila muchihande chino?

³ Katwasaka kulinga chuma chize nachivwisa kupihya vandumbwetuko. Vyuma muka navitukafwa mangana tuhone kuhukanyisanga vandumbwetu? Kaha vyuma muka twatela kulinga nge ndumbwetu natuhukanyisa? Vihula kana natuvikumbulula muchihande chino. Oloze chatete tuvangilenu kushimutwila ovo vemanyinako “ava vavandende” vavuluka mumukanda waMateu kapetulu 18.

4. Uno “ava vavandende” vemanyinako veya?

⁴ “Ava vavandende” vemanyinako tumbaji twaYesu vosena. Chamokomoko namyaka yakusemuka vali nayo, vapwa nge “vana vavandende” mwomwo valisuula kuvanangula kuli Yesu. (Mateu 18:3) Numba tuhu vafuma kumafuchi nakuvisemwa vyakulisezaseza, kaha nawa vakwechi vilinga vyakulisezaseza oloze vosena vafwelela Kulishitu. Ngocho vosena vavazanga kuli Kulishitu.—Mateu 18:6; Yowa. 1:12.

5. Uno Yehova eji kwivwanga ngachilihi nge ngamba yenyi vanamuhukanyisa?

⁵ Yehova amona vosena “ava vavandende” kupwa vavalemu. Hakusaka tutachikize omwo Yehova eji kwivwanga hali “ava vavandende” tuvangilenu kushinganyeka omwo tweji kwivwanga hali vana vavandende. Twamona vana vavandende kupwa vavalemu. Twasaka kuvakinga mwomwo kavatwama nangolo, namangana, kaha nawa kavatachikiza vyuma vyavivulu ngana mwavakulwaneko. Tweji kwivwanga kupihya kumuchima kachi nge natumona mutu vali nakumuyanjisa, chikumanyi nge vanakuyanjisa mwana wamundende. Chochimwe naYehova nawa asaka kutukinga. Ngocho eji kwivwanga kupihya nge mwamona ngamba yenyi vanamuhukanyisa.—Isa. 63:9; Mako 9:42.

6. Kweseka naWavaka-Kolinde 1, 1:26-29, vatu mukaye vamona ngachilihi tumbaji twaYesu?

⁶ Jila yeka muka vafwanyisa tumbaji twaYesu kuli “ava vavandende”? Vatu muka mukaye vamona kupwa vavalemu? Vatu kana shina vaka-luheto, navaze vaya fuma, navaze vatwama nawata wakuyula. Oloze tumbaji twaYesu vavamona kupwa ngana ‘mwavana vavandende’ vamokomoko. (Tangenu Wavaka-Kolinde 1, 1:26-29.) Oloze Yehova kavamona mujila kanako.

7. Uno Yehova asaka tumone ngachilihi vandumbwetu vosena?

⁷ Yehova azanga vangamba jenyi vosena numba vanashimbula mumuchano chipwe chiku. Yehova amona vandumbwetu vosena kupwa vavalemu, shikaho nayetu twatela kuvamona kupwa vavalemu. Twatela kuzanganga ‘vandumbwetu vosena’ keshi kuzangako vamwe kahako. (Petu. 1, 2:17) Twatela kulisuula kukinga vandumbwetu nakuvazakama. Nge tunahukanyisa ndumbwetu, kaha katwatela kulisolola nge nevi tunapihisa vene vyauchi. Chipwe kushinganyeka ngwetu atela kutukonekela nakuvulyamako vyuma tunamulingi. Mwomwo ika vandumbwetu vamwe veji kuhukanyinanga? Pamo valimona kupwa vamokomoko kweseka najila vavalelelelemo. Veka nawa mwomwo vavahya mumuchano, ngocho kavatachikijile ngwavo vatela kukonekela vandumbwavo vaze navavalinga mwamupiko. Numba etu vanalingi mwamupi chipwe etu tunalingi vakwetu mwamupi, oloze twatela kufwila kutwama mukuunda navandumbwetu. Kaha nawa ndumbwetu uze eji kusulakananga washi nge vandumbwenyi vanamulingi mwamupi, atela kuzata nangolo mangana ambile muchima kana. Nge mwalinga ngocho, kaha mwapwa wakuwahilila nakutwama mukuunda navandumbwenyi.

8. Muchima muka vapwile nawo vatu mumakumbi aYesu uze wasakile kuhungumwisa tumbaji twaYesu?

⁸ Mwomwo ika Yesu ahanjikilile hali “ava vavandende”? Mwomwo tumbaji twenyi vamuhulishile ngwavo: “Uno iya chikupu wamulemu muWangana wamelu?” (Mateu 18:1) VaYuleya vavavulu halwola kana vasakilenga vihela naulemu. Lunga umwe uze alinangula chikuma ambile ngwenyi: “Vatu halwola kana vasakilenga vavavumbike kuli vakwavo, nakuya fuma. Echi chikiko chapwile chuma chachilemu chikuma mukuyoya chavo.”

9. Uno chuma muka vatelelele kulinga tumbaji twaYesu?

⁹ Yesu atachikijile ngwenyi tumbaji twenyi vatelelele kuzata nangolo mangana vambile muchima wakulimona kupwa vavalemu uze wapwile muli vaYuleya vavavulu. Avalwezele ngwenyi: “Ou wamulemu hakachi kenu apwenga nge kanyike wamundende, kaha ou napu twamina apwenga nge muka-kuzachila vakwavo.” (Luka 22:26)  Tweji kupwanga nge “kanyike wamundende” nge natumonanga vakwetu ngwetu ‘vatuhambakana etu.’ (Fwili. 2:3) Nge natumona vakwetu ngwetu vatuhambakana etu, kaha nachitukafwa tuhonenga kuvahukanyisa.

10. Mazu muka ahanjikile Paulu aze twatela kukavangiza?

¹⁰ Twatachikiza ngwetu vandumbwetu vatuhambakana muvyuma vimwe. Kachi nge natutalanga kaha havilinga vyamwaza vyavandumbwetu kaha natwitavila chishina kana. Twatela kukavangiza mazu aze kaposetolo Paulu asonekelele vaka-Kolinde akwamba ngwavo: “Iyaze nakulingisa kupwa uwamulemu kuhambakana mukwenu? Uno chuma chikaze uli nacho chize wazenekele kutambula? Jino kachi nge wachitambwile, kaha ikaze uli nakulisashila kwijiva nge kawachitambwileko?” (Koli. 1, 4:7) Shikaho, twatela kuzangama kuchina natulinga vyuma vize navikomwesa vandumbwetu, chipwe kulisolola nge twapwa tuvavalemu kuhambakana vakiko. Chakutalilaho, nge ndumbwetu walunga veji kumusangejekanga mwomwo yakuhana vihande vyamwaza, chipwe ndumbwetu wapwevo mwomwo yakutwaminyina kanawa vilongesa, kaha kavatela kulisasako oloze vatela kwalisanga Yehova.

11. Chishina muka atunangula Yesu hachifwanyisa ahanjikile chamwangana nandungo yenyi?

¹¹ Omu Yesu ahuhumwine vaka-kumukavangiza valihende kukuhukanyisa vakwavo, avalwezele chifwanyisa chamwangana nandungo yenyi. Ou mwangana ajimbanganyine mukuli waunene akongwele ou ndungo yenyi. Oloze mukuhita chalwola ou ndungo katetelelele mukwavo ndungo uze amukongwele mukuli waundendeko. Omu mwangana atachikijile chuma kanechi ahakile ou ndungo wakuhuka mukamenga. Chishina muka natulinangulako? Yesu ambile ngwenyi: “Omu mukiko nawa mwakamilinga naTata wamwilu kachi nge namukana kulikonekelanga navandumbwenu kufuma kumichima yenu.”—Mateu 18:21-35.

12. Tunahase kwivwisa ngachilihi vandumbwetu kupihya nge natukana kuvakonekelanga?

¹² Vyuma alingile ou ndungo vyamuhakile muukalu nakwivwisa vakwavo kupihya kumuchima. Chatete, kasolwele muchima wakekeko hakuhaka mukwavo ndungo “mukamenga palanga nomu mwakakindulwisa uze mukuli.” Chamuchivali, “omu vakwavo vandungo vamwene vyuma vyasolokele, vapihililile chikuma.” Chochimwe nayetu nawa, vyuma natulinga vinahase kwivwisa vakwetu kupihya chipwe kuvevwisa kuwaha. Vyuma muka vinahase kusoloka nge natukana kukonekela ndumbwetu uze natulingi mwamupi? Chatete, tunahase kumwivwisa kupihya kumuchima mwomwo tunakane kumukonekela, nakumusolwela zangi. Chamuchivali, natulingisa vandumbwetu muchikungulwilo vahone kupwa vakuwahilila kachi nge navamona ngwavo katwakonekelele ndumbwetuko.

13. Vyuma muka munalinangula kuli ndumbwetu uze apwa payiniya?

¹³ Nge natukonekelanga vandumbwetu, kaha nachitukafwa tupwenga vakuwahilila nakwivwisa kuwaha vandumbwetu. Omu mukiko chapwile kuli ndumbwetu wapwevo Kavuyi * uze apwa payiniya. Ou ndumbwetu vamuhukanyishile kuli ndumbwetu wapwevo muchikungulwilo. Ambile ngwenyi: “Omu ngwanukilenga mazu ahanjikile ngwevwilenga kukola kumuchima kwijiva nge nangutuu poko. Kaha nawa kangwasakilenga nakuzata nenyi mumulimo wamuwandeko. Ngocho kangwazachilenga mulimo wakwambulula natwimako, kaha nawa kangwapwile wakuwahililako.” Ndumbwetu Kavuyi amwene ngwenyi chapwile chakutamo kupihilila. Oloze kalaminyine ndumbwenyi kokoko chipwe kushinganyeka havyuma vyavipi vize amulingileko. Uno chuma muka chamukafwile? Akavangijile mazu akuhuhumuna atwama muMbimbiliya apwile muchihande chakwamba ngwavo “Kukonekela muMichima Yenu” chize chapwile muKaposhi Kakutalila waNovember 1, 1999. Ngocho akonekelele  ou ndumbwenyi. Ndumbwetu Kavuyi ambile ngwenyi: “Echi chihande changukafwile ngumone ngwami tuvosena tuli nakukilikita mangana tuvwale mutu wamuhya, kaha nawa Yehova eji kutukonekelanga hakumbi hakumbi namuchima wakusuuluka. Ngunakwivwa jino nakumuchima hwo. Kaha nawa ngwapwa nguwakuwahilila.”

14. Kweseka naMateu 18:21, 22, ukalu muka pamo amwene kaposetolo Petulu, kaha vyuma muka natulinangula kuli Yesu kweseka namazu amukumbulwile?

¹⁴ Twatachikiza ngwetu chuma chakwoloka twatela kulinganga shina kukonekela vakwetu. Oloze chinahase kutukaluhwila kulinga ngocho. Pamo omu mukiko chapwilenga shimbu jimwe nakuli kaposetolo Petulu. (Tangenu Mateu 18:21, 22.) Vyuma muka navitukafwa mangana tukonekelenga vakwetu? Chatete, shinganyekenunga omwo Yehova eji kumikonekelanga. (Mateu 18:32, 33) Numba tuhu katwatamo kutukonekelako, oloze eji kutukonekelanga. (Samu 103:8-10) Ngocho “nayetu nawa twatela kulizanga navakwetu.” Shikaho twatela kukonekelanga vakwetu lwola lwosena, keshi nge kuvanga tunazangeko. Twatela kumona kulikonekela kupwa nge himukuli uze twatela kufweta. (Yowa. 1, 4:11) Chamuchivali, shinganyekenu havyuma vyamwaza navifumamo kachi nge natukonekelanga vakwetu. Tunahase kukafwa mutu uze natulingi mwamupi, nakulingisa chikungulwilo chilinunge, nakukinga usoko wetu naYehova, nakwivwa kumuchima hwo. (Koli. 2, 2:7; Kolo. 3:14) Chamuchitatu, twatela kulombanga kuli Kalunga uze atulweza tukonekelenga vakwetu. Katwatela kwechelela Satana enyeke usoko wetu navandumbwetuko. (Efwe. 4:26, 27) Twatela kupendamina hali Yehova atukafwe mangana tutwame mukuunda navandumbwetu.

15. Kweseka naWavaka-Kolose 3:13, vyuma muka twatela kulinga nge ndumbwetu natuhukanyisa?

¹⁵ Vyuma muka mwatela kulinga nge ndumbwenu nalingi vyuma vize vinamihukanyisa? Zatenu nangolo mangana mutwaleho lika kutwama mukuunda nandumbwenu kana. Kaha nawa  lombenu Yehova akafwe ndumbwenu uze namilingi mwamupi, nakumikafwa mumone vilinga vyamwaza atwama navyo ou ndumbwenu vize vyalingisa Yehova amuzange. (Luka 6:28) Nge kamweshi kuliula vyuma vyavipi namilingi ndumbwenuko, kaha wanenu jila yamwaza yize munahase kushimutwila nenyi. Nachipwa chamwaza kushinganyeka ngwetu ndumbwetu kalinganga chuma kana mukuchisakula kumuchima wenyiko. (Mateu 5:23, 24; Koli. 1, 13:7) Omu natuhanjika nandumbwetu uze natulingi mwamupi twatela kwitavila vyuma mwatulweza numba tuhu tuli nakuhuhwasana. Vyuma muka mwatela kulinga kachi nge ndumbwenu kate kwitavila ngwenyi apihisanga? Mwatela kutwalaho ‘kwitavila lika tutenga twenyi’ nakumutalilila chikoki. (Tangenu Wavaka-Kolose 3:13.) Chuma chachilemu mwatela kulinga shina kuhona kulamina koko ndumbwenu. Mwomwo kumulamina koko nachijiha usoko wenu naYehova. Kanda kwechelela kala chuma navalinga vandumbwenu chimihukanyiseko. Nge namulinga ngocho kaha namusolola ngwenu mwazanga Yehova kuhambakana kala chuma.—Samu 119:165.

16. Vyuma muka twatela kulinga etu tuvosena?

¹⁶ Twawahilila chikuma hakuzachila Yehova hamwe navandumbwetu ‘muutanga umwe nakafunga umwe.’ (Yowa. 10:16) Mukanda waValongesa Valinge Mwaya Muchima waYehova halifwo 165 hatwama mazu akwamba ngwawo: “Echi chatela kukulingisa utwaleho lika kulinunga hamwe navandumbwove mangana ulivwise lika kuwaha.” Shikaho twatela ‘kumonanga vandumbwetu vaka-Kulishitu ngana muze avamona Yehova.’ Yehova azanga etu vana venyi vosena vavandende. Shikaho, nayetu twatela kuzanganga vandumbwetu vosena. Yehova eji kumonanga omu mweji kukilikitanga mangana mukafwe vandumbwenu nakuvazakama.—Mateu 10:42.

17. Vyuma muka tuli nakufwila kulinga?

¹⁷ Twazanga vandumbwetu vosena. Shikaho, twatela ‘kuzata nangolo mangana tuzeneke kuhaka chimbunji chakuhukanyisa ndumbwetu mujila yenyi, chipwe chuma chakumulimbwisa.’ (Loma 14:13) Twatela kumona vandumbwetu ngwetu vatuhambakana etu, nakuvakonekela kufuma kumuchima. Kanda natwechelela vyuma navalinga vandumbwetu vituhukanyiseko. Oloze “tukavangizenunga vyuma vyakuneha kuunda, navyuma vize vyakulitunga navakwetu.”—Loma 14:19.