Twatela kupwa nalufwelelo numba twivwise Kalunga kuwaha. Chipwe ngocho, Mbimbiliya yamba ngwayo, “lufwelelo kalweshi kuli vatu vosenako.” (Teso. 2, 3:2) Kaposetolo Paulu apwile nakuhanjika havatu vaze vapwile nakumuyanjisa, vaze vapwile “vatu vaukenya, vakuhuka,” kaha asakile kumukinga kuvatu kana. Oloze mazu ahanjikile kutalisa kulufwelelo atalishile nawa nakuli vatu veka. Vatu vamwe kavetavila ngwavo kwatwama Tengiko. (Loma 1:20) Vatu vamwe veji kwambanga ngwavo vafwelela mutu wangolo chipwe chuma chimwe changolo. Oloze elu keshi lukiko lufwelelo lwasakiwa mangana twivwise Yehova kuwahako.

Twatela kukunyuka ngwetu Yehova kwatwama, kaha apwa muka-kufweta vaze vakwechi lufwelelo lwakukola. (Hepe. 11:6) Lufwelelo lwatwama hamukana wamihako yashipilitu yajila. Mutu nahase kupwa nashipilitu yajila hakulomba kuli Yehova. (Luka 11:​9, 10, 13) Jila yikwavo yayilemu yinahase kutukafwa tupwenga nashipilitu yajila shina kutanganga Mazu aKalunga vahwima. Tunahase nawa kushinganyeka havyuma natutanga nakuvizachisa mukuyoya chetu. Shipilitu yaYehova yinahase kutukafwa twalumuneko chiyoyela chetu nakutukafwa tupwenga nalufwelelo luze nalwivwisa Yehova kuwaha.