1. Vatu vavavulu veji kwivwanga woma wavyuma muka?

 ACHISHINGANYEKENU havyuma vyasolokele mukuyoya chavatu vamwe. Nestor napuwenyi María vasakile kuya nakuzachila kuze kwapwile nakusakiwa kukafwa. b Hakusaka vatesemo vyuma kana, vasakiwile kwashiwisako chiyoyelo chavo. Oloze valizakaminyine ngwavo pamo kaveshi kupwa vakuwahililako nge navapwa najimbongo jajindende. Omu Biniam ejile nakupwa Chinjiho chaYehova mulifuchi muze vakanyishile mulimo wetu, atachikijile ngwenyi hakupwa ngamba yaKalunga naikiye nawa navamuyanjisanga. Chuma kana chamwivwishile woma. Oloze alizakaminyine chikuma hakushinganyeka vyuma navalinga vausoko wenyi mwomwo yakutachikiza ngwavo nayi mukwitava cheka. Valérie vamuwanyine namusongo waupi wakasa, kaha chamukaluhwilile kuwana ndotolo uze mwavumbika vyuma vyamuMbimbiliya vize afwelela kutalisa kumanyinga. Kaha evwile woma ngwenyi pamo mwafwa.

2. Mwomwo ika twatela kuzata nangolo mangana tuhonese woma?

² Kutala mwevwaho lyehi woma wavyuma kana tahi? Etu vavavulu twevwaho lyehi woma. Kachi nge katweshi kuhonesanga womako, kaha echi nachitulingisa tusakule kulinga vyuma vize navyenyeka usoko wetu naYehova. Omu mukiko Satana asaka. Satana nahase kuzachisa woma tuli nawo mangana atulingise tuhone kukavangiza jishimbi jaYehova, kuhakilako vene nalushimbi lwakwambululanga mujimbu wamwaza. (Kuso. 12:17) Satana apwa mutu wamupi, wakukenyuka kaha nawa wangolo.  Oloze munahase kulihenda kuli ikiye. Mujila muka?

3. Chuma muka nachitukafwa tuhonese woma?

³ Nge natukunyuka ngwetu Yehova atuzanga kaha nawa ali kusali yetu, kaha natufungulula Satana. (Samu 118:6) Chakutalilaho, mutu uze asonekele Samu 118 ahichilenga muukalu wauvulu. Apwilenga navaka-kole vavavulu kuhakilako vene navaze vapwile navihela vyavilemu (vesi 9, 10). Shimbu jimwe vamwivwishilenga chikela (vesi 13). Kaha nawa Yehova amuzangamishile chikuma (vesi 18). Chipwe ngocho, ou muka-kwimba jisamu ambile ngwenyi: “Kangweshi kwivwa womako.” Uno vyuma muka vyamulingishile ahone kwivwa woma? Atachikijile ngwenyi numba tuhu Yehova amuzangamishile, oloze ou Ise wamwilu amuzanga chikuma. Ou muka-kwimba jisamu akunyukile ngwenyi chamokomoko naukalu mwamona, Kalunga kenyi wazangi mwapwanga wakulizanga kumukafwa.—Samu 118:29.

4. Vyuma muka vyakutwivwisa woma vize tunahase kuhonesa kachi nge natukunyuka ngwetu Kalunga atuzanga?

⁴ Twatela kukunyuka ngwetu Yehova atuzanga mutu himutu. Kupwa vakukunyuka nachitulingisa tuhonese vyuma vino vitatu vyavula kutwivwisa woma: (1) kulizakamina mwakuwanyina vyuma vyakukafwa jitanga jetu, (2) woma wavatu, (3) nawoma wakufwa. Vatu twavulukanga mupalangalafu yakulivanga vahonesele woma mwomwo vakunyukile ngwavo Kalunga avazanga.

5. Vyuma muka vinahase kulingisa mutwe watanga alizakamine chikuma? (Talenu muvwimbimbi wahalipapilo lyahelu.)

⁵ Mutwe watanga uze apwa muka-Kulishitu eji kumonanga mulimo wakutondela vaka-tanga yenyi vyakulikafwa navyo kupwa waulemu. (Chimo. 1, 5:8) Kachi nge mwapwa mutwe watanga pamo mwalizakaminyine ngwenu navamifumisa hamilimo halwola lwamusongo wachihita. Pamo mwalizakaminyine mwakuwanyina tanga yenu vyakulya nakwakusavala. Kaha nawa pamo mwalizakaminyine ngwenu nge navamifumisa hamilimo, kaha kamweshi kukawana milimo yekako. Ngana mwaNestor napuwenyi María vaze twavulukanga hakavanga, nayenu pamo mwashinganyekele ngwenu chinahase kupwa chachikalu kuyoyela hatujimbongo twatundende. Satana nahonesanga vatu vavavulu kuzachila Yehova mwomwo yakulizakamina havyuma kanevi.

6. Vyuma muka vize Satana asaka tufwelele?

⁶ Satana asaka kutulingisa tufwelele ngwetu Yehova katuzangako kaha nawa keshi kutukafwa mangana tutondele vaka-tanga yetu vyakulikafwa navyoko. Echi chinahase kutulingisa tushinganyeke kulinga kala vyuma mangana vahone kutufumisa hamilimo, numba tuhu vyuma kana navitulingisa tuhokole jindongi jamuMbimbiliya.

7. Vyuma muka atufwelelesa Yesu?

⁷ Yesu atachikiza kanawa Ise kuhambakana omwo vamutachikiza kukala mutu, kaha atufwelelesa ngwenyi Kalunga ketu ‘atachikiza vyuma tuli nakusaka shimbu kanda tumulombevyo.’ (Mateu 6:8) Yesu atachikiza nawa ngwenyi Yehova alizanga kutukafwa. Etu vaka-Kulishitu twapwa vamutanga yaKalunga. Shikaho tunahase kufwelela ngwetu, hakuwana nge Yehova apwa Mutwe watanga, mwakavangiza mazu aze asoneka hali WaChimoteu 1, 5:8.

8. (a) Vyuma muka navitukafwa tuhone kulizakamina ngwetu katweshi kuhasa kutondela vaka-tanga yetu vyakulikafwa navyoko? (Mateu 6:31-33) (b) Kweseka namuvwimbimbi uli halifwo 16, tunahase kulondezeza ngachilihi vapwevo nalunga vaze vananehela ndumbwetu wapwevo vyakulya?

⁸ Kachi nge natukunyuka ngwetu Yehova  atuzanga kaha nawa azanga jitanga jetu, kaha natufwelela ngwetu mwatuhana vyuma vyakulikafwa navyo. (Tangenu Mateu 6:31-33.) Yehova asaka kutukafwa, kaha chikupu vene apwa Muka-kuhana namuchima wakusuuluka. Omu atengele mavu, atengele navyuma vize navitukafwa mangana tuyoyenga. Ahakileko nawa vyuma vyeka hano hamavu mangana tulivwisengavyo kuwaha. (Kupu. 2:9) Numba tuhu tunatachikiza ngwetu tuli navyuma vyavindende vyakulikafwa navyo, oloze twatela kutachikiza ngwetu tuli navyuma kana mwomwo Yehova ikiye natuhanevyo. (Mateu 6:11) Shimbu yosena twatela kutachikiza ngwetu vyuma vize mwatuhana Yehova vinapu vyavilemu chikuma kuhambakana vize natulisuula kuseza oholyapwa. Kaha kulutwe nawa mwakatuhana kuyoya chahaya myaka. Echi chikiko chishina atachikijile Nestor napuwenyi María.—Isa. 65:21, 22.

9. Vyuma muka munahase kulinangula kuli Nestor napuwenyi María?

⁹ Nestor napuwenyi María vapwile nachiyoyelo chamwaza muColombia. Vambile ngwavo: “Twashinganyekele kwashiwisako chiyoyelo chetu mangana tutohwese mulimo wetu wakwambulula. Oloze twevwile woma ngwetu katweshi kusuuluka kuyoyela hatujimbongo twatundendeko.” Uno chuma muka chavakafwile vahone kulizakamina? Vashinganyekelenga hajijila jajivulu jize Yehova avasolwelelengamo zangi. Vakunyukile ngwavo Yehova mwavazakamanga lika, ngocho vechele kuzata milimo yajimbongo jajivulu. Valanjishile zuvo yavo nakuya kungalila kuze kwapwile nakusakiwa vaka-kwambulula Wangana. Uno veji kwivwanga ngachilihi havyuma vasakwile kulinga? Nestor ambile ngwenyi: “Tunamono omwo mazu ahali Mateu 6:33 anatesamo. Katwahonene chuma numba chimwe chakulikafwa nachoko. Kaha oholyapwa twapwa jino vakuwahilila chikuma.”

10. Mwomwo ika vatu veji kwivwilanga vakwavo vatu woma?

¹⁰ Putu vene kunyima, vatu vatwama natato yakulinga vakwavo mwamupi. (Kwambu. 8:9) Chakutalilaho, vatu vamwe veji kuzachisanga wata wavo mujila yakuhenga, kaha veka vapwa vikenya. Vaka-shikola vamwe nawa veji kutukananga vakwavo nakuvayanjisa, kaha nawa vatu vamwe mutanga veji kupupulanga vaka-tanga yavo. Echi chikiko chalingisa vatu vevwenga woma vakwavo vatu. Uno kwivwa vatu woma chinahase kuhana ngachilihi Satana kengililo?

11-12. Uno Satana eji kuwananga ngachilihi kengililo nge natwivwa vatu woma?

 ¹¹ Satana eji kuwananga kengililo nge mwatumona tuli nakwivwa vatu woma mangana atulingise tulitwamine kwambulula mujimbu nakuhona kulinga vyuma vyeka vize atulweza Yehova tulinge. Satana nalingisa jifulumende jituyanjise nakukanyisa mulimo wetu. (Luka 21:12; Kuso. 2:10) Muno mukaye kaSatana vatu vavavulu vanatanjisa mijimbu yamakuli hali Vinjiho jaYehova. Vatu vaze veji kwitavilanga mijimbu kana vanahase kututoleka chipwe vene kutuyanjisa. (Mateu 10:36) Uno tweji kulikomokelanga hatufuta twaSatana tahi? Nduma. Mwomwo azachishilenga tufuta kana namulikulukaji lyamyaka lyakulivanga.—Vili. 5:27, 28, 40.

¹² Kwivwa woma wakutufumbukila kuli vaka-fulumende keshi kakiko kaha kafuta ali nakuzachisa Satanako. Vatu vamwe veji kwivwanga woma hakushinganyeka vyuma navalinga vausoko wavo kachi nge navapwa Vinjiho. Shimbu jimwe veji kwivwanga chikuma woma hachuma kana kuhambakana kwivwa woma wakuvaveta. Hakuwana nge vazanga vausoko wavo, ngocho vasaka kuvakafwa mangana vatachikize Yehova nakumuzanga. Veji kwivwanga kupihya nge vausoko wavo navahanjika vyuma vyavipi hali Kalunga wamuchano nahali vangamba jenyi. Shimbu jimwe, vausoko vaze veji kukananga muchano, mukuhita chalwola veji kupwanga jino Vinjiho jaYehova. Uno natulinga ngachilihi nge vausoko wetu navalitwamina kulikata nayetu mwomwo yakulinangula muchano?

13. Uno kukunyuka ngwetu Kalunga atuzanga nachitukafwa ngachilihi tumike nge vausoko wetu navatufumbukila? (Samu 27:10)

¹³ Mazu atwama hali Samu 27:10 anahase kutuvendejeka. (Tangenu.) Nge natutachikiza ngwetu Yehova atuzanga chikuma, kaha katweshi kwivwa woma wakutufumbukilako. Tunafwelela ngwetu mwakatufweta halukakachila lwetu. Yehova mwatuhana vyuma vyosena twasakiwa mukuyoya, nakutukafwa tuunde muchima, nakupwa vakuwahilila nakupandama chikuma kuli ikiye. Omu mukiko amwene Biniam, uze twavulukanga hakavanga.

14. Vyuma muka natulinangula kuli Biniam?

¹⁴ Biniam apwile Chinjiho chaYehova numba tuhu atachikijile ngwenyi navamuyanjisanga. Atachikijile ngwenyi Yehova amuzanga. Jino achishinganyekenu omwo kutachikiza chuma kana chamukafwile ahone kwivwa vatu woma. Ambile ngwenyi: “Luyanjisa lwatohwele chikuma kuhambakana namuze ngwashinganyekele. Oloze ngwevwile chikuma  woma kungufumbukila kuli vausoko wami kuhambakana kunguyanjisa kufulumende. Ngwalizakaminyine ngwami kupwa Chinjiho chaYehova nachivwisa kupihya tata uze ketavako nakulingisa vausoko wami vashinganyeke ngwavo ngumutu wamokomoko.” Chipwe ngocho, Biniam akunyukile ngwenyi Yehova mwatwalaho kuzakama vatu vaze vamuzanga. Ambile ngwenyi: “Ngwashinganyekelenga hajila Yehova nakafwilangamo vakwetu vomike muukalu wauhutu nakuvamona ulumbi nakuvalukuka. Ngwatachikijile ngwami nge nangutwalaho lika kupwa wakushishika kuli Yehova, kaha mwangukafwa. Omu vangukashile mukamenga mapapa kakavulu nakunguyanjisa, ngwamwene ngwami Yehova eji kutukafwanga nge natupwa lika vakushishika kuli ikiye.” Yehova apwile Ise yaBiniam wamwenemwene, kaha vatu jaYehova vapwile vausoko wenyi vamwenemwene.

15. Mwomwo ika lwola lumwe tunahase kwivwa woma wakufwa?

¹⁵ Mbimbiliya yahanjika ngwayo kufwa chapwa muka-kole. (Koli. 1, 15:25, 26) Tunahase kwivwa woma wakufwa chikumanyi nge tunaviji chikuma chipwe nge vausoko wetu vakiko vali nakuviza. Mwomwo ika tweji kwivwilanga woma wakufwa? Mwomwo Yehova atutengele namuchima wakufwila kuyoya haya myaka. (Kwambu. 3:11) Kwivwa woma wakufwa nachitukinga. Chakutalilaho, chinahase kutukafwa tusakule kanawa vyakulya twatela kulya, nakulinyuka mujimba nakutonda vandotolo navitumbo vyakutukafwa, nakulihenda kuvyuma vize navihaka kuyoya chetu muponde.

16. Uno Satana eji kuwananga ngachilihi kengililo nge natwivwa woma wakufwa?

¹⁶ Satana atachikiza ngwenyi twamona kuyoya kupwa chachilemu. Ashinganyeka ngwenyi tunahase kusuula kala vyuma chipwe vene kujiha usoko wetu naYehova mangana tukinge kuyoya chetu. (Yopa 2:4, 5) Oloze vishinganyeka kana vyakuhenga. Chipwe ngocho, hakuwana nge Satana “atwama nangolo jakuneha kufwa,” ngocho eji kuzachisanga kwivwa woma kufwa mangana tuseze Yehova. (Hepe. 2:14, 15) Shimbu jimwe, vaka-kukundwiza Satana veji kwivwisanga woma vangamba jaYehova ngwavo navavajiha kachi nge navatwalaho lika kwitavila vyuma vafwelela. Kaha shimbu jikwavo nawa, Satana nahase kuzachisa jijila jakutukilamo mangana tuhokole jindongi jaKalunga. Vandotolo navausoko vaze kavetavako vanahase kutushinyinyika twitavile kutuhaka manyinga, chuma chize nachihokola jishimbi jaKalunga. Kaha nawa vatu vamwe vanahase kutushinjila twitavile jijila jeka jakutukilamo jize jalimbalaka najindongi jamuMbimbiliya.

17. Kweseka nachisoneka chaWavaka-Loma 8:37-39, mwomwo ika katwatela kwivwa woma wakufwako?

¹⁷ Numba tuhu katwasaka kufwako, oloze twatachikiza ngwetu Yehova mwatwalaho lika kutuzanga numba nge tunafu. (Tangenu Wavaka-Loma 8:37-39.) Yehova eji kwanukanga lika masepa jenyi nakuvamona nge vachili lika vavatonyi numba tuhu vafwa lyehi. (Luka 20:37, 38) Afwila kukavasangula. (Yopa 14:15) Yehova atuhana ndando yayinene mangana tukapwe “nakuyoya chahaya myaka yosena.” (Yowa. 3:16) Twatachikiza ngwetu, chikupu vene Yehova atuzanga chikuma nakutuzakama. Shikaho nge tunaviji chipwe nge navasaka kutujiha, katweshi kuseza Yehovako oloze natutwalaho kupendamina hali ikiye mangana atuvendejeke nakutuhana mangana nangolo jakumika. Omu mukiko alingile Valérie nalunga lyenyi.—Samu 41:3.

18. Vyuma muka namulinangula kuli Valérie?

¹⁸ Omu Valérie apwile namyaka yakusemuka 35, vamuwanyine namusongo wakasa yayipi chikuma. Achishinganyekenu omu kutachikiza  ngwenyi Yehova amuzanga chamukafwile ahone kwivwa woma wakufwa. Ambile ngwenyi: “Omu ngwatachikijile ngwami nguli namusongo wakasa, ami nalunga lyami twahombele chikuma. Ngwasakiwile kungupula numba nguyoye. Numba tuhu ngwayile kuvandotolo vakulisezaseza, oloze vosena vakanyine kungupula chakuzeneka kunguhaka manyinga. Ngwevwile woma chikuma, oloze ngwakanyine kunguhaka manyinga mwomwo yajishimbi jaKalunga. Yehova nangusolwelanga zangi mukuyoya chami chosena. Aha jino nayami ngwasakile kusolola ngwami ngwamuzanga. Lwola lwosena vangulwezelenga mijimbu yayipi kuli ndotolo, ngwafwilililenga lika kwivwisa Yehova kuwaha nakuhonesa Satana. Kutwala muze vahashile kungupula chakuzeneka kunguhaka manyinga. Numba tuhu misongo yami yichili lika nakutwalililaho, oloze Yehova natukafwenga lika. Hakukunguluka chakusongo yachalumingo twapwile nacho shimbu kanda vanguwane namusongo wakasa, twashimutwilile chihande chamuKaposhi Kakutalila chakwamba ngwavo ‘Pwenu Vakumika Omu Namulitalasana naVihuli Makumbi Ano.’ c Chihande kana chatuvendejekele chikuma. Twachitangilenga mapapa kakavulu. Vihande vyakufwana ngana, nakulinganga vyuma vyakushipilitu chinakafwe yami nalunga lyami tuunde muchima nakusakula kanawa vyakulinga.”

19. Vyuma muka navisoloka kalinwomu?

¹⁹ Vaka-Kulishitu mukaye kosena vanafungululanga vyeseko nakufungulula Liyavolo hakuvakafwa kuli Yehova. (Petu. 1, 5:8, 9) Nayenu munahase kulinga mwomumwe. Kalinwomu Yehova atwaminyine Yesu navaze mwayula navo mangana venyeke “milimo yaLiyavolo.” (Yowa. 1, 3:8) Kufumaho, vatu jaKalunga vaze navakamuzachilanga hano hamavu kaveshi “kukevwa woma chipwe kulizuzukilako.” (Isa. 54:14; Mika 4:4) Shikaho, oholyapwa twatela kuzata nangolo mangana tuhonese woma.

20. Vyuma muka navitukafwa tuhonese woma?

²⁰ Twatela kutwalaho lika kufwelela ngwetu Yehova atuzanga, kaha nawa eji kukinganga vangamba jenyi. Chuma nachitukafwa tulinge ngocho shina kushinganyekanga omwo Yehova akingile vangamba jenyi kunyima nakulwezangako vakwetu vyuma kana. Kaha nawa twatela kushinganyeka omwo Yehova natukafwe tumike muvyeseko. Chikupu vene, tunahase kuhonesa woma hakutukafwa kuli Yehova.—Samu 34:4.