1, 2. (a) Vyuma muka vyeji kulingisanga vatu jaKalunga vawahilile makumbi ano? (b) Uno visemi navakulwane muchikungulwilo vanahase kukafwa ngachilihi vakweze vatachikize mwalumbunukila lumbapachiso?

KALAMA umwe ahanjikile kuli Christopher, kanyike wamyaka yakusemuka 12 ngwenyi: “Ngwakutachikiza putu vene kuukemba wove. Ngunawahilila hakwivwa ngwove, uli nakusaka vakumbapachise. Mana ngukuhulise, ‘Mwomwo ika uli nakusaka kukumbapachisa?’” Kwapwile vyuma vimwe vyalingishile ou kalama ahulise chihula kana. Tweji kuwahililanga chikuma hakumona vakweze vavavulu vali nakuvambapachisa mwaka himwaka. (Muka-kwambulula 12:1) Chipwe ngocho, visemi navakulwane muchikungulwilo vasaka kumona vakweze navalisakwila vavene kuvambapachisa, nakutachikiza kanawa mwalumbunukila lumbapachiso.

² Mbimbiliya yatunangula ngwayo, kulihana nalumbapachiso vyapwa maputukilo achiyoyelo chachihya chamuka-Kulishitu.  Kuyoya kanechi nachilingisa Yehova atukisule chikuma, oloze Satana nawa mwatufumbukilanga. (Vishimo 10:22; WaPetulu 1, 5:8) Echi chikiko chatela kulingisa visemi vawanengako lwola lwakunangula vana vavo mangana vatachikize omwo chalumbunukila kupwa kambaji kaKulishitu. Nge vana vakwechi visemi vaze kavapwa vaka-Kulishituko, kaha vakulwane muchikungulwilo vatela kukafwa vana kana mangana vatachikize omwo chalumbunukila kulihana nalumbapachiso. (Tangenu Luka 14:27-30.) Ngana muze mutu mwawahisa kanawa vyuma mangana atunge zuvo yenyi nakuyikumisa, mukiko nawa vakweze vatela kuwahisa kanawa vyuma shimbu kanda vavambapachise, mangana vatwaleho lika kuzachila Yehova nakashishi “palanga nakusongo.” (Mateu 24:13) Vyuma muka navikafwa vakweze vafwile kuzachila Yehova haya myaka yosena? Manenu tumone.

3. (a) Uno mazu aYesu nawawa aPetulu atunangula ika kutalisa kukulema chalumbapachiso? (Mateu 28:19, 20; WaPetulu 1, 3:21) (b) Vihula muka natushimutwila, kaha mwomwo ika?

³ Uno wapwa umukweze uze ali nakufwila kumumbapachisa tahi? Nge mukiko, kaha unalitomena kulinga chuma chamwaza chikuma. Chapwa hikutokwa chikuma mutu kumumbapachisa nakupwa Chinjiho chaYehova. Lumbapachiso hichuma chize muka-Kulishitu atela kulinga, kaha nawa chachilemu kuli vosena vaze navakayovoka haluyando lwalunene. (Mateu 28:19, 20; WaPetulu 1, 3:21) Nge navakumbapachisa, kaha nausolola hatoma ngwove unashiki kuzachila Yehova haya myaka yosena. Kaha naufwila jino kulama lushiko kana, shikaho vihula vino navikukafwa umone numba nge unatemo kukumbapachisa: (1) Kutala ngunatemo kulisakwila ami ivene chuma kana tahi? (2) Uno nguli namuchima wakulinga chuma kanechi tahi? (3) Kutala ngwatachikiza kanawa mwalumbunukila kulihana kuli Yehova tahi? Tushimutwilenu jino havihula kanevi.

4, 5. (a) Mwomwo ika lumbapachiso kalwapwa kaha lwavakulwaneko? (b) Uno kuzovoloka kushipilitu chalumbununa ika?

⁴ Mbimbiliya kayahanjika ngwayo vatu vakukola kaha vakiko vatela kuya kulumbapachisoko, chipwe kuvuluka myaka yakusemuka atela kupwa nayo mutu numba vamumbapachiseko. Mukanda waVishimo 20:11 wamba ngwawo: “Mwana veji kumutachikijilanga kuvilinga vyenyi numba nge vyamwaza, vyakwoloka nyi chiku.” Ngocho, nakanyike nahase kutachikiza ovyo atela kulingila vyuma vyamwaza nakulihana kuli Tengi yenyi. Shikaho, lumbapachiso lwapwa lwalulemu chikuma kuli mukweze uze nazovoloka kushipilitu nakulihana kuli Yehova.—Vishimo 20:7.

⁵ Uno kuzovoloka kushipilitu chalumbununa ika? Kuzovoloka kushipilitu kachatalisa kumyaka yize mutu ali nayo chipwe kuchivuvu chenyiko, nduma. Mwomwo Mbimbiliya yamba ngwayo, vatu vaze vanakolo lyehi  chipwe vanazovoloka kushipilitu, vanalongesa ‘uhashi wavo wakukekesa vyuma’ mangana vahandunune kwoloka nakuhenga. (WavaHepeleu 5:14) Mutu uze nazovoloka lyehi kushipilitu atachikiza vyuma vyakwoloka nakufwila kulinga vyuma kana. Shikaho kachapwa chachashi kumuhungumwisa alinge vyuma vyavipiko. Kaha keshi kusaka lwola lwosena vamulweze kulinga vyuma vyakwolokako. Ngocho, nachipwa chakutamo kufwelela ngwetu, mukweze navambapachisa mwalinga vyuma vyakwoloka numba tuhu visemi jenyi chipwe vakulwane veka vauchiko.—Esekesenuko Wavaka-Fwilipi 2:12.

6, 7. (a) Lumbununenu ukalu amwene Ndanyele omu apwile muMbavilone. (b) Ndanyele asolwele ngachilihi nge azovolokele kushipilitu?

⁶ Uno vakweze vanahase kuzovoloka kushipilitu mujila kaneyi tahi? Achishinganyekenu hachakutalilaho chaNdanyele. Chasoloka nge, Ndanyele apwile mukweze halwola vamufumishile kuli visemi jenyi nakumutwala kuMbavilone. Chaluvinda, Ndanyele atwaminenga navatu vaze kavakavangijilenga jishimbi jaKalungako. Tuchitalenu jino hachiyoyelo chenyi. Ndanyele vamumwenenga kupwa himutu wakulipwila muMbavilone. Apwilenga havakweze vaze vasakwile vazachilenga mwangana. (Ndanyele 1:3-5, 13) Kaha nawa nge Ndanyele apwile muIsalele, kachi pamo kapwile nachihela chize apwile nacho muMbaviloneko.

⁷ Uno Ndanyele alingile ngachilihi? Kutala etavishile vatu vamuMbavilone valumune vilinga vyenyi chipwe kuzeyesa lufwelelo lwenyi tahi? Nduma. Mbimbiliya yamba ngwayo, omu Ndanyele apwile muMbavilone, ajinyine ‘mumuchima wenyi ngwenyi keshi kulipihisa iveneko,’ kaha nawa ngwenyi, mwalihenda  kuvyuma vyosena vize vyapandama kukulemesa chamakuli. (Ndanyele 1:8) Chikupu vene, Ndanyele asolwele hatoma nge azovolokele kushipilitu.

8. Vyuma muka namulinangula kuli Ndanyele?

⁸ Vyuma muka namulinangula kuli Ndanyele? Mukweze uze nazovoloka kushipilitu apwa wakumika namulwola mwamona ukalu. Keshi kwalumuna vishinganyeka vyenyi, ngana mwalyongono uze eji kulyalumunanga muulombo weka kweseka nachihela alihoko. Keshi kulyonga kupwa sepa lyaKalunga haZuvo yaWangana, kaha kushikola sepa lyavaka-kayeko. Oloze mwapwanga lika wakushishika numba nge ali nakuhita muvyeseko.—Tangenu Wavaka-Efwesu 4:14, 15.

9, 10. (a) Uno mukweze nahase kunganyala ngachilihi nge mwashinganyeka havyuma alingile omu apwile mucheseko? (b) Uno lumbapachiso lwalumbununa ika?

⁹ Pundu vene, tuvosena katwakupukako. Kaha shimbu jimwe tweji kulimbenjanga. (Muka-kwambulula 7:20) Shikaho, nge muli nakusaka vamimbapachise, kaha mwatela kulikekesa enu vavene mumone nge muli nakufwila kukavangiza jishimbi jaYehova. Lihulisenu ngwenu, ‘Kutala ngunononoka Yehova halwola lwalusuku tahi?’ Achishinganyekenu havyuma mwalingile omu mwapwile mucheseko. Kutala mwasakwile kulinga vyuma vyakwoloka tahi? Ngana muze chapwile kuli Ndanyele, kutala kwapwile vatu vamwe vaze vapwile nakumishinjila muzachise uhashi wenu mukaye kano kaSatana tahi? Nge vyeseko vyangana vinamisolokela, kutala munahase kutachikiza kanawa mwaya muchima waYehova nyi?—Wavaka-Efwesu 5:17.

¹⁰ Mwomwo ika chapwila chachilemu kutachikiza mwakukumbulwila vihula kanevi? Mwomwo nachimikafwa mutachikize ngwenu lumbapachiso lwakwata chikuma hakuyoya chenu. Lumbapachiso lweji kusololanga hatoma nge munashiki Yehova lushiko lwalulemu chikuma mukuyoya chenu. Munashiki Yehova ngwenu namumuzanga lika nakumuzachila namuchima wenu wosena haya myaka yosena. (Mako 12:30) Mutu himutu navambapachisa atela kufwila kulama lushiko lwenyi ashikile Yehova.—Tangenu Muka-kwambulula 5:4, 5.

11, 12. (a) Vyuma muka atela kutachikiza mutu uze ali nakusaka kumumbapachisa? (b) Vyuma muka navimikafwa mumone lumbapachiso ngana muze alumona Yehova?

¹¹ Mbimbiliya yamba ngwayo, vatu jaYehova vosena hamwe kaha navakweze “navakalihana” vavene nakumuzachila. (Samu 110:3) Ngocho mukweze uze ali nakusaka kumumbapachisa atela kutachikiza ngwenyi nalisakwila yivene kulinga chuma kana. Echi chasakiwa kulikekesa enu vavane mutachikize vyuma vize mwafwila kulinga, chikumanyi nge mwakolelele mutanga yaVinjiho.

¹² Omu munapunga nakukola, pamo munamononga vatu vavavulu, namasepa jenu, navandumbwenu mutanga, navavambapachisa. Oloze kamwatela kufwila kumimbapachisa mwomwo yakushinganyeka ngwenu myaka yenu yakusemuka yinatemo, chipwe mwomwo yakumona vakwenu vosena vali nakuvambapachisako. Uno munahase kumona ngachilihi  lumbapachiso ngana muze alumona Yehova? Shinganyekenu kanawa mumone ovyo lumbapachiso lwapwila lwalulemu chikuma. Ngocho namuwana vyuma vyamwaza vyavivulu muchihande chino nechi chinakavangizaho.

13. Munahase kutachikiza ngachilihi ngwenu munalisakwila enu vavene kumimbapachisa?

¹³ Kukekesa kanawa kulomba chenu nachimikafwa mutachikize numba nge, kufwila kumimbapachisa chili nakufuma kumuchima wenu. Uno mweji kulombanga kakavulu kuli Yehova tahi? Uno mweji kuvulukanga vyuma muli nakusaka mukulomba chenu tahi? Vyuma namukumbulula vikiko navisolola nge mukwechi usoko wakukola naYehova nyi chiku. (Samu 25:4) Kakavulu, Yehova eji kukumbululanga kulomba chetu kuzachisa Mbimbiliya. Jila yikwavo munahase kusolola nge muli nakufwila chikupu kupandama kuli Yehova nakumuzachila namuchima wenu wosena, shina kukekesa vyuma vyakushipilitu mwanoneka kulinangula. (Yoshuwa 1:8) Lihulisenu ngwenu: ‘Uno lwola lwosena ngweji kulinangulanga Mbimbiliya tahi? Kutala ngweji kufwilanga kwazana muKulemesa Kalunga mwaTanga tahi?’ Vyuma namukumbulula vikiko navimikafwa mumone nge munalisakwila enu vavene kumimbapachisa nyi chiku.

14. Lumbununenu chihandwa chatwama hakulihana kuli Yehova nalumbapachiso.

¹⁴ Vakweze vamwe kavatachikiza kanawa chihandwa chatwama halumbapachiso nahakulihana kuli Yehovako. Vamwe vanahase kwamba ngwavo valihana lyehi kuli Yehova, oloze kanda vachilizange kuvambapachisa. Uno chuma kana chamuchano tahi? Kulihana chapwa kulomba kuli Yehova nakumulweza ngwenu namumuzachilanga haya myaka yosena. Nge navamimbapachisa, kaha namusolola hatoma ngwenu munalihane lyehi kuli Yehova. Ngocho, shimbu kanda vamimbapachise mwatela kutachikiza kanawa omwo chalumbunukila kulihana kuli Kalunga.

15. Uno kulihana chalumbununa ika?

¹⁵ Nge munalihane lyehi kuli Yehova, kaha munamulweze jino ngwenu munapu muvatu jenyi. Munamushiki ngwenu kumuzachila chikiko chuma chachilemu mukuyoya chenu. (Tangenu Mateu 16:24.) Kushika Kalunga mujila kaneyi hichuma chachilemu chikuma. (Mateu 5:33) Uno namusolola ngachilihi ngwenu munapu jino muvatu jaKalunga?—Wavaka-Loma 14:8.

16, 17. (a) Hanenu chakutalilaho chize chasolola mwalumbunukila kupwa tuvatu jaYehova. (b) Vyuma muka mutu eji kulwezanga Yehova hakulihana chenyi?

¹⁶ Tuchitalenu hachakutalilaho chino. Achishinganyekenu sepa lyenu namihane munyau kupwa wana. Mwambata mapapilo asakiwa kumunyau nakumihanawo, nakwamba ngwenyi: “Ou munyau unapu wove, oloze ami yami nangulamanga jisapi. Kaha nawa, ami yami nangupwanga nyamutekenya keshi yoveko.” Uno namwivwa ngachilihi hawana kanou? Uno namumumona ngachilihi ou sepa lyenu namihane ou munyau?

¹⁷ Omu mutu eji kulihananga kuli Yehova, eji kumulwezanga ngwenyi: “Ngunakuhane kuyoya chami, kaha ngunapu nguwove.” Yehova eji kufwelelanga ngwenyi, mutu uze namushiki mwatesamo mazu enyi. Nyi ngachilihi nge mutu kana kononokele Yehova nakuputuka kulisesembwa namutu uze kazachila Kalungako? Nyi ngachilihi nge mutu kana mwetavila kuzata milimo yize kayeshi kumuhana lwola lwakuzata mulimo wakwambulula chipwe kupwanga kukukunguluka lwola lwosenako? Kaha mutu kana nahono kulama lushiko  luze ashikile Yehova. Echi chinafwane nge ali nakulama jisapi jamunyau uze nahane mukwavo. Omu tweji kulihananga kuli Yehova, tweji kumulwezanga ngwetu, “Tunapu tuvatu jove.” Ngocho, natufwila kulinganga vyuma vize asaka Yehova, numba tuhu etu vavene katweshi nakusaka kuvilingako. Tulondezezenu Yesu uze ambile ngwenyi: “Nguneza kufuma mwilu mangana ngulingenga mwaya muchima wayauze angutumine, keshi nge mwaya muchima wamiko.”—Yowano 6:38.

18, 19. (a) Mazu ahanjikile Rose naChristopher asolola ngachilihi nge lumbapachiso hichuma chachilemu chikuma chize cheji kunehanga kukisula? (b) Lumbapachiso mwalumona ngachilihi?

¹⁸ Chikupu vene, lumbapachiso lwapwa lwalulemu chikuma. Ngocho, chapwa hikutokwa chachinene kuli etu kulihana kuli Yehova nakutumbapachisa. Vakweze vaze vazanga Yehova nakutachikiza mwalumbunukila kulihana, kaveshi kulangisa kulihana kuli ikiye nakuvambapachisako. Kaha nawa kaveshi kuliveya hakulinga vyuma kanako. Mwanapwevo umwe wakumbapachisa walijina lyaRose ambile ngwenyi: “Ngwazanga chikuma Yehova, kaha ngwawahilila hakumuzachila. Ngwatachikiza chikupu ngwami, lumbapachiso lukiko lwalulemu chikuma mukuyoya chami chosena.”

¹⁹ Nyi ngachilihi Christopher uze twavulukanga kumaputukilo achihande chino? Uno eji kwivwanga ngachilihi oholyapwa hakusakula kumumbapachisa omu apwile namyaka yakusemuka 12? Eji kwambanga ngwenyi awahilila chikuma hakusakula kulinga chuma kana. Aputukile kuzata mulimo waupayiniya washimbu yosena omu apwile namyaka yakusemuka 17. Kahomu ahetele myaka yakusemuka 18, vamutongwele kupwa muka-kuzachila muchikungulwilo. Oholyapwa jino ali nakuzachila haMbetele. Ambile ngwenyi: “Lumbapachiso hichuma chakwoloka chize ngwasakwile kulinga. Ngwasuuluka chikuma mukuyoya chami hakuzachila Yehova naliuka lyenyi.” Ngocho vyuma muka mwatela kulinga kachi nge muli nakusaka vamimbapachise? Chihande chinakavangizaho nachikumbulula chihula kanechi.