VAHEPELEU vaze vatwaminenga muLifuchi lyaLushiko, mwaka waputukilenga halwola luze vaputukilenga kulima nakutumba jimbuto. Kaha makumbi ano lwola kana lwalitombola nakakweji waSeptember chipwe October.

Vatu valavilenga kushimbula chakakweji kupendamina hakushimbula chakakweji kufuma haze mwamweka (kushimbula kana chambachilenga makumbi 29 chipwe 30). Kaha nawa valavilenga kusuhwa chamwaka kuzachisa likumbi lize lyeji kunehanga musana. Kusuhwa chamwaka chize valavilenga kuzachisa kwalumuka chakakweji kufuma haze mwamweka chapwilenga chachihi kuhambakana chalikumbi. Shikaho vasakile kuwanako jila yakulavilamo yize nayilingisa kulava chosena echi chivali chilitombole. Valingilenga ngocho hakuhakilako makumbi chipwe kakweji, pamo shimbu kanda mwaka ukwavo uputuke. Jila kana eyi yalingishile kulava kanechi chilitombole nangonde yakutumba chipwe yakwaha.

Mumakumbi aMose, Kalunga alwezele vatu jenyi vaIsalele ngwenyi, kakweji watete mumwaka mwakapwa Avive chipwe Nyisane kuchivatuko chavula. (Kulo. 12:2; 13:4) Kweseka namakumbi ano, lwola kana lwalitombola nakakweji waMarch chipwe April. Mukakweji waNyisane mukiko vaIsalele valingilenga chiwanyino, kaha hachiwanyino kana vahanyinenga Kalunga jimbuto jakulivanga jambale.—Kulo. 23:15, 16.

Mutu alinangula chikuma Emil Schürer asonekele mumukanda wenyi wakwamba ngwavo The History of the Jewish People in the Age of Jesus Christ, (175 B.C.–A.D. 135) ngwenyi: “Chapwile chachashi kutachikiza lwola lwakuhakilako kakweji mukulava kana.” Ambile nawa ngwenyi: “Chilika chapaseka vachilingilenga mukakweji waNyisane (Nyisane 14) chize vatelele kulinga nge kakweji napu jino wosena wamuundu kufuma hakumweka chenyi, hanyima yalikumbi lize kweji kupwanga jiola 12 jamusana najiola 12 jaufuku kuchivatuko chavula . . . Nge vanahete kusongo yamwaka kaha hinavamona ngwavo chilika chapaseka nachikapwako shimbu kanda likumbi lize kweji kupwanga jiola 12 jamusana najiola 12 jaufuku, kaha vahakililengako kakweji mukwavo [wakusokesa 13] shimbu kanda kakweji waNyisane.”

Vinjiho jaYehova veji kuzachisanga jila yoyimwe hakuwana likumbi lyakulinga Kulya chaMwata chaChingoloshi lize lyeji kupwanga kuchivatuko chavula, kaha nawa lyakulitombola naNyisane 14 kweseka nakalenda YavaHepeleu. Vatu muvikungulwilo mukaye kosena veji kuvalwezelanga chimweza likumbi kana. a

Uno vaHepeleu vatachikijilenga ngachilihi lwola akuminenga kakweji nalwola aputukilenga kakweji mukwavo? Makumbi ano munahase kutachikiza hakutala hakalenda wakupulita chipwe wahalikina. Oloze kushikulu kachapwile ngochoko.

Mumakumbi aNowa, kakweji hikakweji apwilenga namakumbi 30. (Kupu. 7:11, 24; 8:3, 4) Kutwala muze, mulwola lwavaHepeleu tukweji vamwe kavahetelenga hamakumbi 30 koko. Kaha nawa mulwola kana kakweji aputukilenga hakumweka chakakweji. Valingilenga ngocho nge munahichi makumbi 29 chipwe 30 kufuma haze aputukile kakweji nafumuho.

Halwola lumwe Ndavichi naYonatane vavulukile vyakuputuka chakakweji hakwamba ngwavo: “Hamene nakukapwa chiwanyino chakumweka chakakweji.” (Samwe. 1, 20:5, 18) Chasoloka nge mulwola lwavo, vatu valavililenga chimweza tukweji. Uno vaIsalele vavavulu vatachikijilenga ngachilihi ngwavo, kakweji weka naputuka? Mukanda uze vasonekamo jishimbi javaYuleya jize vahanjikilenga hakanwa navisemwa vyavo wasolola mijimbu yimwe. Ou mukanda wasolola ngwawo omu vaYuleya vafumine muundungo muMbavilone, vaka-Sunendeline (vaka-zango yayinene yavaYuleya) vakiko vakafwilenga vaIsalele kutachikiza chuma kana. Hatukweji 7 vaze vaIsalele valingilenga viwanyino, ava vaka-zango valiwanyinenga mukakweji kamwe halikumbi lyakusokesa 30. Ava malunga vapwile namulimo wakutachikiza likumbi mwaputuka kakweji mukwavo. Uno valingilenga ngachilihi ngocho?

Malunga vaze vahakile havihela vyakulunduka muYelusalema vatalilenga mwilu naufuku mangana vatachikize likumbi mwamweka kakweji. Kaha nge vanamono ngwavo kakweji namweke, valwezelenga vaka-zango yaSunendeline. Nge ava vaka-zango vanakunyuka ngwavo kuli unjiho wauvulu uze unasolola nge kakweji namweke, kaha vavilikilenga likumbi  naputuka kakweji mukwavo. Uno chapwilenga ngachilihi nge vaze malunga kavamwene kumweka chakakwejiko mwomwo yamavwi chipwe mbundu? Vatachikijile jino ngwavo kakweji valimo napu namakumbi 30 kaha kakweji weka pamo naputuka.

Uze mukanda wajishimbi navisemwa vyavaYuleya walumbunwine nawa ngwawo vyuma vize vakashile vaka-Sunendeline vavivilikilenga hakuwika kakahya haPili yaMilive kwakamwihi naYelusalema. Vawikilenga nawa kakahya havihela vyosena vyakulunduka muIsalele mwosena mangana vatanjise mujimbu kana. Kutwala muze vatuminenga tunganda mangana vatandakanyise mujimbu. Ngocho mujimbu wakuputuka chakakweji weka vautandakanyishile muYelusalema mwosena nakuvihela vyeka vyosena muIsalele. Kaha vosena valingilenga viwanyino vyamumwaka halwola lwolumwe.

Munahase kutala chati yili mwishi mangana yimikafwe mwivwishise kanawa tukweji, naviwanyino, najingonde vyamulwola lwavaIsalele.