1. Mwomwo ika vangamba jaYehova lwola lumwe veji kwivwilanga uli?

LWOLA lumwe etu vavavulu tweji kwivwanga uli. Vatu vamwe veji kwivwanga uli hatando yayindende, kaha vakwavo veji kwivwanga uli hatando yayisuku. Tunahase kwivwa uli numba vene nge tuli havatu vavavulu. Vandumbwetu vamwe nge vanalukila kuchikungulwilo cheka, cheji kuvakaluhwilanga kutunga masepa. Vandumbwetu vakwavo vatwama mujitanga jize jalinunga hamwe, oloze veji kwivwanga uli mwomwo yakwalukila kuchihela chakwakusuku navausoko wavo. Vandumbwetu vaze vafwisa mutu uze vazanga navakiko veji kwivwanga uli. Vandumbwetu veka nawa chikumanyi vaze vanalinangula muchano kalinwomu, veji kwivwanga uli kachi nge vanavafumbukila kuli vausoko wavo, namasepa javo vaze kavapwa Vinjiho jaYehovako.

2. Natukumbulula vihula muka muchihande chino?

² Yehova atachikiza ukalu tweji kuhitangamo nomu tweji kwivwanga. Atachikiza omu tweji kwivwanga kachi nge tunevu uli, ngocho asaka kutukafwa. Uno Yehova eji kutukafwanga ngachilihi? Vyuma muka twatela kulinga mangana tuhonese uli? Kaha tunahase kukafwa ngachilihi vandumbwetu muchikungulwilo vaze veji kwivwanga uli? Natukumbulula vihula kana muchihande chino.

3. Uno Yehova azakamine ngachilihi Elija?

³ Yehova asaka vangamba jenyi vosena vawahilile. Ngocho atwama hakamwihi nayetu vosena, kaha eji kutachikizanga nge tunahombo. (Samu 145:18, 19) Tutalenu omu Yehova akafwile Elija halwola ahombele. Elija ayoyelelele mulwola lwalukalu mumakumbi  avaIsalele. Vatu vavalemu muIsalele vaze kavazangilenga Yehovako, vayanjishilenga vatu vaze valemeselenga Yehova, chikumanyi vasakile kujiha Elija. (Vamya. 1, 19:1, 2) Kaha nawa Elija ashinganyekele ngwenyi ikiye kaha apwile kapolofweto uze azachililenga Yehova halwola kana. Pamo echi chikiko chuma chikwavo chamulingishile ahombe. (Vamya. 1, 19:10) Hahaze vene Yehova alingileko chuma chimwe mangana akafwe Elija. Atumine kangelo kuya kuli Elija nakumulweza ngwenyi keshi ukawenyiko, oloze kuli navaIsalele vavavulu vaze vali nakuzachila Kalunga.—Vamya. 1, 19:5, 18.

4. Uno mukanda waMako 10:29, 30, wasolola ngachilihi nge Yehova azakama vangamba jenyi vaze vahunga kuli vausoko wavo namasepa javo vaze kavazanga Yehovako?

⁴ Yehova atachikiza ngwenyi, etu vamwe tweji kulisuulanga kwecha kulinga vyuma vimwe numba tumuzachile. Tweji kulisuulanga kwecha kulikata navausoko wetu namasepa vaze kavazanga Yehovako. Echi chinahase kulingisa vechenga kutuzakama mwomwo yakuzachila Yehova. Pamo kaposetolo Petulu alizakaminyine, ngocho ahulishile Yesu ngwenyi: “Etu tunaseze vyuma vyosena nakukukavangiza, vyuma muka natukawanyinaho?” (Mateu 19:27) Kaha Yesu afwelelesele tumbaji twenyi ngwenyi navakapwa mutanga yayinene yakushipilitu. (Tangenu Mako 10:29, 30.) Yehova ashika ngwenyi mwakafwanga vosena vaze veji kumuzachilanga. (Samu 9:10) Shikaho, tushimutwilenu havyuma vimwe vize mwatela kulinga mangana Yehova amikafwe muhonese uli.

5. Mwomwo ika chapwila chamwaza kushinganyeka omwo Yehova eji kumikafwilangamo?

⁵ Shinganyekenu omu Yehova ali nakumikafwa. (Samu 55:22) Echi nachimikafwa muhonese uli. Chakutalilaho, ndumbwetu wamujike Chilombo, * uze apwa kaha Chinjiho mutanga yavo, ambile ngwenyi: “Kushinganyeka omwo Yehova nangukafwenga omu ngwapwilenga muukalu, cheji kungukafwanga nge nguli nakwivwa uli. Echi cheji kungulingisanga ngutachikize ngwami Yehova mwangukafwanga lwola lwosena.”

6. Uno chisoneka chaWaPetulu 1, 5:9, 10, cheji kukolezezanga ngachilihi vandumbwetu vaze veji kwivwanga uli?

⁶ Shinganyekenu omwo Yehova ali nakukafwilamo vandumbwenu vaze vali nakwivwa uli.  (Tangenu WaPetulu 1, 5:9, 10.) Ndumbwetu Ndonji uze apwa kaha Chinjiho chaYehova mutanga yavo ambile ngwenyi: “Vandumbwetu vosena muchikungulwilo veji kumonanga ukalu. Chamokomoko naukalu kana, etu tuvosena tweji kuzachilanga Yehova kweseka noho hakumina ngolo jetu. Kahechi cheji kukolezezanga etu twatwama mujitanga muze kavapwa Vinjihoko.”

7. Uno kulomba cheji kumikafwanga ngachilihi?

⁷ Lombenunga, nakutanganga Mbimbiliya, nakuyanga kukukunguluka lwola lwosena. Mwatela kulwezanga Yehova hatoma omwo muli nakwivwa. (Petu. 1, 5:7) Ndumbwetu wakanyike Mahongo ambile ngwenyi: “Chuma chimwe chachilemu changukafwile omu ngwevwilenga uli shina, kulomba kuli Yehova lwola lwosena.” Omu ou ndumbwetu aputukile kuzachila Yehova, evwilenga chikuma uli mwomwo vausoko wenyi kavapwa Vinjiho jaYehovako. Ambile nawa ngwenyi: “Ngwamwene Yehova kupwa chisemi chami wamwenemwene. Kaha ngwalombelenga mapapa kakavulu hakumbi hakumbi, nakumulweza omwo ngwapwilenga nakwivwa.”

8. Uno kutanganga Mbimbiliya nakushinganyekaho cheji kumikafwanga ngachilihi?

⁸ Tangenunga Mbimbiliya hakumbi hakumbi, nakushinganyeka hamijimbu yize yasolola nge Yehova amizanga. Ndumbwetu Ngambo, uze veji kuhendanga kuli vausoko wenyi ambile ngwenyi: “Kutanga mijimbu yamuMbimbiliya, namijimbu yavangamba jaYehova vaze vanahichinga muukalu nge ou wami, nakushinganyeka hamijimbu kana, cheji kungukafwanga chikuma.” Vandumbwetu vamwe veji kulaminanga visoneka mumitwe vize vyeji kuvavendejekanga nge vali muukalu, vyakufwana nge Samu 27:10 naIsaya 41:10. Vandumbwetu vakwavo veji kwivwililanga kumikanda yamazu akukopa, nge vali nakuwahisa vyakukunguluka chipwe nge vali nakutanga Mbimbiliya. Echi cheji kuvakafwanga vahone kwivwa uli.

9. Uno kuyanga kukukunguluka cheji kumikafwanga ngachilihi?

⁹ Fwilenunga kuya kukukunguluka lwola lwosena. Kukunguluka chinahase kumikolezeza nakumikafwa mutachikize kanawa vandumbwenu. (Hepe. 10:24, 25) Ndumbwetu Mahongo twavulukanga hakavanga ambile ngwenyi: “Numba tuhu ngwapwilenga nguwasonyi, oloze ngwayilenga kukukunguluka lwola lwosena nakuhanjikaho. Echi changukafwile ngupandame chikuma kuli vandumbwami.”

10. Mwomwo ika chapwila chachilemu kutunga usepa navandumbwetu vakushishika?

¹⁰ Tungenunga usepa navandumbwenu vakushishika. Likatenunga usepa navandumbwenu vakulisezaseza muchikungulwilo vaze vanahase kumikafwa chamokomoko namyaka yakusemuka vali nayo, chipwe kuchisemwa vafuma. Mbimbiliya yatulweza ngwayo ‘mangana atwama  kuli vakulwane.’ (Yopa 12:12) Vandumbwetu vavakulwane navakiko vanahase kulinangulako vyuma vimwe kuli vandumbwetu vavanyike muchikungulwilo. Chakutalilaho, Ndavichi alikachile usepa naYonatane, numba tuhu Yonatane apwile mukulwane chikuma. (Samwe. 1, 18:1) Ndavichi naYonatane valikafwilenga umwe namukwavo mangana vatwaleho lika kuzachila Yehova chamokomoko naukalu vamwenenga. (Samwe. 1, 23:16-18) Ndumbwetu Kutemba uze apwa kaha Chinjiho chaYehova mutanga yavo ambile ngwenyi: “Vandumbwetu muchikungulwilo vakiko vapwa nge visemi jetu, vayaya jetu navasongo jetu. Shikaho, Yehova nahase kuvazachisa mangana vatukafwe nge tuli muukalu.”

11. Vyuma muka twatela kulinga mangana tutunge usepa wakukola navandumbwetu?

¹¹ Chinahase kupwa chachikalu kutunga usepa chikumanyi nge mwatwama nasonyi. Ndumbwetu Mutete uze atwama nasonyi, uze alinangwile muchano chamokomoko nakumufumbukila ambile ngwenyi: “Ngwatachikijile ngwami ngwasakiwile kungukafwa kuli vandumbwami muchikungulwilo.” Chinahase kupwa chachikalu kulweza sepa lyenu ukalu muli nakuhitamo. Oloze nge namumulwezawo kaha usepa wenu nauzama. Masepa jenu vasaka kumikolezeza nakumikafwa, oloze hakusaka valinge ngocho, mwatela kuvalweza ukalu wenu.

12. Uno kuzata mulimo wakwambulula chinahase kutukafwa ngachilihi tuwane masepa vamwenemwene?

¹² Jila yimwe yamwaza tunahase kutungilamo usepa navandumbwetu shina kuzatanga navo mumulimo wakwambulula. Ndumbwetu Chilombo uze twavulukanga hakavanga ambile ngwenyi: “Ngunalikatenga namasepa vavavulu hakuzachilanga hamwe navandumbwami mumulimo wakwambulula, namumilimo yeka yamuliuka. Yehova nangukafwenga hamyaka yayivulu hakuzachisa ava masepa.” Chikupu vene, chapwa chamwaza kulikata usepa navandumbwetu vakushishika. Yehova eji kuzachisanga masepa kana mangana vatukafwe nge tunahombo mwomwo yakwivwa uli.—Vishi. 17:17.

13. Tuvosena muchikungulwilo twatwama namulimo muka?

¹³ Tuvosena muchikungulwilo twatwama namulimo wakuneha kuunda nakuzanga vandumbwetu vosena mangana vahone kwivwa uli. (Yowa. 13:35) Vyuma tweji kuhanjikanga nakulinga vinahase kukolezeza vandumbwetu. Ivwenu vyuma ahanjikile ndumbwetu umwe wapwevo. Ambile ngwenyi: “Omu ngwalinangwile muchano, vandumbwami muchikungulwilo vakiko vapwile vausoko wami vakushipilitu. Nge ava vandumbwami kavangukafwileko, kachi kangwapwa nguChinjiho chaYehovako.” Vyuma muka twatela kulinga mangana tukafwe vandumbwetu vaze vapwa Vinjiho uka wavo mutanga, mangana valivwe kupwa vavalemu muchikungulwilo?

14. Vyuma muka mwatela kulinga mangana mulikate usepa navatu vavahya?

¹⁴ Likatenunga navatu vavahya muchikungulwilo. Munahase kulinga ngocho hakuvatambwokesanga nge vaneza kuchikungulwilo. (Loma 15:7) Chipwe ngocho, katwatela kukumina kaha hakuvamenekako. Oloze twatela kufwila kutunga usepa wakukola navakiko. Shikaho mwatela kusolola ngwenu mwavazakama. Vahulisenu vihula mangana mutachikize ukalu vali nakumona, oloze kanda namuvahulisa vihula vize navivevwisa sonyiko. Vatu vamwe chinahase kuvakaluhwila kumilweza omwo vali nakwivwa. Shikaho kamwatela kuvashinjila vahanjikeko. Oloze vahulisenu vihula mujila yakuzangama, nakwivwilila kanawa omwo navakumbulula. Chakutalilaho, munahase kuvahulisa vamilweze omwo valinangwile muchano.

15. Uno vandumbwetu vakuhya kushipilitu vanahase kukafwa ngachilihi vakwavo muchikungulwilo?

 ¹⁵ Nge vandumbwetu vakuhya kushipilitu chikumanyi tulama navazakama vandumbwavo, kaha chikungulwilo nachizama. Ndumbwetu Chisengo uze vanangwile muchano kuli naye ambile ngwenyi: “Ngunakusakwilila chikuma vandumbwami vamalunga, vapwile kwijiva nge visemi jami mwomwo vashikaminenga nayami nakunguzakama. Kala lwola ngwapwilenga muukalu, ngwayilenga kuli vakiko vangukafwe.” Ndumbwetu wamukweze Kayombo, evwile kupihya omu muka-kumunangula asezele muchano, kaha ambile ngwenyi: “Tulama muchikungulwilo vanguzakamine chikuma, kahechi changukafwile. Vashimutwililenga nayami lwola lwosena, nakuzachila hamwe nayami mumulimo wakwambulula, nakungulwezako vishina vyavilemu valinangwilenga hachilongesa chavo chauka. Kaha shimbu jimwe twahemenenenga hamwe.” Oholyapwa ndumbwetu Chisengo naKayombo vali nakuzachila haMbetele.

16-17. Tunahase kukafwa ngachilihi vandumbwetu?

¹⁶ Vakafwenunga. (Ngale. 6:10) Ndumbwetu Leo uze azata mulimo waumishonali mulifuchi lyakwakusuku navausoko wenyi ambile ngwenyi: “Chuma chasakiwa kuli mutu uze ali muukalu shina kumusolwela likoji. Likumbi limwe ngwapwile muponde hamukwakwa, kahomu ngwakindulukile kuzuvo ngwazeyele chikuma. Oloze ndumbwetu walunga napuwenyi vangulanyine kuya kuzuvo yavo mangana ngukalye vyakulya. Kangweshi nakwanuka vyakulya twalileko, oloze ngweji kwanukanga omwo vangwivwilile omu ngwapwile nakuvalweza ukalu wami. Ngocho ngwevwile nakumuchima hwo.”

¹⁷ Omu tweji kupwanga kukukunguluka changalila nechi chachihanda, tweji kulivwisanga kuwaha kutwama hamwe navandumbwetu nakushimutwila havyuma vize tunalinangula. Ndumbwetu Chilombo uze twavulukanga hakavanga ambile ngwenyi: “Ngweji kwivwanga uli nge nguli kukukunguluka chachihanda nechi changalila.” Mwomwo ika ahanjikilile ngocho? Ou ndumbwetu ambile ngwenyi: “Numba tuhu kukukunguluka kana kweji kupwanga vandumbwetu vavavulu, oloze vakiko veji kupwanga hamwe najitanga javo. Ngocho ngweji kwivwanga uli mwomwo ngweji kupwanga kaha ukawami.” Vandumbwetu veka nawa cheji kuvakaluhwilanga kuya kukukunguluka changalila chipwe chachihanda nge vanafumu hakufwisa  vaka-mahyavo. Kutala mwatachikizako vandumbwetu vali nakumona ukalu wakufwana ngana tahi? Nge mukiko, kaha valanyenu mangana mukapwe navo hamwe kukukunguluka nachizaho.

18. Tunahase kuzachisa ngachilihi mazu atwama hali Wavaka-Kolinde 2, 6:11-13 omu natusolwelanga vandumbwetu zumbu?

¹⁸ Shikamenunga navandumbwenu. Fwilenunga kushikama navandumbwetu vakulisezaseza chikumanyi vaze vali nakwivwa uli. Twatela ‘kukasununa michima yetu,’ chikumanyi kuli vandumbwetu vaze vali nakwivwa uli. (Tangenu Wavaka-Kolinde 2, 6:11-13.) Ndumbwetu Chisengo uze twavulukanga hakavanga ambile ngwenyi: “Twawahilililenga chikuma omu vandumbwetu vatusanyikilenga kuya kujizuvo javo nakushikama, chipwe nakwolola mahinji.” Kutala kuliko ndumbwenu umwe muchikungulwilo uze mwatela kusolwela zumbu tahi?

19. Lwola muka lwamwaza chikuma luze tunahase kushikama navandumbwetu?

¹⁹ Kweji kupwanga lwola lumwe luze vandumbwetu vanahase kuwahilila chikuma kachi nge natushikama navo. Vandumbwetu vamwe cheji kuvakaluhwilanga kupwa hamwe navausoko wavo vaze kavapwa Vinjiho jaYehovako, halwola luze vausoko wavo navazana muvilika vize vyalimbalaka najindongi jamuMbimbiliya. Vandumbwetu veka veji kwivwanga kupihya kumuchima hamakumbi amwe, pamo hamakumbi kana hakiko vafwishile vausoko wavo. Kachi nge natushikamanga navandumbwetu hamakumbi kana, kaha natusolola nge ‘twavazakama.’—Fwili. 2:20.

20. Uno mazu ahanjikile Yesu atwama hali Mateu 12:48-50 anahase kutukafwa ngachilihi nge tunakwivwa uli?

²⁰ Kuli vyuma vyavivulu vyeji kutulingisanga twivwenga uli shimbu jimwe. Oloze twatela kwanuka ngwetu Yehova eji kutachikizanga nge tuli nakwivwa uli. Kakavulu eji kuzachisanga vandumbwetu mangana vatukafwe. (Tangenu Mateu 12:48-50.) Shikaho nge natukafwanga vandumbwetu, kaha natusolola ngwetu twasakwilila Yehova hakutuhana vandumbwetu muchikungulwilo. Numba tuhu shimbu jimwe tweji kwivwanga uli, oloze twatela kutachikiza ngwetu Yehova mwapwanga hamwe nayetu shimbu yosena.