Enu Vakweze—Munahase Kulizanga Ngachilihi vyaLumbapachiso?
“Ove Kalunga kami, ngwasaka kulinga mwaya muchima wove.”—SAMU 40:8.
MYASO: 51, 58
1, 2. (a) Mwomwo ika lumbapachiso lwapwila lwalulemu chikuma? Lumbununenu. (b) Vyuma muka mutu atela kutachikiza shimbu kanda vamumbapachise, kaha mwomwo ika?
UNO wapwa umukweze uze ali nakufwila kumumbapachisa tahi? Nge mukiko, kaha uli nakufwila kulinga chuma chamwaza chikuma. Nganomu twavulukanga muchihande chinafumuho, lumbapachiso hichuma chachilemu chize chakwata hakuyoya chenu. Lumbapachiso lweji kusololanga nge munalihane kuli Yehova, kulumbununa nge munamushiki ngwenu namumuzachilanga haya myaka yosena, kaha nawa ngwenu kulinga mwaya muchima wenyi chikiko chuma chachilemu chikuma mukuyoya chenu. Hakuwana nge lushiko kanelu munashiki Kalunga lwapwa lwalulemu chikuma, ngocho vatela kumimbapachisa kuvanga kaha nge munazovoloka kushipilitu nakulisakwila enu vavene kulinga ngocho, kaha nawa mwatachikiza mwalumbunukila kulihana kuli Kalunga.
2 Tuyokutuyoku nawa, pamo munamono ngwenu kanda mutengamo kumimbapachisa. Nyi pamo munashinganyeka ngwenu munatemo, oloze visemi jenu ngwavo mwatela kuvandaminako mukole nakutachikiza vyuma vyavivulu mukuyoya chenu. Uno namulinga ngachilihi? Echi kachatela kumihombesako. Oloze mwatela kuzachisa lwola kana muzovoloke washi nakutamo kumimbapachisa. Kushinganyeka havyuma kana nachimikafwa mulinge vyuma vino: (1) mukunyuke havyuma mwetavila, (2) mukekese vilinga vyenu, (3) mupwenga namuchima wakusakwilila.
KUKUNYUKA HAVYUMA MWETAVILA
3, 4. Vakweze vanahase kulinangula ika kuli Chimoteu?
3 Achishinganyekenu omu munahase kukumbulula vihula vino: Mwomwo ika ngwafwelela ngwami Kalunga kwatwama? Mwomwo ika ngwafwelela ngwami Mbimbiliya yafuma kuli Kalunga? Mwomwo ika ngweji kukavangijilanga jishimbi jaKalunga, muchishishisa chakulondezeza vilinga vyakaye? Vihula kanevi navimikafwa mukavangize mazu aze ahanjikile kaposetolo Paulu ngwenyi: “Mangana mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.” (Wavaka-Loma 12:2) Mwomwo ika?
Chimoteu etavilile muchano mwomwo ashinganyekelenga havyuma alinangwilenga, kaha akunyukile
4 Vyuma alingile Chimoteu vinahase kumikafwa. Atachikijile kanawa Visoneka mwomwo naye nakaka yenyi wapwevo vamunangwilevyo. Chipwe ngocho, Paulu alwezele Chimoteu ngwenyi: “Kavangizanga lika vyuma vize walinangwile, vize nawa vakukunywile nakuvitavila.” (WaChimoteu 2, 3:14, 15) Lizu ‘kukunyuka’ lyalumbununa “kwitavila vyuma unamono kupwa vyamuchano.” Ngocho Chimoteu akunyukile ngwenyi muchano watwama muVisoneka. Kaha awitavilile, keshi mwomwo yakumunangula kuli naye nakaka yenyiko, oloze mwomwo ashinganyekelenga havyuma alinangwilenga, kaha akunyukile.—Tangenu Wavaka-Loma 12:1.
5, 6. Mwomwo ika chapwila chachilemu kulinangula mwakuzachishila “uhashi wenu wakushinganyeka” halwola muchili muvakweze?
5 Nyi ngachilihi yenu? Pamo hamyaka yayivulu munatachikiza vyuma yahanjika Mbimbiliya. Nge mukiko, kaha shinganyekenu kanawa havyuma vyamilingisa mwitavile vyuma kana. Echi nachimikafwa muzamise lufwelelo lwenu nakuhona kulinga vyuma vyakuhenga mwomwo yakumishinyinyika kuli vakwenu, chipwe mwomwo yavishinganyeka vyavaka-kaye, navyuma mweji kushinganyekanga.
6 Nge namulinangula mwakuzachishila kanawa “uhashi wenu wakushinganyeka” halwola muchili muvakweze, kaha munahase kukumbulula vihula vize navamihulisa vakwenu vyakufwana nge: ‘Uno wejiva ngachilihi ngwove Kalunga kwatwama chikupu? Kachi nge Kalunga atuzanga, kaha mwomwo ika etavishila vyuma vyavipi visoloke? Uno chikupu Kalunga napungako lika tahi?’ Nge munalizange, kaha vihula kanevi kavyeshi kumilingisa muhuhwasaneko, oloze navimilingisa mulinangule chikuma Mbimbiliya.
7-9. Lumbununenu omu vihande vyahakeyala yetu ya jw.org vinahase kumikafwa mwinjikize vyuma mwafwelela.
7 Chilongesa chahauka nachimikafwa muhase kukumbulula vihula navamihulisa vakwenu, nakuzamisa lufwelelo lwenu, nakumilingisa muhone kuhuhwasana. (Vilinga 17:11) Tukwechi vyuma vyavivulu vize navimikafwa mulinge ngocho. Vatu vavavulu vanazachisanga mbuloshuwa yaThe Origin of Life—Five Questions Worth Asking, namukanda waIs There a Creator Who Cares About You? Kaha nawa vakweze vavavulu vananganyala chikuma nakulivwisa kuwaha vihande vyahakeyala yetu ya jw.org vyakwamba ngwavo, “What Does the Bible Really Teach?” Vihande kana munahase kuviwana haze vavuluka ngwavo BIBLE TEACHINGS. Vavisoneka mujila yize nayimikafwa mufwelele chikuma vihande vyamuMbimbiliya.
8 Hakuwana nge munakulinangulanga Mbimbiliya, tunafwelela ngwetu munatachikiza mwakukumbulwila vihula vimwe vize vili hakeyala yetu ya jw.org. Kutala munenjikiza ngwenu vyuma namukumbulula vyakwoloka tahi? Vyuma vili hakeyala yetu ya jw.org vinahase kumikafwa mushinganyeke kanawa havisoneka vyakulisezaseza nakusoneka ovyo vinamilingisa mwitavile vyuma kana. Chuma kana nachimikafwa mutachikize kanawa mwakukumbulwila vatu navamihulisa vyuma mwafwelela. Nge muli nachinoma chize nachimikafwa mutange vihande vyahakeyala yetu, kaha munahase kuzachisa vyuma kana hachilongesa chenu chahauka mangana muzamise lufwelelo lwenu.
9 Mwatela kutachikiza chikupu ngwenu munalinangula muchano. Echi nachimikafwa mulizange vyalumbapachiso. Mwanapwevo umwe uze apwa ndumbwetu ambile ngwenyi: “Shimbu kanda ngushinganyeke vyakungumbapachisa, ngwalinangwile Mbimbiliya nakutachikiza jino ngwami ngunawane kwitava chamuchano. Kaha hakumbi hakumbi ngweji kuzamisanga lufwelelo lwami muvyuma ngwetavila.”
VILINGA VYENU
10. Mwomwo ika natufwelela ngwetu muka-Kulishitu uze vanambapachisa atela kupwa navilinga vyakulitombola navyuma afwelela?
10 Mbimbiliya yamba ngwayo: “Lufwelelo hauka walwo lwakuzeneka vilinga, lunapu lwakufwa.” (WaYakova 2:17) Nge munakunyuka havyuma munalinangula, kaha vilinga vyenu navisolola vyuma munetavila. Ngocho namupwa ‘natwamiso yajila navilinga vyakuzachila Kalunga,’ ngana muze yahanjika Mbimbiliya.—Tangenu WaPetulu 2, 3:11.
11. Lumbununenu omu yapwa ‘twamiso yajila.’
11 Uno ‘twamiso yajila’ yapwa ika? Nge muli natwamiso yajila, kaha mukwechi vilinga vitoma. Chakutalilaho, achishinganyekenu hatukweji 6 vanahichi kunyima. Omu mwapwile mucheseko, kutala mwashinganyekele kulinga vyuma vyakwoloka nyi vyakuhenga? (WavaHepeleu 5:14) Kutala muli nakwanukako lwola lumwe mwahonesele cheseko tahi? Nge muli kushikola, kutala mweji kuhananga chakutalilaho chamwaza kuli vakwenu tahi? Uno mweji kupwanga vakushishika kuli Yehova tahi, nyi mweji kulondezezanga vakwenu vaka-shikola vakwechi vilinga vyavipi, kuchina navamiseha? (WaPetulu 1, 4:3, 4) Chipwe ngocho, tuvosena katwakupukako. Shimbu jimwe, navaze vanazachilanga Yehova hamyaka yayivulu veji kuhonanga kwambulila vakwavo mwomwo yakwivwa sonyi. Oloze mutu uze alihana kuli Kalunga eji kuwahililanga hakupwa Chinjiho chaYehova, kaha eji kusololanga kuwahilila chenyi hakupwa navilinga vitoma.
12. Uno “vilinga vyakuzachila Kalunga” vyapwa vika, kaha twatela kuvimona ngachilihi?
12 Uno “vilinga vyakuzachila Kalunga” vyapwa vika? Vilinga kana vyapwa vyavivulu, vimwe vyapwa milimo yakuchikungulwilo yakufwana nge kukungulukanga nakuyanga mumulimo wakwambulula. Vilinga vikwavo vyapwa vyuma tweji kulinganga vize kavamona vakwetuko, vyakufwana nge kulomba chahauka nachilongesa chahauka. Mutu uze alihana kuli Yehova katela kumona milimo kaneyi kupwa hichiteliko. Atela kwivwa ngana muze evwile Mwangana Ndavichi uze ambile ngwenyi: “Ove Kalunga kami, ngwasaka kulinga mwaya muchima wove, jishimbi jove jili mumuchima wami.”—Samu 40:8.
Uno hakulomba kuli Yehova, mweji kuvulukanga hatoma vyuma muli nakusaka tahi? Kaha vyuma kana vyasolola nge mwazanga Yehova nyi?
13, 14. Ika nayimikafwa mupwenga “navilinga vyakuzachila Kalunga,” kaha vakweze vamwe vananganyala ngachilihi?
13 Mukanda wakwamba ngwavo, Questions Young People Ask—Answers That Work, Volume 2, hamafwo 308 na 309 hali lipwata lyavihula vize vinahase kumikafwa musakule vyakulinga. Halipwata kana munahase kusonekaho vyuma namukumbulula kuvihula vyakufwana nge: Uno hakulomba kuli Yehova, mweji kuvulukanga hatoma vyuma muli nakusaka tahi? Uno vyuma kana vyasolola nge mwazanga Yehova nyi? Vyuma muka mweji kulinangulanga hachilongesa chenu chahauka? Kutala mweji kuyanga nakwambulula mujimbu wamwaza numba tuhu visemi jenu kavayileko tahi? Halipwata kana hali nawa mahanya aze munahase kusonekamo vyuma vize munakusaka kulinga vyakupandama kukulomba, nakuchilongesa chahauka, nakumulimo wakwambulula.
14 Vakweze vavavulu vaze vanakusaka kuvambapachisa vanahanjikanga ngwavo lipwata kana lyapwa lyalilemu chikuma. Mwanapwevo umwe uze apwa ndumbwetu walijina lyaTilda ambile ngwenyi: “Ngwazachishile lipwata kana hakusakula vyakulinga. Ngwateselemo chikoki chikoki vyuma ngwasakwile, kahomu mwahichile mwaka umwe ngwatelemo jino kungumbapachisa.” Ndumbwetu mukwavo wamukweze Patrick nayikiye anganyalile mujila yoyimwe. Ambile ngwenyi: “Ngwatachikijile vyuma ngwasakwile kulinga, oloze kuvisoneka changukafwile nguvitesemo.”
Kutala namuzachilanga Yehova chipwe nge visemi jenu vanalitwamina nyi? (Talenu palangalafu 15)
15. Lumbununenu ovyo mutu atela kulisakwila yivene kulihana kuli Yehova.
15 Halipwata kana hali nachihula chakwamba ngwavo: “Kutala namuzachilanga Yehova chipwe nge visemi jenu namasepa jenu vanalitwamina nyi?” Nge namulihana kuli Yehova nakumimbapachisa, kaha namupwa nausepa wamwaza naYehova. Shikaho, kuzachila Yehova kachatela kupendamina hali visemi jenu chipwe hali kala mutuko. Twamiso yenu yajila navilinga vyenu vyakuzachila Kalunga vyeji kusololanga nge mwakunyuka ngwenu mukwechi muchano nakufwila kukavangiza jishimbi jaKalunga. Nge namulinga vyuma kanevi, kaha namutamo jino kumimbapachisa.
MUCHIMA WENU WAKUSAKWILILA
16, 17. (a) Vyuma muka vyatela kulingisa mutu apwenga muka-Kulishitu? (b) Uno tunahase kulumbununa ngachilihi muchima wakusakwilila handando yakusokola?
16 Likumbi limwe, mutu uze atachikijile chikuma Jishimbi jaMose ahulishile Yesu ngwenyi: “Lushimbi muka lwapwa lwalulemu?” Yesu amukumbulwile ngwenyi: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.” (Mateu 22:35-37) Yesu alumbunwine ngwenyi kuzanga Yehova chikiko chatela kulingisa mutu vamumbapachise nakupwa jino muka-Kulishitu. Jila yimwe nayimikafwa mutwaleho lika kuzanga Yehova shina kuhunanana handando yakusokola yize yapwa wana uze Kalunga ahana vatu. (Tangenu Wavaka-Kolinde 2, 5:14, 15; WaYowano 1, 4:9, 19.) Nge namulinga ngocho, kaha namusolola ngwenu mwasakwilila hakumihana wana kanou.
17 Tunahase kulumbununa muchima wenu wakusakwilila handando yakusokola mujila yino: Achishinganyekenu munakulondomana hameya, kaha mutu umwe himweza nakumiyovola. Kutala munahase kuliyila kwimbo lyenu nakuvulyama mutu uze namiyovola tahi? Nduma. Namusakwililanga mutu uze namiyovola mukuyoya chenu chosena. Chochimwe nawa, nayetu twatela kusakwililanga Yehova naYesu handando yakusokola. Chikupu vene, natuvazachilanga mukuyoya chetu chosena. Vatuyovola kushili nakukufwa. Zangi yavo hali etu yatulingisa tupwenga nalutalililo lwakukayoya hano hamavu muPalachise haya myaka yosena.
18, 19. (a) Mwomwo ika kamwatela kwivwa woma kulihana kuli Yehovako? (b) Mujila muka kuzachila Yehova chinahase kulingisa kuyoya chenu chipwenga chamwaza?
18 Kutala mwasakwilila Yehova havyuma amilingila tahi? Nge mukiko, kaha mwatela kulihana kuli Kalunga nakumimbapachisa. Kulihana chenu chapwa kumushika Kalunga ngwenu namulinganga mwaya muchima wenyi haya myaka yosena. Uno mwatela kwivwa woma kushika Kalunga vyuma kanevi tahi? Nduma. Yehova atachikiza vyuma vyamwaza mwasaka, kaha mwakahana fweto vaze veji kulinganga mwaya muchima wenyi. (WavaHepeleu 11:6) Nge namulihana kuli Kalunga nakumimbapachisa, kaha kuyoya chenu kacheshi kupwa chamokomokoko, oloze nachipwa chamwaza. Ndumbwetu umwe walunga wamyaka yakusemuka 24, uze vambapachishile achili kanyike ambile ngwenyi, “Nge ngwakoleleko chindende halwola vangumbapachishile, kachi ngwevwishishile kanawa vyuma ngwalinangwilenga, chipwe ngocho kusakula kulihana kuli Yehova halwola kana changukafwile ngulihende kukufwila vyuma vyamukaye.”
Satana apwa walifwi, kaha nawa kamizakamako
19 Yehova atachikiza vyuma vyamwaza vize mwasaka. Oloze, Satana apwa walifwi, kaha nawa kamizakamako. Keshi kuhasa kumihana vyuma vyamwazako nge namumukavangiza. Uno Satana nahase kumihana ngachilihi vyuma vyamwaza, okunyi ikiye katwama navyoko? Katwama namujimbu wamwazako, kaha nawa katwama nalutalililoko. Satana atalilila kukanonga, ngocho asaka nayenu mukanongele hamwe naikiye.—Kusoloka 20:10.
20. Vyuma muka atela kulinga mukweze mangana azovoloke nakuheta haseteko yakulihana kuli Kalunga nakumumbapachisa? (Talenu nawa lipwata lyakwamba ngwavo, “Vyuma Navimikafwa Muzovoloke.”)
20 Kulihana kuli Yehova chikiko chuma chachilemu chikuma chize mwatela kusakula. Kutala munalizange kulinga ngocho tahi? Nge mukiko, kaha kamwatela kwivwa womako. Oloze nge munamono ngwenu kanda mutengamo, kaha zachisenu vyuma tunashimutwila muchihande chino mangana vimikafwe muzovoloke kushipilitu. Paulu alwezele vandumbwenyi muFwilipi vatwaleho lika kuzovoloka. (Wavaka-Fwilipi 3:16) Nge namukavangiza vyuma kanevi, kaha kamweshi kulangisa kulihana kuli Yehova nakumimbapachisako.
