1. Uno milimo yaKalunga yinatesangamo ngachilihi putu vene kushikulu?

YEHOVA naYesu vanazachilanga hamwe nakulinunga kufuma vene kukuputuka kutenga vyuma. Yehova atengele Yesu shimbu kanda atenge vyuma vyosena. Kaha Yesu azachilenga naYehova kupwa “kuluwa muka-kuzata.” (Vishimo 8:30) Vangamba jaYehova navakiko vazachililenga hamwe navakwavo. Chakutalilaho, Nowa natanga yenyi vazachililile hamwe hakusonga wato. Kufumaho, vaIsalele vazachilililenga hamwe hakutunga tavanaku, nakuyipatwojola, nakuyitwala kuchihela cheka. Kaha nawa hatembele, vembililenga hamwe myaso yamwaza yakwalisa Yehova. Vatu jaYehova vahashilenga kulinga vyuma vyosenevi mwomwo vazachilililenga hamwe.—Kuputuka 6:14-16, 22; Kulava 4:4-32; Mijimbu 1, 25:1-8.

2. (a) Vyuma muka vyasolwele nge vaka-Kulishitu vakulivanga vapwile vakulipwila? (b) Vihula muka natushimutwila?

² Vaka-Kulishitu vamulikulukaji lyamyaka lyakulivanga navakiko vazachililenga hamwe. Kaposetolo Paulu alumbunwine  ngwenyi numba tuhu vapwilenga nauhashi wakulihandununa nakuzata nawa milimo yakulisezaseza, oloze vapwilenga vakulinunga. Vosena vakavangijilenga Twamina yavo, Yesu Kulishitu. Paulu avafwanyishile kuvilyo vyamujimba vize vyeji kuzachilanga hamwe. (Tangenu Wavaka-Kolinde 1, 12:4-6, 12.) Nyi ngachilihi etu makumbi ano? Natuhasa ngachilihi kuzachila hamwe nakulinunga mumulimo wakwambulula, namuchikungulwilo, namujitanga?

3. Vyuma muka vamumwenesele kaposetolo Yowano?

³ Mulikulukaji lyamyaka lyakulivanga, kaposetolo Yowano vamumwenesele vangelo 7 vaze vapwile nakwimba jineta. Omu kangelo wamuchitanu embile luneta lwenyi, Yowano amwene “tanganyika uze aholokelele hamavu kufuma mwilu.” Kaha uze “tanganyika” azachishile sapi hakusokolola kuwina wakuzeneka kukuma. Chakavanga, wishi walovokele muze muwina, kaha muze muwina mwalovokele vambimba vavavulu. Vambimba kana kavenyekele mitondo chipwe kala vyuma vitutako, oloze valukukile vatu vaze kavapwile “nakatachikijilo kaKalunga hajiholo javoko.” (Kusoloka 9:1-4) Yowano atachikijile ngwenyi, vambimba makumbi vatwama nalwenyeka chikuma, mwomwo venyekele vyuma vyavivulu muEjipitu mumakumbi aMose. (Kulovoka 10:12-15) Vaze vambimba amwene Yowano vemanyinako vaka-Kulishitu vawavisa vaze vanambululanga mujimbu wakuhuhumuna vatu vamukwitava chamakuli. Kaha mayongomena avatu vaze vatalilila kukayoya hano hamavu navakiko vali nakwambulula mujimbu kanou. Vosena valinunga nakuzachila hamwe mulimo kana. Ou mulimo unakafwe vatu vavavulu vaseze kwitava chamakuli nakusokoka kungolo jaSatana.

4. Mulimo muka waunene vali nawo vatu jaKalunga makumbi ano, kaha vanahase kuutesamo ngachilihi?

⁴ Tuli namulimo wakwambulila vatu “mujimbu wamwaza” mukaye kosena shimbu kanda kukuma chizenga. Ou himulimo waunene chikuma. (Mateu 24:14; 28:19, 20) Twatela kusanyika vatu vosena ‘vali nalipwila’ vanwenga “meya akuyoya,” kulumbununa nge twatela kunangula muchano wamuMbimbiliya kuvatu vosena vaze navasaka kuutachikiza. (Kusoloka 22:17) Oloze tunahase kutesamo mulimo kanou nge ‘natulinunga nakuzachila hamwe’ navandumbwetu muchikungulwilo.—Wavaka-Efwesu 4:16.

5, 6. Mulimo wakwambulula weji kutukafwanga ngachilihi tulinunge hamwe navandumbwetu?

⁵ Twatela kulongesanga kanawa vyuma numba twambulile vatu vavavulu. Jindongi veji kutuhananga kuchikungulwilo jeji kutukafwanga tutesemo mulimo wetu. Hakukumisa kuliwana chakuya muwande, tweji kuyanga jino nakuhanjika navatu vyamujimbu wamwaza waWangana. Mukaye kosena tweji kuhananga vatu mikanda yayivulu yize yahanjika haMbimbiliya. Lwola lumwe veji  kutulwezanga twazane mukwambulula chakulipwila. Kwazana mukwambulula kanechi chakulipwila cheji kutulingisanga tulinunge hamwe navandumbwetu mukaye kosena vaze vali nakuzata mulimo kanou. Kaha nawa, tweji kuzachilanga hamwe navangelo vaze veji kukafwanga vatu jaKalunga mulimo wakwambulula mujimbu wamwaza.—Kusoloka 14:6.

⁶ Tweji kuwahililanga chikuma hakutanga mukanda waYearbook muze vasoneka vyuma vyamwaza tuli nakutesamo mumulimo wetu wakwambulula mukaye kosena. Achishinganyekenu nawa omu tweji kulinunganga mukaye kosena halwola tweji kusanyikanga vatu kukukunguluka chetu changalila. Tuvosena tweji kwivwililanga kuvyuma vyovimwe hakukunguluka kanechi. Vihande navimweso vyeji kupwangako vyeji kutukafwanga tuzachile chikuma Yehova. Kaha nawa, mwaka himwaka tweji kulinunganga hamwe navandumbwetu mukaye kosena haKwanuka Kufwa chaMwata. (Wavaka-Kolinde 1, 11:23-26) Tweji kulikungululanga halikumbi limwe lyaNyisane 14, hakulembalemba chalikumbi mangana tusakwilile Yehova havyuma atulingila, nakukavangiza nawa lushimbi lwaYesu. Shimbu kanda likumbi lyaKwanuka Kufwa chaMwata lihete, tweji kuzachilanga hamwe mangana tusanyike vatu vavavulu vakapwe kuchilika kanechi chachilemu.

7. Vyuma muka tweji kutesangamo hakuzachila hamwe navakwetu?

⁷ Mbimba umwe kaha keshi kuhasa kulinga vyuma numba vimweko. Chochimwe nayetu, katweshi kuhasa kwambulila vatu vosena uka wetuko. Oloze hakuwana nge twazachila hamwe navakwetu, ngocho, tweji kwambulilanga vatu vavavulu vyaYehova nakukafwa vatu vamwe vamwalise nakumuvumbika.

8, 9. (a) Chakutalilaho muka azachishile Paulu hakunangula vaka-Kulishitu vapwenga vakulinunga? (b) Vyuma muka navitukafwa tuzachile hamwe nachikungulwilo?

⁸ Paulu alumbunwinyine vaka-Efwesu omu valongesa chikungulwilo, kaha avalwezele vosena muchikungulwilo ngwenyi vatela “kukula muvyuma vyosena.” (Tangenu Wavaka-Efwesu 4:15, 16.) Paulu azachishile chakutalilaho chavilyo vyamujimba hakulumbununa ngwenyi muka-Kulishitu himuka-Kulishitu nahase kulingisa chikungulwilo chilinunge hamwe nakulondezeza Yesu uze apwa Twamina wachikungulwilo. Ambile ngwenyi, vilyo vyamujimba vyosena vyeji kuzachilanga hamwe “kuhichila mulinungililo hilinungililo lize lyeji kuzatanga mulimo walyo.” Ngocho, numba tupwa tuvakulwane chipwe tuvanyike, tupwa vakulikangula kumujimba chipwe chiku, tuvosena mutu himutu twatela kulihulisa ngwetu: Uno vyuma muka ngwatela kulinga?

⁹ Yesu atongola vakulwane vatwaminyine vikungulwilo, kaha asaka etu tuvavumbike nakulinga vyuma vize navatulweza. (WavaHepeleu 13:7, 17) Lwola lumwe chapwa chachikalu kulinga ngocho. Oloze tunahase kulomba Yehova atukafwe. Kaha shipilitu  yenyi yajila nayitukafwanga tulinge kala vyuma navatulweza vakulwane. Achishinganyekenu nawa omu tunahase kukundwiza chikungulwilo nge natupwa vakulinyisa nakuzachila hamwe navakulwane. Echi nachineha kuunda muchikungulwilo nakulizanga nawa chikuma navandumbwetu.

10. Mujila muka vaka-kuzachila veji kukafwanga chikungulwilo chilinunge hamwe? (Talenu muvwimbimbi wakulivanga.)

¹⁰ Vaka-kuzachila navakiko veji kukundwizanga chikungulwilo chilinunge hamwe. Veji kuzatanga nangolo mangana vakafwe vakulwane, kaha tweji kuvasakwililanga chikuma hamilimo yavo. Chakutalilaho, vaka-kuzachila veji kutambwokesanga vangeji vaze veji kwizanga kukukunguluka, nakumona nawa ngwavo vandumbwavo vali namikanda yakuya nayo mumulimo wamuwande. Veji kuzatanga nawa nangolo mangana vawahise Zuvo yaWangana nakuyilama yipwenga yitoma. Nge natuzachila hamwe navava vandumbwetu, kaha natulinunga hamwe nakuzachila Yehova mujila yakulonga.—Esekesenuko Vilinga 6:3-6.

11. Vakweze vanahase kukafwa ngachilihi chikungulwilo chilinunge hamwe?

¹¹ Vakulwane vamwe muchikungulwilo vanazate chikuma hamyaka yayivulu. Oloze pamo kaveshi nakuhasa kuzata milimo yosena vazachilengako mwomwo yaushinakaji. Ngocho vandumbwetu vavakweze vanahase kuvakafwa. Nge navavanangula, kaha vanahase kuzata milimo yayivulu muchikungulwilo. Kaha nge vaka-kuzachila navazata nangolo, kulutwe vanahase kukapwa vakulwane. (WaChimoteu 1, 3:1, 10) Vakweze vamwe vaze vapwa tulama vanazovoloka chikuma kushipilitu. Kaha vanapu hitulama vakujinguluka vaze vanakukafwa vandumbwetu muvikungulwilo vyavivulu. Tweji kuwahililanga nge natumona vakweze navalisuula nakukafwa vandumbwetu.—Tangenu Samu 110:3; Muka-kwambulula 12:1.

12, 13. Vyuma muka vinahase kukafwa vatu vosena mutanga vazachile hamwe?

¹² Mujila muka tunahase kukafwa vatu mujitanga jetu valinunge hamwe? Kulemesa Kalunga mwaTanga chalumingo hichalumingo nachitukafwa. Nge visemi navana navalinangwilanga hamwe vyaYehova, kaha navalizanga chikuma. Halwola kana, vanahase kuliwahisa vyuma navakahanjika muwande nakuvalingisa jino vatachikize kanawa vyuma navakahanjika. Nge navevwa mutu himutu mutanga mwahanjika hamuchano wamuMbimbiliya, nakumona ngwavo vatu vosena mutanga vanazange Yehova nakusaka kumwivwisa kuwaha, kaha vosena navalizanga mutanga.

¹³ Uno valunga napwevo vakulimbata vanahase ngachilihi kuzachila hamwe nakulinunga? (Mateu 19:6) Nge vosena navazanga Yehova nakumuzachila, kaha navapwa vakuwahilila nakulinunga muulo wavo. Vatela nawa kulizanga umwe namukwavo, ngana mwaApalahama naSala, Isaka naLaveka, Elekana naHana. (Kuputuka  26:8; Samwele 1, 1:5, 8; WaPetulu 1, 3:5, 6) Nge valunga napwevo navalinga ngocho, kaha navapwa vakulinunga nakupandama chikuma kuli Yehova.—Tangenu Muka-kwambulula 4:12.

14. Vyuma muka munahase kulinga mangana ulo wenu uzame, nge muka-mahyenu kazachila Yehovako?

¹⁴ Mbimbiliya yahanjika hatoma ngwayo, katwatela kumbata chipwe kusomboka kumutu uze kazachila Yehovako. (Wavaka-Kolinde 2, 6:14) Oloze kuli vandumbwetu vamwe vaze vambata chipwe kusomboka kumutu uze kapwa Chinjiho chaYehovako. Vamwe valinangwile muchano oku vanengila lyehi muulo, kaha vaka-mahyavo kavalumuka nakupwa Vinjihoko. Veka nawa vambachile chipwe kusomboka kumutu uze azachililenga Yehova, oloze muka-mahyenyi himwafuma muchikungulwilo. Ngocho vaka-Kulishitu vaze vali muukalu kanou, vatela kuzata nangolo mangana vahase kulama malo avo nakufwila kukavangiza vyuma yahanjika Mbimbiliya. Shimbu jimwe, kachapwa chachashiko. Chakutalilaho, Mary nalunga lyenyi David vazachililenga hamwe Yehova. Kutwala muze, David alitwaminyine kuyanga kukukunguluka. Chipwe ngocho, Mary atwalileho lika kupwa pwevo wamwenemwene nakusolola vilinga vyavaka-Kulishitu. Anangwile nawa vana venyi 6 vatachikize Yehova, nakuyanga lika kukukunguluka chachikungulwilo nachangalila. Omu mwahichile myaka yayivulu, vaze vana vakolele nakufuma hembo, oloze Mary atwalileho lika kuzachila Yehova numba tuhu chapwile chachikalu kulinga ngocho. Kufumaho, David aputukile kutanganga jimangazini jize Mary amuhanyinenga. Kutwala muze, David aputukile cheka kukunguluka. Kaha muzukulyenyi wamyaka yakusemuka 6 amulaminyinyinenga chitwamo kuZuvo yaWangana, kaha nge kaka yenyi David wauchi, ou kanyike amulwezelenga ngwenyi, “Ove kaka, ngwasakanga chikuma kukumona kukukunguluka.” Omu mwahichile myaka 25, David akindulukile kuli Yehova, kaha oholyapwa jino vawahilila hakuzachila cheka hamwe Yehova.

15. Vatu vaze vanashimbula muulo vanahase kukafwa ngachilihi vakweze vaze vanalimbate kalinwomu?

 ¹⁵ Makumbi ano, Satana ali nakufumbukila jitanga. Echi chikiko chatela kulingisa valunga napwevo vazachila Yehova vafwile kulinunga hamwe. Chamokomoko namyaka munatwame muulo, mwatela kushinganyeka havyuma munahase kuhanjika nakulinga mangana muzamise ulo wenu. Nge munashimbula chikuma muulo, kaha munahase kupwa chakutalilaho chamwaza kuli vakweze vaze vanalimbate kalinwomu. Pamo munahase kuvasanyika mangana vapwenga kuchilongesa chenu chakulemesa Kalunga mwatanga. Ngocho navamona ngwavo, numba tuhu vatu vanatwame myaka yayivulu muulo, oloze vatela kulisolwela zangi nakulinunga hamwe.—WaChituse 2:3-7.

16, 17. Vyuma muka vatalilila vangamba jaKalunga vakulinunga?

¹⁶ Omu vaIsalele vayilenga kuviwanyino vyavo muYelusalema, vazachililenga hamwe navakwavo. Vawahishilenga vyuma vyosena vize vyasakiwilenga haungeji wavo. Kaha vatambukililenga hamwe nakulikafwa navandumbwavo. Omu vahetelenga hatembele, valemeselenga Yehova nakumwalishila hamwe. (Luka 2:41-44) Makumbi ano nawa, omu tuli nakulizanga tukayoye mukaye kakahya, twatela kulinunga nakufwila kuzachila hamwe navakwetu. Kutala munahase kuwanako jijila jeka jakulingilamo ngocho tahi?

¹⁷ Vatu mukaye makumbi ano vali nakulikokojwesanga nakulizungisa havyuma vyavivulu. Oloze etu twasakwilila Yehova hakutukafwa tutwame mukuunda nakwivwishisa muchano. Vatu jenyi mukaye kosena vali nakumulemesa mujila yize etavila. Vanapu vakulinunga hamwe, chikumanyi mumakumbi ano akukuminyina. Tuvosena tuli nakukanduka “kupili yaYehova,” ngana muze apolofwetele Isaya naMika. (Isaya 2:2-4; tangenu Mika 4:2-4.) Natukawahilila chikuma kulutwe omu vatu vosena hamavu ‘navakalinunga hamwe’ nakulemesa Yehova.