LISA a ambile ngwenyi: “Likoji lyavandumbwetu likiko lyangukunywile chikuma.” Chuma kana chikiko chamukafwile aputuke kulinangula muchano. Omu mukiko chapwile nakuli Anne. Ambile ngwenyi: “Numba tuhu vyuma vangunangwilenga vyangukunywile, oloze chuma changukunywile chikuma shina likoji vangusolwelele.” Ava vandumbwetu vosena vavali, vali jino nakulivwisa kuwaha kutanga Mbimbiliya nakushinganyeka havyuma veji kutanganga. Kuvasolwela likoji chikiko chavakafwile chikuma.

Tunahase kusolola ngachilihi likoji lize nalikolezeza vatu? Tushimutwilenu hajijila jivali tunahase kulingilamo ngocho. Tunahase kulinga ngocho muhanjikiso namuvilinga. Natushimutwila nawa vatu vaze twatela kusolwela likoji.

Pwevo wamwenemwene uze vavuluka hali Vishimo kapetulu 31 atwama “[na]lushimbi lwalikoji” halilimi lyenyi. (Vishi. 31:26; kwinyikila chamwishi) Eji kulingisanga lushimbi kana lumutwaminyine muvyuma mwahanjika namujila mwavihanjikilamo. Navisemi vamalunga nawa vatela kupwa nalushimbi kana hamalimi avo. Visemi vavavulu vatachikiza ngwavo hanjikiso yautenu yinahase kunehela vana ukalu nakuvalingisa vahone kwivwilila kuvyuma navavalweza. Shikaho visemi vatela kuhanjikanga nalikoji mangana chipwenga chachashi kuli vana vavo kuvevwilila nakuvononoka.

Numba mwapwa muvisemi chipwe chiku, uno vyuma muka mwatela kulinga mangana muhanjikenga nalikoji? Mazu akulivanga ahali Vishimo 31:26 anahase kutukafwa. Amba ngwawo: “Eji kuhanjikanga namangana.” Echi chasakiwa kusakula kanawa mazu natuhanjika najila natuwahanjikilamo. Nachipwa chamwaza kachi nge natulihulisanga chihula chino, ‘Uno mazu nguli nakusaka kuhanjika nawalingisa vakwetu vapihilile nyi nawavaunjisa?’ (Vishi. 15:1) Nachipwa chamangana kuvangila kushinganyeka shimbu kanda tuhanjike.

Mbimbiliya yahanjika nawa ngwayo: “Kuhanjika chakulusuka cheji kutuvanga nge poko yamukwale.” (Vishi. 12:28) Nge natushinganyeka omwo vakwetu navevwa havyuma natuhanjika namujila natuvihanjikilamo, kaha nachitukafwa tusakulenga kanawa vyuma twatela kuhanjika. Chikupu vene, nge natukavangiza “lushimbi lwalikoji,” kaha nachitukafwa tulihende kukuzachisa mazu amapi nakutukafwa nawa tusakule jila yamwaza twatela kuhanjikilamo. (Efwe. 4:31, 32) Echi nachitukafwa tuhone kupwa navishinganyeka vyavipi nahanjikiso yayipi nakuhanjika jino mazu alikoji. Yehova atuhana chakutalilaho hachihande kana omu ahanjikile mujila yalikoji kuli ngamba yenyi Elija uze apwile nakwivwa woma. Kangelo uze emanyinyineko Yehova ahanjikile “[na]lizu lyakuunda, lyalivwovu.” (Vamya. 1, 19:12) Shikaho, kupwa nalikoji kachakumina kaha hakuhanjika nalikojiko, oloze twatela nawa kusolola likoji muvilinga. Mujila muka?

Tweji kulondezezanga Yehova hakuhanjika mulikoji nakulinga vyuma mujila yalikoji. (Efwe. 4:32; 5:1, 2) Lisa uze twavulukanga hakavanga alumbunwine likoji vamusolwelele kuli  Vinjiho. Ambile ngwenyi: “Omu tanga yetu vayilwezele mukukasumuna vyakufuma muzuvo, jitanga jivali jaVinjiho jaYehova jejile nakutukafwa kulongejeka. Halwola kana kangwapwile nakulinangula Mbimbiliyako.” Likoji vavasolwelele lyamulingishile aputuke kulinangula muchano.

Anne uze twavulukanga hakavanga nayikiye asakwililile Vinjiho halikoji vamusolwelelele. Ambile ngwenyi: “Changukaluhwililile kufwelela vatu mwomwo yavyuma vyavipi vili nakusoloka mukaye.” Ambile nawa ngwenyi: “Omu ngwaliwanyine naVinjiho kangwavafweleleleko. Ngwalihulishile ngwami, ‘Mwomwo ika ava Vinjiho vali nakungusolwela likoji?’ Oloze likoji vangusolwelele kuli muka-kungunangula lyangulingishile ngumufwelele.” Vyuma muka vyamwaza vyafuminemo? Anne ambile ngwenyi: “Ngwaputukile jino kuhaka mangana kuvyuma ngwalinangwilenga.”

Tachikizenu ngwenu likoji vasolwelele Lisa naAnne lyavakwachile kumuchima nakuvakunyula vaputuke kulinangula muchano. Likoji lize vavasolwelelele kuli vandumbwetu muchikungulwilo lyavakafwile vafwelele Yehova navatu jenyi.

Vatu vamwe veji kuchiwananga kupwa chachashi kuhanjika mazu alikoji nakusolola chisambo mwomwo yachisemwa chavo chipwe kweseka nakuchihela vatwama. Kaha chapwa vene chamwaza kulinga ngocho. Numba tuhu natusolola likoji mwomwo yachisemwa chetu kacheshi nakulumbununa nge tuli nakulondezeza likoji lyaKalungako.—Esekesenuko Vilinga 28:2.

Likoji lyamwenemwene lyapwa muhako washipilitu yajila yaKalunga. (Ngale. 5:22, 23) Shikaho twatela kupwa nashipilitu yaKalunga mangana yitukafwe tusolwelenga vakwetu likoji lyamwenemwene. Kulinga ngocho nachisolola nge tuli nakulondezeza Yehova naYesu. Kaha nawa hakupwa tuvaka-Kulishitu natusololanga muchima wamwenemwene wakuzakamanga vakwetu. Shikaho kuzanga Yehova Kalunga navakwetu chikiko cheji kutukunyulanga. Kaha nawa natusololanga likoji lyamwenemwene lyakufuma kumuchima lize nawa Kalunga mwetavila.

Chinahase kupwa chachashi kusolwela likoji vatu vaze veji kutusolwelanga likoji chipwe vaze twatachikiza. (Samwe. 2, 2:6) Tweji kulinganga ngocho hakuvasakwilila. (Kolo. 3:15) Nyi ngachilihi nge munamono ngwenu mutu umwe katelemo kumusolwela likojiko?

Yehova atuhana chakutalilaho chamwenemwene hakusolola likoji lyalinene. Kaha nawa Mazu enyi atunangula chishina chachilemu chamwakusolwela likoji kana. Lizu “likoji lyalinene” valizachisa mapapa kakavulu muVisoneka VyachiHelase vyaVaka-Kulishitu. Uno Kalunga eji kutusolwelanga ngachilihi likoji?

Achishinganyekenu havatu vavavulu chikuma vaze Yehova nasolwelanga likoji hakuvahana vyuma vyakulikafwa navyo mangana vayoye. (Mateu 5:45) Chipwe ngocho, Yehova navasolwelanga lika likoji nahalwola luze kavamutachikijileko. (Efwe. 2:4, 5, 8) Chakutalilaho, ahanyine Mwanenyi umwe kaha wakulipwila kuvatu vosena. Kaposetolo Paulu asonekele ngwenyi, Yehova ahanyine ndando yakusokola “kweseka naluheto lwalikoji lyenyi lyalinene.” (Efwe. 1:7) Numba tuhu tweji kulinganga shili nakwivwisa Yehova kupihya, oloze eji kutwalangaho lika kututwaminyina nakutunangula. Jindongi namazu enyi vyapwa nge “vula yakazevezeve.” (Lushi. 32:2) Katweshi kuhasa kumufweta halikoji lyenyi eji kutusolwelangako. Kaha nawa tachikizenu ngwenu chiyoyelo chetu chakulutwe chapendamina halikoji lyalinene lyaYehova.—Esekesenuko WaPetulu 1, 1:13.

Chikupu vene, likoji lyaYehova lyapwa lyamwaza kaha nawa lyeji kutukunyulanga. Shikaho muchishishisa chakusolwela likoji vatu vamwe kaha, oloze tuzatenu nangolo mangana tulondezeze Yehova hakusolola likoji kuvatu vosena hakumbi hakumbi. (Teso. 1, 5:15) Nge natusololanga likoji lwola lwosena, kaha natupwa nge kakahya halwola kunatutu. Ngocho natuvendejeka vausoko wetu, navandumbwetu, navakwetu twazata navo, navakwetu vaka-shikola, navatu twatunga navo.

Shinganyekenu hali vausoko wenu chipwe vandumbwenu muchikungulwilo vaze navanganyala kulikoji namuvasolwela mumazu namuvilinga. Kunahase kupwa ndumbwenu umwe muchikungulwilo uze ali nakusakiwa kumukafwa kuwahisa hembo lyenyi, nakumande chipwe vene kumulanjilako vyuma. Kaha nawa munahase kukafwa mutu uze ali nakusakiwa kukafwa uze namuwana mumulimo wamuwande.

Shikaho tulondezezenu Yehova hakukavangiza “lushimbi lwalikoji” mumazu namuvilinga.