SHIMBU kanda Yesu ayenga mwilu, alwezele tumbaji twenyi ngwenyi: “Namukapwanga muvinjiho jami . . . nakuvihela vyakwakusuku vyahamavu.” (Vilinga 1:8) Uno kachi navahasa ngachilihi kwambulula mukaye kosena?

Martin Goodman, mutu uze alinangula chikuma, uze nawa azachila haOxford University, ambile ngwenyi, “mulimo kanou wahandula vaka-Kulishitu kuli vaka-kwitava cheka chamuwangana wavaLoma, kuhakilako vene nachavaYuleya.” Yesu ambulwilenga mujimbu wamwaza kuvihela vyakulisezaseza. Vaka-Kulishitu vamuchano vatelelele kulondezeza Yesu hakwambulula “mujimbu wamwaza waWangana waKalunga” kuvihela vyosena. Vatondelenga vatu vaze vasakile kutachikiza muchano. (Luka 4:43) Evi vikiko vyalingishile mulikulukaji lyamyaka lyakulivanga mupwenga “vaposetolo,” lizu lize lyalumbununa vatu vaze vanatumu kulinga vyuma vimwe. (Mako 3:14) Yesu alwezele vaka-kumukavangiza ngwenyi: “Yenunga mukanangule vatu vakumafuchi osena vakapwe tumbaji.”—Mateu 28:18-20.

Makumbi ano, vaposetolo jaYesu 12 kaveshi hano hamavuko, oloze vangamba jaYehova vavavulu vali nakulondezeza ava vaposetolo hakuzata mulimo wakwambulula. Omu veji kuvalwezanga kuya nakwambulwila kuvihela vili nakusakiwa vaka-kwambulula, veji kwambanga ngwavo: “Yami uno. Ngutume.” (Isaya 6:8) Vandumbwetu vamwe vanayi kumafuchi akwakusuku, chikumanyi vaze vahita muShikola yaNgileyate. Vamwe vanalukilanga kuvihela vyeka mulifuchi lyavo nakwambulwilako. Vandumbwetu vavavulu vanalinangula lilimi lyeka mangana vakafwe vandumbwavo muchikungulwilo chipwe mulizavu lyazachisa lilimi kana. Kachapwa chachashi kulinga vyuma kaneviko, oloze  ava vandumbwetu vanalisuulanga kuzata nangolo mangana vasolole nge vazanga Yehova navakwavo vatu. Vanawahisanga kanawa vyuma nakuzachisa lwola lwavo, nangolo javo, najimbongo javo, mangana vambulule mujimbu wamwaza kuvihela kuze kuli nakusakiwa vaka-kwambulula mujimbu. (Luka 14:28-30) Vyuma vali nakukilikita ava vandumbwetu vyavilemu chikuma.

Katweshi kuhasa tuvosena kuya kuze kuli nakusakiwa vaka-kwambulula chipwe kulinangula lilimi lyekako. Oloze tuvosena tunahase kulondezeza vamishonali hakuzata natwima muchikungulwilo chetu.

Vaka-Kulishitu vamulikulukaji lyamyaka lyakulivanga vazachilenga mulimo wakwambulula natwima, numba tuhu vavavulu vapwilenga hamembo avo, kaha nawa kavapwilenga vamishonaliko. Paulu alwezele Chimoteu ngwenyi: “Zata mulimo wamuka-kwambulula mujimbu wamwaza, tesamo kanawa mulimo wove.” (WaChimoteu 2, 4:5) Mazu kana atalishile kuli vaka-Kulishitu vakulivanga, kaha nawa ali nakuzata nakuli yetu makumbi ano. Vaka-Kulishitu vosena vatela kukavangiza lushimbi lwakwambulula mujimbu waWangana nakunangula vatu vapwenga tumbaji. Kuli jijila jajivulu jize tunahase kulondezezelamo vamishonali hakuzata natwima muvikungulwilo vyetu.

Chakutalilaho, omu vamishonali veji kuyanga kumafuchi eka, veji kuwananga vyuma vyakulihandununa navize vyakumembo avo, ngocho veji kuzatanga nangolo mangana vejilile chiyoyelo chakuze vanayi. Numba tuhu katweshi kuhasa kwalukila kuchihela kuze kuli nakusakiwa vaka-kwambululako, oloze tunahase kuwanako jijila jeka jakukafwilamo vatu. Chakutalilaho, mu 1940, vandumbwetu vavakolezezele vawaneko likumbi limwe muchalumingo lyakwambulwila mumikwakwa. Uno mwesekaho lyehi kwambulwila mumikwakwa chipwe kuzachisa mesa yakushindumuna tahi? Chishina tuli nakulumbununa shina echi, Kutala munalisuula kuwanako jijila jajihya jakwambulwilamo mujimbu wamwaza tahi?

Nge namupwa namuchima wakulisuula, kaha namuzata mulimo wakwambulula natwima. Vandumbwetu vosena vaze veji kuyanga kuvihela kuze kuli nakusakiwa vaka-kwambulula chipwe kulinangula lilimi lyeka, kakavulu vapwa vaka-kwambulula vakutamo vaze vanahase kukafwa chikuma vandumbwavo muchikungulwilo. Chakutalilaho, vapwa vandundumutete mumulimo wakwambulula. Vamishonali nawa veji kutwaminyinanga vandumbwavo muchikungulwilo palanga nomu navamona ngwavo vandumbwavo vamuchikungulwilo kana  vanatemo kulinga ngocho. Nge wapwa undumbwetu walunga wakumbapachisa, kutala uli “nakusaka” kulisuula uzachile vandumbwove muchikungulwilo chenu kupwa muka-kuzachila chipwe kalama tahi?—WaChimoteu 1, 3:1.

Tunahase nawa kukafwa vandumbwetu mujijila jeka. Tuvosena muchikungulwilo, navanyike navakulwane, tunahase ‘kukolezeza’ vakwetu vaka-kwitava vaze vali nakusakiwa kukafwa.—Wavaka-Kolose 4:11, kwinyikila chamwishi.

Nge tuli nakusaka kukafwa vandumbwetu, kaha twatela kuvatachikiza kanawa. Mbimbiliya yatukolezeza ‘tulihakenga michima’ navandumbwetu, chipwe kushinganyeka havyuma vili nakusakiwa kuli vandumbwetu omu tweji kupwanga kukukunguluka. (WavaHepeleu 10:24) Echi kachalumbununa nge twatela kufwila kutachikiza navyuma vize katwatela kutachikiza hali vandumbwetuko. Oloze chalumbununa nge twatela kutachikiza vandumbwetu navyuma vili nakusakiwa kuli vakiko. Tunahase kuvakafwa vyuma vinakusakiwa, nakuvavendejeka, nakuvakolezeza navyuma yahanjika Mbimbiliya. Lwola lumwe, kunahase kupwako vyuma vimwe vize navisakiwa kaha vaka-kuzachila natulama kukafwa vandumbwetu. (Wavaka-Ngalesha 6:1) Olozenyi tuvosena tunahase kukafwa vandumbwetu vatushinakaji najitanga jize jili nakumona vihuli.

Ndumbwetu Salvatore vamukafwile mujila kaneyi. Hakuwana nge apwile muukalu wakuhona jimbongo, alanjishile vikumba vyenyi vyosena. Kaha alizakaminyine chikuma hatanga yenyi. Ngocho tanga yimwe muchikungulwilo yamwene nge ou ndumbwetu apwile muukalu chikuma. Ndumbwetu Salvatore vamuhanyine jimbongo nakumukafwa hamwe kaha napuwenyi vawane milimo. Kaha nawa vashikaminenga navo nachingoloshi nakuvakolezeza. Ngocho vatungile usepa wamwaza. Oholyapwa jino eji jitanga japwa jakuwahilila hakwanuka vyuma valingililenga hamwe halwola luze vamwenenga ukalu.

Vaka-Kulishitu vamuchano kavalangisa kulweza vakwavo vyuma vafwelelako. Twatela kulondezeza Yesu nakulweza vatu vatachikize vyuma vyamwaza ashika Kalunga. Numba natuhasa kuya kuze kuli nakusakiwa vaka-kwambulula nyi nduma, oloze tuvosena twatela kuzata nangolo mangana tukafwe vakwetu muchikungulwilo. (Wavaka-Ngalesha 6:10) Nge natuhana vakwetu vyuma vyamwaza, kaha natupwanga vakuwahilila ‘nakutwalaho lika kwima mihako mumilimo yamwaza yosena.’—Wavaka-Kolose 1:10; Vilinga 20:35.