1. Vyuma muka vyeji kukafwanga vatu jaYehova vatwaleho lika kumulemesa chamokomoko naukalu vali nakuhitamo?

 MBIMBILIYA yahanjika ngwayo, tuli nakuyoyela “mulwola lwalukalu.” (Chimo. 2, 3:1) Vatu jaYehova veji kumonanga ukalu uze veji kumonanga vatu vosena mukatwamino kamyaka yino. Oloze nawa, veji kumonanga ukalu wakuvafumbikila nakuvayanjisa mwomwo yakuzachila Yehova. Vyuma muka navitukafwa tutwaleho lika kulemesa Yehova chamokomoko naukalu kana? Chuma chachinene shina, mwomwo twatachikiza Yehova kupwa “[hi]Kalunga ou ayoya.” —Yele. 10:10; Chimo. 2, 1:12.

2. Uno kutachikiza ngwetu Yehova apwa Kalunga ou ayoya nachitukafwa ngachilihi?

² Yehova kwatwama kaha nawa eji kumonanga ukalu wosena tweji kumonanga. Ngocho lwola lwosena afwila kutukafwa. (Miji. 2, 16:9; Samu 23:4) Kumona Yehova kupwa hiKalunga ou ayoya nachitukafwa tufungulule vyeseko vize navituwana. Tutalenu omwo chuma kana chakafwile Mwangana Ndavichi.

3. Uno Ndavichi atalishile mulihi hakwamba ngwenyi “Yehova ayoya”?

³ Ndavichi atachikijile Yehova nakupendamina hali ikiye. Ndavichi alombelenga kuli Yehova mangana amukafwe omu vamuhangasanyinenga kuli vaka-kole jenyi kuhakilako vene naMwangana Saulu. (Samu 18:6) Ndavichi ahanjikile ngwenyi, “Yehova ayoya” omu Kalunga akumbulwile kulomba chenyi nakumuyovola. (Samu 18:46) Ndavichi hakuhanjika mazu kana kapwile nakusolola kaha ngwenyi Kalunga kwatwamako. Mukanda umwe wahanjika ngwavo, mazu ahanjikile Ndavichi asolola nge afwelelele Yehova hakupwa “kalunga ou ayoya uze eji kukafwanga vatu jenyi.” Vyuma ahichilemo Ndavichi vyamukafwile atachikize ngwenyi Kalunga ayoya,  kaha echi chamukolezezele chikuma atwaleho lika kuzachila Yehova nakumwalisa.—Samu 18:​28, 29, 49.

4. Uno kumona Yehova kupwa Kalunga ou ayoya nachitunganyalisa ngachilihi?

⁴ Tunahase kuzachila Yehova natwima kachi nge natukunyuka ngwetu apwa Kalunga ou ayoya. Natupwa nawa nangolo jakutukafwa tumike muvyeseko natumona nakutukunyula tutwaleho lika kuzata nangolo mumilimo yaKalunga. Nachitukafwa nawa tutwaleho lika kupwa masepa jaYehova.

KALUNGA OU AYOYA MWAMIJIKIJISA

5. Vyuma muka navitujikijisa nge tuli nakumona ukalu? (Wavaka-Fwilipi 4:13)

⁵ Tunahase kumika muvyeseko vyosena kachi nge natwanuka ngwetu Yehova ayoya kaha nawa mwatukafwa. Anukenu ngwenu vyeseko vyosena vize tweji kuhitangamo, Kalunga avimona kupwa vyavyashi kufungulula. Hakuwana nge apwa Wangolo Josena ngocho mwatuhana ngolo jakutukafwa tumike. (Tangenu Wavaka-Fwilipi 4:13.) Echi cheji kutujikijisanga kachi nge tuli nakumona ukalu. Kushinganyeka omwo Yehova natukafwenga muvyeseko vyavindende, nachitukunyula tufwelele ngwetu mwatukafwa nawa muvyeseko vyavinene natumona.

6. Vyuma muka ahichilemo Ndavichi omu apwile mukweze vize vyamukafwile afwelele chikuma Yehova?

⁶ Shinganyekenu havyuma vivali ahichilemo Ndavichi vize vyamulingishile afwelele chikuma Yehova. Omu Ndavichi apwile kafunga wakanyike, Ulusu naNdumba vakwachile mikoko jaise. Hamapapa osena awa avali, Ndavichi ahamukile kununga vaze tunyama vavali nakuyovola mikoko jaise. Chipwe ngocho Kashinganyekele ngwenyi natesamo chuma kana mungolo jenyiko. Atachikijile ngwenyi Yehova ikiye namukafwe. (Samwe. 1, 17:​34-37) Ndavichi kavulyamine vyuma kana evi ahichilemoko. Kushinganyeka havyma kana chamukafwile afwelele ngwenyi, Kalunga ou ayoya mwakamujikijisa nakulutwe.

7. Uno Ndavichi ashishikile havyuma muka, kaha echi chamukafwile ngachilihi afungulule Ngolyate?

⁷ Mukuhita chalwola nawa, pamo omu apwile mukweze, Ndavichi ayile kuchilombo chamaswalale javaIsalele. Omu ahetele kuze awanyine maswalale vanalizakamina chikuma mwomwo Ngolyate kaFwilishite ahulamishilenga “Lizavu lyamaswalale javaIsalele” (Samwe. 1, 17:​10, 11) Maswalale vevwile woma mwomwo vashishikilenga hali kaFwilishite nahavyuma avasawilenga. (Samwe. 1, 17:​24, 25) Oloze Ndavichi ashishikile havyuma vyeka. Ndavichi atachikijile ngwenyi, Ngolyate kapwile nakuhulamisa lizavu lyamaswalale javaIsaleleko, oloze apwile nakuhulamisa “lizavu lyamaswalale jaKalunga ou ayoya.” (Samwe. 1, 17:26) Chikupu vene, Ndavichi ashinganyekelenga chikuma hali Yehova. Ndavichi afwelelele ngwenyi Kalunga uze amukafwile omu apwile kafunga, ikiye cheka mwamukafwa muukalu kanou. Kupendamina hali Kalunga chakafwile Ndavichi alwenga naNgolyate nakumufungulula.—Samwe. 1, 17:​45-51.

8. Vyuma muka navitukafwa tukunyuke ngwetu Yehova mwatukafwa nge tuli nakumona ukalu? (Talenu nawa muvwimbimbi.)

⁸ Nayetu tunahase kumika muvyeseko kachi nge natwanuka ngwetu Kalunga ou ayoya alizanga kutukafwa. (Samu. 118:6) Tunahase kufwelela ngwetu Yehova mwatukafwa hakushinganyeka havyuma atulingililile kunyima. Tangenunga mijimbu yamuMbimbiliya yize nayimyanukisa omwo Yehova ayowele vaka-kumulemesa. (Isa. 37:​17, 33-37) Talenu nawa hakeyala yetu yajw.org mangana mumone omwo Yehova nakafwenga vandumbwetu vamakumbi ano. Kaha nawa anukenunga lwola luze Yehova amikafwile omu mwapwile muukalu. Kanda namulizakaminako kachi nge kamwahichile muukalu wakukomwesa wakufwana nge kuzunga naUlusu chipwe naNdumbako. Mwomwo ika? Tachikizenu ngwenu Yehova namilingilanga vyuma vyavivulu mukuyoya chenu. Namikoko mupwenga mumasepa jenyi.  (Yowa. 6:44) Noholyapwa vene ngana tachikizenu ngwenu ikiye namikafwe mutwaleho lika kupwa mumuchano. Shikaho mulombenu amikafwe mwanuke lwola luze akumbulwile kulomba chenu nomu amikafwile halwola lwakutamo chipwe kumikafwa mumike muvyeseko. Kushinganyeka havyuma kana nachimikafwa mukunyuke ngwenu Yehova mwatwalaho lika kumikafwa.

9. Vyuma muka twatela kwanuka nge tuli muvyeseko? (Vishimo 27:11)

⁹ Nge natumonanga Yehova kupwa hiKalunga ou ayoya, kaha natumonanga vyeseko mujila yamwaza. Mujila muka? Nge tuli mucheseko kaha twatela kushishika hachihande chize chapwa chachilemu chikuma chize chakwata hali Yehova naSatana. Vyuma ahanjikile Satana vyasolola nge etu vangamba jaYehova nge tuli nakumona ukalu kaha tunahase kuseza Yehova. Shikaho vyuma natulinga nge tuli muukalu navisolola numba nge tuli nakwivwisa Yehova kuwaha nyi chiku. (Yopa 1:​10, 11; tangenu Vishimo 27:11.) Oloze nge natufungulula vyeseko vyetu kaha natusolola ngwetu twazanga Yehova nakusolola nawa ngwetu Satana apwa muka-makuli. Kutala vali nakumifumbukila kujifulumende chipwe muli nakumona ukalu wakuhona jimbongo chipwe vatu kuhona kwakula kanawa kumujimbu chipwe ukalu weka tahi? Nge mukiko kaha anukenu ngwenu ukalu wenu watela kumilingisa mulinge vyuma vize navivwisa Yehova kuwaha. Anukenu nawa ngwenu, keshi kumyechelela vamyeseke kuhambakana noho hakumina ngolo jenuko. (Koli. 1, 10:13) Mwamihana ngolo jakumikafwa mumike.

KALUNGA OU AYOYA MWAKAMIFWETA

10. Vyuma muka Kalunga ou ayoya mwakalingila vaze veji kumulemesanga?

¹⁰ Yehova apwa Muka-Kufweta vaze veji kumulemesanga. (Hepe. 11:6) Oholyapwa eji kutukafwanga tuunde muchima nakutukafwa tupwenga vakusuuluka, kaha kulutwe mwakatuhana kuyoya chahaya myaka. Shikaho twatalilila kuli Yehova mwomwo twakunyuka ngwetu atwama nangolo namuchima wakufwila kutufweta. Kukunyuka kana cheji kutukafwa tutwaleho lika kuzata noho hakumina ngolo jetu mumilimo yaYehova ngana muze valingilenga vangamba jenyi kunyima. Omu mukiko alingile Chimoteu wamulikulukaji lyamyaka lyakulivanga.—Hepe. 6:​10-12.

11. Vyuma muka vyakunywile Chimoteu azate nangolo muchikungulwilo? (WaChimoteu 1, 4:10)

 ¹¹ Tangenu WaChimoteu 1, 4:10. Chimoteu atalililenga kuli Kalunga ou ayoya. Echi chikiko chamulingishile akilikite hakuzachila Yehova navakwavo. Mujijila muka? Kaposetolo Paulu amukolezezele apwenga muka-kunangula wamwenemwene mumulimo wakwambulula namuchikungulwilo. Paulu amulwezele nawa ahanenga chakutalilaho chamwaza kuli vakwavo vaka-kwitava, vapwa vakulwane chipwe vanyike. Vamuhanyine nawa mulimo waukalu kuhakilako vene nakuhuhumuna vatu mujila yazangi. (Chimo. 1, 4:​11-16; Chimo. 2, 4:​1-5) Chimoteu atachikijile ngwenyi numba tuhu milimo yenyi kaveshi kuyimona kuli vatu chipwe kuyimona kupwa yayilemuko oloze Yehova mwakamufweta.—Loma 2:​6, 7.

12. Vyuma muka vinahase kukunyula vakulwane muchikungulwilo vatwaleho lika kuzata milimo yavo? (Talenu nawa mivwimbimbi.)

¹² Makumbi ano, vakulwane muchikungulwilo navakiko vatela kufwelela ngwavo Yehova eji kumonanga milimo yavo yamwenemwene veji kuzatanga nakuyimona kupwa yayilemu. Vakulwane vavavulu vaze vatwama namulimo wakufunga nakunangula, nakwambulula mujimbu wamwaza veji kukundwizanga nawa mulimo wakutungatunga nakukafwa vaze vali muukalu wakulijila. Kaha vakulwane vamwe vatwama mumazavu avakakumenekela vaveji chipwe muji Komiti jaKulivwasana naVipatela. Vakulwane vaze veji kulisuulanga mangana vazate milimo kana vamona chikungulwilo kupwa chaYehova keshi chamutuko. Echi chikiko cheji kuvalingisanga vazate milimo yavo namuchima wavo wosena nakufwelela nawa ngwavo Yehova mwakavafweta hamilimo yavo.—Kolo. 3:​23, 24.

13. Uno Yehova eji kwivwanga ngachilihi hakukilikita chetu mangana tumuzachile?

¹³ Vandumbwetu vamwe kavapwa vakulwaneko. Oloze tuvosena tuli navyuma tunahase kuhana Yehova. Yehova eji kwivwanga kuwaha chikuma kachi nge natumuzachila nahakumina ngolo jetu. Eji kumonanga wana tweji kuhananga wakukundwiza mulimo wamukaye  kosena numba upwa waundende. Eji kwivwanga kuwaha kachi nge natwimika livoko mangana tukumbululeho hakukunguluka numba tuhu twatwama nasonyi. Kaha nawa eji kwivwanga kuwaha nge natuliula tutenga twavakwetu nakuvakonenela. Twatela kufwelela ngwetu Yehova amona mulimo tuli nakuzata kupwa waulemu numba tuhu natwivwa nge katweshi nakumuzachila chikumako. Yehova amizanga chikuma mwomwo yakukilita chenu kaha nawa mwakamifweta.—Luka 21:​1-4.

TWALENUHO LIKA KUPWA MASEPA JAKALUNGA OU AYOYA

14. Uno kupwa nausoko wakukola naYehova nachitukafwa ngachilihi tutwaleho lika kupwa vakushishika? (Talenu nawa muvwimbimbi.)

¹⁴ Nge natupwa nausepa wakukola naYehova kaha nachitukafwa tutwaleho lika kupwa vakushishika kuli ikiye. Omu mukiko chapwile kuli Yosefwe. Apwile wakumika hakukana kulinga ujila. Kasakile kwivwisa kupihya Kalungako mwomwo amumwene kupwa hisepa lyenyi. (Kupu. 39:9) Twatela kupwanga nalwola lwakulomba kuli Yehova nakulinangulanga Mazu enyi mangana tupwenga nausoko wakukola nayikiye. Kulinga chuma kana nachizamisa usepa wetu naYehova. Nge natupwa nausoko wakukola naYehova kaha natulondezeza Yosefwe hakuhona kulinga vyuma vize navwisa Yehova kupihya.—Yako. 4:8.

15. Chishina muka tunahase kulinangula kuli vaIsalele kutalisa kuvyuma vyavasolokele mupambo? (WavaHepeleu 3:12)

¹⁵ Vaze veji kuvulyamanga ngwavo Yehova apwa Kalunga ou ayoya cheji kupwa chachashi kuli vakiko kumusosoloka. Achishinganyekenu havyuma vyasolokele kuli vaIsalele omu vapwile mupambo. Vatachikijile ngwavo Yehova kwatwama, oloze vaputukile kuhuhwasana numba nge mwavazakama. Vahulishile nachihula chino ngwavo: “Uno Yehova ali nayetu tahi, nyi nduma?” (Kulo. 17:​2, 7) Echi chavalingishile valikange kuli Kalunga. Shikaho tweji kufwilanga kulihenda kukukavangiza chakutalilaho chavo chachipi.—Tangenu WavaHepeleu 3:12.

16. Vyuma muka vinahase kweseka lufwelelo lwetu?

¹⁶ Kaye keshi kutulingisanga chitukaluhwile kutwaho lika kupwa tumasepa jaYehova. Vatu vavavulu veji kwambanga ngwavo kakwatwama Kalungako.  Kaha kakavulu nawa vaze kavakavangiza jishimbi jaKalungako vasoloka nge vali nakufukila. Ngocho lufwelelo lwetu vanahase kulweseka kachi nge natumona vatu vali nakufukila. Numba tuhu tunahase kuhanjika ngwetu Kalunga kwatwama, oloze tunahase kuhuhwasana numba nge mwatukafwa. Mutu uze asonekele Samu 73 aputukile kuhuhwasana hachuma kana. Amwenenga vatu vaze vamujingilikile vaze kavakavangijilenga jishimbi jaKalungako vali nakulivwisa kuwaha kuyoya. Kutwala muze ou muka-kusoneka aputukile kuhuhwasana numba nge chapwa chakutamo kuzachila Kalunga.—Samu. 73:​11-13.

17. Vyuma muka navitukafwa tutwaleho lika kupwa masepa jaYehova?

¹⁷ Vyuma muka vyakafwile muka-kwimba jisamu olole vishinganyeka vyenyi? Ahunananyinenga havyuma vinahase kusolokela vatu vaze navavulyama Yehova. (Samu 73:​18, 19, 27) Ashinganyekele nawa hanganyo yeji kufumangamo hakuzachila Kalunga. (Samu 73:24) Nayetu nawa tunahase kushinganyeka havyuma vyamwaza natulingila Yehova. Kaha tunahase kushinganyeka omwo chili chiyoyelo chetu kachi nge katwazachila Yehovako. Nge natulinga ngocho kaha nachitukafwa tutwaleho lika kupwa vakushishika mukuyoya chetu nakukukulula ngana muze akukukulwile muka-kwimba jisamu ngwenyi: “Chinapu chamwaza kuli ami kupandama kuli Kalunga.”—Samu 73:28.

18. Mwomwo ika katwatela kwivwila woma wavyuma navisoloka kulutweko?

¹⁸ Tunahase kumika mukala ukalu tunahase kumona mumakumbi ano akukuminyina, mwomwo tweji kuzachilanga “Kalunga ou ayoya kaha nawa wamuchano.” (Teso. 1, 1:9) Kalunga ketu atuzakama ngocho mwatwalangaho lika kutukafwa. Hakuwana nge akafwilenga vangamba jenyi kunyima, ngocho nayetu makumbi ano mwatukafwanga. Kalinwomu tumone luyando lwalunene luze kanda lusolokengaho lyehi hano hamavu. Oloze katwatela kulizakaminako mwomwo Yehova mwakapwa nayetu. (Isa. 41:10) Shikaho tuvosena tunahase “kumika chikuma nakwamba ngwetu: ‘Yehova ikiye muka-kungukafwa.”’—Hepe. 13:​5, 6.