1. (a) Yehova atushika vyuma muka? (b) Uno “[ku]talilila kuli Yehova” chalumbununa ika? (Talenu “Mazu Vanalumbununa.”)

 YEHOVA ashika vatu vosena vaze vamuzanga ngwenyi mwakavalingila vyuma vyamwaza. Kalinwomu afumiseko misongo, nakulishona, nakufwa. (Kuso. 21:3, 4) Mwakakafwa “vavavwovu” vaze vatalilila kuli ikiye mangana vakalumune mavu kupwa palachise. (Samu 37:9-11) Kaha nawa mwakalingisa etu tuvosena tukapwe nausoko wamwaza chikuma naikiye kuhambakana nou tuli nawo oholyapwa. Chikupu vene vyuma kana evi twatalilila vyapwa vyamwaza chiyovo. Vyuma muka vyatulingisa tufwelele ngwetu vyuma atushika Kalunga navikatesemo? Yehova eji kutesangamo jishiko jenyi. Shikaho twatela “[ku]talilila kuli Yehova.” b (Samu 27:14) Tweji kusololanga ngwetu twatalilila kuli Yehova, hakuvandamina namuchima wakusuuluka ngwetu Kalunga ketu mwakatesamo jishiko jenyi.—Isa. 55:10, 11.

2. Vyuma muka vize Yehova natesamo lyehi?

² Yehova nasolola hatoma ngwenyi eji kutesangamo jishiko jenyi. Achishinganyekenu hachakutalilaho chino. Mumukanda wakusoloka Yehova atushikile ngwenyi mumakumbi etu mwakakungulwila vatu hamwe vakumafuchi osena, nakumiyachi yosena nakumalimi osena, kaha vosena mwakavaneha hamwe mukulemesa chamuchano. Makumbi ano eli lizavu lyavatu kana valivuluka ngwalyo “liyongomena lyalinene.” (Kuso. 7:9, 10) Numba tuhu mulizavu kana mwatwama malunga namapwevo navanyike vavikova vyakulisezaseza, namalimi akulisezaseza, navisemwa vyakulisezaseza, oloze yapwa tanga yimwe yamukaye kosena yakulinunga. (Samu 133:1; Yowa. 10:16) Vaze vatwama muliyongomena lyalinene veji kuzatanga mulimo wakwambulula  natwima. Lwola lwosena valizanga kulwezako vakwavo vyakaye kamwaza kaze vatalilila. (Mateu 28:19, 20; Kuso. 14:6, 7; 22:17) Nge mwatwama muliyongomena lyalinene, kaha vyuma mwatalilila vyapwa vyavilemu.

3. Satana afwila kulinga vyuma muka?

³ Liyavolo kasaka mutalilile vyuma vyamwaza vatushikako. Afwila kumilingisa mufwelele ngwenu Yehova kamizakamako kaha nawa jishiko jenyi kajeshi kukatesamoko. Kachi nge Satana mwatufungulula twechenga kutalilila vyuma vize vatushika, kaha tunahase kuhomba nakwecha kuzachila Yehova. Nganomu natumona, Liyavolo asakile kulingisa Yopa ahone kutalilila vyuma vyamwaza nakumulingisa echenga kuzachila Yehova.

4. Vyuma muka natushimutwila muchihande chino? (Yopa 1:9-12)

⁴ Natukekesa tufuta twaSatana azachishile hakushinyinyika Yopa ahone kupwa wakulonga. (Tangenu Yopa 1:9-12.) Natushimutwila nawa vyuma natulinangula kuli Yopa novyo twatela kwanukila ngwetu Kalunga atuzanga kaha nawa mwakatesamo jishiko jenyi.

5-6. Vyuma muka vyasolokelele Yopa mukapyapya kakandende kaha?

⁵ Yopa apwilenga nachiyoyelo chamwaza chikuma. Apwilenga nausepa wamwaza naYehova. Apwile natanga yayinene yakuwahilila naluheto lwaluvulu chikuma. (Yopa 1:1-5) Oloze Yopa atokesele kafwe vyuma vyenyi vyosena mulikumbi lyangongo. Chatete atokesele vimuna jenyi. (Yopa 1:13-17) Kufumaho, vana venyi vosena vafwile. Achilihulikenu kulu mushinganyeke haukalu kanou. Visemi veji kwivwanga kumuchima kukola chikuma kachi nge mwanavo umwe nafu. Jino achishinganyekenu hakulyonyinga naushona apwile nawo Yopa napuwenyi hakufwisa vana vavo vosena 10 halwola lwolumwe. Echi chikiko chalingishile Yopa alishone nakupula uvwalo wenyi nakulimbila hamavu.—Yopa 1:18-20.

⁶ Kufumaho, Satana avetele Yopa namusongo waupi chikuma. (Yopa 2:6-8; 7:5) Halwola lumwe Yopa vamuvumbikilenga chikuma kuvatu vamungalila yenyi. Vatu vejilenga kuli ikiye avalweze mangana. (Yopa 31:18) Oloze halwola kanelu vamuchinyinenga. Vandumbwenyi, namasepa jenyi navangamba jenyi vamuhungile.—Yopa 19:13, 14, 16.

7. (a) Uno Yopa ashinganyekele ngwenyi iya apwile nakumunehela luze lupi, kaha vyuma muka akanyine kulinga? (b) Uno muka-Kulishitu nahase kumona ngachilihi ukalu wakulifwana nauze vanasolola mumuvwimbimbi?

⁷ Satana asakile Yopa afwelele ngwenyi ali nakuyanda mwomwo Yehova keshi nakumwivwila cheka uselewako. Chakutalilaho, Satana azachishile peho yanyamanganda mangana yishiule zuvo yayinene yize yapwile navana vaYopa 10 vaze vapwile nakulya vyakulya. (Yopa 1:18, 19) Kaha nawa alingishile mwilu mufume kakahya kaze kochele mikoko jaYopa navangamba jenyi vaze vapwile nakulama mikoko. (Yopa 1:16) Hakuwana nge peho yanyamanganda nakakahya vyafumine mwilu, ngocho Yopa ashinganyekele ngwenyi Yehova Kalunga ikiye nalingi chuma kana. Echi chalingishile Yopa ashinganyeke ngwenyi pamo nevwisa Yehova kupihya. Chipwe ngocho Yopa akanyine kwangula Ise wamwilu. Atachikijile ngwenyi Yehova namuhanenga vyuma vyamwaza vyavivulu hamyaka yayivulu. Ashinganyekelenga ngwenyi hakuwana nge atambwilenga vyuma vyamwaza ngocho atelelele nawa kulisuula kutambula vyuma vyavipi. Kaha ambile ngwenyi: “Lijina lyaYehova valyalisenga lika.” (Yopa 1:20, 21; 2:10) Yopa atwalileho lika kupwa wakushishika kuli Yehova numba tuhu atokesele luheto lwenyi navana venyi kaha  nawa avijile. Oloze Satana kakumishile kumwesekako.

8. Kafuta muka kakwavo azachishile Satana hakweseka Yopa?

⁸ Kaha nawa Satana azachishile malunga vatatu vaze valyongele kupwa masepa jaYopa mangana alingise Yopa alimone kupwa wamokomoko. Ava malunga vashinganyekele ngwavo Yopa ali nakumona vihuli kana mwomwo vilinga vyenyi vyakuhuka vyavulile chikuma. (Yopa 22:5-9) Vasakile nawa kumulingisa afwelele ngwenyi chamokomoko nakala vyuma vyamwaza alingilenga, Kalunga kamwenenga vyuma kana kupwa vyavilemuko. (Yopa 4:18; 22:2, 3; 25:4) Ava malunga vasakile kulingisa Yopa ashinganyeke ngwenyi Kalunga kamuzangako, kaha nawa kamuzakamako, nakushinganyeka nawa ngwenyi, kuzachila Kalunga chinapu hikulishina kaha. Mazu vahanjikile ava malunga alingishile Yopa ahombe nakushinganyeka kwijiva nge ukalu wenyi kaweshi kukakumako.

9. Vyuma muka vyakafwile Yopa apwenga wakuhamuka nakumika?

⁹ Achishinganyekenu Yopa ali nakwivwa kukola, kaha natwame muuto. (Yopa 2:8) Masepa jenyi vatwalileho kumwamba ngwavo kapwa mutu wamwenemweneko, kaha nawa ngwavo kazachilenga milimo yamwenemweneko. Chikupu vene vihuli amwene vyalemene nge malolwa. Kaha kulyonyinga chenyi havana venyi afwishile chatohwele chikuma mumuchima. Hakavanga Yopa aholele kulu. (Yopa 2:13–3:1) Kachi nge vaze masepa jaYopa vamakuli vashinganyekele ngwavo kuhola chaYopa nachimulingisa aseze Tengi yenyi, kaha vishinganyeka kana vyapwile vyakuhenga. Halwola lumwe Yopa andwile mutwe wenyi nakutala vaze masepa jenyi nakwamba ngwenyi: “Kangweshi kuseza kulonga chamiko palanga nomu nangufwa.” (Yopa 27:5) Vyuma muka vyakafwile Yopa apwenga wakuhamuka nakumika chamokomoko navihuli amwenenga? Nahalwola ahombele chikuma, Yopa atwalilileho lika kutalilila  kuli Kalunga ngwenyi mwakumisa vihuli apwile nakumona. Atachikijile ngwenyi numba nge mwafwa Yehova mwakamusangula.—Yopa 14:13-15.

10. Uno mujimbu waYopa watunangula vyuma muka?

¹⁰ Mujimbu waYopa watunangula nge Satana keshi kutushinjila tuseze Yehovako, kaha nawa Yehova atachikiza ukalu tuli nakuhitamo. Vyuma ahichilemo Yopa vyatulingisa twivwishise ovyo vyalingishile vyuma kana visoloke. Achishinganyekenu havyuma vimwe vize tunahase kulinangula kuli Yopa.

11. Vyuma muka navifumamo kachi nge natutwalaho lika kufwelela Yehova? (WaYakova 4:7)

¹¹ Yopa asolwele hatoma ngwenyi, nge natutwalaho lika kufwelela Yehova kaha natupwa vakumika muvyeseko nakuhasa kufungulula Satana. Vyuma muka navifumamo? Visoneka vyatufwelelesa ngwavyo, Liyavolo mwatuchina.—Tangenu WaYakova 4:7.

12. Uno lutalililo lwakusanguka lwajikijishile ngachilihi Yopa?

¹² Twatela kufwelela chikupu ngwetu nakukapwa kusanguka. Ngana muze twashimutwilanga muchihande chinafumuho, Satana asaka kuwana kengililo nge natwivwa woma wakufwa mangana atulingise tuhone kupwa vakushishika kuli Yehova. Satana ashinganyekele ngwenyi Yopa nahase kulinga kala chuma, kuhakilako vene nakwecha kuzachila Kalunga mangana ayovole mwono wenyi. Vishinganyeka vyaSatana vyapwile vyakuhenga. Yopa atwalileho lika kupwa wakushishika kuli Yehova nahalwola atachikijile ngwenyi mwafwa. Kufwelela Yehova nakutalilila kuli ikiye ngwenyi kalinwomu awahise vyuma, chamukafwile omike. Yopa afwelelele ngwenyi nge Yehova keshi kwolola vyuma halwola ali muvihuliko, kaha mwakalinga ngocho omu mwakamusangula. Yopa afwelelele ngwenyi chikupu vene mwakasanguka. Kachi nge natufwelela mulutalililo lwakusanguka, kaha tunahase kutwalaho kupwa vakushishika kuli Yehova numba vene navatulweza ngwavo natufwa.

13. Mwomwo ika twatela kutachikijila kanawa tufuta azachishile Satana hakweseka Yopa?

¹³ Twatela kutachikiza kanawa tufuta azachishile Satana hakweseka Yopa mwomwo Satana ali nakutweseka kuzachisa tufuta twotumwe. Achishinganyekenu hamakuli ano ahanjikile Satana. Ambile ngwenyi: “Vyeshowo ali navyo mutu [keshi Yopa kahako] mwavihana hamwono wenyi.” (Yopa 2:4, 5) Echi chasolwele nge Satana apwile nakulumbununa ngwenyi katwazanga Yehova Kalungako, kaha nawa tunahase kwecha kumuzachila mangana tuyovole myono yetu. Asolwele nawa ngwenyi Kalunga katuzangako kaha nawa kamona kukilikita chetu chakusaka kumwivwisa kuwaha kupwa chachilemuko. Hakuwana nge twatachikiza tufuta twaSatana, ngocho keshi kuhasa kutwozako mwomwo twatalilila kuli Yehova.

14. Uno vyeseko vyeji kutukafwanga tutachikize vyuma muka? Hanenu chakutalilaho.

¹⁴ Twatela kumona vyeseko kupwa hivyuma vize navitukafwa tutachikize omwo twapwa. Vyeseko vize ahichilemo Yopa vyamukafwile atachikize kuhehela chenyi, nakuzachilaho. Chakutalilaho atachikijile ngwenyi atelelele kupwa wakulinyisa chikuma. (Yopa 42:3) Chochimwe nawa, nayetu tunahase kutachikiza omwo twapwa kachi nge tuli muvyeseko. Ndumbwetu Nikolay, c uze vakashile mukamenga chamokomoko namisongo, ambile ngwenyi: “Kupwa mukamenga chinafwane nge kuya nakukupima kulikina lya X-ray. Kupwa mukamenga cheji kusololanga hatoma vilinga vyamuka-Kulishitu.” Kachi nge natutachikiza tutenga twetu kaha natuzata nangolo mangana tuvolole.

15. Iya twatela kwivwilila, kaha mwomwo ika?

 ¹⁵ Twatela kwivwilila kuli Yehova keshi kuli vaka-kole jetuko. Yopa evwililile kanawa omu Yehova apwile nakuhanjika kuli ikiye. Omu Kalunga apwile nakushimutwila naYopa, chapwile kwijiva nge ali nakumuhulisa ngwenyi: ‘Kutala wamona ngolo jami jakutenga vyuma tahi? Ngunatachikiza vyuma vyosena vinakusolokela. Uno unashinganyeka ngwove kangweshi kuhasa kukuzakamako tahi?’ Yopa akumbulwile mujila yayivwovu nakusakwilila Yehova havyuma vyamwaza namulingila. Ambile ngwenyi: “Ngunakwivunga kaha, oloze jino ngunakumono nameso ami.” (Yopa 42:5) Halwola Yopa ahanjikile mazu kana, pamo achipwile lika muuto, kaha mujimba wenyi wosena uli namahute, kaha nawa apwile nakulyonyinga hakufwisa vana venyi. Chipwe ngocho, Yehova asolwele nge azangile lika Yopa nakumufwelelesa ngwenyi namwivwila uselewa.—Yopa 42:7, 8.

16. Kweseka namukanda waIsaya 49:15, 16, vyuma muka twatela kutachikiza nge tuli nakuhita muvyeseko?

¹⁶ Namakumbi ano, vatu vanahase kututukana nakutumona kupwa tuvamokomoko. Vanahase kutusaula chipwe kusaula liuka nakutuvangijikila “vyuma vyavipi vyeka navyeka vyosena.” (Mateu 5:11) Kweseka namujimbu waYopa, tunalinangula nge Yehova atachikiza ngwenyi natupwa lika vakushishika kuli ikiye nge natumona vihuli. Yehova atuzanga kaha keshi kuseza vaze vatalilila kuli ikiyeko. (Tangenu Isaya 49:15, 16.) Kanda namwivwililanga kuvyuma vyamakuli veji kuhajikanga vaka-kole jaKalungako. Ndumbwetu James wakuTurkey uze namononga vihuli vyavivulu  hamwe kaha natanga yenyi ambile ngwenyi: “Twatachikijile ngwetu kwivwilila kumijimbu yamakuli kutalisa kuvatu jaKalunga chinahase kutuhombesa. Shikaho twashinganyekelenga havyuma naukatulingila Wangana waKalunga nakutwalaho lika kuzata nangolo milimo yaYehova. Echi chatulingishile tupwenga lika vakuwahilila.” Ngana mwaYopa, nayetu tweji kwivwililanga kuli Yehova. Shikaho makuli avaka-kole jetu kawatela kutuhonesa kutalilila vyuma vatushikako.

17. Vyuma muka munalinangula kuli vatu vakushishika vamalunga navamapwevo vavuluka hali WavaHepeleu kapetulu 11?

¹⁷ Yopa keshi ikiye kaha ngamba yaYehova apwile wakuhamuka nakumika muvyesekoko. Mumukanda uze kaposetolo Paulu asonekelele vaHepeleu, avulukilemo navatu veka vaze ambile ngwenyi “liyongomena lyalinene lyavinjiho.” (Hepe. 12:1) Numba tuhu vosena vahichile muvihuli vyavivulu, oloze vapwile vakushishika kuli Yehova. (Hepe. 11:36-40) Kutala kumika chavo nakukilikita chavo chayile mwangana vene tahi? Nduma. Numba tuhu kavamwene kutesamo chajishiko jimwe jaYehovako oloze vatwalileho lika kutalilila kuli Yehova. Hakuwana nge vatachikijile ngwavo Yehova navevwila uselewa, ngocho vafwelele chikupu ngwavo navakamona omu najikatesamo jishiko jaKalunga. (Hepe. 11:4, 5) Vyakutalilaho vyavo vinahase kutukolezeza mangana tutwaleho lika kutalilila kuli Yehova.

18. Vyuma muka muli nakufwila kulinga? (WavaHepeleu 11:6)

¹⁸ Makumbi ano tuli nakuyoyela mukaye muze vyuma vili nakupihilako chikuma. (Chimo. 2, 3:13) Satana chimwatwalaho lika kweseka vatu jaKalunga. Chamokomoko naukalu uze uli nakwiza kulutwe, tutwalenuho lika kuzachila Yehova nangolo, “mwomwo tunajiki lutalililo lwetu hali Kalunga ou ayoya.” (Chimo. 1, 4:10) Tachikizenu ngwenu vyuma vize Kalunga ahanyine Yopa vyasolola nge “Yehova atwama nazangi chikuma, apwa muka-kutetela.” (Yako. 5:11) Nayetu nawa tutwalenuho lika kupwa vakushishika kuli Yehova mwomwo tunatachikiza ngwetu mwakafweta “vaze vali nakumutondatonda chikuma.”—Tangenu WavaHepeleu 11:6.