Vihula Vyakufuma Kuli Vaka-Kutanga
Unjiho muka watukafwa tukukulule ngwetu mazu akwamba ngwavo “nauvalamanga,” aze atwama hali Samu 12:7, atalisa kuli “vaka-kukalikiza” (vesi 5)?
Mujimbu wamukapetulu wosena wasolola nge Samu 12:7 yatalisa kuli vaka-kukalikiza.
Hali Samu 12:1-4, hatwama mazu akwamba ngwavo, “vaka-kushishika vanahu muli vatu.” Kaha hali Samu 12:5-7 ambile ngwenyi:
“‘Yehova nambe ngwenyi: “Hakuwana nge vaka-kukalikiza vali nakuvashinyinyika,
Kaha vaka-kuhutwa nawa vali nakulishimwoka,
Ngocho nangukatuka, mukiko mwanambe Yehova.
Nanguvalwila kuli vaze vali nakuvasaula.”
Mazu aYehova apwa atoma.
Apwa nge palata yize vanatomesa mulilungu mapapa 7.
Ove Yehova, nauvalamanga,
Nauvakinganga mutu himutu kuchisemunwino chino haya myaka yosena.”
Vesi 5 yasolola vyuma ahanjikile Kalunga kutalisa kuli “vaka-kukalikiza.” Ambile ngwenyi mwavalwila.
Vesi 6 yamba nawa ngwayo “mazu aYehova apwa atoma,” apwa “nge palata yize vanatomesa.” Vaka-Kulishitu vakushishika vetavila mazu kana kupwa amuchano.—Samu 18:30; 119:140.
Tutalenu vesi yinakavangizaho yaSamu 12:7, yize yamba ngwayo: “Ove Yehova, nauvalamanga, nauvakinganga mutu himutu kuchisemunwino chino haya myaka yosena.” Uno mazu akwamba ngwavo “nauvalamanga” atalisa kuka?
Hakuwana nge mazu amuvesi 7 akavangiza mazu amuvesi 6 akwamba ngwavo “mazu aYehova,” ngocho jila valumwinamo mazu kana mujiMbimbiliya jimwe, chinahase kulingisa vatu vamwe vakukulule ngwavo vesi kana yalumbununa nge Kalunga eji ‘kulamanga’ mazu enyi. Kaha nawa twatachikiza vene ngwetu Kalunga nakinginga Mbimbiliya numba tuhu vaka-kole vanasakenga kuyinongesa.—Isa. 40:8; Petu. 1, 1:25.
Oloze tachikizenu nawa ngwenu Yehova nakinginga nawa vatu vaze vavuluka muvesi 5. Yehova mwatwalaho lika kukafwa “vaka-kukalikiza” navaze vali “nakumona vihuli,” nakuvalwila.—Yopa 36:15; Samu 6:4; 31:1, 2; 54:7; 145:20.
Uno mazu akwamba ngwavo “nauvalamanga” atwama muvesi 7 atalisa kuka?
Mujimbu wahali Samu 12 watalisa kuli vaka-kukalikiza.
Samu 12:1 yavuluka ukalu vahichilemo “vaka-kushishika” vaze vongelenga kuli vatu vakuhuka. Kufumaho, tweji kuwanangaho mazu aze asolola nge Yehova mwakakatuka nakunongesa vatu vaze vali nakuzachisa lilimi lyavo mujila yakuhenga. Eyi samu yatufwelelesa ngwayo, tunahase kufwelela ngwetu Yehova mwalwila vatu jenyi mwomwo mazu enyi apwa atoma.
Shikaho vesi 7 yasolola nge Yehova mwalamanga nakukinga vatu vakukalikiza kuvatu vakuhuka.
Mazu vazachisa muvesi 7 asolola mazu atwama muvisoneka vyachiHepeleu vyaMasorete. Kaha Visoneka vyaSeptuagint (Visoneka vyachiHepeleu Valumwine muchiHelase) vazachisa lizu “etu” mapapa kavali, lize lyatalisa kuvatu vakushishika vakukalikiza navaze vali nakumona vihuli. Kaha vesi 7 yakukulula ngwayo, “mutu himutu” wakushishika navakamukinga “kuchisemunwino chino,” kulumbununa vatu vaze veji kushinyinyikanga vakwavo. (Samu 12:7, 8) Mbimbiliya yamulilimi lyaAramaic Targums yalumuna vesi 7 ngwayo: “Ove MWATA, naukinga vaka-kwoloka, nauvalamanga kuchisemunwino chino haya myaka. Nauvalamanga kujisali josena kuze navayanga vaka-kuhuka, vaze vapwa nge lizambo uze eji kukokanga manyinga avana vavatu.” Echi chasolola nge mazu atwama hali Samu 12:7 atalisa kuli vaka-kukalikiza.
Chikupu vene, vesi 7 yahana lutalililo ‘vatu vakushishika’ vafwelele ngwavo Kalunga mwakavakinga.
