1. Mazu muka amuchano ahanjikile Mwangana Solomone aze vasoneka hali Muka-kwambulula 7:20?

 MWANGANA Solomone ambile ngwenyi: “Kakweshi mutu wakwoloka hano hamavu uze eji kulinganga lika vyamwaza chakuzeneka kulinga shiliko.” (Kwambu. 7:20) Mazu ahanjikile apwa amuchano. Tuvosena twapwa tuvaka-shili. (Yowa. 1, 1:8) Shikaho, tuvosena twasakiwa kutukonekela kuli Kalunga nakuli vakwetu vatu.

2. Namwivwa ngachilihi kachi nge sepa lyenu mwamikonekela namuchima wenyi wosena?

² Pamo muli nakwanuka lwola lumwe luze mwevwishile sepa lyenu kupihya kumuchima. Ngocho mwasakile kwolola vyuma mangana muzamise cheka usepa wenu. Kaha mwalikonekelele kuli ikiye namuchima wenu wosena. Uno mwevwile ngachilihi omu sepa lyenu amikonekelele namuchima wenyi wosena? Tunafwelela mwevwile nakumuchima hwo. Kaha nawa mwawahililile chikuma.

3. Vyuma muka natushimutwila muchihande chino?

³ Twasaka Yehova apwenga sepa lyetu, oloze shimbu jimwe tweji kuhanjikanga chipwe kulinga vyuma vize vyeji kumwivwisanga kupihya. Mwomwo ika twatela kufwelela ngwetu Yehova afwila kutukonekela? Uno kukonekela chaYehova chalihandununa ngachilihi nachechi chayetu? Kaha nawa mutu wakufwana ngachilihi veji kukonekelanga kuli Kalunga?

4. Mwomwo ika twatela kufwelela ngwetu Yehova apwa muka-kutetela?

⁴ Mazu aKalunga atufwelelesa ngwawo Yehova eji kukonekelanga. Omu Yehova alisolwele kuli Mose haPili yaShinai,  ahanjikile kuli ikiye kuhichila muli kangelo ngwenyi: “Yehova, Yehova, Kalunga wakeke nakutetela, wakushipwokela kukwata utenu, wazangi yakwilila, wamuchano, apwa muka-kusolola zangi yakwilila kuvatu vavavulu, muka-kukonekela vatu milonga, navaka-kuzombwojoka jishimbi, navaka-shili.” (Kulo. 34:6, 7) Yehova apwa Kalunga wakeke kaha nawa walikoji. Lwola lwosena eji kukonekelanga vaka-shili vaze navapihilila nakwalumuka.—Nehe. 9:17; Samu 86:15.

5. Kweseka namukanda waSamu 103:13, 14, uno Yehova eji kulinganga ika hakuwana nge atutachikiza kanawa?

⁵ Hakuwanga nge Yehova apwa Tengi yetu, ngocho atachikiza vyuma vyosena hali yetu. Ijivenu ngwenu Yehova atachikiza kanawa omwo apwa mutu himutu. (Samu 139:15-17) Shikaho atachikiza tutenga twosena twatwama navo vaze twaswana kuli visemi jetu vakulivanga. Kaha nawa atachikiza vyuma tunahichimo mukuyoya chetu vize vinalumuna vilinga vyetu. Uno Yehova eji kulinganga ika hakuwana nge atutachikiza kanawa? Eji kutwivwilanga keke.—Samu 78:39; tangenu Samu 103:13, 14.

6. Uno Yehova asolola ngachilihi nge afwila kukonekela vatu?

⁶ Yehova asolola hatoma nge afwila kukonekela vatu. Atachikiza ngwenyi mwomwo yashili yize valingile kuli mutu watete Alama, shikaho tuvosena twaswana shili nakufwa. (Loma 5:12) Ngocho katweshi kuhasa kulikinga etu vavene chipwe kukinga vakwetu kushili nakukufwako. (Samu 49:7-9) Oloze Kalunga ketu wazangi atutetelelele hakuwahisako chuma chimwe mangana atusokole. Uno chuma muka awahishile? Kwesaka namazu atwama hali Yowano 3:16, Yehova atumine Mwanenyi umwe kaha wakulipwila mangana ezenga nakutufwila. (Mateu 20:28; Loma 5:19) Muchishisa chayetu kufwa, Yesu ejile nakutufwila mangana weshowo mwamufwelela akawane kuyoya. (Hepe. 2:9) Twafwelela chikupu ngwetu Yehova evwile kukola chikuma kumuchima hakumona Mwanenyi uze azanga mwafwa mujila yayipi. Chikupu vene, nge Yehova kasakile kutukonekelako kachi katumine Mwanenyi kwiza nakutufwilako.

7. Vatu muka vavuluka muMbimbiliya vaze Yehova akonekelele namuchima wakusuuluka?

⁷ MuMbimbiliya mwatwama vyakutalilaho vyavatu vaze Yehova akonekelelele namuchima wakusuuluka. (Efwe. 4:32) Mutu muka  munahase kushinganyeka uze vakonekelele? Pamo munakushinganyeka Mwangana Manase. Ou mutu wakuhuka alingile shili yayinene chikuma kumeso aYehova. Alemeselenga tulunga vamakuli nakuhungumwisa vakwavo valinge mwomumwe. Ajihile vana venyi nakuvahana kupwa wana kutulunga vamakuli. Kaha nawa ahakile likombelo lyakusonga mutembele yajila yaYehova. Mbimbiliya yamba ngwayo: “Alingilenga vyuma vyavipi vyavivulu kumeso aYehova mangana amwivwise kupihya.” (Miji. 2, 33:2-7) Oloze omu Manase apihililile nakwalumuka, Yehova amukonekelelele namuchima wakusuuluka. Kalunga amukindwilwishile cheka haWangana. (Miji. 2, 33:12, 13) Kaha nawa pamo muli nakushinganyeka Mwangana Ndavichi uze alingile shili kuli Yehova. Alingile ukoji kaha nawa ajihile mutu. Omu Ndavichi etavililile shili yenyi nakupihilila nakwalumuka, Yehova amukonekelele. (Samwe. 2, 12:9, 10, 13, 14) Tunahase kwitavila chikupu ngwetu Yehova afwila kutukonekela. Nganomu natushimutwila natuwana nge Yehova alihandununa navatu, mwomwo ikiye eji kukonekelanga mujila yakulipwila.

8. Hakuwana nge Yehova apwa Muka-kuyula wakulipwila, vyuma muka eji kutachikizanga mangana akonekele vatu?

⁸ Yehova ikiye apwa “Muka-kuyula vaka-mavu vosena.” (Kupu. 18:25) Muka-kuyula wamwenemwene atela kutachikiza kanawa jishimbi. Omu mukiko apwa naYehova, mwomwo kapwa kaha Muka-kutuyulako oloze apwa nawa Muka-Kutuhana Jishimbi. (Isa. 33:22) Kakweshi mutu atachikiza vyuma vyakwoloka navyevi vyakuhenga ngana muze apwa Yehovako. Vyuma vyeka muka atela kutachikiza muka-kuyula wamwenemwene? Atela kutachikiza unjiho wosena shimbu kanda ayule chihande. Shikaho, Yehova apwa Muka-kuyula wamwenemwene mwomwo eji kutachikizanga unjiho wosena.

9. Uno Yehova eji kutalanga havyuma muka numba akonekele mutu chipwe chiku?

⁹ Yehova kapwa ngana mwavaka-kuyula vavatuko. Ikiye eji kutachikijilanga chimweza unjiho wosena wachihande. (Kupu. 18:20, 21; Samu 90:8) Kapendamina havyuma vize vatu navamona nakwivwako. Yehova atachikiza ngwenyi mutu nahase kulinga vyuma vimwe mwomwo yavilinga vize vatwama navyo visemi jenyi, chipwe mwomwo yajila vamulelelamo, chipwe mwomwo yakungalila akolela chipwe mwomwo yakuviza muwongo. Yehova eji kutalanga nawa muchima wamutu. Atachikiza ovyo vinalingisa mutu alinge vyuma vimwe. Kakweshi chuma chaswama kumeso aYehovako. (Hepe. 4:13) Shikaho, Yehova eji kukonekelanga mutu hakukekesa muchano wosena.

10. Mwomwo ika natwambila ngwetu Yehova eji kuyulanga mujila yakwoloka? (Lushimbi lwamuchivali 32:4)

¹⁰ Shimbu yosena Yehova eji kuyulanga mujila yakwoloka. Katala vatu kumesoko. Keshi kukonekela vatu mwomwo yasolokeso yavo, chipwe mwomwo yavikumba vali navyo, chipwe mwomwo yaulemu wavo chipwe uhashi wavoko. (Samwe. 1, 16:7; Yako. 2:1-4) Kakweshi mutu mwashinjila Yehova alinge vyuma vimwe chipwe kumuhana maswekezako. (Miji. 2, 19:7) Keshi kulinga vyuma mwomwo yamatoto chipwe mwomwo yavyuma navahanjika vatuko. (Kulo. 34:7) Chakuzeneka kukakasana, Yehova apwa Muka-kuyula wamwenemwene, mwomwo atachikiza omwo twapwa navyuma tweji kuhitangamo mukuyoya.—Tangenu Lushimbi lwamuchivali 32:4.

11. Uno kukonekela chaYehova chalihandununa ngachilihi nachechi chavatu?

¹¹ Vatu vaze vasonekele Visoneka VyachiHepeleu vatachikijile ngwavo Yehova eji kukonekelanga mujila yakulipwila. Shimbu jimwe,  vazachishile lizu lyachiHepeleu lize mukanda umwe wahanjikile ngwawo lizu kana “valizachisa kaha hakulumbununa omwo Kalunga eji kukonekelanga vaka-shili, oloze kavalizachisa hakulumbununa omwo mutu eji kukonekelanga mukwavoko.” Yehova kaha ikiye atwama nangolo jakukonekela namuchima wenyi wosena muka-shili uze mwapihilila nakwalumuka. Vyuma muka vyeji kufumangamo kachi nge Yehova natukonekela?

12-13. (a) Vyuma muka eji kulivwisanga mutu kuwaha kachi nge vanamukonekela kuli Yehova? (b) Kutala Yehova nahase kusopesa cheka mutu uze akonekelele lyehi tahi?

¹² Nge natwitavila ngwetu Yehova natukonekela, kaha natupwa ‘nalwola lwakuhizumuka,’ kaha nawa natuunda muchima nakupwa nachivezu chitoma. Tunahase kulivwisa kuwaha vyuma kana evi mwomwo yakutukonekela kuli “Yehova ivene,” keshi kuli vatuko. (Vili. 3:19) Kachi nge Yehova natukonekela, eji kutukafwanga tupwenga cheka nausoko wakukola naikiye kwijiva nge kanda tulingengaho lyehi shili.

¹³ Kachi nge Yehova natukonekela, keshi kukatuzangamisa cheka chipwe kutuhana mulonga hashili twalingileko. (Isa. 43:25; Yele. 31:34) Yehova eji kuhakanga jishili jetu kwakusuku “nganomu mututuko wasosoloka kumulauko.” b (Samu 103:12) Nge natushinganyeka omwo Yehova eji kutukonekelanga, kaha nachitulingisa tumusakwilile nakumwivwa woma. (Samu 130:4) Uno mutu muka veji kukonekelanga kuli Yehova?

14. Kweseka nomu tunalinangula, vyuma muka vyeji kulingisanga Yehova akonekele mutu chipwe chiku?

¹⁴ Nganomu tunashimutwila lyehi, Yehova keshi kukonekela mutu mwomwo yakutohwa chipwe yakukeha chashili nalingiko. Tunalinangula nawa nge Yehova apwa Tengi yetu, Muka-Kuhana Jishimbi kaha nawa Muka-kuyula. Ngocho eji kuzachisanga chinyingi chenyi hakusaka kukonekela mutu chipwe chiku. Vyuma muka eji kukekesanga Yehova shimbu kanda akonekele mutu?

15. Kweseka naLuka 12:47, 48, uno chuma muka eji kukekesanga Yehova numba akonekele mutu chipwe chiku?

¹⁵ Chuma chimwe eji kukekesanga Yehova shina kutachikiza numba nge mutu uze nalingi shili nejiva ngwenyi nalingi vyuma vyakuhenga. Yesu ashindakanyine chishina  kana kweseka namazu aze atwama hali Luka 12:47, 48. (Tangenu.) Mutu uze eji kulinganga shili chakuchisakula kumuchima oku natachikiza ngwenyi vyuma ali nakulinga navivwisa Yehova kupihya, eji kulinganga shili yayinene chikuma. Pamo Yehova keshi kukonekela mutu kanako. (Mako 3:29; Yowa. 9:41) Kuhanjika muchano, shimbu jimwe tweji kutachikizanga ngwetu vyuma tunalingi vyavipi. Kachi nge chili ngocho, kutala Yehova nahase kutukonekela tahi? Eyo. Tushimutwilenu chuma chamuchivali chize eji kukekesanga Yehova numba akonekele mutu chipwe chiku.

16. Uno kupihilila nakwalumuka chapwa chika, kaha mwomwo ika twatela kupihilila nakwalumuka kachi nge tuli nakusaka Yehova atukonekele?

¹⁶ Chuma chikwavo eji kukekesanga Yehova shina kumona numba nge mutu uze nalingi shili napihilila nakwalumuka. Uno kupihilila nakwalumuka chalumbununa ika? Kupihilila nakwalumuka chalumbununa “kwalumuna vishinganyeka namuchima wamutu, chipwe vyuma ajina mutu.” Chalumbununa nawa mutu kuliveya nakwivwa kupihya havyuma vize nalingi chipwe hakuhona kulinga vyuma vyakwoloka vize atelanga kulinga. Mutu uze napihilila nakwalumuka eji kuliveyanga mwomwo yavyuma vyavipi vize nalingi kaha nawa eji kuliveyanga mwomwo yakwechelela usoko wenyi naYehova uzeye, chuma chize chinamulingisa alinge vyuma vyavipi. Anukenu ngwenu mwangana Manase naNdavichi valingile shili yayinene, oloze Yehova avakonekelele mwomwo vapihililile nakwalumuka. (Vamya. 1, 14:8) Chikupu vene, Yehova eji kukonekelanga mutu kachi nge namono ngwenyi mutu kana napihilila nakwalumuka. Oloze twatela kulingako vyuma vimwe, keshi kukumina kaha hakwivwa kupihya havyuma vize vinatulingisa tulinge shili chipwe hashili tunalingiko. c Tushimutwilenu hachuma chamuchitatu chize eji kukekesanga Yehova numba akonekele mutu chipwe chiku.

17. Uno kwalumuka chapwa chika, kaha mwomwo ika chapwila chachilemu kachi nge katweshi nakusaka kukakindulukila kushili yize twalingile kunyimako? (Isaya 55:7)

¹⁷ Chuma chikwavo nawa chachilemu eji kukekesanga Yehova shina kumona numba nge mutu nalumuka. Kwalumuka chalumbununa  “kukinduluka cheka.” Mujila yikwavo, mutu atela kuseza vilinga vyenyi vyavipi nakupwa navilinga vize asaka Yehova. (Tangenu Isaya 55:7.) Mutu kana atela kwalumuna vilinga vyenyi mangana Yehova amutwaminyine. (Loma 12:2; Efwe. 4:23) Atela kufwila kuseza vilinga vyenyi navishinganyeka vyenyi vyavipi. (Kolo. 3:7-10) Chipwe ngocho, kufwelela mundando yakusokola yaKulishitu cheji kulingisanga Yehova atukonekele nakututomesa kushili. Yehova nahase kutukonekela kuhichila mundando kana kachi nge mwatumona tuli nakuzata nangolo jetu josena mangana twalumune vilinga vyetu.—Yowa. 1, 1:7.

18. Vyuma muka tunashimutwila kutalisa kukukonekela chaYehova?

¹⁸ Tuhitulukenu mukavatu vyuma tunalinangula. Yehova ikiye Muka-kukonekela wamunene mwilu nahamavu. Mwomwo ika tunahanjikila ngocho? Chatete, eji kukonekelanga lwola lwosena. Chamuchivali, atachikiza vyuma vyosena hali yetu. Atachikiza kanawa omwo atutenga kaha nawa ikiye kaha nahase kutachikiza numba nge tunapihilila nakwalumuka chikupu. Chamuchitatu, nge Yehova natukonekela keshi kukanuka cheka shili twalingileko. Cheji kupwanga kwijiva nge kanda tulingengaho lyehi shili. Echi cheji kutulingisanga tupwenga nachivezu chitoma nakutwivwila uselewa.

19. Mwomwo ika tunahase kupwila vakuwahilila numba tuhu natutwalaho lika kulinga shili mwomwo yakuhona kukupuka?

¹⁹ Hakuwana nge katwakupukako, natutwalangaho lika kulinga shili. Chipwe ngocho, mazu atwama mumukanda waInsight on the Scriptures, Volume 2, lifwo 771 anahase kutuvendejeka. Mazu kana amba ngwawo: “Yehova apwa muka-kutetela, kaha atachikiza ngwenyi vangamba jenyi vapwa vakuhehela, shikaho kavatela kuliveyanga lwola lwosena havyuma vyavipi veji kulinganga mwomwo yakuhona kukupukako. (Ji 103:8-14; 130:3) Shikaho kachi nge navatwalaho lika kulinga mwaya muchima waKalunga kaha navawahilila. (Fwi 4:4-6; 1Yo 3:19-22).” Mazu kana atukolezeza chikupu.

20. Vyuma muka natushimutwila muchihande nachikavangizaho?

²⁰ Twawahilila hakutachikiza ngwetu Yehova apwa wakulizanga kutukonekela kachi nge tunapihilila nakwalumuka. Uno tunahase kulondezeza ngachilihi muchima waYehova wakukonekela? Uno kukonekela chavatu chalifwana ngachilihi nachechi chaYehova? Kaha chalihandunwina haka? Mwomwo ika chapwila chachilemu kutachikiza chihandwa kana? Chihande chinakavangizaho nachikumbulula vihula kana.